Ezayi sebre 30:1-33
30 A Zeova yeelame yaa: “Toog na paam kom-kãensã sẽn pa wʋmd tʋbrã.+Bãmb pidsda b mens magbo, pa mam dẽndã ye.+B maanda kaool toɛy-toɛy sẽn pa zems ne m daabã,*n maand yel-wẽn n paasd b yel-wẽn a taabã.
2 Bãmb dabda Ezɩpt+ n pa sok maam,+n na n tɩ solg a Farawõ nengẽ n paam koglgo,la b solg Ezɩpt maasmẽ wã!
3 La a Farawõ koglgã na n yɩɩ yãmb yãnde,tɩ y sẽn solg Ezɩpt maasmẽ wã yɩ yãmb paoogre.+
4 Bala a nanambsã bee Zowan,+la a koe-taasdbã taa Hanɛs.
5 B fãa na n paama yãnde,Ezɩpt nebã sẽn yaa buud sẽn pa tõe n naf nedã yĩnga.B pa tõe n sõng ned wall b naf-a ye.Yaa yãnd la paoogr bal la b wat ne.”+
6 Ad bʋ-kaoor koɛɛg goabg we-rũmsã wɛɛngẽ:
Bãmb pɩʋʋgda namsg la toog soolmã.Yaa gɩgemdã soolmẽ, gɩgemd ning sẽn kelemdã soolmẽ,la põeerã ne wag-bɛɛg meng-meng sẽn kɛɛd ne tʋʋlmã* soolmẽ.Bãmb zɩlga bõens ne arzɛgse,la b zɩlg yʋgma ne rɩɩbo,
la bõn-kãensã fãa pa na n naf nin-buiidã ye.
7 Ezɩpt sõngrã ka neng baa bilf ye.+
Rẽ n so tɩ mam bool-a t’a Rahaab+ sẽn zĩ n pa maand bũmbu.
8 “Masã, kẽng n gʋls koɛɛgã walg zug bãmb taoore,la f gʋls-a sebr pʋgẽ,+tɩ beoog-daarbɩ a yɩ kaset wakat fãa yĩnga.+
9 Bala bãmb yaa nin-buiid sẽn yaa tõatba,+ kamb sẽn yagd ziri,+la sẽn pa rat n kelg a Zeova tõogã.*+
10 Bãmb yeta gɛtbã yaa: ‘Ra n yã-y bũmb ye.’
La b yet bãngdbã* yaa: ‘Ra n togs-y tõnd vẽnegr sẽn yaa sɩd ye.+
Togs-y tõnd gom-noodo,* la y paam vẽnegr sẽn yaa belgre.+
11 Bʋdg-y n bas-y sorã, bas-y so-bukã n kẽ moogo.
Ra n le gom-y Israyɛll Sõng soabã yell ne tõnd ye.’”+
12 Dẽ wã, ad Israyɛll Sõng soabã sẽn yeele:
“Yãmb sẽn bas mam goamã+n tẽ ziri la zãmbo,la y teeg bõn-kãensã,+
13 tudg-kãngã na n yɩɩ yãmb yĩng wa lalg sẽn pusgi,la wa lal-zãonglg sẽn kɩll n dat n lʋɩ.
A na n sirga zĩig pʋgẽ, nif kamsg pʋgẽ.
14 A na n wãa wa yʋ-bedre.A na n wãa zõg-zõg tɩ pɛɛg baa a ye pa kellsẽn sek bug-saal yãkr bug-toaalgẽ,wall koom toogr bakẽ ye.”*
15 Bala Zu-soab sẽn ka to a Zeova sẽn yaa Israyɛll Sõng soabã yeelame yaa:
“Yaa yãmb sẽn na n lebg n wa mam nengẽ la y zĩnd sɩɩ, la y na n paam fãagre.Yaa y sã n kell n pa sɩɩ la y teeg maam, la y na n paam pãnga.”+
La yãmb pa tʋlg rẽ ye.+
16 Yãmb yeelame yaa: “Ayo. Tõnd na n zomba wed-moos n zoe!”
Sɩd me, y na n zoeeme.
Yãmb leb n yeelame yaa: “Tõnd na n zomba wed-moos sẽn tʋʋl n zoe!”+
Woto yĩnga, neb nins sẽn digd yãmbã me na n zoee ne tʋʋlem.+
17 Nin-yend na n bugsa yãmb neb tusr tɩ b rig rabeem,+la neb a nu na n bugsa yãmb tɩ y zoe,hal tɩ yãmb neb nins sẽn na n kellã lebg wa ra-luk sẽn be tãng zugu,la wa tãb-kaoor sẽn be kunkubr zugu.+
18 La a Zeova maaga a yĩng n gũud n dat n maan yãmb neere.+A na n maana bũmbu, a na n zoee yãmb nimbãanega.+
Bala a Zeova yaa tɩrlem Wẽnnaam.+
Sũ-noog rãmb la neb nins fãa sẽn ket n gũud-a wã.*+
19 Bas f yam tɩ nin-buiidã sã n le wa be Siyõ, Zerizalɛm pʋgẽ,+ fo pa na n le yãb ye.+ Fo sã n wa kelem n bool-a, a na n zoee fo nimbãanega. A sã n wʋm fo kɛlenga, a na n leoka foo zĩig pʋgẽ.+
20 Yaa sɩd t’a Zeova na n kõo yãmb sũ-sãang tɩ yɩ y rɩɩbo, la namsg tɩ yɩ yãmb koom.+ La yãmb Karen-saam-kãsengã pa na n le solg a meng ye. Y nin na n yãa y Karen-saam-kãsengã.+
