Yel-bũnã sebre 30:1-33
30 Ad a Yake biig a Agʋʋr koees sẽn tar yõod wʋsgo, a sẽn taas a Itiyɛll ne a Ukalle:
2 Mam yaa zɩt n yɩɩd ned buud fãa.+Mam pa tar bãngr ning ninsaal sẽn segd n paamã ye.
3 Mam pa zãms yam ye.Mam pa tar Sẽn yaa-a sõng n yɩɩdã bãngr ye.
4 Ãnda n dʋ saasẽ n lebg n sigi?+
Ãnda n tigs sobgã a nug-pʋs a yiibã pʋsẽ?
Ãnda n pil ko-rãmbã ne a fuugu?+
Ãnda n lugl* tẽngã kɩremsã fãa?+
Yẽ soabã yʋʋr la a bõe, t’a biigã me yʋʋr la a bõe? Fo sã n miẽ bɩ f togs-ma.
5 Wẽnnaam gomd fãa yaa yɩlemde.*+
A yaa gãongo, neb nins sẽn soonded a nengẽ wã yĩnga.+
6 Ra paas baa fʋɩ a goamã pʋgẽ ye.+Sã n pa rẽ, a na n demsa foo,la na n yɩɩ vẽeneg tɩ fo yaa zirẽ-be-neda.
7 Mam Wẽnnaam, bũmb a yiib la mam kot yãmba.
Ra mong-y maam bõn-kãens hal n tãag m kũum ye.
8 Kɩt-y tɩ sẽn pa sɩda, la zirẽ-beed zãag ne maam.+
Ra n kɩt-y tɩ m yɩ naong soab wall arzɛk soab me ye.
Bɩ y bas tɩ m dɩ rɩɩb ning sẽn yaa m pʋɩɩrã bala,+
9 sẽn na yɩl tɩ m da wa tɩge, n kɩɩs yãmb n sok yaa: “A Zeova yaa ãnda?”+
Ra bas-y me tɩ m lebg naong soab n wa zu, tɩ paoog m Wẽnnaamã yʋʋr ye.
10 Ra kãneg tʋm-tʋmd ne a zu-soab ye.Sã n pa rẽ, a na n kãaba foo wẽnga, la fo na n paama taale.+
11 Neb* n be n kãabd b ba-rãmb wẽnga,la b pa ningd b ma-rãmb bark me ye.+
12 Neb n be n yaa yɩlem b mens nifẽ,+la b pa paam tɩ b yɩlg-b n yiis b rẽgdã ye.*
13 Neb n be n tar nin sẽn get ne tɩtaam,la nin sẽn get ne wuk-m-meng wʋsgo.+
14 Neb n be tɩ b yẽnã yaa wa sʋʋse,tɩ b yɛyã yaa wa sʋʋs sẽn tar n kootẽ.B rɩta tẽngã nimbãan-nebã,la naong rãmbã sẽn be ninsaalbã sʋkã.+
15 Rendeed* tara kom-pugli a yiib sẽn kelemd n yetẽ: “Kõ-ma! Kõ-ma!”
Bũmb a tãab n be n pa tɩgd ye.A naas n pa tol n yetẽ yaa: “Sekame!”
16 Yaa Yaoogã,*+ pag sẽn yaa kiri,tẽng sẽn pa tar koom,la bugum sẽn pa tol n yetẽ tɩ “sekame” wã.
17 Ned sã n yaand a ba la a pa sakd a ma,+gãabd nins sẽn be longẽ* wã n na n feo a ninã.Sɩl-bi wã n na n dɩ-ba.+
18 Bũmb a tãab n be n yɩɩd mam sẽn tõe n wʋm b võore.*A naas n be mam sẽn pa wʋmd b võore:
19 Yaa sɩlg sẽn tũud sor ning saasẽ,waaf sẽn tũud sor ning pĩig kugr zugu,koom-koglg sẽn tũud sor ning mogr zugu,la rao manesem sẽn yaa to-to pʋg-sad nengẽ wã.
20 Ad pʋg-yoodr manesem sẽn yaa to-to:
A rɩtame la a yẽes a noorã.Rẽ poore, a yetame: “Mam pa maan bũmb sẽn yaa wẽng ye.”+
21 Bũmb a tãab n be n kɩtdẽ tɩ tẽngã rigimdidẽ.A naas la a pa tõe n sak n deege:
22 Yaa yamb sẽn na n lebg rĩm n dɩt naam,+yalem sẽn na n dɩ rɩɩb n tɩge,
23 pʋg-sad b sẽn kis* sẽn na n paam sɩda,la tʋm-tʋmd-poak sẽn na n deeg* a zu-soben-poak zĩiga.+
24 Bũmb a naas n be tẽngã zug n yaa kɩds wʋsgo,n yaool n dogd ne yam:*+
25 Yaa gũyã. B pa bõn-vɩɩs sẽn tar pãnga,*la b segenda b rɩɩb sɩpaolgo.*+
26 Sɛy+ me pa bõn-vɩɩs sẽn tar pãng ye.*La b tuuda b bogd pĩisẽ.+
27 Sʋyã+ pa tar dĩma,la b kẽnda sull-sulli.+
28 Kõsenkõog+ tabendeda bũmb fãa ne a naoã,la a kẽed na-yiri.
29 Bũmb a tãab n be tɩ b kẽnã be rasãnde.A naas n be tɩ b sã n kẽnd bɩ b gesg be rasãnde:
30 Yaa gɩgemd sẽn yaa rũng ning sẽn tar pãng n yɩɩdã,la sẽn pa tard n lebd poorẽ ned baa a yembr taoorã,+
31 baag b sẽn tar n kẽnd tãoosgo, boɛɛga,la rĩm sẽn kẽnd ne a tãb-biisi.
32 Fo sã n maana yalemd n zẽk f menga,+wall f magd n na n maana rẽ,bɩ f rɩk f nugã n pĩ f noorã.+
33 Bala f sã n maan tɩ ned sũur puugi wata ne zaba,wa f sẽn na n pãb bĩisim tɩ bĩis-kaam yi,la wa f sẽn na n wẽoog yõor tɩ zɩɩm yi wã.+
Vẽnegr toor-toore
^ Ebre, “zẽk.”
^ Bɩ, “yɩlga ne bugum.”
^ Ebre, “Zãmaan.”
^ Ebre, “bĩndã ye.”
^ Yaa bũmb sẽn wõnd bɛdeng n be koomẽ.
^ Ges-y gom-biis võor bilgrã zĩigẽ.
^ Bɩ, “kosoogẽ.”
^ Bɩ, “sẽn yaa yel-solemd wʋsg ne maam.”
^ Bɩ, “b sẽn pa nong.”
^ Bɩ, “ledg.”
^ Bɩ, “tar yam wʋsgo.”
^ Bɩ, “tʋʋlg wakate.”
^ Ebre, “Yaa buud sẽn ka pãnga.”
^ Ebre, “yaa buud sẽn ka pãng ye.”
