1. Bõe yĩng tɩ d tõe n yeel tɩ bũmb fãa yaa a Zeova n so? (Ges-y fotã sẽn be yĩngrã.)

BŨMB fãa yaa a Zeova n so! Yẽ n “so saasã ne saasã saase, la dũniyã ne bũmb nins fãa sẽn be a pʋgẽ wã.” (Tõo. 10:14; Vẽn. 4:11) A sẽn naan ninsaalbã yĩnga, b fãa yaa yẽ n so. (Yɩɩn. 100:3) La hal ninsaalbã sẽn be tẽng zugã tɛka, Wẽnnaam yãkda neba, n welg-b toor tɩ b yaa a nin-buiidu.

2. Ãnd dãmb la b boond Biiblã pʋgẽ t’a Zeova nin-buiidu?

² Wala makre, Yɩɩn-sõamyã 135 goma pĩnd Israyɛll neb nins sẽn da tũud a Zeova ne b sũur fãa wã yelle, n yeel tɩ b yaa a “dẽnda.” (Yɩɩn. 135:4) Ooze sebrã pʋgẽ me, b ra pĩnd n togsame tɩ neb sẽn yaa bu-zẽms na n wa lebga a Zeova nin-buiidu. (Ooze 2:25, Wẽnnaam Sebre, 1983) A Ooze bãngr-gomdã pidsa wakat ning a Zeova sẽn sɩng bu-zẽmsã yãkre, tɩ bãmb me na n tɩ naag a Zeezi n dɩ naamã. (Tʋʋ. 10:45; Rom. 9:23-26) Neb nins fãa Wẽnnaam sẽn yãkdã paamda a vʋʋsem sõngã zaeebo, n na n tɩ vɩɩmd saasẽ. B boond-b lame tɩ “buud sẽn welg toor Wẽnnaam yĩnga.” (1 Pɩy. 2:9, 10) La kiris-neb kʋʋngã sẽn saagd n na n wa vɩɩmd tẽngã zugã yẽ? A Zeova boonda bãmb me t’a ‘neba,’ bɩ ‘neb nins a sẽn yãkã.’—Eza. 65:22.

3. a) Ãnd dãmb n yaa a Zeova nin-buiid rũndã-rũndã? b) Bõe yell la d na n gom sõs-kãnga pʋgẽ?

 ³ Rũndã-rũndã, sẽn saagd-b n na n wa tɩ vɩɩmd saasẽ wã (bãg-bilã) la sẽn saagd-b n na n wa vɩɩmd wakat sẽn kõn sa tẽngã zugã (piis a taabã) fãa naaga taab n yaa “bãgr a yembre,” n tũud a Zeova. (Luk 12:32, MN; Zã 10:16) D sẽn paam n yaa a Zeova nin-buiidã sɩd yaa zu-zẽkre, tɩ d rat ne d sũur fãa n pʋʋs-a barka. Sõs-kãnga pʋgẽ, d na n yãa bũmb toor-toor d sẽn tõe n maane, n wilg a Zeova tɩ d sũur nooma d sẽn paam n yaa a nin-buiidã.

4. Togs-y bũmb a ye d sẽn tõe n maan n pʋʋs a Zeova bark d sẽn paam n naag a nin-buiidã. Wãn to la a Zeezi maan a buudu?

⁴ D sã n dɩk d meng n kõ a Zeova n deeg lisgu, d wilgdame tɩ d sũur nooma d sẽn paam n naag a nin-buiidã. Ne lisgã maasem, d wilgda nebã tɩ d sakame tɩ yaa a Zeova n so tõndo, la tɩ d rata ne d sũur fãa n maan a raabã wakat fãa. (Ebre. 12:9) A Zeezi me sẽn wa n na n deeg lisgã, a maana a buudu. Yaa wa a sẽn yeel a Zeova yaa: “Mam Wẽnnaam, mam dat n maana yãmb daabo.” (Yɩɩn. 40:8, 9) Baa a Zeezi sẽn dog Israyɛlle, tɩ yaool n da yaa buud a Zeova sẽn so wã, a rɩka a meng n kõ a Zeova n na n maan a raabã.

