Namsgã yaa ãnd yelle?
Sã n pa Wẽnd n kɩt tɩ d namsdẽ, sɩnga wãn tɩ komã, naongã, zabã, bã-kɛgemsã la sabab-wẽnsã wa beẽ? Biiblã wilgda bũmb nins sẽn kɩt tɩ ninsaalbã namsdẽ wã. Sẽn tɩ yɩɩd fãa, yaa bũmb a tãab yĩnga:
Rat-m-ye wã, rat-wʋsgã, la kis-taabã. Biiblã yetame: “Ninsaal tõe a to n maand-a wẽnga.” (Koɛɛg soaba 8:9) Naoor wʋsgo, nebã sẽn namsdã yaa neb kẽer sẽn yaa rat-m-ye rãmb bɩ nin-toose, n maand-b pãngã yĩnga.
Yel-lingdem. “Yel-lingdem” sẽn mi n paamd nebã me kɩtame tɩ namsgã beẽ. (Koɛɛg soaba 9:11, MN) Rat n yeel tɩ nina tõe n wa tɩ bee zĩig ning tɩ sabab-wẽng kell n paam-a. Tõe n yaa yell sẽn wa woto bala, wall nina n pa maan gũusgu, pa rẽ bɩ a tudg n maana bũmb tɩ wa ne yellã.
Dũni-kãngã naabã sẽn yaa na-wẽngã. Biiblã wilgda bũmb ning sẽn tolg n kɩt tɩ ninsaalbã namsdẽ wã. Ad b sẽn yete: “Dũniyã zãng bee wẽng soabã nugẽ.” (1 Zã 5:19) “Wẽng soabã” yaa a Sʋɩtãan. A ra yaa malɛk sẽn tar pãng n be ne Wẽnnaam, la a “ka pa sɩd pʋgẽ ye.” (Zã 8:44) Malɛgs a taab me n kɩɩs Wẽnnaam sẽn na yɩl n pids b mens ratem. B lebga a Sʋɩtãan poorẽ dãmba. Bãmb la zĩn-dãmbã. (Sɩngre 6:1-5) A Sʋɩtãan ne a zĩn-dãmbã kɩɩsgã tɛka, b wẽnda yɛlã dũniyã zugu, n pirsd nebã tɩ b maand wẽnga, sẽn yɩɩd fãa rũndã-rũndã. A Sʋɩtãan sũ-puugrã lebga kãseng masã, t’a ‘belgd tẽngã zĩig ning fãa neb sẽn beẽ wã nebã.’ Kɩtame tɩ “toog” be ne neb nins sẽn be dũniyã zugã. (Vẽnegre 12:9, 12) Sɩd me, a Sʋɩtãan yaa na-toaag meng-menga. A sã n ne nebã sẽn namsdã, noom-a lame. Yaa yẽ n kɩtd tɩ nebã namsdẽ, pa Wẽnnaam ye.
TAGS-Y N GES-Y: Ned na maand a taab wẽnga, n namsd-b zaalem, tɩ sã n pa a yaa nin-wẽnga, n pa tar nimbãan-zoeer sɩda? La Biiblã yetame yaa: “Wẽnnaam yaa nonglem.” (1 Zã 4:8) Wẽnnaam sẽn yaa nonglem, t’a zʋgd a taabã me yaa sõma zãngã, a “zãra ne wẽng maanego,” n “ka tol n maand wẽng ye!”—Zoob 34:10.
La tõe tɩ y sokda y meng yaa: ‘Hal tɩ ta dabʋr la Wẽnnaam sẽn yaa pãng sẽn ka to soabã na n bas t’a Sʋɩtãan ket n so dũniyã?’ Wa d sẽn zoe n togsã, Wẽnnaam kisa wẽnga, t’a sẽn ne d namsgã me sãamd a sũuri. Sẽn paase, Biiblã yetame: “Sik-y yãmb yɩɩrã fãa n bas ne bãmba, bala, bãmb n get yãmb yelle.” (1 Pɩyɛɛr 5:7) Wẽnd nonga tõndo. A leb n tara tõogo, n na n kɩt tɩ namsgã la yel-kɛg buud fãa sa. Sõsg ning sẽn pʋgdã pʋgẽ, d na n goma rẽ yelle. *
^ sull 7 Y sã n dat n bãng Wẽnnaam sẽn bas tɩ namsgã beẽ wã võore, bɩ y karem Bõe la d tõe n bãng Biiblã pʋgẽ? sebrã sak 11 wã. A Zeova Kaset rãmbã n yiis-a. Y tõe n paam-a-la www.ps8318.com pʋgẽ me.
Découvrez aussi…
GŨUSG GASGÃ
Wẽnd na n kɩtame tɩ namsgã fãa sa ka la bilfu
Bõe n wilgd tɩ Wẽnnaam na n kɩtame tɩ namsgã la yel-kɛgã fãa sa ka la bilfu?
SOGSG BIIBLÃ SẼN LEOKDE
Sʋɩtãanã sɩd beeme bɩ?
Sʋɩtãanã yaa wẽngã tʋlsem sẽn be ninsaalbã sũyẽ wã bal bɩ, bɩ a sɩd beeme?
