Чӱчкыдын аза шочмаш вате-марийлан иканаште куаным да тургыжланымашым конда. Азам ончымаш шуко жап ден вийым налеш манын, нунылан вучыдымын лийын кертеш. Самырык ача-авалан шагалрак малаш да шукырак у сомылым ышташ логалеш, садлан коклаштышт умылыдымаш лектын кертеш. Азам ончымо годым тыланда икте-весе нергенат мондыман огыл. Чылажымат шукташлан тыланда ынде у семын илаш тунемман. Библийысе каҥаш-влак у нелылыкым сеҥен лекташ кузе полшен кертыт?

МОМ БИБЛИЙ ОЙЛА. «Йӧратымаш кужун чытыше да поро». Тыгак йӧратымаш «шкаланже пайдам ок кычал, ок шыдешке» (1 Коринфян-влаклан 13:4, 5). Аза верч тургыжланымаш самырык аван чыла вийжым налеш манын, ӧрман огыл. Марийже ынде шонен кертеш, пуйто тудын нерген йӧршеш монденыт. Садлан ватылан шарныман: марийжыланат икмыняр вниманийым ойыраш кӱлеш. Чытымашым да порылыкым ончыктен, вате марийжылан умылаш полша: азам ончымаште тудат кугу полышым пуа да ешыжлан тудо чот кӱлешан.

«Пӧръеҥ-влак, вийдыме улмыштым чаманен, ватыда дене шот дене илыза» (1 Петрын 3:7). Марийлан шарнаш кӱлеш: ватыжын уло вийжым аза ончымаш налеш. У сомыл-влаклан кӧра тудо чот ноя да тургыжлана, эсогыл тудын депрессият лийын кертеш. Южгунам марийжылан шыдыжат лектын кертеш. Туге гынат марийже чытымашым ончыктышаш. Вет «чытыше еҥ виян деч сайрак» (Притчи 16:32). Умылымашым ончыктен, ватылан полшаш тыршыза (Притчи 14:29).

ПАЙДАЛЕ КАҤАШ-ВЛАК

• Ача-влак. Ватыланда азам ончаш полшыза, йӱдымат тидым ышташ тыршыза. Моло пашам кораҥден, вате ден йочалан шукырак жапым ойырыза

• Ава-влак. Марий йочам ончымаште полышым темла гын, тудым уло кумылын налза. Тудо иктаж-мом йоҥылыш ышта гын, ида сыре да тудым ида шылтале. Олмешыже порын ончыктыза, кузе сайрак ышташ лиеш

МОМ БИБЛИЙ ОЙЛА. «Нуно коктын ик кап... лийыт» (Тӱҥалтыш 2:24). Ида мондо: аза шочмо дене те коктын тыгакак ик кап улыда. Коклаштыда кылым пеҥгыдемдашлан уло вийым пыштыза.

Вате-влак, марийдан полшымыжлан тауштыше лийза. Тендан тауштыме мутда вийым пуэн кертеш (Притчи 12:18). Марий-влак, шке ватыдам йӧратеда да акледа манын ӱшандарыза. Еш верч тыршымыжым ужын, тудым моктыза (Притчи 31:10, 28).

«Тек нигӧ шкаланже пайдам ок кычал, а весылан кычалже» (1 Коринфян-влаклан 10:24). Пелашланда мо сайрак, тудым ышташ тыршыза. Пырля лияш жапым ойырыза, мутланыза, икте-весыдам колыштса да моктыза. Интимный кыл кучымаш шотышто шке нерген гына огыл, тыгак пелашдан кӱлешлыкше нерген шоныза. Библийыште каласыме: «Икте-весе деч ида кораҥ. Пырля мутланен келшен... икмыняр жаплан веле кораҥаш лиеш» (1 Коринфян-влаклан 7:3—5). Сандене тиде йодыш нерген чон почын мутланыза. Чытымаш ден умылымашым ончыкташ тыршеда гын, тендан кокласе кыл пеҥгыдемеш.

ПАЙДАЛЕ КАҤАШ-ВЛАК

• Коктын пырля лияш жапым ойыраш ида мондо

• Ваш-ваш вниманийым ончыкташ тыршыза. Мутлан, открыткым колтыза, СМС-ым возыза але изирак пӧлекым ыштыза. Тыге, пелашдам йӧратеда манын ончыктеда

МОМ БИБЛИЙ ОЙЛА. «Тый Святой Возымашым йоча годсек шинчет. Тудо Христос Иисуслан ӱшаныме дене утаралташ тыланет ушым пуэн кертеш» (2 Тимофейлан 3:15). Кузе йочадам туныкташ да кушташ тӱҥалыда манын, ончылгоч шонкалыза. Йоча пеш вашке тунемеш, эше шочмыж деч ончыч. Мӱшкырыштӧ улмыж годымак тудо ача-аван йӱкыштым пала да шижмашыштым умылен кертеш. Шочмекшак, тудлан лудаш тыршыза. Лудмыдам огеш умыло гынат, кугу лиймекше, тиде тудлан лудмашым йӧраташ полша.

Юмо нерген йочалан изинек каласкалыза. Иеговалан кумалмыдам тек тудо колеш (Второзаконие 11:19). Тудын дене модмыда годымат Юмын ыштымыже нерген каласкалыза (Псалом 77:3, 4). Тыге, кушмо годым икшывыда Иеговам йӧратымыдам ужеш да шкежат тудым йӧраташ тунемеш.

ПАЙДАЛЕ КАҤАШ-ВЛАК

• Йочам кушташ уш-акылда лийже манын кумалза

• Кӱлешан мут ден чын туныктымашым йочалан уэш-пачаш ойлен шогыза. Тыге тудо изинек тунемаш тӱҥалеш