5, 6. a) Bõe n wilgd t’a Zeezi sẽn deeg lisgã, a Zeova sũur yɩɩ noogo? b) Rɩk-y makr n wilg tɩ d sã n dɩk d meng n kõ a Zeova, a sũur noomame?

⁵ A Zeezi sẽn deeg lisgã, yɩɩ a Zeova noog bɩ? Ad Biiblã sẽn yeele: “A Zeezi sẽn paam lisg n sa, b yii koomẽ wã. La gese, yĩngr pakame, la bãmb yãnda Wẽnnaam Sɩɩg sẽn wẽnd wall t’a sigd bãmb zugu. La koɛɛg zĩnda saasẽ n yeele: ‘Ada yaa mam Bi-ribl-nongr sẽn ta mam yam zãnga.’” (Mat. 3:16, 17) Yaa sɩd t’a Zeezi ra zoe n yaa a Zeova Biiga, la a sẽn dɩk a meng n ko-a ne yamleoog n na n maan a raabã ne a sũur fãa wã yɩɩ a Zeova noog hal wʋsgo. Tõnd me sã n dɩk d meng n kõ a Zeova, a sũur nooma wʋsgo, t’a na n ning-d barka.—Yɩɩn. 149:4.

⁶ D rɩk makr ne rao sẽn na n tar a kamaan pʋʋgo. Daar a ye, a bi-pugl n kẽ pʋʋgẽ wã n kaoog kamaande, n sẽ n kõ-a. Baa kamaanã sẽn zoe n yaa ba wã n so wã, a sũur na n yɩɩ noog wʋsg ne a bi-puglã. Bala, a sẽn maanã wilgdame t’a nonga a ba wã. Baa kamaanã sẽn waoog pʋʋgẽ wã, raoã pa na n yĩm a bi-puglã sẽn kõ-a kamaandã ye. Tõnd me sã n dɩk d meng n kõ a Zeova ne yamleoog n na n maan a raabã ne d sũur fãa, noom-a-la wʋsgo.—Yik. 34:14.

7. Bõe la a Malaki yeel-yã, tɩ wilgdẽ t’a Zeova sũur nooma ne neb nins sẽn tũud-a ne yamleoogã?

⁷ Karm-y Malasɩ 3:16. Y sã n nan pa rɩk y meng n kõ a Zeova n deeg lisgu, bɩ y tags y segd n maan rẽ wã võore. Yaa sɩd tɩ hal d sẽn da be d ma pʋgẽ wã, a Zeova n so tõndo, bala a yaa d Naanda. La mams-y n ges-y a sũur sẽn noom to-to, d sã n dɩk d meng n kõ-a n na n maan a raabã, tɩ wilgdẽ tɩ d sakame tɩ yẽ la yĩngr la tẽng Naabã! (Yel. 23:15) A Zeova mii neb nins sẽn sak ne yamleoog n tũud-a wã, n gʋlsd b yʋyã a ‘tẽegr sebrã’ pʋgẽ.

8, 9. A Zeova ratame tɩ neb nins yʋy sẽn be a ‘tẽegr sebrã’ pʋgẽ wã maan bõe?

⁸ D sã n paam tɩ d yʋʋrã be a Zeova ‘tẽegr sebrã’ pʋgẽ, tɩ wilgdẽ tɩ d naaga a nin-buiidã, bũmb kẽer la d segd n maane. A Malaki wilga vẽeneg tɩ d  segd n zoee a Zeova la d waoogd a yʋʋrã. D sã n bas a Zeova tũubu, n tũ wẽnnaam a to bɩ bũmb a to, a na n yẽesa d yʋʋrã vɩɩm sebrã pʋgẽ.—Yik. 32:33; Yɩɩn. 69:29.

