Дали Бог те гледа?

ДАЛИ Јехова, Врвниот Творец, може да гледа? Се разбира дека може! Библијата го дава јасниот заклучок: „Зар не може да види оној што го обликувал окото?“ (Псалм 94:9). Јехова може да види далеку, далеку повеќе од кој и да е човек. Тој не само што гледа какви сме однадвор туку и „ги испитува срцата“ и „ги проценува“ (Изреки 17:3; 21:2). Тоа значи дека тој може да процени што размислуваме и кои ни се мотивите и најскриените желби.

Јехова е свесен за проблемите низ кои минуваме во животот, и одговара на нашите молби. Псалмистот напишал: „Очите на Јехова ги гледаат праведниците и ушите негови го слушаат нивниот повик за помош. Јехова е близу до оние што се скршени во срцето и ги спасува оние со скршен дух“ (Псалм 34:15, 18). Навистина е утешно сознанието дека Јехова сфаќа во каква ситуација се наоѓаме и дека ги исполнува нашите сесрдни молитви!

Јехова Бог ги знае и работите што се прават во најголема тајност. Без сомнение, „сѐ е голо и откриено пред очите на оној кому ние мораме да му поднесеме сметка“ (Евреите 4:13). Според тоа, Бог ги забележува сите наши дела, било добри било лоши (Изреки 15:3). На пример, во 1. Мојсеева 6:8, 9 се вели дека ‚Ное нашол милост во очите на Јехова‘ и дека тој ‚одел со вистинскиот Бог‘. Јехова бил задоволен од Ное и го благословил поради тоа што му бил послушен и живеел според Неговите праведни мерила (1. Мојсеева 6:22). За разлика од него, другите луѓе во тоа време биле насилни и расипани. Бог не бил слеп, гледал што се случува. Тој видел ‚дека лошотијата на човекот на земјата била голема и дека сите мисли на неговото срце биле секогаш насочени само кон зло‘. На крајот, Јехова ги уништил злите, а им го зачувал животот на Ное и на неговото семејство (1. Мојсеева 6:5; 7:23).

Дали Јехова ќе биде задоволен од тебе? Тој и сега „ја пребарува со своите очи целата земја за да ја покаже својата сила штитејќи ги оние што му се оддадени со цело срце“ (2. Летописи 16:9). Затоа, наскоро уште еднаш ќе ги отстрани од Земјата сите зли и ќе ги избави оние што се кротки во срцето (Псалм 37:10, 11).