Yɩɩn-sõamyã sebre 42:1-11
Yɩɩlã taoor soab yĩnga. A Koore+ kom-dibli wã Maskɩlle.*
42 Mam Wẽnnaam, mam data* yãmb ne m sũur fãa,wa walg sẽn dat kʋɩlg koom ne a sũur fãa to-to wã.
2 Wẽnnaam ko-yũud n sɩd tar maam.* Wẽnnaam ning sẽn vɩ wã ko-yũud n tar maam.+
Dabʋr la mam na n wa yals Wẽnnaam taoore?+
3 Wĩndg la yʋngo, mam nintãmã n lebg m dɩɩbo.Daarã tõre, nebã yaanda maam n sokdẽ: “Fo Wẽnnaamã bee yɛ?”+
4 Mam tẽega bõn-kãens yelle, n togs yãmb bũmb nins sẽn be m sũurẽ wã.Bala pĩnda, mam da naagda neb kʋʋng n kẽnda.Mam da wae n lʋɩta b taoor n kẽnd maasg-maasga,* n dabd Wẽnnaam doogẽ wãne kɩdeng la bark pʋʋsg rãamde.Yaa rãamd ning kʋʋngã sẽn maand tigr yĩngã.+
5 Bõe yĩng tɩ mam* sũurã sãam wʋsg woto?+
Bõe yĩng tɩ mam maand yɩɩr a woto fãa?
Gũ Wẽnnaam,+bala mam na n le pẽg-a lame, a sẽn yaa mam Fãagd sẽn yaa kãsengã yĩnga.+
6 Mam Wẽnnaam, mam* sũurã sãama wʋsgo.+
Yaa rẽ yĩng la mam sẽn tẽeg yãmb yell+Zʋrdẽ soolmẽ wã, Hɛrmo tãensã zutne Mizaar tãngẽ wã.*
7 Ko-zulums boonda ko-zulumsi,yãmb koomã sẽn dʋʋgdã rãamd maasem yĩnga.
Yãmb ko-pɛmã sẽn tar pãngã fãa lima maam.+
8 Wĩndga, a Zeova na n wilga maam a maan-neerã.La yʋngo, mam na n yɩɩla a yɩɩlle: Yaa Wẽnnaam ning sẽn kõ maam vɩɩmã pʋʋsgo.+
9 Mam na n soka Wẽnnaam sẽn yaa mam pĩigã yaa:
“Bõe yĩng tɩ yãmb yĩm mam yelle?+
Bõe yĩng tɩ mam na n kẽnd ne sũ-sãanga, mam bɛyã sẽn weoogd maamã yĩnga?”+
10 Mam bɛɛbã yaanda maam ne beem wʋsgo.*Daarã tõre, b yaanda maam n sokdẽ: “Fo Wẽnnaamã bee yɛ?”+
11 Bõe yĩng tɩ mam* sũurã sãam wʋsg woto?
Bõe yĩng tɩ mam maand yɩɩr a woto fãa?
Gũ Wẽnnaam,+bala mam na n le pẽg-a lame, a sẽn yaa mam Fãagd sẽn yaa kãseng la m Wẽnnaamã yĩnga.+
Vẽnegr toor-toore
^ Ges-y gom-biis võor bilgrã zĩigẽ.
^ Bɩ, “mam sɩɩgã rata.”
^ Bɩ, “mam sɩɩgã.”
^ Bɩ, “ne waoogre.”
^ Bɩ, “mam sɩɩgã.”
^ Bɩ, “mam sɩɩgã.”
^ Bɩ, “tãn-bilẽ wã.”
^ Pa rẽ bɩ, “tɩ yaa wa b wãada mam kõabã.”
^ Bɩ, “mam sɩɩgã.”
