A YOMARA ne a yap a Marcelo la a Hiver bee Guatemala tẽn-bil a ye pʋgẽ. A Yomara sɩnga Biiblã zãmsg ne a Zeova Kaset rãmbã, la tarẽ-n-tarẽ yapã me wa n naag-a lame. La yell n da be. B tãabã fãa yaa zoense, la b pa tõe n karem bray wã ye. Woto yĩnga, saam-biigã sẽn da zãmsd-b Biiblã ra karemda sulã, la vɛrse-rãmbã sẽn be sulã pʋsẽ wã tɩ b kelgdẽ.

Tigissã kẽnd me ra yaa toog ne-ba. Bala, yɩl n ta Rĩung roog ning sẽn pẽ b zakã, b ra segd n kẽna minit 40. B ra pa tõe n kẽn b toor n kẽng ye. La tigingã nebã ra sõngd-b lame tɩ b tõogd n kẽnd tigissã fãa. B tãabã sẽn wa n paam n tõe n wɛgs sõsg tigingã pʋgẽ wã, saam-biisã ra sõngd-b lame tɩ b reng n dɩk sõsgã ne zugu.

Yʋʋmd 2019 sig-noy kiuugã, saam-biisã sɩnga tigissã maaneg a Yomara rãmb sẽn beẽ wã. Wakat kãnga, saam-biig ne a pag sẽn yaa wakat fãa so-pakdb n yik n tɩ zĩnd be. Baa ne pagã ne a sɩdã sẽn da pa mi bray wã, b ra rata ne b sũur fãa n sõng a Yomara ne a yapã tɩ b zãms a gʋlsg la a karengo. Rẽ n so tɩ b tɩ bao sɛb sẽn na n sõng-b tɩ b zãms bray wã, la b bãng b sẽn tõe n maan to-to n zãms neb a taaba.

Kiis a wãn poor bala, a Yomara ne a yapã ra tõe n karma bray wã sõma. Sõng-b lame tɩ b tẽebã pãng paase. Rũndã-rũndã, a Yomara ne a Marselo la a Ivɛɛr yaa wakat fãa so-pakdba. Sẽn paase, a Marcelo yaa kãsem-sõngda. B fãa tʋmda a Zeova tʋʋmã ne yẽesem wʋsgo. B mak-sõngã kɩtame tɩ neb a taab me tʋmd ne yẽesem.

A Yomara ne a yapã sũur nooma wʋsgo, tigingã neb sẽn get b yell ne nonglmã. A Yomara yeelame: “A Zeova Kaset rãmbã sẽn seg tõnd pipi wã tɛka, b wilg-d lame tɩ b nong-d-la ne nonglem hakɩɩka.” A Marselo paasame yaa: “D tara zo-rãmb hakɩɩk d tigingã pʋgẽ, la d naaga d tẽed-n-taasã sẽn yaa wa zak a ye neb n be dũniyã gill zug n nong taabã.” A Yomara ne a yapã gũuda ne b sũur fãa, wakat ning a Zeova sẽn na n kɩt tɩ dũniyã lebg arzãnã.—Yɩɩn. 37:10, 11; Eza. 35:5.