Tõod sebre 19:1-21
19 “Yãmb Wẽnnaam a Zeova sã n wa sãam buud nins yãmb Wẽnnaam a Zeova sẽn na n dɩk b soolmã n kõ yãmbã, tɩ y soog soolmã n be b tẽnsẽ wã la b zagsẽ wã,+
2 yãmb segd n yãka tẽns a tãab soolem ning yãmb Wẽnnaam a Zeova sẽn na n kõ-y tɩ y soogã pʋgẽ.+
3 Yãmb segd n welga soolem ning yãmb Wẽnnaam a Zeova sẽn na n kõ yãmb tɩ y soogã zĩis a tãabo, n maneg soayã tɩ ned ning fãa sẽn kʋ a to tõe n zoe n kẽng tẽn-kãens a yembr pʋgẽ.
4 “Ned sã n kʋ a to n zoe n kẽng be n na n põsg a yõore, ad bũmb ning yãmb sẽn segd n maan rẽ wɛɛngẽ: A sã n wẽ a to wã ne yĩdgu, la a ra pa kis-a,+
5 wala makre, yẽ ne a to wã sã n tũ taab n kẽng weoogẽ n na n tɩ bao raado, t’a zẽk a larã n na n kɛ tɩɩga, tɩ larã baag n wẽ a to wã t’a ki, a segd n zoe n kẽnga tẽn-kãens a yembr pʋgẽ, n põsg a yõore.+
6 Sã n pa rẽ, ned ning sẽn dokd sẽn ki-a wã sũurã*+ sũ-puugrã sẽn yaa kãsengã,* a tõe n diga ned ning sẽn kʋ a to wã, n tɩ paam-a n kʋ, tẽngã sẽn zãr wʋsgã yĩnga. A yaool n da pa segd ne kũum ye. Bala a ra pa kis a to wã ye.+
7 Rẽ n so tɩ mam yet yãmb yaa: ‘Yãk-y tẽns a tãabo.’
8 “Yãmb Wẽnnaam a Zeova sã n yalg yãmb soolmã wa a sẽn da pʋlem y yaab-rãmbã,+ la a kõ yãmb soolmã fãa wa a sẽn da pʋlem t’a na n kõo y yaab-rãmbã,+
9 (La yaa y sã n kell n sak no-kãensã fãa mam sẽn taasd yãmb rũndã wã, n nong yãmb Wẽnnaam a Zeova la y tũ a soayã wakat fãa.)+ dẽ, yãmb na n yãka tẽns a tãab n paase.+
10 Woto, b pa na n daag bʋʋm soab zɩɩm+ soolem ning yãmb Wẽnnaam a Zeova sẽn na n kõ yãmb tɩ yɩ y pʋɩɩrã pʋgẽ ye. Zɩɩm taal me pa na n zĩnd yãmb zug ye.+
11 “La ned sã n kis a to+ n da gũud n na n zab ne-a, n wa wẽ-a* t’a ki, la a zoe n kẽng tẽn-kãensã a yembr pʋgẽ,
12 tẽngã kãsem-dãmb segd n kɩtame tɩ b tɩ tall-a n wa kõ ned ning sẽn dokd sẽn ki-a wã sũurã.* A segda ne kũum.+
13 Yãmb pa segd n zoe a nimbãaneg ye. Yãmb segd n yiisa bʋʋm soab zɩɩm taal Israyɛlle,+ sẽn na yɩl tɩ bũmb fãa yɩ sõma ne-yã.
14 “Yãmb sã n wa reeg y pʋɩɩrã tẽng ning yãmb Wẽnnaam a Zeova sẽn na n kõ yãmb tɩ y soogã pʋgẽ, yãmb pa segd n serg y yak toadg bãnde,+ zĩig ning y yaab-rãmbã sẽn ning todsã ye.
15 “Nin-yend kaset yĩng pa segd n kɩt tɩ b ning ned taal a sẽn kong wall a sẽn maan yel-wẽnd yĩng ye.+ Bũmb fãa segd n yɩɩ vẽeneg ne neb a yiib bɩ a tãab kaseto.*+
16 Kaset soab sẽn tar yam-wẽng sã n dõd neda, n yeel t’a beegame,+
17 neb a yiibã sẽn tar yell ne taabã na n yaasa a Zeova taoore, ne maan-kʋʋdbã la bʋ-kaoodb nins sẽn tʋmd wakat kãngã taoore.+
18 Bʋ-kaoodbã na n vaeesa yellã sõma n gese.+ Sã n mik tɩ kaset soabã sẽn yetã pa sɩda, la t’a rõda a saam-biigã,
19 yãmb segd n maan-a-la bũmb ning a sẽn da magd n na n maan a saam-biigã.+ Yãmb segd n yiisa bũmb ning fãa sẽn yaa wẽng yãmb sʋka.+
20 Neb a taabã na n wʋmame n yɛɛse. La b kõn tol n le maan bõn-wẽng a woto yãmb sʋk ye.+
21 Yãmb pa segd n zoe a nimbãaneg ye.+ Na n yɩɩ vɩɩm vɩɩm yĩnga,* nifr nifr yĩnga, yẽnd yẽnd yĩnga, nug nug yĩnga, naoor naoor yĩnga.+
Vẽnegr toor-toore
^ Bɩ, “zɩɩmã sũ-roakdã.”
^ Ebre, “sũurã sẽn wɩngã yĩnga.”
^ Bɩ, “wẽ a sɩɩgã.”
^ Bɩ, “zɩɩmã sũ-roakdã.”
^ Ebre, “noore.”
^ Bɩ, “sɩɩg sɩɩg yĩnga.”
