Пӱртӱс деч толшо эҥгек лийме годым Иегован Таныкше-влак шке иза-влаклан вигак полшаш тыршат. Тыге ме икте-весынам уло кумыл дене йӧратымым ончыктена (Иоаннын 13:34, 35; 1 Иоаннын 3:17, 18). Тиде полыш шке радамже дене ышталтеш. Кузе ме полшена?

Окса надырым ыштена. Икымше курымышто Иудейыште кугу шужымаш лийме годым Антиохийыште илыше-влак христианысе иза-шольышт-влаклан окса дене полшеныт (Апост. пашашт 11:27—30). Тачат иктаж-могай элыште иза-влакын нелылыкышт нерген пален налмеке, ме нунылан верысе погынымаш гоч окса надырым колтена (2 Коринфян-влаклан 8:13—15).

Практический полышым пуэна. Эҥгек лийме верлаште, кажне иза-акан чыла сай мо пален налашлан, кугурак иза-влак нуным муаш тыршат. Полыш комитет кочкыш ден вӱдым да вургемым шеледа, тыгак илыме вер да медицинский полыш шотышто тырша. Мастарлыкышт уло гын, иза-влак Вашлиймаш залым да иза-ака-влакын пӧртыштым ачалаш полшаш доброволец семын толыт. Молан кӧра ме эҥгекыш логалше иза-влаклан вашке полшен кертына? Пырля пашам ыштымаште мемнан кугу опытна да иктылык уло. Эн ончыч ме «иза-шольо ден ака-шӱжар лийше-влаклан» полшаш тыршена. Но йӧн лекме годым ме моло-влакланат полшаш ямде улына. Нуно мемнан семын Юмылан огыт ӱшане гынат, тидым ыштена (Галат-влаклан 6:10).

Нелылыкыш логалше-влакым лыпландарена. Эҥгекыш логалше-влакым лыпландараш кӱлеш. Тидым ышташ мыланна Иегован вийже полша, вет тудо «чыла лыпландарымашын Юмыжо» (2 Коринфян-влаклан 1:3, 4). Библийыште возымо Юмын сӧрымашыже нерген ме нунылан уло кумылын каласкалена. Юмын Кугыжанышыже ойгым кондышо чыла нелылыкым вашке кораҥда манын, нуным ӱшандарена (Почмаш 21:4).

• Иегован Таныкше-влак пӱртӱс деч толшо эҥгек лиймеке молан кӧра вигак полшаш тӱҥалыт?

• Библийым кучылтын, эҥгекыш логалше-влакым кузе лыпландарена?