Bas-yard yaa tɩlae sẽn na yɩl n tall sũ-noogo

RƖƖB sẽn zabd pʋg pa sõmb lae-lae ye. Ned sẽn zoe n dɩ a buud n yɩlem segd n gũusa wʋsg ne a rɩ-rɩtɩ wã. La tolg n bas rɩɩb fasɩ sẽn na yɩl tɩ f pʋg ra zab me pa yam tʋʋmd ye. Woto meng tõe n waa ne yɛl wʋsg n yɩɩg a sẽn na n manege. Ned sã n pa rɩtẽ, a pa tõe n vɩɩmd n kaoos ye.

Woto me, f sã n tall bas-yard ne ned t’a wa zãmb-fo, sɩd sãamda sũuri. D sã n zoe n talla bas-yard ne neb tɩ b zãmb-d naoor ka tɛka, tõe n wa n kɩtame tɩ d gũus ne d zo-rãmbã yãkre. La f sã n pa rat tɩ ned zãmb-fo, a tɩɩm pa f sẽn na n tolg n zãag f meng fasɩ ne nebã ye. Bõe yĩng tɩ d pa segd n maan woto? Bala d sã n pa tol n tar bas-yard baa bilf ne neb a taabã, sãamda d sũ-noogã. Sẽn na yɩl n vɩɩmd ne sũ-noogo, yaa tɩlae tɩ d tall zems-n-taar sẽn tik bas-yard tõnd ne neb a taabã sʋk zugu.

“Bas-yard yaa bũmb sẽn yaa tɩlae daar fãa sẽn na yɩl tɩ nebã tõog n vɩɩmd ne taab tɩ yɩ noogo.” Woto la sebr a yembr (Jugend 2002) yeel-yã. Zʋgnall a to me (Neue Zürcher Zeitung) yeela woto: “Ned kam fãa, tʋlla hal wʋsg tɩ b tall bas-yard ne-a. Bas-yard paasda vɩɩmã sõmblem hali n kɩt tɩ sẽn na yɩl n tõog n kell n vɩɩmde, a yaa tɩlae.” Zʋgnallã paasame tɩ “ned sẽn pa tar bas-yard pa tõe n mao a vɩɩmã pʋgẽ ye.”

Sẽn mik tɩ yaa tɩlae tɩ d tall bas-yard ne nedã, d tõe n talla bas-yard ne ãnd soab t’a pa tol n zãmb-do?

Teeg-y a Zeova ne y sũur fãa

Biiblã yeta tõnd yaa: “Teeg [a Zeova] ne f sũur fãa la f ra teeg f meng bãngr ye.” (Yelbũna 3:5) Sɩda, Wẽnnaam Gomdã raoonda tõnd n yɩlemdẽ tɩ d tall bas-yard ne Wẽnnaam a Zeova sẽn yaa d Naandã.

Bõe yĩng tɩ d tõe n tall bas-yard ne Wẽnnaam? Pipi, yaa tɩ Wẽnnaam a Zeova yaa sõngo. No-rɛɛs a Ezai ra gʋlsame: “Sõngo! Sõngo! [A Zeova] yaa sõngo.” (Ezai 6:3) Rẽ yĩnga, sõmblmã pa bũmb sẽn be yamleoog ne-y sɩda? Sɩd-sɩda, segd n yɩɩ woto, bala a Zeova sẽn yaa sõngã rat n yeelame t’a yaa yɩlemde, t’a pa tol n tõe n maan kɛgre, la tɩ b tõe n teeg-a-la zãng-zãnga. Ned me pa tõe n zãmb-a bɩ n kɩt t’a maan kɛgr  ye. La a Zeova leb n pa tõe n sãam bas-yard ning tõnd sẽn tar ne-a wã me ye.

