Ayo. Biiblã pa yet tɩ ligdã yaa bõn-wẽng ye. A pa yet me tɩ ligdã n wat ne bõn-wẽns buudã fãa ye. Nebã wae n yetame tɩ “ligdã yaa bõn-wẽns buud fãa yẽgre,” la Biiblã pa yet woto kɛpɩ ye. B sẽn yet woto wã, b tudgda nebã. Sɩd-sɩda, Biiblã yetame tɩ “ligdã nonglem yaa bõn-wẽns buud fãa yẽgre.”—1 Tɩmote 6:10.

•  Bõe la Biiblã yet ligdã wɛɛngẽ?

•  Bõe yĩng tɩ Biiblã yeel tɩ d gũus ne ligdã nonglem?

•  Wãn to la sagls nins Biiblã sẽn kõt ligdã wɛɛngẽ wã tõe n naf tõndo?

•  Biiblã vɛrse-rãmb sẽn gomd ligdã yelle

 Biiblã wilgda vẽeneg tɩ d sã n zã ligdã ne yam, a tõe n talla yõodo. Pʋd n tõe n ‘kogla’ tõndo. (Koɛɛg soaba 7:12) Biiblã pʋgẽ me, b pẽgda neb nins sẽn kõt b taabã ligd wall bũmb a taabã.—Yel-bũnã 11:25.

 La Biiblã keoogda tõnd tɩ d gũus tɩ ligdã baoob ra wa lebg bũmb ning sẽn pak tõnd n tɩ yɩɩd ye. Biiblã yetame yaa: “Bɩ y yel-manesmã wilg tɩ y pa neb sẽn nong ligdi, la y kɩtdẽ tɩ bũmb nins y sẽn tarã sekd-yã.” (Ebre-rãmbã 13:5) Woto wilgdame tɩ d segd n zãa d ligdã sõma, la d ra baood arzɛgs ye. D segd n modgdame tɩ bũmb nins sẽn yaa tɩlɛ wã sekd tõndo. Wala makre, rɩɩbo, futu, la gãag zĩiga.—1 Tɩmote 6:8.

 Yão-be-nebã pa na n paam vɩɩm sẽn kõn sa wã ye. (Efɛɛz rãmbã 5:5) Bõe yĩnga? Pipi, yão-beedã ne bõn-naands pʋʋsg wall ziri tũudmã yaa yembre. (Kolos rãmbã 3:5) Yiibu, yaa tɩ naoor wʋsgo, yão-be-nebã kɩɩsda Wẽnnaam noyã sẽn na yɩl n paam b sẽn datã. Yel-bũn 28:20 yetame tɩ “sẽn yãgd-a n dat n lebg arzɛk soab pa na n pa n ka tall taal ye.” Ned a woto tõe n sakame meng n tʋm tʋʋm-beedo. Wala makre, wẽgbo, fãabo, belgre, zãmbo, yõk ned n dat t’a nebã wa yao n deeg-a, la nin-kʋʋre.

 Baa ligdã nonglem sã n pa kɩt t’a soabã bɩɩs zʋg-wẽnga, tõe n waa ne zu-loees a taaba. Biiblã yetame tɩ “neb nins sẽn dat n lebg rakãag-rãmb ne b sũy fãa wã lʋɩta makr pʋgẽ, bẽdg la ratem wʋsg pʋgẽ sẽn yaa yalemd la sẽn sãamd bãmba.”—1 Tɩmote 6:9.

 D sã n pa maand bũmb nins d sẽn mi tɩ kisame, la tɩ pa tat Wẽnnaam yamã sẽn na yɩl n paam ligdi, d na n nanda d menga. D na n taa Wẽnnaam yam, la d paamdẽ me t’a sõngd tõndo. Wẽnnaam pʋlma ned ning fãa sẽn modgd ne a sũur fãa n na n ta a yamã yaa: “Mam pa na n loog n bas foom a bada, la m pa na n tol n daag-f n bas ye.” (Ebre-rãmbã 13:5, 6) A yeelame me tɩ “sẽn maand-a sɩd na n paama bark wʋsgo.”—Yel-bũnã 28:20.