1, 2. a) D sã n modg n nong a Zeova n paasdẽ, bõe yĩng tɩ d tẽebã me na n paasdẽ? b) Sogs-bʋs la d na n leoke?

TÕND nonga a Zeova, a sẽn “deng n nong tõndã yĩnga.” (1 Zã 4:19) A sẽn nong tõndã, a pʋlmame t’a na n ninga neb nins sẽn na n kell n maan sɩd ne yẽ wã barka. D sã n modg n nong a Zeova n paasdẽ, d tẽebã pãng me na n paasdame, tɩ d maneg n kɩs sɩd t’a na n keoo neb nins a sẽn nongã.—Karm-y Ebre-rãmb 11:6.

² A Zeova pa tõe n pa keo neb nins sẽn na n kell n maan sɩd ne-a wã ye. D sã n pa kɩs sɩd tɩ Wẽnnaam keooda neb nins sẽn baood yẽ ne pʋ-peelmã, d pa tõe n yeel tɩ d tẽed-a-la ne d sũur fãa ye. Bala, “tẽeb yaa pɛl-kɛgeng ned sẽn tar ne bũmb nins a sẽn tẽed t’a na paamame.” (Ebre. 11:1) Ned pa tõe n yet t’a tẽedame, n yaool n pa gũud Wẽnnaam sẽn pʋlem bũmb ninsã pidsg ye. D sẽn kɩs sɩd t’a Zeova na n keo-d lame wã, wãn to la sõngd tõndo? Bõe la a Zeova maan n keo neb sẽn tũ-a pĩnd wẽndẽ, la neb sẽn tũud-a rũndã-rũndã? D na n leoka sogs-kãensã.

3. Bõe la a Zeova pʋlem Malasɩ 3:10 pʋgẽ?

³ A Zeova getame tɩ yaa tɩlɛ t’a keo neb nins sẽn na n kell n  maan sɩd ne yẽ wã. A yeta tõnd tɩ d maan d sẽn tõe fãa, la d kɩs sɩd t’a na n keo-d lame. Ad a sẽn yeele: “Mak-y maam woto n ges mam sã n ka na n pak saag t’a ni-yã. La m kõ yãmb bark wʋsg tɩ sek-yã.” (Mal. 3:10) D sã n sɩd sak n mak-a wa a sẽn yeelã, wilgdame tɩ d sẽn paam t’a pʋlem t’a na n keo-d lame wã noom-d-la wʋsgo.

4. Bõe n kɩt tɩ d kɩs sɩd t’a Zeezi gomd ning sẽn be Matye 6:33 wã yaa sɩda?

⁴ A Zeezi yeela a karen-biisã tɩ b sã n deng n bao Wẽnnaam Rĩungã, Wẽnnaam na n gesame tɩ b paam sẽn ketã. (Karm-y Matye 6:33.) A Zeezi yeela woto ne bas-yardo, bala, a kɩsa sɩd tɩ Wẽnnaam pidsda a pʋleng fãa. (Eza. 55:11) Dẽnd tõnd me tõe n kɩsa sɩd tɩ d sã n teeg a Zeova zãng-zãnga, a na n maana wa a sẽn yeelã. A yeelame: “Mam kõn bas yãmba, wall m mong yãmb abada ye.” (Ebre. 13:5, Wẽnnaam Sebre, 1983) A Zeova sẽn pʋlem woto wã kɩtame tɩ d kɩs sɩd ne a Zeezi sẽn yeel tɩ be Matye 6:33 wã.

