ദൈവത്തെ അറിയുന്നതുകൊണ്ടുള്ള പ്രയോജനം എന്താണ്?
ദൈവം ആരാണ് എന്ന ചോദ്യത്തിന് ഉത്തരം കണ്ടുപിടിക്കാൻ സഹായിക്കുന്ന ചില കാര്യങ്ങൾ നമ്മൾ ഇതിനോടകം പരിശോധിച്ചു. ദൈവത്തിന്റെ പേര് യഹോവ എന്നാണെന്നും ദൈവത്തിന്റെ പ്രമുഖഗുണം സ്നേഹമാണെന്നും നമ്മൾ ബൈബിളിൽനിന്ന് മനസ്സിലാക്കി. മനുഷ്യരുടെ പ്രയോജനത്തിനുവേണ്ടി ദൈവം ഇതുവരെ എന്തൊക്കെ ചെയ്തിട്ടുണ്ടെന്നും ഇനി എന്തു ചെയ്യുമെന്നും നമ്മൾ ചർച്ച ചെയ്തു. ദൈവത്തെക്കുറിച്ച് ഇനിയും കുറെ പഠിക്കാനുണ്ടെങ്കിലും അതുകൊണ്ട് നിങ്ങൾക്കുള്ള പ്രയോജനം എന്താണെന്ന് ഒരുപക്ഷേ നിങ്ങൾ ചിന്തിച്ചേക്കാം.
“ദൈവത്തെ അന്വേഷിച്ചാൽ ദൈവത്തെ കണ്ടെത്തും” എന്ന് യഹോവ ഉറപ്പു തരുന്നു. (1 ദിനവൃത്താന്തം 28:9) യഹോവയുമായുള്ള ‘ഉറ്റ സ്നേഹബന്ധമാണ്’ ദൈവത്തെ അന്വേഷിച്ച് കണ്ടെത്തിയാൽ ലഭിക്കുന്ന അമൂല്യമായ സമ്മാനം. (സങ്കീർത്തനം 25:14) ഈ സ്നേഹബന്ധംകൊണ്ടുള്ള പ്രയോജനം എന്താണ്?
യഥാർഥസന്തോഷം. “സന്തോഷമുള്ള ദൈവം” എന്നാണ് യഹോവയെ വിശേഷിപ്പിക്കുന്നത്. (1 തിമൊഥെയൊസ് 1:11) ദൈവത്തോട് അടുക്കുകയും ദൈവത്തെ അനുകരിക്കുകയും ചെയ്യുമ്പോൾ നമുക്ക് യഥാർഥസന്തോഷം ലഭിക്കും. അതു വൈകാരികമായും മാനസികമായും ശാരീരികമായും നമുക്കു ഗുണം ചെയ്യും. (സങ്കീർത്തനം 33:12) അടുക്കും ചിട്ടയും ഇല്ലാത്ത ജീവിതരീതി ഒഴിവാക്കിയും നല്ല ആരോഗ്യശീലങ്ങൾ വളർത്തിക്കൊണ്ടും മറ്റുള്ളവരുമായി നല്ല ബന്ധങ്ങൾ കാത്തുസൂക്ഷിച്ചുകൊണ്ടും നിങ്ങൾക്ക് ഒരു സന്തോഷമുള്ള ജീവിതം നയിക്കാനും കഴിയും. സങ്കീർത്തനക്കാരന്റെ ഈ വാക്കുകളോടു നിങ്ങളും യോജിക്കും: “ഞാൻ ദൈവത്തോട് അടുത്ത് ചെല്ലും; അതല്ലോ എനിക്കു നല്ലത്.”—സങ്കീർത്തനം 73:28.
വ്യക്തിപരമായ ശ്രദ്ധയും കരുതലും. “നിന്റെ മേൽ കണ്ണുനട്ട് ഞാൻ നിന്നെ ഉപദേശിക്കും” എന്ന് യഹോവ തന്റെ ദാസർക്ക് ഉറപ്പു കൊടുത്തിരിക്കുന്നു. (സങ്കീർത്തനം 32:8) ഇതിന് അർഥം ദൈവം തന്റെ ഓരോ ദാസരെയും ശ്രദ്ധിക്കുകയും അവർക്ക് ഓരോരുത്തർക്കും വേണ്ടതു കരുതുകയും ചെയ്യും എന്നാണ്. (സങ്കീർത്തനം 139:1, 2) യഹോവയുമായി ഒരു അടുത്ത ബന്ധം വളർത്തിയെടുത്താൽ എപ്പോഴും നിങ്ങളോടൊപ്പം യഹോവയുണ്ട് എന്ന കാര്യം നിങ്ങൾ മനസ്സിലാക്കും.
മഹത്തായ ഭാവി. ഇപ്പോൾത്തന്നെ സന്തോഷവും സംതൃപ്തിയും നിറഞ്ഞ ജീവിതം നയിക്കുന്നതിനുള്ള വഴി പറഞ്ഞുതരുന്നതോടൊപ്പം നിങ്ങൾക്കു മഹത്തായ ഒരു ഭാവിയും യഹോവ വാഗ്ദാനം ചെയ്യുന്നു. (യശയ്യ 48:17, 18) ബൈബിൾ പറയുന്നു: “ഏകസത്യദൈവമായ അങ്ങയെയും അങ്ങ് അയച്ച യേശുക്രിസ്തുവിനെയും അവർ അറിയുന്നതാണു നിത്യജീവൻ.” (യോഹന്നാൻ 17:3) ഇന്നത്തെ പ്രക്ഷുബ്ധമായ ജീവിതസാഹചര്യങ്ങളിൽപ്പോലും ഉറപ്പോടെ നിൽക്കാൻ സഹായിക്കുന്ന നങ്കൂരംപോലെയാണ് ദൈവം തരുന്ന പ്രത്യാശ.—എബ്രായർ 6:19.
ദൈവത്തെ മെച്ചമായി അറിയേണ്ടതിന്റെയും ദൈവവുമായി വ്യക്തിപരമായ ഒരു ബന്ധം വളർത്തിയെടുക്കേണ്ടതിന്റെയും പ്രധാനകാരണങ്ങളിൽ ചിലതു മാത്രമാണ് ഇവ. കൂടുതൽ വിവരങ്ങൾക്കായി യഹോവയുടെ സാക്ഷികളിൽ ഒരാളുമായി സംസാരിക്കുന്നതിനോ ഞങ്ങളുടെ വെബ്സൈറ്റ് ആയ jw.org സന്ദർശിക്കുന്നതിനോ നിങ്ങളെ ക്ഷണിക്കുന്നു.