Mam doga pĩnd Repibilik Demokratik Dalemayn tẽn-bil a ye sẽn be Saks soolmẽ wã. Tõnd zakã pʋgẽ, vɩɩmã ra yaa noogo. M roagdbã wub-m-la sõma, n wilg-m sẽn segde. Tẽngã nebã ra yaa kominist-rãmba. Kɩtame tɩ Saks soolmã neb wʋsg nifẽ, tũudmã pa tar yõod ye. Ma-me ra tẽedame tɩ Wẽnd kae ye. Hal n tãag m yʋʋm 18, m da kɩsa sɩd tɩ Wẽnd kae, la m da tẽed kominismã.

Bõe yĩng tɩ m da nong kominismã? Bala, kominist-rãmbã yetame tɩ nebã fãa yaa yembre. Sẽn paase, m da tẽedame tɩ togame tɩ b pʋɩ tẽnsã paoong tɩ ned fãa paame, bala na n sõngame tɩ ra yɩ neb a wãn bal n yaa rakãag-rãmba, tɩ sẽn ket-bã be far pʋgẽ ye. Rẽ n so tɩ m tɩ naag kominist-rãmbã kom-bɩɩs sull a ye. M sẽn wa n tar yʋʋm 14, m da wʋkda seb-kʋd b sẽn lobe, n lebsd n maand seb-paala. M da tʋmda wʋsgo, hal tɩ Aue tẽngã taoor dãmb sũur ra noom ne-ma. B kõ-m-la dipolom n na n keo-ma, la b kõ-m lohorem tɩ m tõe n maan bũmb kẽer tẽngã pʋgẽ. Baa m sẽn da ket n yaa bi-bɩɩgã, m paam n bãnga tẽngã politik taoor dãmb kẽere. M da getame tɩ m sẽn tees m vɩɩmã neng ningã zemsame, la tɩ m beoog na n yɩɩ neere.

La yɛlã wa n tiig n toeemame. Yʋʋmd 1989 wã, Bɛrlẽ lalgã lʋɩɩme, tɩ rẽ kɩt tɩ Erop Delɛst soolmã sẽn da yaa kominist-rãmb n so wã weele. Sẽn pa yã n kaoose, m bãnga bũmb sẽn sãam m sũuri. M bãngame tɩ tẽngã taoor dãmbã ra maanda nebã pãnga. Wala makre, b ra geta sẽn pa teend-b kominismã wa neb sẽn pa tẽng-n-biis meng-menga, n mi n maan-b sẽn pa segde. Sɩnga wãn tɩ wa yaa woto? Yet tɩ kominist-rãmbã tẽedame tɩ nebã fãa yaa yembr wɛ? Bɩ yaa goam tɩ b gomd bala? M yamã ra pa le gãe bãan ye.

Kɩtame tɩ m bas m sẽn da maandã, tɩ lebg mizikã la desẽ wã n pak-ma. M da tõe n paam n kẽnga lekollẽ b sẽn zãmsd nebã miziki, hal n wa paam n kẽng inivɛrsite menga. Kɩtame tɩ m da rat tɩ mizikã la desẽ wã wa lebg m tʋʋmde. M wa n pʋd m basa m roagdbã sẽn zãms-m bũmb nins m yãadmẽ wã, n maand m sẽn date. Sẽn da pak-m masã yaa pemsem kokr la pʋg-sadb roobo. La mizikã ne reemã la m sẽn da maand m sẽn datã pa sõng-m tɩ m paam sũur pʋgẽ bãan ye. F sã n da ges m desẽ-rãmbã, f neeme meng tɩ m da vɩɩ rabeem pʋgẽ. M da sokda m meng yaa: ‘Beoog vɩɩmã na n yɩɩ wãna? Vɩɩmã yõod meng yaa bõe?’

 M wa n paama m sogsgã leoore, hal tɩ m sẽn bãng bũmb ninsã ling-m wʋsgo. Daar a ye zaabre, m da zĩi ne karen-biis a taab n sõsd beoog vɩɩmã yelle, tɩ karen-biig yʋʋr sẽn boond t’a Mãndi * kõ-m saglg sẽn yaa sõma. A ra yaa a Zeova Kaset soaba. A yeela maam yaa: “Andreas, f sã n dat f sogsgã leoore, yaa vɩɩmã tɩ yaa beoog-daarã wɛɛngẽ, bɩ f maag f yĩng n bao Biiblã pʋgẽ.”