5. Bõe yĩng t’a Zeezi sẽn yeel a Pɩyɛɛrã kengd d fãa raoodo?

⁵ Daar a ye, tʋm-tʋmd a Pɩyɛɛr soka a Zeezi yaa: “Tõnd basa bũmb fãa n tũud yãmba, tõnd yell na n yɩɩ a wãn-wãna?” (Mat. 19:27) A Zeezi pa zab a Pɩyɛɛr a sẽn sok woto wã ye. A pʋd n leokame, n yeel tɩ b na n paama keoor b sẽn sak n mong b mens bũmb wʋsgã. Tʋm-tʋmdbã la kiris-neb a taab na n wa tɩ rɩɩ naam ne a Zeezi saasẽ. La a Zeezi yeelame tɩ nand meng tɩ b kẽng saasẽ wã, b na n paama bark ka tɛka. A yeelame: “Ned ning fãa sẽn na n bas a yiri, a ba-bi-raopa, a ba-bi-pogse, a ba, a ma, a paga, a kamba wall a pʋʋg  mam yʋʋrã yĩnga, a na n paama bũmb nins a sẽn basã buud naoor koabga, la a paam vɩɩm sẽn kõn sɛ wã.” (Mat. 19:29) Neb nins sẽn tũud a Zeezi wã na n paama barka, hal tɩ zʋʋg bũmb nins b sẽn sak n mong b mensã. Sɩd me, d tigimsã pʋsẽ, d paama ba-rãmba, ma-rãmba, ba-biis pagb la rapa, la kamba. Woto yaa bark sẽn zʋʋg bũmb nins fãa d sẽn sak n bõn Wẽnnaam Rĩungã yĩngã.

6. Bõe yĩng t’a Zeova pʋlem t’a na n keoo sẽn tũud-b yẽ wã?

⁶ Bark ka tɛkã d sẽn zoe n paamd masã wã sẽn yãk b toogo, d miime tɩ bark ning d sẽn na n paam beoog-daarã n yɩɩde. (1 Tɩm. 4:8) A Zeova sẽn sõng-d tɩ d bãng rẽ wã, kõta tõnd raoodo, tɩ yell ning sã n wa rat n sãam d tẽebã bɩ d tõog toogo. Sɩd-sɩdã, d sẽn kɩs sɩd t’a Zeova ‘ronda neb nins sẽn baood yẽ wã,’ sõngdame tɩ d tall tẽeb kãn-kãe.—Ebre. 11:6.

7. Bõe yĩng tɩ b mak tõnd tẽebã ne “baar sẽn vigl kãenkãe”?

⁷ A Zeezi sẽn wa n sõsd ne nebã tãngã zugã, a yeel-b lame: “Maan-y sũ-noog n kɩdme, yãmb keoor sẽn na n yɩ kãseng arzãn pʋgẽ wã yĩnga. Bala, b rag n namsa Wẽnnaam no-rɛɛsdbã sẽn deng yãmbã me a woto.” (Mat. 5:12) Sẽn na n tɩ vɩɩmd-b saasẽ wã sẽn yãk b toogo, neb wʋsg n na n wa vɩɩmd wakat sẽn kõ sa tẽngã zugu. Rẽ me yaa keoor sẽn sek ned na ‘maan sũ-noog n kɩdme.’ (Yɩɩn. 37:11; Luk 18:30) D na n kẽnga saasẽ, tɩ d na n vɩɩmda tẽngã zug me, d tõeeme tɩ d tẽebã yɩ ‘wa baar sẽn vigl kãenkãe la sẽn tar pãnga.’ (Ebre. 6:17-20) Tõnd tẽebã sã n tar pãnga, n yaa wa baar sẽn vigl sõma, na n sõngame tɩ baa fʋɩ ra tõog tɩ d bas Wẽnnaam sakr ye. D na n paama pãng n tõog toog buud fãa.

8. Bõe yĩng tɩ bũmb nins Wẽnnaam sẽn pʋlmã tõe n sõng-d tɩ d ra maan yɩɩr tɩ looge?

⁸ Bũmb nins Wẽnnaam sẽn pʋlem tɩ d tẽedã tõe n sõngame tɩ d ra maan yɩɩr tɩ loog ye. Wa kaam sẽn bʋkd yĩngã, Wẽnnaam pʋlemsã bʋkda d sũyã yel-pakr wakate. D sẽn mi tɩ d tõe n basa d yell fãa ne a Zeova, n kɩs sɩd t’a na n sõng-d lame wã sigsda d sũyã. (Yɩɩn. 55:23) D tõe n kɩsa sɩd tɩ Wẽnnaam na n ‘maana hal wʋsg n yɩɩg tõnd sẽn kot fãa, wall d sẽn tagsd fãa.’ (Efɛ. 3:20) Yãmb we n gese! B pa yeel bal t’a na n sõnga tõnd ye. B yeelame t’a na n sõnga tõnd hal wʋsgo, ‘n yɩɩd tõnd sẽn tagsdã.’

