Согтууруулах ундааг тохируулан хэрэглэх нь буруу биш. Дарс бол Бурхны өгсөн бэлэг бөгөөд амьдралыг илүү баяр баясгалантай болгодог гэж Библид байдаг (Дуулал 104:14, 15; Номлогчийн үгс 3:13; 9:7). Бас эрүүл мэндэд тустайг Библид бичсэн байдаг (1 Тимот 5:23).

 Есүс дэлхий дээр амьдарч байхдаа дарс уусан удаатай (Матай 26:29; Лук 7:34). Есүсийн үйлдсэн гайхамшгуудын нэг нь, хуримын зоог дээр усыг дарс болгон хувиргасан явдал юм (Ёохан 2:1–10).

Хэтрүүлж уухын хор уршиг

 Библид дарсыг сайнаар бичсэн байдаг ч хэтрүүлж юм уу согттолоо уухыг буруушаадаг. Тиймээс Христийн дагалдагч хүн согтууруулах ундааг тохируулж уух нь хамгийн чухал (1 Тимот 3:8; Тит 2:2, 3). Согтууруулах ундаа хэтрүүлэн хэрэглэхээс зайлсхийх ёстойн учрыг Библид ингэж бичжээ.

•   Хэтрүүлэн хэрэглэвэл сэтгэн бодох юм уу шийдвэр гаргах чадвараа алдана (Сургаалт үгс 23:29–35). Согтсон хүн «Бурханд тааламжтай, амьд, ариун тахил болгон биеэ өргө» гэсэн Библийн зарчмыг ажил хэрэг болгож чадахгүй (Ром 12:1).

•   Хэтрүүлэн уувал айж ичихээ больж «дураараа дургих аюултай» (Хосеа 4:11; Эфэс 5:18).

•   Мөнгө төгрөгөө үрж, эрүүл мэндээрээ хохирно (Сургаалт үгс 23:21, 31, 32).

•   Хэтрүүлж юм уу согттолоо уух нь Бурханд таалагддаггүй (Сургаалт үгс 23:20; Галат 5:19–21).

Хэр их уухыг хэтрүүлсэн гэж үзэх вэ?

 Согтууруулах ундаа хэтрүүлж уусан хүн өөртөө эсвэл өрөөл бусдад гай тарьдаг. Библийнхээр бол, ямар хүнийг согтсон гэх вэ? Тасарч унасан хүнийг л хэлдэг юм биш. Харин тэнцвэрээ алдах, гуйвж дайвах, үг нь олшрох, үг хэл нь орооцолдох гэх мэт шинж тэмдэг илэрвэл согтсон гэж үздэг (Иов 12:25; Дуулал 107:27; Сургаалт үгс 23:29, 30, 33). Согттолоо уудаггүй хүн ч хэтрүүлж уувал «зөв бодох чадвараа» алдаж горыг нь амсдаг (Лук 21:34, 35).

Огт хэрэглэхгүй байх

 Христийн дагалдагчид ямар үед согтууруулах ундаа хэрэглэж болохгүйг Библид тодорхой хэлдэг.

•   Согтууруулах ундаа хэрэглэснээс болоод бусад хүн Бурхнаас хөндийрөх аюултай бол (Ром 14:21).

•   Улсынхаа хуулийг зөрчиж байгаа бол (Ром 13:1).

•   Согтууруулах ундаанд донтдог бол. Архинд донтсон юм уу согтууруулах ундааг өөр байдлаар хэтрүүлж хэрэглэдэг бол шийдэмгий арга хэмжээ авах ёстой (Матай 5:29, 30).