M da pa kɩs sɩd zãng ne a sẽn yeelã ye. La m wa n baas n yãka yam n na n tũ a saglgã. A Mãndi wilga maam Dãniyɛll sebrã sak a 2. M sẽn karem bũmb ning be wã ling-m-la wʋsgo. Yaa bãngr-gomd sẽn wilgd dũni gill pãn-soaadb sẽn na n pʋgl taab n dɩ naam, n tãag tõnd wakatã. A Mãndi wilga maam bũmb a taab Biiblã sẽn da pĩnd n togse, tɩ pidsd tõnd wakatã. M yaa n paamda m sogsgã leoore! M da sokda m meng yaa: ‘Yaa ãnd n gʋls bãngr-gom-kãensã? Ãnd n tõe n deng n togs sẽn wat beoogo, hal tɩ yaa kɛpɩ woto? Pa Wẽnnaam sɩda?’

A Mãndi kosa a Horst ne a pag a Angelika sẽn yaa a Zeova Kaset rãmbã tɩ b wat n sõsd ne maam. B sõnga maam tɩ m wʋm Biiblã goam võor sõma. Pa kaoos la m bãng tɩ tũudmã fãa sʋka, yaa a Zeova Kaset rãmbã bal n nong Biiblã, la tɩ yaa bãmb bal n wilgd nebã tɩ Wẽnnaam yʋ-peellã yaa Zeova. (Yɩɩn-sõamyã 83:18, MN; Matye 6:9) M bãngame t’a Zeova na n kɩtame tɩ tẽngã lebg arzãna, tɩ ninsaalbã vɩɩmd a zug wakat sẽn kõn sa. Ad Yɩɩn-sõamyã 37:9 sẽn yete: “Sẽn tẽed-b Sẽn-Ka-Saabã n na n soog tẽngã.” Mam sẽn bãng tɩ yaa neb nins fãa sẽn maood n tũud Biiblã noyã n na n wa paam vɩɩm a woto wã, yɩ-m-la noogo.

La yɩl n tõog n tũ Biiblã sẽn yetã, yɩɩ tɩlɛ tɩ m mao n toeeme. M da segd n deng n bɩɩsa sik-m-menga, bala m sẽn da mi mizikã la desẽ wã hal tɩ tʋʋmdã yaa sõma wã, kɩtame tɩ m da zẽkd m menga. Sẽn paase, yɩl n bas m vɩ-yookã pa yɩ nana ye. M sũur nooma ne a Zeova, bala a kʋmda neb nins sẽn maood b pãng tɛk n na n tũ Biiblã sẽn yetã, n maand sũ-mar ne-ba.

Hal n tãag m yʋʋm 18 wã, yaa kominismã la m da kɩs sɩda, n da pa tẽed tɩ Wẽnd beeme ye. La rẽ tɛka, Biiblã sõngda maam tɩ m toeemdẽ. M sẽn bãng bũmb nins Biiblã pʋgẽ wã sõng-m lame tɩ m paam sũur pʋgẽ bãane, n pa le maand yɩɩr ne beoog vɩɩmã ye. Kɩtame tɩ m vɩɩmã tar barka. Yʋʋmd 1993, m deega lisg n lebg a Zeova Kaset soaba. Yʋʋmd 2000, m kẽe kãadem ne a Tabitha. A tũuda a Zeova ne yẽesem. D moonda koɛɛgã wa d sẽn tõe fãa, n sõngd nebã tɩ b bãngd Biiblã sẽn yetã. Neb nins d sẽn taasd koɛɛgã wʋsg yaa wa maam. B ra teega kominismã, la b tẽed tɩ Wẽnd kae ye. M sã n paam n wilg-b ned sẽn tõe n maan to-to n bãng a Zeova, kõt-m-la sũ-noog wʋsgo.

Mam sẽn wa n sɩng Biiblã zãmsg ne a Zeova Kaset rãmbã, pa yɩ m doagdbã noog ye. La b wa n neeme tɩ m sẽn naagd a Zeova Kaset rãmbã n tũud Wẽnnaamã, manega m vɩɩmã. Masã, b karemda Biiblã la b kẽnd a Zeova Kaset rãmbã tigissã, tɩ m sũur noome.

Maam ne a Tabitha zĩid-n-taarã noomame, bala d modgd n tũuda sagls nins Biiblã sẽn kõt pagbã ne b sɩdbã. Wala makre, Biiblã sagenda pagbã ne b sɩdbã tɩ b maan sɩd ne taaba. D sẽn tũud rẽ wã kɩtame tɩ d sẽn nong taab to-to wã paasdẽ.—Ebre-rãmbã 13:4.

M pa le vɩ rabeem pʋgẽ, m pa le maand yɩɩr ne beoog me. M neeme tɩ maam ne m tẽed-n-taasã sẽn be dũniyã gill zugã yaa wa zak a ye neba, tɩ laafɩ la zems-n-taar hakɩɩk be d sʋka. A Zeova nin-buiidã sʋka, nebã fãa yaa yembre. Woto la m sẽn da sɩng n datã.