Тиде брошюр гыч те пален налында: Библийыште шуко сай принцип уло. Нуно тыланда да ешланда пайдам веле кондат. Иегова тыланда пиалан илышым тылана. Илышыштыда тудлан служымаш икымше верыште лиеш гын, «тунам чыла тиде [илышлан мо кӱлеш] тыланда пырля пуалтеш» манын, Юмо сӧра (Матфейын 6:33). Иегова лишыл йолташда лийнеже. Тудын дене келшымаш кылым пеҥгыдемдаш манын, чыла йӧным кучылтса. Айдемылан Юмын йолташыже лияш — эн кугу чап (Матфейын 22:37, 38).

МОМ БИБЛИЙ ОЙЛА. «„Тыланда Ача лиям, а те Мыйын эргым да ӱдырем-влак лийыда“, — ойла чыла кучен Ашныше Господь» (2 Коринфян-влаклан 6:18). Иегова тендам тудын лишыл йолташыже лияш ӱжеш. Кумалтыш мут Юмо дек лишемаш полша. Иегова ойла: «Чарныде кумалза» (1 Фессалоникысе-влаклан 5:17). Чон тургыжланымаш да кӧргысӧ шонымаш нерген почын ойлымыдам колышташ тудо эре ямде (Филиппысе-влаклан 4:6). Еш дене пырля кумалыда гын, мӧҥгысыда-влак Иегова дене лишыл улмыдам ужыт.

Кумалын ойлымаш гына огеш сите, тыгак колышташ кӱлеш, мом Юмо ойла. Библийым да Библий дене негызлалтше публикаций-влакым шымлен, те Юмым колыштын кертыда (Псалом 1:1, 2). Пален налмыда нерген шонкалыза (Псалом 76:12, 13). Тыгак христиан вашлиймашыш коштмыда денат Юмым колыштмыдам ончыктеда (Псалом 121:1—4).

Иегова нерген весе-влаклан ойледа гын, тидат тудын дене кыл кучымашдам пеҥгыдемдаш полша. Мыняр чӱчкыдын тидым ыштеда, тынар Иегова дек лишемыда (Матфейын 28:19, 20).

ПАЙДАЛЕ КАҤАШ-ВЛАК

• Библийым лудаш да кумалаш кажне кечын жапым ойырыза

• Ешыштыда икымше верыште духовный паша лийже манын тыршыза, вара иже канымаш да веселан жапым эртарымаш лийшаш

МОМ БИБЛИЙ ОЙЛА. «Юмо деке лишемза, тунам Тудат тендан деке лишемеш» (Иаковын 4:8). Еш дене Библийым шымлаш графикым ыштыза да тудым шуктен шогыза (Тӱҥалтыш 18:19). Но тиде гына огеш сите. Илышыштыда Юмо эре лийшаш. Ешыштыда чылаштын Юмо дене пеҥгыде кыл кучымашышт лийже манын, тиде возымаш почеш ыштыза: «Таче пуымо кӱштымашем-влак шӱмыштыда лийшаш улыт. Йочада-влаклан нуным ушештарен шогыза да нунын нерген корныштат, мӧҥгыштат, кунам кынелыда, кунам возыда, эре ойлыза» (Второзаконие 6:6, 7). Иисус Навин сай примерым ончыктен, тудо каласен: «Мый да ешем Иеговалан служитлымым ойырен налына» (Иисус Навин 24:15).

ПАЙДАЛЕ КАҤАШ

• Еш дене шымлымашым кузе эртараш тӱҥалыда, ончылгоч шоналтыза. Тыгодым ешыште кажныжын кӱлешлыкшым шотыш налза