Sẽn paase, d tõe n talla bas-yard ne a Zeova, bala a tõeeme la a ratame n teel neb nins sẽn balemd-a wã. Wala makre, a pãn-kãsengã kɩtame t’a tõe n tʋme. A manesmã fãa pʋsẽ, a tʋmda ne a tɩrlmã sẽn zems zãngã la a yamã. La a nonglmã sẽn ka mak-n-taagã n kɩt t’a maand bũmbã fãa. Tʋm-tʋmd a Zã ra gʋlsame tɩ “Wẽnnaam yaa nonglem.” (1 Zã 4:8) Wẽnnaam nonglmã pukda bũmb ning a sẽn maandã fãa pʋgẽ. A Zeova sõmblmã la a zʋg-kãsems a taabã fãa kɩtame t’a yaa Ba halaal la ned d sẽn tõe n sɩd tall bas-yard ne zãng-zãnga. Bũmb baa a ye, la ned ba a ye kae sẽn zems tɩ b tõe tall bas-yard ne-a n yɩɩg a Zeova ye.

Tall-y bas-yard ne a Zeova n paam sũ-noogo

Bũmb a to me sẽn kɩt tɩ d segd n tall bas-yard ne a Zeova yaa tɩ ned ba a yembr pa tõe n wʋm tõnd yɛlã võor sõma wa a Zeova ye. A miime tɩ ãdem-biig fãa rata koglgo, bas-yard la zems-n-taar sẽn kaoosd wakat fãa ne Naandã. Neb nins sẽn tar zems-n-ta-kãngã buudã tara bãan n yɩɩda. Rĩm a Davɩɩd ra kʋmb n yeelame tɩ “bark bee ned ninga zug sẽn delld [a Zeova.]” (Yɩɩl Sõamyã 40:5) Rũndã-rũndã, neb milyõ rãmb n tagsd wa a Davɩɩd ne b sũy fãa.

D ges makr a wãna. A Doris zĩnda Repiblik dominikɛnne, Alemayn, Gerɛs la Etazĩni. A yeelame: “Mam sũur nooma m sẽn tar bas-yard ne a Zeova wã. A mii mam yĩnsã, m tẽebã la m yĩn-sidsã yell gesgo. Zoa ye pa be n yɩɩd-a ye.” A Wolfgang sẽn yaa bʋʋd yel-mitã yeelame: “F sã n tar ned sẽn tʋll n sõng-f ne a sũur fãa, ned sẽn tõe la sẽn sɩd rat n maan-f neere, sɩd yaa bõn-kãseng menga!” A Ham sẽn dog Aazi n be Erop rũndã-rũndã wã yeelame: “Mam tara bas-m-yam t’a Zeova tara yɛlã fãa tɩɩm la t’a pa tudgd ye. Woto yĩnga, mam sũur nooma m sẽn tõe n teeg-a wã.”

Vẽenega, tõnd ned kam fãa segd n talla bas-yard ne d Naandã la ne neb a taabã me. Woto yĩnga, a Zeova sẽn yaa d zoa sẽn tar yam la minimã sagenda tõnd tɩ d bãng d sẽn tõe n tall bas-yard ne neb nins buudã. D sã n karemd Biiblã neere, d na n yãa sagls nins a sẽn kõt yel-kãng zugã.

D sẽn tõe n tall bas-yard ne neb ninsã

“Da rell nin-kãsems sẽn yaa ninsaalb sẽn ka tõe n fãag fooma ye.” Woto la yɩɩl-gʋlsdã gʋls-yã. (Yɩɩl Sõamyã 146:3) Gom-kãngã Wẽnnaam sẽn vẽneg tɩ b gʋlsã sõnga neb wʋsg tɩ b bãng tɩ neb wʋsg n pa segd ne tõnd bas-yardo. Baa neb nins b sẽn nand wʋsg n get-b wa “nin-kãsems” dũni-kãngã pʋgẽ wã, wala neb nins sẽn tar minim wʋsg zĩis kẽer bãngrã wall nug-tʋʋmã wɛɛngẽ wã mens pa segd ne tõnd bas-yard wakat fãa ye. Dũni kãngã “nin-kãsems” sor-wilgrã sẽn baasd ne tudgr naoor wʋsgã yĩng kɩtame tɩ tall bas-yard ne-b tõe n wa baas ne sũ-sãamse.

