«Нүдийг нүдээр» гэсэн тушаал нь эртний Израйлд Мосегоор дамжуулан өгсөн Бурхны хуульд байдаг. Үүнийг Есүс «Уулан дээр айлдсан сургаалдаа» эш татсан (Матай 5:38; Египетээс гарсан нь 21:24, 25; Дэд хууль 19:21). Энэ нь гэмт хэрэгтний хийсэн үйлдэлд тохирсон ял оноохыг хэлдэг. a

 Бусдад санаатайгаар хохирол учруулсан гэмт хэргийг энэ зарчмын дагуу шийддэг байжээ. Мосегийн хуульд «Хугаралтыг хугаралтаар, нүдийг нүдээр, шүдийг шүдээр, хүнийг гэмтээсэн дагуу нь түүнд мөн түүнчлэн учрах болой» гэсэн заалт бий (Левит 24:20).

•  «Нүдийг нүдээр» гэсэн тушаал ямар зорилготой байсан бэ?

•  «Нүдийг нүдээр» гэсэн тушаал Христийн дагалдагчдад хамаатай юу?

•  «Нүдийг нүдээр» гэсэн тушаалын талаарх буруу ойлголтууд

•  Есүс буруу ойлголтыг залруулсан нь

 Энэ тушаал нь өш хонзон авахыг хөхиүлэн дэмждэггүй. Харин шударга шийдвэр гаргах буюу хэт хүнд эсвэл хэт хөнгөн ял оноохгүй байхад нь шүүгчдэд туслах зорилготой байв.

 Түүнчлэн бусдад санаатайгаар хохирол учруулах юм уу ийм хэрэг төлөвлөхөөс сэргийлдэг байсан. Мосегийн хуульд «Тэгвэл [Бурхны шударга ёсыг баримталдаг] бусад хүмүүс сонсоод айж, та нарын дунд дахин хэзээ ч ийм бузар муу үйл үйлдэгдэхгүй болно» гэжээ (Дэд хууль 19:20).

 Үгүй. Христийн дагалдагчдад хамаагүй. Энэ нь Мосегийн хуулийн нэг хэсэг байсан. Есүс амиа золиосолсноор Мосегийн хууль хүчингүй болсон билээ (Ром 10:4).

 Гэсэн хэдий ч энэ тушаал нь Бурхны үзэл бодлыг мэдэж авахад тустай. Жишээлбэл, Бурхан шударга ёсыг эрхэмлэдэг (Дуулал 89:14). Мөн шударга хэм хэмжээ тогтоосон. Өөрөөр хэлбэл, хэрэгтэнг «шударгаар» шийтгэх ёстой (Иеремиа 30:11).

 Буруу ойлголт: «Нүдийг нүдээр» гэсэн тушаал нь өшөө авахыг хөхиүлэн дэмждэг.

 Үнэндээ бол: Мосегийн хуульд «Чи өөрийн ард олны хөвгүүдийн эсрэг өс хонзонг бүү ав, аливаа зэвүүцлийг ч бүү хадгал» гэж байдаг (Левит 19:18). Энэ хууль нь өшөө авахыг хөхиүлэн дэмждэггүй, харин Бурханд болон Бурхны тогтоосон хуулийн тогтолцоонд найдахыг уриалдаг байсан (Дэд хууль 32:35).