⁹ Dẽnd d sã n dɩk d meng n kõ a Zeova n na n maan a raabã, n deeg lisgu, yaa sõma la pa sek ye. Bala, d maanda rẽ fãa vugr bala. La a Zeova tũubã yaool n yaa d vɩɩmã tõre. Beoog sẽn vẽeg fãa, d segd n wilgda ne d tʋʋm-tʋmdɩ wã tɩ d sakd-a lame.—1 Pɩy. 4:1, 2.

10. Welgr bʋg n segd n zĩnd sẽn sakd-b a Zeova ne sẽn ka sakd-bã sʋka?

¹⁰ Sõsg ning sẽn loogã pʋgẽ, d yãame t’a Kayẽ ne a Salomo la Israyɛll nebã ra yetame tɩ b tũuda a Zeova, la b yaool n da pa tũud-a ne b sũur fãa ye. B kibayã wilgda vẽeneg t’a Zeova nin-buiidã segd n nonga sẽn yaa sõma ne b sũur fãa, la b kisg sẽn yaa wẽnga. (Rom. 12:9) Sɩd me, a Malaki sẽn gom ‘tẽegr sebrã’ yellã poore, a Zeova goma “welgr ning sẽn be nin-tɩrg ne nin-wẽng sʋka” yelle, la “welgr ning sẽn be sẽn sakd-b Wẽnnaam ne sẽn ka sakd-b Wẽnnaamã sʋka.”—Mal. 3:18.

11. Bõe yĩng tɩ segd n yɩ vẽeneg ne nebã tɩ d yaa a Zeova Kaset soaba?

¹¹ Bũmb a to me d sẽn tõe n maan tɩ wilg tɩ d sũur nooma ne d sẽn paam t’a Zeova yãk-d tɩ d naag a nin-buiidã, yaa d sẽn na n mao tɩ ‘nebã fãa yã tɩ d kẽngda taoor’ tũudmã pʋgẽ. (1 Tɩm. 4:15; Mat. 5:16) Sok-y y meng yaa: ‘Nebã neeme tɩ m tũuda a Zeova ne m sũur fãa bɩ? M sã n paam segb n na maan tɩ b bãng tɩ m yaa a Zeova Kaset soaba, m zoeta yãnd bɩ?’ Tags-y n ges-y-yã! A Zeova n yãk yãmb tɩ y yaa a Kaset soaba. Y sã n zoet yãnd n pa rat tɩ nebã bãng tɩ y tũud-a lame, a sũur kõn sãam wʋsg sɩda?—Yɩɩn. 119:46; karm-y Mark 8:38.

12, 13. Bõe la kiris-neb kẽer maanda, tɩ rẽ kɩt tɩ yaa toog tɩ nebã bãng tɩ b yaa a Zeova Kaset rãmba?

¹² Bʋko, kiris-neb kẽer tʋʋm-tʋmdɩ la b manesem kɩtame tɩ b pa tolg n yaa  toor ne neb nins sẽn pa tũud a Zeova wã ye. B basame tɩ dũniyã yamã kẽ-ba, tɩ b rɩkd a nebã togs-n-taare. (1 Kor. 2:12) Dũniyã yamã sã n yaool n kẽ neda, lebga a yĩngã ratem pidsg n pak-a. (Efɛ. 2:3) Woto kɩtame tɩ baa d sẽn paamd sagls ka tɛk futã la mengã manegr wɛɛngẽ wã, kiris-neb kẽer ket n nonga fut sẽn pa zemse, bɩ sẽn yaa hobragi, tɩ b sẽn manegd d mens to-to wã me yaa sẽn na n wilg b mense. Baa yaa tigsg la b rabda, b yelgda fut sẽn mobgd b yĩngã, la sẽn wilgd b yĩngã zĩis kẽer nebã sẽn pa segd n yã. B sẽn manegd b zugã to-to wã me pa ne sik-m-meng ye. (1 Tɩm. 2:9, 10) Kɩtame tɩ b sã n be neb sʋka, yɩl n bãng b sã n yaa ‘dũniyã zo-rãmb’ wall a Zeova Kaset rãmba, yaa toogo.—Zak 4:4.

