কনাগুম্বা মীওই অমনা মহাক্না ঈশ্বর থাজরিবা অদুদা করিগুম্বদা খম থেংনা চাংয়েং লাক্লবা মতমদা অমদি মহাক্না হায়বা ইঞ্জনা চৎচরিবদুনা কান্নবা অমত্তা পুরক্লোইদৌবা ওইরবদি মহাক্না ঈশ্বরবু থাজরিবা অদুদা চেৎনা লৈবা ঙমগদ্রা? মদুগী ৱাহং অদু যোবকী মতাংদা হংখি, অমসুং পাওখুম পীখি।

ইস্রায়েল মচাশিংনা ইজিপ্তা লৈরিঙৈদা যোব কৌবা অব্রাহামগী মরি মতা অমা ঙসি অরাবিয়া হায়না খংনবা মফমদুদা লৈরম্মী। মরক অসিদা স্বর্গদা লৈবা দুতশিংনা ঈশ্বরগী মমাংদা পুনখি অমসুং মদুদা ঈশ্বরগী মাইয়োক্তা লৈবা সৈতান অদুসু মখোয়গী মরক্তা য়াওরম্মী। স্বর্গগী অদুগুম্বা মীফম অদুগী মমাংদা যেহোবানা মহাক্কী মপু নীংবা মনাই যোবকী মথক্তা থাজবা ফোংদোক্লম্মী। তশেংবমক্তি যোবকুম্না লমচৎকী নিয়ম-নিতি ঙাক্না চৎপা মী অমত্তা লৈতে হায়না যেহোবানা হায়রম্মী। তৌইগুম্বশুং সৈতান্নদি যোবনা ঈশ্বরবু সেবা তৌরিবদু ঈশ্বরনা যোবপু থৌজান্বিদুনা ঙাক শেন্বিবা অদুগীদমক্তনি হায়রম্মী। যোবনা লৈজরিবা পুম্নমক্তু লোইনমক লৌথোকপিরবদি মহাক্না ঈশ্বরবু শাপ তৌরক্কনি হায়না সৈতান্না হায়রম্মী।

ঈশ্বরনা সৈতান্বু অহান্বদা যোবকী লন থুম, মচা-মশুসিং অমসুং মহাক্কী পুক্নিং হকচাংগী ফিভমদা অমাঙবা পুরক্নবা অয়াবা পীবিখি। মঙোন্দা ওইরক্লিবা ফিভম পুম্নমক অসিদা সৈতানগী করি থৌদাং য়াওরিবগে হায়বদু খংলমদবা মরম্না মহাক্না করিগীদমক চাংয়েংশিং অসি থেংননবগী ঈশ্বরনা অয়াবা পীরম্লিবনো হায়বদু যোবনা ভাব তারমদে। অদু ওইরবফাওবদা যোবনা কৈদৌঙৈদা ঈশ্বরগী মাইয়োক্তা লেপখিদে।

শাশিন্নবা মরুপ অহুমখক যোবতা লাক্লম্মী। যোবকী লাইরিক্তা ভাষন ময়াম অমা য়াওই মদুদা হায়রিবা মীশিং অসিনা যোবনা অরোন্বা পাপ তৌরুবগীদমক মহাকপু ঈশ্বরনা দন্দি পীরিবনি হায়দুনা যোবতা লান্না থাজহন্নবা হোৎনরম্মী। মখোয়না অসিফাওবা হায়রম্মী মদুদি ঈশ্বরনা কৈদৌঙৈদা মহাক্কী মনাইশিংগী মরম্না হরাওজবা লৈরমদে অমসুং মখোয়দা থাজবা থম্লমদে। যোবনা মখোয়গী অরান্বা ৱাখনলোন অদু লৌরমদে। থাজবগা লোইননা মহাক্না শিদ্রিফাওবদা মহাক্কী লমচৎকী নিয়ম-নিতি ঙাক্না চৎকনি হায়না যোবনা হায়রম্মী।

তৌইগুম্বশুং যোবনা অশোইবা অমা তৌরম্মী। মহাক্না কা হেঞ্জিন্না মহাক মরাল চেন্নদে হায়বদু উৎনবা হোৎনরম্মী। ঙাংনরিবা পুম্নমক্তু তাশিল্লগা লৈরম্বা এলীহু কৌবা নহা অদু ৱা ঙাংথোক্লক্লম্মী। যেহোবা ঈশ্বরগী পুঙম ঙমজবা অদু কনখৎপনা কনাগুম্বা মীওই অমবু কনখৎপদগী হেন্না মরু ওই হায়বদু যোবনা খংদ্রে হায়দুনা এলীহুনা যোবপু মরাল শীরম্মী। এলীহুনা যোবকী শাশিন্নবা মরুপশিং অদুবুসু অকন্বা ৱাহৈনা চৈরম্মী।

মহাক্কী ৱাখনলোন অদু চুমথোকপিরদুনা যেহোবা ঈশ্বরনা যোবতা ৱা ঙাংলক্লম্মী। খুৎশেমগী অঙকপ কয়াদা থিল্লগা যোবতা ঈশ্বরগী মপাল নাইদনা চাওবা অদুগা য়েংনরুবা মতমদা মীওইবসি কয়ামুক পিকপগে হায়বগী পারা অদু যেহোবানা যোবতা তম্বীরম্মী। যোবনা নোল্লুকচনা ঈশ্বরনা চুমথোকপিবা অদু লৌজরম্মী। যেহোবাদি “য়াম্না নুংশিহৈবা অমসুং চানবিহৈবনি।” (যাকোব ৫:১১) মরম অদুনা যেহোবানা যোবকী পুক্নিং হকচাংগী ফিভম হান্নগুম্না অমুক হঞ্জিনবিরম্মী। মহাক্কী মাংখ্রবা লনশিং অদুশু অদুগুম্বা শরুক অনি হঞ্জিনবিরম্মী অমসুং মচা তরাশু পীবিরম্মী। অকন্বা চাংয়েং থেংনরিঙৈ মনুংদা যেহোবাদা চেৎনা লমচৎকী নিয়ম-নিতি ঙাক্না চৎলুবনা যোবনা সৈতান্না শিংনরম্বা মদুদি মীওইবনা চাংয়েং লাকপা মতমদা ঈশ্বরগীদা থাজবা য়ানা লৈবা ঙমলোই হায়বদুগী মতাংদা মায় পাক্না পাউখুম পীখি।

​—যোবকী লাইরিক্তা য়ুম্ফম ওইবা