9. Bõe la d segd n maane, n tõog n kɩs sɩd t’a Zeova na n keo-d lame?

⁹ D sã n dat n wa paam keoorã, yaa tɩlɛ tɩ d kɩs a Zeova sɩd zãng-zãnga, la d tũud a noyã la a saglsã. A Moyiiz ra yeela Israyɛll nebã yaa: “Sẽn-Ka-Saab na n ninga tẽngã barka, tẽng ning Sẽn-Ka-Saab sẽn yaa yãmb Wẽnnaamã sẽn kõ yãmb tɩ y soogã. Yãmb sã n sak n kelg Sẽn-Ka-Saab sẽn yaa yãmb Wẽnnaamã koɛɛgã n gũus n maan bũmb nins fãa mam sẽn kõ yãmb dũndã wã, Sẽn-Ka-Saab sẽn yaa yãmb Wẽnnaamã na n ninga yãmb bark wa b sẽn yeel yãmbã.” (Tõo. 15:4-6) Rẽ yĩnga, y kɩsa sɩd tɩ y sã n kell n tũ a Zeova, a na n ning-y-la bark bɩ? Y sã n kɩsa sɩd ne rẽ, yaa yam-sõngo.

10, 11. Bõe la a Zeova maan n keo a Zozɛfe?

¹⁰ Wẽnnaam sẽn kɩt tɩ b gʋls Biiblã yaa tõnd sõngr yĩnga. Biiblã tara kibay sẽn wilgd Wẽnnaam sẽn keo neb sẽn tũ-a ne b sũy fãa. (Rom. 15:4) Wala makre, a Zozɛf kibarã. Sũ-kiir yĩnga, a ba-biisã koos-a-la yembdo, tɩ b tall-a n kẽng Ezɩpti. Be, a zu-soab pag n dõd-a, tɩ b kẽes-a bãens roogo. La rẽ yĩnga, kɩtame t’a ra pa le tõe n paam  Wẽnnaam bark bɩ? Ayo! Biiblã yeelame: “Sẽn-Ka-Saab rag n bee ne a Zozɛfe, la b wilga a Zozɛf b nonglem. . . . Sẽn-Ka-Saab kɩtame t’a Zozɛf paamd tõogr ne bũmb nins fãa a sẽn maandã.” (Sɩng. 39:21-23) Baa ne zu-loe-kãensã sẽn kaoos yʋʋm wʋsgã, a Zozɛf kell n maana sũ-mar n gũ Wẽnnaam.

¹¹ A Faraõ wa n kɩtame tɩ b yiis a Zozɛf bãensã roogẽ, n kɩt tɩ nin-kãngã sẽn da yaa yambã lebg nin-kãseng Ezɩpt soolmã pʋgẽ. Yẽ n da yaa yiib-n-soab a Faraõ poore. (Sɩng. 41:1, 37-43) A pagã wa n doga kom-dibli a yiibu, t’a pʋd kãsmã t’a Manase, sẽn dat n yeel tɩ ‘yĩmbu.’ Bala, a Zozɛf yeelame: “Wẽnnaam kɩtame tɩ mam yĩm m toogã ne m ba-yirã fãa yelle.” A pʋda yiib-n-soabã t’a Efrayim. Bala, a yeelame: “Wẽnnaam kɩtame tɩ mam paam rogem tẽng ning mam sẽn paam paoogrã pʋga.” (Sɩng. 41:51, 52) A Zozɛf sẽn sak Wẽnnaam baa toog pʋgẽ wã, a keo-a lame, tɩ rẽ kɩt me tɩ Israyɛll nebã ne Ezɩpt nebã paam n põse. A meng wa n sak n deegame tɩ yaa a Zeova n dol yẽ, n ning-a barka.—Sɩng. 45:5-9.

12. Bõe n sõng a Zeezi t’a kell n sak Wẽnnaam baa toog pʋgẽ?

¹² A Zeezi Kirist me kell n tũu Wẽnnaam baa ne a sẽn yã toog wʋsgo, tɩ ra tõe n kɩt t’a bas Wẽnnaam tũubã. Wẽnnaam keo-a-la rẽ yĩnga. Bõe n sõnga a Zeezi t’a tõog toogo? Ad Biiblã sẽn yeele: “Bãmb saka kũum da-pika n ka zoe yãnd ye, sũ-noog sẽn be bãmb taoorã yĩnga.” (Ebre. 12:2, Wẽnnaam Sebre, 1983) Yaa vẽeneg tɩ sẽn da kõt-a sũ-noogã yaa a sẽn paam n tõe n kɩt tɩ Wẽnnaam yʋʋrã paam waoogrã. Wẽnnaam sũur yɩɩ noog ne-a me, t’a kõ-a tʋʋm sẽn be barka, tɩ rẽ fãa yaa keoore. Biiblã yeelame t’a “zaoo Wẽnnaam geer dɩtgo.” B yeelame me tɩ Wẽnnaam zẽk-a lame, n kõ-a “waoogr sẽn yaa kãsenga,” la “yʋʋr sẽn yɩɩd yʋyã fãa.”—Fili. 2:9.