 Yaa sɩd tɩ woto pa segd n kɩt tɩ d ra tol n tall bas-yard ne ned ye. Baasgo, yaa vẽeneg tɩ d segd n tũusa d sẽn dat n tall bas-yard ne neb ninsã. Bõe zug la d segd n tik n tũus-ba? Tẽn-kʋdem wẽndẽ Israɛllã ra kõo makr a ye sẽn tõe n sõng-do. Sẽn da wa n lebg tɩlae tɩ b yãk neb n kõ-b zu-sobend sẽn yaa kãseng Israɛllã, b sagla a Moiiz t’a yãk ‘nin-yẽesens neba sʋka, sẽn zoet Wẽnnaam la sẽn yaa sɩd dãmba, la sẽn kis [zãmbo.]’ (Yikri 18:21) Bõe la woto tõe n zãms tõndo?

Nin-kãensã reng n wilgame tɩ b yaa wẽn-sakdba, tɩ b tõe n talla bas-yard ne-ba, tɩ b yaool n yãk-ba. B ra zoe n wilga vẽeneg tɩ b zoeta Wẽnnaam, tɩ b waoogda b Naandã neer la tɩ b pa rat n wa maan bũmb n sãam a sũur ye. Ra yaa vẽeneg ne nebã fãa tɩ nin-kãensã maooda wa b sẽn tõe tɛk fãa n tũud Wẽnnaam noyã. B ra kisa zãmbo, tɩ rẽ wilgdẽ tɩ b yaa burkĩmba, la tɩ baa ned sẽn da tar naam pa tõe n kɩt tɩ b sak zãmb ye. B pa na n tũnug ne bas-yard ning nebã sẽn tar ne-bã n bao n naf-b mense, bɩ n sõng b roagdb bɩ b zo-rãmb ye.

Rũndã-rũndã, kõn yɩ yam bũmb tɩ tõnd me tikd zʋg kãensã zut n baood d sẽn dat n tall bas-yard ne neb ninsã sɩda? Rẽ yĩnga, d mii neb sẽn tar manesem sẽn wilgd tɩ b zoeta Wẽnnaam bɩ? B rãmbã rɩka sard kãn-kãe n na n kell n tũ a noyã b vɩɩmã pʋgẽ bɩ? B mi-b-la wa neb sẽn zãagd-b mens ne yel-kɛg bɩ? B yaa pʋ-peelem dãmb n pa wẽnemsd yell n bao b mens nafr bɩ? Hakɩka, rap la pagb nins sẽn tar zʋg-kãensã buudã zemsa ne bas-yardo.

Ra koms-y raood b sã n wa sãam y sũur wakat ning ye

Sẽn mik tɩ wa tõog n tall bas-yard ne ned rɩkda sẽkã yĩnga, d sã n wa baood n na n tall bas-yard ne neda, d segd n talla sũ-mare. Sẽn são yaa f sẽn na n sɩng bilf-bilfu. Wãn-wãna? D tõe n yãka wakat n gũus nedã n ges a yel-manesmã sẽn yaa to-to yɛl kẽer pʋsẽ. Rẽ yĩnga, a maanda sɩd yel-bõoneg pʋsẽ bɩ? Wala makre, a sã n bõos bũmb n segd n wa lebse, a sɩd wat n lebsame bɩ? A sata tʋʋm nins b sẽn kõt-a wã lɛɛr bɩ? Sã n yaa rẽ, d tõe n yaool n talla bas-yard ne a soabã yel-kãsems pʋsẽ. Woto zemsa ne noor ning sẽn yet tɩ “ned ninga sẽn maand sɩd ne bũmb bilfu, a maanda sɩd ne bũmb kãseng me” wã. (Luk 16:10) D sã n tũusd d sẽn dat n tall bas-yard ne neb ninsã la d tar sũ-mare, tõe n sõng-d lame tɩ d põs sũ-sãams wʋsgo.

La yaa wãn-to masã, d sã n tar bas-yard ne ned t’a wa baas n zãmb-do? Neb nins sẽn zãmsd Biiblã tẽrame t’a Zezi tʋm-tʋmdbã zoe n bas-a-la yʋng ning b sẽn wa n na n yõk-a wã. A Zida Iskariot zãmb-a lame, la rabeem yõka tʋm-tʋmdb a taabã tɩ b zoe n bas-a. A Pɩɛɛr meng kɩɩsa naoor a tãab t’a pa mi a Zezi ye. La a Zezi bãnga vẽeneg tɩ yaa a Zida meng n yãk yam n zãmb-a. B sẽn bas a Zezi wakat kãngã sẽn yɩ toog wʋsg pʋgẽ wã yĩng pa gɩdg-a semen a wãna loogr poor t’a tall bas-yard ne a tʋm-tʋmdb 11 wã sẽn kellã ye. (Matɩe 26:45-47, 56, 69-75; 28:16-20) Woto, tõnd me sã n wa tagsdẽ tɩ d talla bas-yard ne ned t’a wa baas n zãmb-do, yɩta sõma tɩ d bao n bãng rẽ sã n sɩd wilgdame t’a sɩd ra yaa pʋ-lik soaba, bɩ sã n yaa a sẽn pa-zems-zãngã yĩng bal n kɩt t’a beege.

