A Zeova na n kaoa nin-wẽnsã bʋʋdo
A Zeova na n kaoa nin-wẽnsã bʋʋdo
“Bɩ y segl n seg y Wẽnnaamã.”—AMOS 4:12.
1, 2. Bõe n kɩt tɩ d tõe n kɩs sɩd tɩ Wẽnnaam na n kɩtame tɩ wẽnemã sa?
A ZEOVA na n wa kɩtame tɩ wẽnemã la namsgã sa tẽn-kãngã zug bɩ? Yʋʋm kob-gĩnd 21 soab kãngã sɩngrẽ, sok-kãngã zemsa wʋsg n yɩɩd menga. Yaa wa d sẽn teesẽ fãa, d yãta kaset sẽn wilgd wẽnemã ninsaalbã sẽn maand taabã vẽenega. Ad d sɩd tʋlla ne d sũy fãa n vɩɩmd dũni nen-kɛglem tʋʋma, bi-beer la zãmb sẽn kaẽ!
2 La zu-noogo, d tõe n kɩsa sɩd zãng t’a Zeova na n kɩtame tɩ wẽnemã sa. Yaa Wẽnnaam zʋg-sõma wã n kõt tõnd bas-m-yam t’a na n zaba ne nin-wẽnsã. A Zeova yaa tɩrga, la a kaooda bʋʋd ne tɩrlem. Yɩɩl Sõamyã 33:5 pʋgẽ, a Gomdã yetame t’a “nonga tɩrlem la bʋʋd sẽn yaa tɩrga.” Tɩ yɩɩll a to yetẽ t’a Zeova “kisa ned sẽn nong n maan a taab pãnga.” (Yɩɩl Sõamyã 11:5) Sɩd-sɩda, Wẽnnaam a Zeova sẽn yaa pãng sẽn tõe fãa soabã, sẽn nong tɩrlem la a kaood bʋʋd tɩrgã pa na n bas tɩ bũmb ning a sẽn kisã zĩnd wakat fãa ye.
3. Bõe yell la d na n gom wʋsg masã a Amos bãngr-gomdã d sẽn na n vaeesã pʋgẽ?
3 Ges-y bũmb a to sẽn kɩt tɩ d tõe n kɩs sɩd t’a Zeova na n yiisa wẽnemã. Yaa a pĩnd wẽndẽ yel-manesmã kɩbay b sẽn gʋls Biibla pʋgẽ wã n wilgd rẽ. A Amos sebrã pʋgẽ, d yãta mak-kãsems sẽn wilgd a Zeova sẽn tar manesem ning ne nin-wẽnsã wakat buud fãa wã. D sã n vaees a Amos bãngr-gomdã n paase, d na n bãnga yɛl a tãab Wẽnnaam bʋ-kaoorã wɛɛngẽ. Pipi, a bʋ-kaoorã zemsa wakat fãa. Yiib-n-soaba, ned pa tõe n põs bʋ-kaoor kãng ye. La tãab-n-soaba, a Zeova pa sãamd nebã yaar ye, a sãamda nin-wẽnsã, la a zoeta neb nins sẽn na n sak n tek yam n kos sugrã nimbãanega.—Rom dãmba 9:17-26.
Wẽnnaam bʋ-kaoorã zemsa wakat fãa
4. Yɛ la a Zeova tʋm a Amose, la bõe yĩnga?
4 Tẽeg-y t’a Amos wakatã, Israɛll buudã ra zoe n welga a yiibu. Zida sẽn yaa goabg rĩungã sẽn da tar buud a yiibã, la Israɛll sẽn da yaa rɩtg rĩungã sẽn da tar buud piigã. A Zeova yãka a Amos t’a yɩ a no-rɛɛsa, n tʋm-a t’a yi Zida sẽn yaa a ba-yirã n kẽng Israɛll n tɩ moon Wẽnnaam bʋ-kaoorã.
5. A Amos reng n taasa a bãngr-goamã tẽn-bʋs zut n ning-b taale, la yaa bʋʋm bʋg a yembr yĩng n kɩt tɩ tẽn-kãens ra zems ne Wẽnnaam sɩbgrã?
5 A Amos sẽn na n sɩng a tʋʋmdã a pa reng n togs Israɛll rɩtg rĩungã sẽn yaa kɩɩsdã a Zeova bʋ-kaoorã ye. A sɩngame n togsd Wẽnnaam bʋ-kao tẽns a yoob sẽn gũbg Israɛllã zutu. Yaa Siiri, Filisti, Tiire, Edom, Amon la Moaabe. Tẽn-kãensã sɩd ra zemsa ne sɩbgr bɩ? Hal sõma! Bũmb a yembr yaa tɩ b ra yaa a Zeova nin-buiidã bɛɛb meng-menga.