13, 14. A Zeova tagsg yaa wãn ne d fãa sẽn modgd n tũud-a wã?

¹³ D tõe n kɩsa sɩd t’a Zeova nee modgr nins fãa d sẽn maand n tũud-a wã, la t’a nanda rẽ. D sã n wa tẽed tɩ d pa tõe n maan bũmb ninga, wall d tagsdẽ tɩ d ka barka, a Zeova wʋmda a võore. Ligd zu-loees bɩ bãaga, wall kʋʋlem bɩ bũmb a to sã n kɩt tɩ d pa le tõe n tʋm a tʋʋmã wa pĩndã, a kʋmda tõndo. D kɩs sɩd zãng-zãng t’a Zeova nanda modgr nins fãa d sẽn maand n tũud-a baa ne d zu-loeesã.—Karm-y Ebre-rãmb 6:10, 11.

¹⁴ D tẽegd wakat fãa, t’a Zeova n yaa a soab ning “sẽn kelgd pʋʋsgã.” Sẽn wa n yaa yell ning fãa bɩ d bas d yam t’a na n kelg-d lame. (Yɩɩn. 65:3) Tõnd Ba a Zeova “sẽn yaa nimbãan-zoɛta la Wẽnnaam sẽn belsd nebã wakat fãa” wã, a na n kõ-d-la bũmb nins fãa sẽn na n sõng-d tɩ d tõog n tu-a wã. Wakat ninga, a tũnugda ne d tẽed-n-taasã. (2 Kor. 1:3) Tõnd me sã n kʋmd d taabã, nooma a Zeova. Biiblã yetame: “Sẽn sõngd-a nimbãan-ned pengda Sẽn-Ka-Saabo, la bãmb na n dola yẽnda.” (Yel. 19:17; Mat. 6:3, 4) D sã n sakd n mongd d mens n sõngd d tẽed-n-taas nins sẽn dat sõngrã, a Zeova geta rẽ wa samd d sẽn dogl yẽ. A pʋlmame t’a na n dolame.

15. Togs-y bũmb kẽer y sẽn gũud ne yãgbo? (Ges-y sõsgã sɩngrẽ fotã.)

¹⁵ Sẽn paam-b vʋʋsem sõng zaeebã sẽn mi tɩ b Zu-soab a Zeezi sẽn yaa “bʋ-kaood tɩrgã” na n wa kõ-b-la “tɩrlem maanfã,” kengda b raoodo. (2 Tɩm. 4:7, 8) La baa y  sã n pa na n tɩ vɩɩmd saasẽ, pa rat n yeel tɩ Wẽnnaam pa nong yãmb wʋsg ye. Neb milyõ-rãmb sẽn tũud a Zeova, t’a Zeezi boond-b t’a ‘piis a taabã’ gũuda ne yãgbo, n na n wa vɩɩmd wakat sẽn kõn sa tẽngã zugu, arzãnã pʋgẽ. Wakat kãnga, b na n “paama vɩ-bãane, ne sũ-noog meng-menga.”—Zã 10:16; Yɩɩn. 37:11.

16. Bõe la b yeel 1 Zã 3:19, 20 tɩ kengd raoodo?

¹⁶ Wakat ninga, d tõe n getame tɩ d sẽn maand a Zeova tũudmã pʋgẽ wã pa waooge, wall d tagsdẽ tɩ pa sek a Zeova sũur na yɩ noog ne-d ye. Tõe tɩ d tagsdame meng tɩ d pa tog ne Wẽnnaam bark baa a ye. La d ra yĩm tɩ “Wẽnnaam yɩɩda tõnd sũyã,” la t’a “mii bũmb fãa” ye. (Karm-y 1 Zã 3:19, 20.) D bas d yam t’a Zeova na n keo-d lame, d sã n maand a raabã ne d sũy fãa, d sẽn kɩs-a sɩd la d nong-a wã yĩnga, baa tõnd mengã get tɩ d sẽn maandã paoodame.—Mark 12:41-44.