21 Yãmb sã n wa rat n bʋdg goabg wall rɩtgo,+ y tʋbã na n wʋma koɛɛg y poorẽ wã sẽn yete: “Ad sorã.+ Tũ-y-yã-a!”
22 Yãmb na n dẽgma y bõn-naandsã b sẽn pees n bolg ne wanzuri wã la b rãmb nins b sẽn dõog n bolg ne sãnemã.+ Yãmb na n lob-b-la kɛɛng wa kʋɩdg pag pekr sẽn dẽgme, n yeel yaa: “Menem-y-yã!”*+
23 A na n kõo yãmb saag y bõn-buudã y sẽn bʋdã yĩnga,+ la koodã tẽngã sẽn na n womã na n yɩɩ wʋsgo, la sõma.*+ Wakat kãnga, yãmb rũmsã na n wãba yamd zĩ-yalemsẽ.+
24 La niisã ne bõensã sẽn kood pʋtã na n wãba yamd sẽn kalem ne bɩto, la b sẽn yelg ne pell la kaorgo.
25 Tẽn-kũumã raare, wakat ning gasdã sẽn na n lʋɩ wã, kʋɩls la ko-zoetem na n zĩnda tãn-lug-lug fãa zugu, la kunkubr sẽn zãnt fãa zugu.+
26 Daar ning a Zeova sẽn na n sẽb a nin-buiidã kaoondã,+ la a maag sãmpoag nins a sẽn da pãb-b tɩ b pogl hal wʋsgã,+ ki-pɛɛl vẽenem na n lebga wa wĩntoog vẽenem, tɩ wĩntoogã vẽenem pãng paas naoor a yopoe+ wa rasem a yopoe vẽenem.
27 Ade! A Zeova* yita zĩ-zãrgẽ n watne sũ-puugr sẽn yaa kãsenga, n zao sawad-tagdo.
A no-bɩmsã pida ne sũ-yikri,t’a zɩlemdã yaa wa bugum sẽn dɩte.+
28 A vʋʋsmã yaa wa kʋɩlg sẽn pid n puugi, n limd n tat koakoaya,n na n go nin-buiidã ne sãoong goaadga,la a na n gaag buud toɛy-toɛyã yɛy ne salbr+ sẽn na n kẽes-b moogo.
29 La yãmb yɩɩllã na n yɩɩ wa yɩɩll ning b sẽn yɩɩnd ne yʋngo,wakat ning yãmb sẽn segend y mens* tigr yĩngã,+n kɩdemd sũ-noog wa ned sẽn zãad wɩɩg*n dabd a Zeova sẽn yaa Israyɛll Pĩig kugrã+ tãngẽ wã.
30 A Zeova na n kɩtame tɩ b wʋm a koɛɛgã sẽn tar ziirã.+La a na n wilga a kangã+ sẽn na n wẽ ne sũ-pu-kãsengã,+ne bug-witim sẽn dɩte,+la ne sa-kẽenga,+ sa-tãs la sa-pɩlma.+
31 A Zeova koɛɛgã rãamd yĩnga, rabeem wʋsg na n yõka Asiiri.+A na n wẽ-a-la ne dasaare.+
32 Wakat ning fãa a Zeova sẽn na n wẽ Asiiri nebã ne a sɩbgr dasaarã,na n naaga ne bembend* la pends rãamde,+wakat ning a sẽn na n zẽk a kang n zab ne-bã.+
33 Bala a segla Asiiri Tofɛtã*+ n sa.A segl-a-la rĩmã yĩng me.+
A maana a ra-killã zĩig zulung la yalenga,n pids-a ne bugum la raad wʋsgo.
A Zeova vʋʋsmã sẽn yaa wa kidbr kʋɩlgãna n ning-a-la bugum.
Vẽnegr toor-toore
^ Ebre, “sɩɩgã.”
^ Ebre, “waaf sẽn yɩgd t’a zẽnemã zabd wa bugmã.”
^ Bɩ, “zãmsgã.”
^ Bɩ, “goam sẽn yaa belgre.”
^ Yaa neb sẽn taasd b taab bũmb nins Wẽnnaam sẽn vẽneg-b tɩ b yã.
^ Pa rẽ bɩ, “bulgẽ ye.”
^ Bɩ, “n gũud-a ne b sũur fãa wã.”
^ Pa rẽ bɩ, “la y bool-b tɩ rẽgdo.”
^ Ebre, “la b tall kaam wʋsgo.”
^ Ebre, “A Zeova yʋʋrã.”
^ Bɩ, “yɩlgd y mens n yɩ sõamyã.”
^ Bɩ, “kelgd wɩɩg rãamd.”
^ Yaa bũmb sẽn wõnd gãngaoogo, tɩ b zãad ne nug n pãbda.
^ Ka, “Tofɛtã” pa yõogr zĩig sɩd-sɩd ye. A makda sãoongo.