6. Bõe yĩng tɩ Wẽnnaam da na n wa ne yel-beed Siiri, Filisti la Tiir zutu?
6 Wala makre, a Zeova ninga Siiri rãmbã taale, ‘b sẽn pãb Gileaadã’ yĩnga. (Amos 1:3) Siiri rãmbã reega tẽns Gileaad sẽn yaa Israɛll babg n be Zʋrdẽ kʋɩlgã yaang babgẽ wã, la b nams Wẽnnaam nin-buiidã wʋsg beenẽ. Yaa wãn to yẽ ne Filisti la Tiire? Filisti nebã taalã yaa b sẽn da tall Israɛll nebã n kẽng yembd n tɩ koos-b ne Edom nebã yĩnga. Tiir toandbã me koosa Israɛll neb kẽer yembdo. (Amos 1:6, 9) Yãmb wee n tags n gese! B yõga Wẽnnaam nin-buiidã n koos yembdo. Dẽnd pa lingr la a Zeova sẽn na n kɩt tɩ yel-beed wa Siiri, Filisti la Tiir zutã ye.
7. Wãn to la Edom, Amon la Moaab ra kĩ ne Israɛlle, la manesem bʋg la b tall ne Israɛll nebã?
7 Edom, Amon la Moaab ra tara bũmb a ye sẽn da loe-b ne taaba. B fãa ra kĩi ne Israɛll buudã. Edom nebã ra yaa a Abrahaam yagense, ne a Zakoob kĩn-kir taag a Ezayu maasem. Rẽnd b tõe n yeelame tɩ b ra yaa Israɛll nebã saam-biisi. Amon ne Moaab nebã ra yita a Abrahaam ba-biig biig a Lot pendẽ. La rẽ yĩnga, Edom, Amon la Moaab nebã wilga b manesmã pʋgẽ tɩ Israɛll nebã ne bãmb yaa rogem bɩ? Ayo! Edom zẽka sʋʋg n zab ne “b saam-biis” n pa zoe b nimbãaneg ye. Amon nebã ra talla wẽnem wʋsg tɩ loog ne Israɛll neb nins sẽn da yaa yembsã. (Amos 1:11, 13) Baa ne a Amos sẽn pa gom Moaab sẽn nams Wẽnnaam nin-buiidã yell vẽenegã, Moaab nebã ra zoe n kɩɩsa Israɛll wʋsgo. Tẽn-kãensã sẽn kĩ ne taabã sɩbgr da na n yɩɩ toaaga. A Zeova kãabame t’a na n kɩtame tɩ sãoong sẽn yaa toaag wa b zutu.
Ned pa tõe n põs Wẽnnaam bʋ-kaoorã ye
8. Bõe yĩng tɩ tẽns a yoobã sẽn yaa Israɛll yagsã ra pa tõe n põs Wẽnnaam sɩbgrã?
8 Vẽenega, tẽns a yoobã yell b sẽn gom a Amos bãngr-gomdã sɩngrẽ wã ra zemsa ne Wẽnnaam sɩbgrã. B ra pa tar b sẽn na maaneg n tõog n põs sɩbg-kãnga ye. Sẽn sɩng ne Amos sak a 1 verse a 3, n tɩ ta sak a 2 verse a 1 wã, a Zeova yeela woto naoor a yoobe: “M ka na n bas-b taal ye.” Wa sẽn zems ne a sẽn yeelã, a kell n pidsa a gomdã n sɩd sɩbg tẽn-kãense. Pĩnd yɛlã kɩbay b sẽn gʋlsã wilgdame tɩ yel-beed n sɩd ra paam tẽn-kãensã fãa. Bãng-y tɩ tẽn-kãensa b naase, sẽn dat n yeel tɩ Filisti, Moaab, Amon la Edom buudã pa ket ye!
9. Bõe la Zida nebã ra zems ne, la bõe yĩnga?
9 A Amos bãngr-goam nins sẽn pʋgdã goma tẽng a yopoe soabã yelle, yẽ meng ba-yirã sẽn yaa Zida soolmã. Ra segd n linga a Amos kɛlgdbã sẽn da be Israɛll rɩtg soolmẽ wã, b sẽn wʋm a sẽn moond tɩ Wẽnnaam na n sɩbga Zida rĩungã. Bõe yĩng tɩ Zida nebã ra zems ne sɩbgre? Amos 2:4 yetame: ‘Bala bãmb ka sak m tõoda ye.’ A Zeova pa ges b sẽn kɩɩs a tõogã ne yamleoogã wa yel-faag ye. Sã n yaa ne Amos 2:5, a reng n togsame: “Mam na n kɩtame tɩ bugum zĩnd Zida tẽnga pʋgẽ n dɩ Zerizalɛm na-yirã.”