17. Bõe la d zoe n paamd masã menga, tɩ yaa barka?

¹⁷ D vɩɩ a Sʋɩtãan dũni wã yaoolem wakate, la baasgo, a Zeova ningda sẽn tũud-b yẽ wã barka. Ne a Zeova sõngre, a nin-buiidã sẽn be dũniyã gill zugã zemsda taab wa zak a ye neba, n tar sũ-noogo, la b bãngd a raabã n paasdẽ. (Eza. 54:13) Hakɩɩka, wa a Zeezi sẽn yeelã, a Zeova ningda tõnd bark masã menga, n kɩt tɩ d tar tẽed-n-taase, pagb la rap sẽn be dũniyã gill zug n nong-do. (Mark 10:29, 30) Sẽn paase, neb nins sẽn baood Wẽnnaam ne b sũy fãa wã paamda sũur pʋgẽ bãane, n maand sũ-noog ne b sẽn zoe n tarẽ wã, tɩ b vɩɩmã noom-ba.—Fili. 4:4-7.

18, 19. Neb nins sẽn tũud a Zeova wã tagsg yaa wãn ne bark nins b sẽn zoe n paamdẽ wã?

¹⁸ Dũniyã gill zugu, sẽn tũud-b a Zeova wã tõe n kõo kaset t’a sɩd keood-b lame. Wala makre, a Biyãnka sẽn be Alemayn wã yeelame: “M pa tõe n pʋʋs a Zeova bark n sa, a sẽn sõngd-m m zu-loeesã pʋgẽ la a be ne-m daar fãa wã ye. Dũni-kãngã nebã maanda b yam. To nonglem pa le be ye. La m sẽn paam n yaa a Zeova tʋmd-n-taagã, m yam gãee bãane, tɩ yaa wa a tebenda maam. Sẽn yaa bũmb ning fãa la m sak n mong m meng a yʋʋrã yĩnga, a keooda maam hal tɩ zʋʋg rẽ.”

¹⁹ D saam-bi-poak a Pola me sẽn be Kanada wã bẽeda bãag sẽn kɩt tɩ kẽnã yaa toog ne-a. A tara yʋʋm 70. Ad a sẽn yeele: “Kẽnã sẽn yaa toog ne-mã pa kɩt tɩ m pa moond koɛɛgã wʋsg ye. Mam moonda koɛɛgã ne telefõnnã, la m modgd n tũnugd ne segb buud toor-toor n moondẽ. M baoo sebr n gʋlsd Biiblã vɛrse-rãmb la goam m sẽn yãt siglgã sɛbã pʋgẽ, n mi n karemdẽ tɩ kengd m daoodo.” A paasame: “D sã n tagsd a Zeova pʋlemsã yelle, d neeme tɩ yɛl nins sẽn komsd raoodã pa na n kaoos wakat fãa, tɩ rẽ kõt-d raoodo. Baa d yɛlã sẽn keng to-to fãa, a Zeova bee tõnd sõngr yĩnga.” Tõe tɩ yãmb zu-loeesã pa wõnd a Biyãnka bɩ a Pola ye. La y tõe n mi n tagsa a Zeova sẽn maan n keo yãmba, la a sẽn keo neb yãmb sẽn mi. Sɩd-sɩdã, d sã n tẽegd a Zeova sẽn zoe n ningd-d bark la a na n le ning-d bark beoog-daarã, kengda raoodo!

20. D sã n kell n tũ a Zeova ne d sũy fãa, d tõe n kɩsa sɩd ne bõe?

²⁰ Wẽnnaam na n wa kɩtame tɩ d paam d sẽn pʋʋsd n kot ne d sũy fãa wã, tɩ yɩ ‘keoor sẽn yaa kãsenga.’ D ra tol n yĩm rẽ ye! Y tõe n kɩsa sɩd tɩ y sã n “maan Wẽnnaam daabã, y na reeg bũmb ning b sẽn kãab yãmbã.” (Ebre. 10:35, 36) Bɩ d fãa kell n modg n paasd d tẽebã, la d tʋmd a Zeova tʋʋmdã ne d sũur fãa. D maand woto, n kɩs sɩd tɩ d na n wa reega pʋɩɩr a Zeova nengẽ, tɩ yɩ d keoore.—Karm-y Koloos-rãmb 3:23, 24.