Israyɛll nebã sẽn zĩnd we-rasempʋɩɩgẽ wã yʋʋm 40, yaa mannã la b ra rɩt n yɩɩda. (Yik. 16:35) A Zeova kõ-b-la kodens naoor a yiib me. (Yik. 16:12, 13; Sõd. 11:31) La Israyɛll nebã ra mi n paama rɩɩb a taab n dɩ.

Wala makre, wakat kẽere a Zeova mi n talla a nin-buiidã n kẽng ‘zĩig sẽn na yɩl tɩ b vʋʋse.’ Zĩ-kãense, koom la rɩɩb n mi n be be. (Sõd. 10:33) Vʋʋsg zĩig a ye a Zeova sẽn tall-b n kẽng yɩɩ Elim. “Ko-bunds piig la a yiib la koms pis-yopoe n da be be.” Sãmbg sẽn kae, komsã ra yaa mak-kɛgl bɩ tamarʋ tɩɩse. (Yik. 15:27) Sebr a yembr (Les plantes de la Bible) yeelame tɩ mak-kɛglã tɩɩs “bee zĩis wʋsg we-rasempʋɩɩgẽ wã, n yaa tɩɩs nins nebã sẽn dɩt n yɩɩda. Tɩ-kãensã kõta neb milyõ-rãmb rɩɩbo, kaam la maasem.”

We-rasempʋɩɩgẽ wã, koom la tɩɩs zĩig n be tɩ b boond rũndã-rũndã tɩ Feran, n be Feran ko-soogẽ wã. Tõe tɩ Israyɛll nebã zĩnda be me n vʋʋse. a Sebr a yembr (Discovering the World of the Bible) yeelame tɩ “ko-so-kãng woglem sẽn ta kɩlo 130 wã naaga Sinayi koom la tɩɩs zĩis nins sẽn yaa wogdo, neeba, la neb wʋsg sẽn mi wã sʋka. Feran koom la tɩɩs zĩigã woglem kolga kɩlo a 5 n be zĩ-zãntgẽ. A bee kɩlo 45 zĩigẽ ne Feran ko-soogã sɩngrẽ. B boond-a lame tɩ Sinayi Edɛn. Mak-kɛgl tɩɩs tusa sẽn be be wã yĩnga, kɩtame tɩ neb wʋsg nong n wat be hal pĩnd wẽndẽ.”

Israyɛll nebã sẽn wa n yi Ezɩptã b zãa zom-nagdga, laas b sẽn tar n nagd zom, la tõe me tɩ b zãa kood la kaam. Yaa vẽeneg tɩ bõn-kãens pa kaoos la sa ye. Sẽn paase, nin-buiidã zãa “rũm-bõoneg la rũm-bɛda, rat n yeel tɩ rũms wʋsgo.” (Yik. 12:34-39) La rɩɩb la koom sẽn da pa be we-rasempʋɩɩgẽ wã woto wã yĩnga, rũmsã wʋsg kiime. Tõe tɩ Israyɛll nebã wãba rũms kẽere, la b yõg kẽer n maan maand n kõ wẽn-faad menga. b (Tʋʋ. 7:39-43) Baa ne rẽ, Israyɛll nebã gʋʋla rũmsi, wa a Zeova sẽn yeel-b bũmb ning b sẽn pa tall tẽebã yĩngã. A yeel-b lame yaa: “Yãmb kambã na n lebga rũm-kɩɩmb we-raoogã pʋgẽ yʋʋm pis-naase.” (Sõd. 14:33) Tõe tɩ b ra paamda rũmsã  bĩisim la b nemdo, la yaa vẽeneg tɩ ra pa sekd neb na maan milyõ a 3 yʋʋm 40 pʋgẽ ye. c

Yɛ la rũmsã ra paamd rɩɩb la koom? d Wakat kãnga, tõe tɩ saagã ra niida be n yɩɩd rũndã-rũndã wã, tɩ yamd ra be be. Étude perspicace des Écritures Volume 1 wã yeelame tɩ yʋʋm 3 500 rũndã, “koom da bee Arabi n yɩɩd rũndã-rũndã hal zĩig sẽn zãre. Ko-soay wʋsg sẽn be be n kʋɩ, la lond sẽn da yaa kʋɩlsã wilgdame tɩ wakat n zĩnd tɩ saagã ra niid tɩ sek koom na zoe be.” La baa ne rẽ, we-raoogã ra yaa zĩ-koɛɛng sẽn kẽesd rabeem. (Tõo. 8:14-16) Sã n pa a Zeova sẽn maan yel-soalem tɩ Israyɛll nebã la b rũmsã paam koom naoor wʋsgã, b fãa ra na n kiime.—Yik. 15:22-25; 17:1-6; Sõd. 20:2, 11.

A Moyiiz yeela Israyɛll nebã t’a Zeova rɩlg-b-la ne mannã “sẽn na yɩl tɩ [b] bãng tɩ ninsaal pa vɩ ne rɩɩb bal ye. A vɩɩ ne gomd ning fãa sẽn yit a Zeova noorẽ wã me.”—Tõo. 8:3.