¹³ Bũmb a taab pʋgẽ me la a Zeova Kaset rãmb kẽer pa wilgd tɩ b yaa toor fasɩ ne dũniyã nebã. Wala makre, b sã n wa naag b tẽed-n-taasã tɩ b na n kok pemsem, b sẽn maand bũmb ninsã la b sẽn saood to-to wã pa zems ne kiris-neb ye. B sẽn gomd goam nins rezo sosiyo rãmbã zugã, la b ningd fot-rãmb nins be wã wilgdame tɩ b pa kiris-neb tẽeb sẽn bɩ ye. Tõe tɩ b pa maan yel-wẽn-kãseng sẽn sek kãsem-dãmbã na kibl-b ye. Baasgo, b pa kõt b taabã mak-sõng ye. D tẽed-n-taas nins sẽn maood n na n yɩ toor fasɩ ne dũniyã nebã tõeeme n wa rat n maand wa bãmba.—Karm-y 1 Pɩyɛɛr 2:11, 12.

14. Tõnd sã n dat n kell n yɩ a Zeova zoa, bõe n yaa tɩlɛ?

¹⁴ Bũmb nins fãa b sẽn maand dũniyã pʋgẽ wã yaa sẽn na n kɩt tɩ lebg yĩngã ratmã, la “ninã sẽn get bũmb nins n datã, la wilg-m-meng arzegs sẽn wat ne wã” n pak tõnd n yɩɩda. (1 Zã 2:16) La d sẽn yaa a Zeova nin-buiidã, yaa tɩlɛ tɩ d “bas wẽn-kɩɩsgo la dũniyã ratem wẽnsã la d vɩɩmd zamaan kãnga pʋgẽ ne gũus-m-menga la tɩrlem la d sak Wẽnnaam.” (Tit 2:12) D no-goamã, d sẽn dɩt la d sẽn yũudi, d sẽn yelgd fut nins la d sẽn manegd d mens to-to wã, d sẽn tʋmd to-to wã, la bũmb nins fãa d sẽn maandã segd n wilgdame tɩ d tũuda a Zeova ne d sũur fãa.—Karm-y 1 Korẽnt-rãmb 10:31, 32.

15. Bõe yĩng tɩ d segd n nong d tẽed-n-taasã la d maand-b neere?

¹⁵ D manesem sẽn yaa to-to me ne d tẽed-n-taasã wilgda d sũur sã n nooma d sẽn paam n yaa a Zeova zoa wã. Bãmb me yaa a Zeova zo-rãmba. Rẽ sã n be d yamẽ, d na n nonga d tẽed-n-taasã wakat fãa, la d maand-b neere. (1 Tes. 5:15) A Zeezi ra yeela a karen-biisã yaa: “Yãmb sã n nong taaba, nebã fãa na bãng tɩ yãmb yaa mam karen-biisi.”—Zã 13:35.

16. Bõe la b ra wilg a Moyiiz tõogã pʋgẽ, tɩ sõngd tõnd tɩ d bãng a Zeova sẽn nong a nin-buiidã to-to wã?

¹⁶ D gom bũmb a ye b sẽn da wilg a Moyiiz tõogã pʋgẽ, tɩ tõe n sõng-d tɩ d bãng d manesem sẽn segd n yɩ to-to ne d tẽed-n-taasã. Wẽnd-doogã pʋgẽ, laas la teed a taab la b ra welg toore, a Zeova tũudmã tʋʋm yĩng bala. Tõogã ra wilga b sẽn segd n ges te-kãensã yell to-to wã ball-balle, la a wilg tɩ ned ning sẽn pa tũ-a rẽ segda ne kũum. (Sõd. 1:50, 51) Te-kãensã sẽn da pa bõn-vɩɩsã yell gesg sã n da paka a Zeova hal woto, yaa vẽeneg tɩ neb nins sẽn dɩk b mens n kõ-a, n tũud-a ne b sũur fãa wã yell n pak-a n yɩɩda! A yeela bũmb sẽn wilgd t’a nonga tõnd hal wʋsgo. Ad a sẽn yeelã: “Ned sã n sɩɩs yãmba, yaa wa a sẽn tuk mam nifu!”—Zaka. 2:12.