B tõe n talla bas-yard ne maam bɩ?

Ned sã n yãk yam n na n tũus a sẽn na n tall bas-yard ne neb ninsã, a segd n deng n soka a meng woto: ‘Rẽ yĩnga, b tõe n talla bas-yard ne mam mengã bɩ? Bas-yardã wɛɛngẽ, no-bʋs mam sẽn baood tɩ neb a tãabã tũ la mam meng segd n tũ?’

Hakɩka, b sẽn tõe n tall bas-yard ne ned ningã togsda sɩd wakat fãa. (Efɛɛz rãmba 4:25) A pa wẽnemded a goam sẽn na yɩl n noog a kɛlgdbã sũy a meng nafr yĩng ye. La b sẽn tõe n tall bas-yard ne ned ningã sã n pʋlem bũmb me a maanda a sẽn tõe fãa n pids-a. (Matɩe 5:37) Ned sã n togs-a a sũurẽ gomde, a talld-a lame, la a leb n pa gom-to-ned ye. B sẽn tõe n tall bas-yard ne a soabã pa zãmbd a kẽed-n-taag ye. A pa get filim dãmb bɩ sɛb sẽn wilgd yoob yɛla, la a pa tagsd b yelle, la a pa maand rolemd ne pagb ye. (Matɩe 5:27, 28) B sẽn tõe n tall bas-yard ne ned ningã tʋmda wʋsg sẽn na yɩl n tõog n ges a meng la a zak rãmb yelle, la a pa  maand kʋɩɩng n baood ligd-nana n wẽgd neb a taabã ye. (1 Tɩmote 5:8) D sã n ning no-kãensã sẽn zems zãng la sẽn yit Gʋlsg Sõamyã pʋgẽ wã d yamẽ, na n sõng-d lame tɩ d tõog n bãng d sẽn tõe n tall bas-yard ne neb ninsã n welge. Sẽn paase, tõnd ned kam fãa sã n tũud no-kãensã, na n kɩtame tɩ neb a taabã tõog n tall bas-yard ne-do.

Vɩɩmd dũni pʋgẽ nebã fãa sẽn na n yɩ pʋ-peelem dãmba, tɩ bas-yard pa na n ye kong tɩ wa ne sũ-sãams na n talla yamleoog hal wʋsgo! Rẽ yĩnga woto yaa bũmb sẽn pa tõe n yɩ sɩd bɩ? Sã n yaa ne neb nins sẽn sɩd tẽed Biiblã kãabgã, woto tõe n sɩd yɩɩme, bala Wẽnnaam Gomdã reng n goma “tẽn-paalg” sẽn wat yell tɩ zãmbo, zɩlem-beedo, wẽgb la sũ-sãamse, bãas la kũum meng pa na n zĩnd a pʋgẽ ye! (2 Pɩɛɛr 3:13; Yɩɩl Sõamyã 37:11, 29; Wilgri 21:3-5) Rẽ yĩnga pa sek tɩ y sɩd bao n bãng n paas sɩda? Y sã n data, yaa ne sũ-noog la a Zeova Kaset rãmbã na n kõ-y kɩbay a taab sẽn tar yõod wʋsgo.

[Foto, seb-neng a 4]

D sã n pa tol n tar bas-yard ne neb a taabã, sãamda tõnd meng sũ-noogã

[Foto, seb-neng a 5]

D tõe n talla bas-yard ne a Zeova n yɩɩd neba fãa

[Foto rãmba, seb-neng a 7]

Tõnd fãa tʋll n talla zems-n-taar sẽn tik bas-yard zug ne taaba