A DON yaa Kanada saam-biiga. A maanda a sẽn tõe sẽn na yɩl tɩ koe-noogã ta sẽn pa tar-b roto, n gãe soayã noyã. A goma b ned a ye yʋʋr sẽn boond t’a Pɩyɛɛr yelle, n yeele: “A Pɩyɛɛr ra yaa rẽgdo. Tõnd zakã kudg soayã zutu, m sẽn yã neb sẽn yaa rẽgd woto pa waoog ye. A gesg ra pa be yamleoog baa bilfu. A ra mii a sẽn na n maaneg me tɩ nebã zãag ne-a. Neb n bao naoor wʋsg n na n sõng-a, t’a zãgse.” Na maan yʋʋm 14, a Don baoo segb buud toor-toor n na n maan a Pɩyɛɛr neere.

Daar a ye, a Pɩyɛɛr soka a Don yaa: “Bõe tɩ f modgd woto fãa n na n sõng maam? Neb a taabã pa baood m zĩig ye. Bõe yĩng tɩ mam yell pak foo?” Sẽn na yɩl t’a goamã kẽ a Pɩyɛɛre, a Don kɩtame tɩ b karem vɛrse-rãmb a tãabo. A reng n soka a Pɩyɛɛr a sã n miime tɩ Wẽnnaam tara yʋʋre, n yaool n kos-a t’a karem Yɩɩn-sõamyã 83:18 (MN). Rẽ poore, sẽn na yɩl t’a Pɩyɛɛr bãng a sẽn dat n sõng-a wã võore, a kɩtame t’a karem Rom-dãmb 10:13, 14. B yeela be tɩ “ned ning fãa sẽn na n bool Zu-soabã yʋʋr na n paama fãagre.” Sẽn na n baase, a Don karma Matye 9:36, la a kos a Pɩyɛɛr t’a karem a toore. Vɛrse wã yetame: “A Zeezi sẽn yã neb kʋʋngã, b nimbãaneg yõka bãmba. Bala, nin-kãens da yɛɛme tɩ b nensã yeege, n yaa wa piis sẽn ka tar pe-kɩɩm ye.” Karengã poore, a ninga nintãm, la a sok yaa: “Mam yaa wa nin-kãensã bɩ?”

A Pɩyɛɛr wa n sɩnga toeengo. A ra soodame masã, n manegd a toɛɛngã, la a yelgd fut nins a Don sẽn kõ-a wã. Rẽ tɛka, a ra manegda a mengã sõma.

A ra tara sebr n gʋlsd a sẽn maandã fãa. Sɩngrẽ wã, a sẽn gʋls bũmb ninsã ra yaa sũ-sãams goam bala. La a sẽn gʋls yaoolmã pa woto ye. Wala makre, a yeelame: “Rũndã, m bãnga Wẽnnaam yʋʋre. Masã, m sã n na n pʋʋse, yaa a Zeova la m pʋʋsda. M sẽn mi  Wẽnnaam yʋʋrã sɩd yaa bõn-sõng tɛkẽ! A Don yeelame t’a Zeova tõe n yɩɩ m zoa, tɩ sẽn yaa bũmb ning fãa la m dat n togs-a, baa sẽn yaa wakat ninga, a na n sak n kelg-m lame.”

A Pɩyɛɛr sẽn gʋls yaoolmã yaa a yaoã la a kẽem-bi-puglã yĩnga. A yeelame:

“M yĩnsã pa noom rũndã ye. M tagsdame tɩ kʋʋlmã yaa n ta-m lame. Baa m sã n ki rũndã, m miime tɩ m na n le yãa m zoa wã [a Don] arzãnã pʋgẽ. Y sã n wa karem gom-kãensã bɩ y bãng tɩ yaa m sẽn maan kaalem. M solgrã raare, y sã n yã rao y sẽn pa mi, bɩ y tɩ sõs ne-a. M bõosd-y lame tɩ y karem sebr ning sẽn yaa bʋla-bʋla wã me. * Sebrã yeelame tɩ m tõe n le yãa m zoa wã arzãnã pʋgẽ. M tẽeda rẽ ne m sũur fãa. Y ma-biig a Pɩyɛɛr sẽn nong-y wʋsgã.”

A Pɩyɛɛr solgrã poore, a kẽem-bi-puglã yʋʋr sẽn boond t’a Ummi wã yeelame: “Sẽn zems yʋʋm a yiib woto la a Pɩyɛɛr bao mam zĩiga. Yʋʋm ka tɛkã, yɩɩ pipi m sẽn yã t’a tar sũ-noogo. A nengã ra bee laad menga.” A yeela a Don yaa: “M na n karma sebrã, bala bũmb sã n tõog n yɩ m tãoã noog woto, tog n yaa bõn-sõng tɛkẽ!” A sakame me t’a Zeova Kaset soab na n pɩʋʋgd n sõsd ne-a Biiblã sɩd yetame tɩ bõe? sebrã zugu.

Tõnd me pa segd n ges d ninã sẽn ne wã bal ye. D zʋg rẽ, n wilg ned buud fãa nonglem hakɩɩka, la d maan sũ-mar ne-a. (1 Tɩm. 2:3, 4) Woto, tõe tɩ d tõog tɩ koe-noogã kẽ neb sẽn yaa wa a Pɩyɛɛre, tɩ b sak n toeeme. Baa wʋsg sẽn pa nong neb a woto zĩigã, tõe tɩ b sũyã yaa sõma. D tõe n kɩsa sɩd tɩ Wẽnnaam sẽn mi sẽn be ninsaal sũurẽ wã na n kɩtame t’a goamã sẽn yaa sɩdã kẽ sẽn dat-b n bãng-a wã sũyã.—1 Sãm. 16:7; Zã 6:44.