17. A Zeova gũusd n geta bõe?

¹⁷ A Malaki wilgame tɩ neb nins sẽn tũud a Zeova wã sã n yẽsd ne taaba, a Zeova ‘kɩllda a tʋbre, n wʋmdẽ.’ (Mal. 3:16) Woto wilgdame t’a Zeova “mii neb nins sẽn yaa bãmb dẽndã.” (2 Tɩm. 2:19) A mii d sẽn yet fãa la d sẽn maand fãa. (Ebre. 4:13) D sã n yaa gãs-gãs ne d tẽed-n-taasã, a neeme. La d sã n nong n maand-b sãando, n pʋɩt tõnd sẽn tarã ne-ba, n maand-b neer la d kõt-b sugri, d tõe n kɩsa sɩd t’a Zeova nee rẽ me.—Ebre. 13:16; 1 Pɩy. 4:8, 9.

18. Wãn to la d tõe n wilg tɩ d sẽn paam n yaa a Zeova Kaset rãmbã noom-d lame?

¹⁸ D rata ne d sũur fãa n wilg a Zeova tɩ d sẽn paam n yaa a Kaset soabã noom-d lame. D miime tɩ d sẽn dɩk d meng n kõ-a ne yamleoog n na n tũ-a wã yaa bõn-sõng tɛkẽ! Baa d sẽn be “zamaan-kãngã nebã sẽn sãam la sẽn yaa wẽnsã” sʋkã, d ratame tɩ yɩ vẽeneg tɩ d yaa neb “sẽn ka tar yelle, la sẽn yaa yɩlma,” n yãgd “wa vẽenem dũniyã pʋga.” (Fili. 2:15) D maooda d pãng tɛk n pa maand sẽn yaa wẽng ye. (Zak 4:7) D nonga d tẽed-n-taasã la d waoogd-ba, bala d miime tɩ bãmb me yaa a Zeova neba.—Rom. 12:10.

19. Wãn to la a Zeova keood a nin-buiidã?

¹⁹ Biiblã yeelame t’a Zeova ‘ka basd a nebã ye.’ (Yɩɩn. 94:14) Woto kɩtame tɩ d tõe n bas d yam tɩ sẽn wa n yaa yell ning fãa n paam-do, a Zeova na n sõng-d lame. Baa kũum pa tõe n welg tõnd ne a Zeova nonglmã ye. (Rom. 8:38, 39) Ad Biiblã sẽn paase: “Tõnd sã n vɩya, yaa Zu-soabã yĩng la tõnd vɩ. La tõnd sã n ki, yaa Zu-soabã yĩng la tõnd ki-yã. Tɩ tõnd vɩ tɩ d yaa kũum me, tõnd yaa Zu-soabã rẽnda.” (Rom. 14:8) Yaa ne d sũur fãa la d gũud wakat ning a Zeova sẽn na n vʋʋg a zo-rãmb nins sẽn maan kaalmã. (Mat. 22:32) La baa masã menga, d zoe n paamda bark ka tɛka. Hakɩɩka, wa Biiblã sẽn yeelã, “bark bee soolem ning sẽn tar Sẽn-Ka-Saab tɩ yaa a Wẽnnaamã zugu! Bark bee Sẽn-Ka-Saab sẽn yãk neb nins tɩ b yaa b rẽnda zutu!”—Yɩɩn. 33:12.