10. Bõe yĩng tɩ Zida ra pa tõe n põs yel-beedã?
10 Zida sẽn da yaa kɩɩsdã ra pa tõe n põs yel-beedã sẽn watã ye. Yaa naoor a yopoe soab masã la a Zeova yeel woto: ‘M ka na n bas-b taal ye.’ (Amos 2:4) Sɩbgr ning b sẽn da reng n togs Zida zugã sɩd waame, Babilon nebã sẽn wa n sãam-a yʋʋmd 607 sẽn deng Kirist zãmaanã. D leb n nee ka tɩ nin-wẽnsã pa tõe n põs Wẽnnaam bʋ-kaoorã ye.
11-13. A Amos reng n togsa bãngr-goam bu-bʋg zugu, la wãn to la b ra wẽgd nebã beenẽ?
11 Ra yaa no-rɛɛs a Amos sẽn moon a Zeova bʋ-kaoorã tẽns a yopoe zut paalem. Kẽer da tõe n tagsdame masã t’a ra togsa bãngr-goamã n sa. La b ra belgda b mense. A Amos ra ket n tara goam n na n togse. A Amos ra segd n deng n tɩ taasa Israɛll rɩtg rĩungã bʋ-kaoor sẽn yaa toaag koɛɛga. Israɛll ra zemsa ne Wẽnnaam sɩbgrã, buudã vɩɩm manesem la a wẽn-tũudmã sẽn sãam wʋsgã yĩnga.
12 A Amos bãngr-goamã puka wẽgb ning sẽn da wae Israɛll soolmã pʋgẽ wã. Rẽ wɛɛngẽ, Amos 2:6, 7 yetame: “Zusoaba yeelame: ‘Yaa Israɛll neba yel-wẽn a tãaba ne b yel-wẽn a naas soaba yĩng n kɩt tɩ m ka na n bas-b taal ye. Bala, bãmb yõga nin-tɩrs n koose. La b yõga naong rãmb n tek ne neooda. Bãmb tabda nimbãan-dãmb zutu, la b rigd naong rãmb tɩ b ra tũ sor ye.’ ”
13 B ra koosa nin-tɩrsã. Tõe tɩ rat n yeelame tɩ bʋʋd sasa, bʋ-kaoodbã ra reegda ligd bɩ wanzuri, n ningd bʋʋm dãmbã taale. Sam dãmbã ra koosda naong rãmbã yembdo, tõe tɩ yaa samd sẽn pa yɩɩd “neooda” ligd yĩnga. Sẽn da pa zoet-b ned nimbãanegã ra ‘tabdame,’ bɩ b ra baoodame n na n sik “nimbãan dãmba” tẽng hal tɩ b wʋkd wubsg n lobd b zutu, tɩ rẽ rat n yeel tɩ yel-beed n paam-ba, bɩ tɩ sũ-sãang bɩ yãnd n tar-ba. Zãmbã ra yaa wʋsg hal tɩ kɩt tɩ ‘naong rãmba’ ra pa tõe n paam tɩ b kao b bʋʋd tɩrg ye.
14. Ãnd dãmb la b ra namsd Israɛll buud piigã rĩung pʋgẽ?
14 Ges-y neb nins b sẽn da namsdã: Ra yaa nin-tɩrse, nimbãan dãmba, naong rãmba. A Zeova sẽn maan Tõogã kaool ne Israɛllã ra baoodame tɩ b zoe ka pãng rãmbã la naong rãmbã nimbãanega. La ne sẽn da be-b Israɛll buud piigã rĩung pʋgẽ wã, yɛlã ra yaa wẽng wʋsgo.
“Bɩ y segl n seg y Wẽnnaamã”
15, 16. a) Bõe yĩng tɩ b keoog Israɛll nebã tɩ b ‘segl n seg b Wẽnnaamã’? b) Wãn to la Amos 9:1, 2 wilgd tɩ nin-wẽnsã pa tõe n põs Wẽnnaam sɩbgrã? d) Bõe n paam Israɛll buud piigã rĩung yʋʋmd 740 sẽn deng Kirist zãmaanã?
15 Yoobã la yel-wẽn a taab sẽn da pid Israɛllã yĩnga, no-rɛɛs a Amos ra bee bʋʋm la a sẽn keoog buudã sẽn yaa tõatã n yeel tɩ, “bɩ y segl n seg y Wẽnnaamã.” (Amos 4:12) Israɛll sẽn yaa kɩɩsdã ra pa tõe n põs Wẽnnaam bʋ-kaoorã sẽn da kolgã pidsg ye, bala a Zeova togsa naoor a nii tɩ: “M ka na n bas-b taal ye.” (Amos 2:6) A Zeova yeta nin-wẽns nins sẽn na n mak solgrã woto: “Neb a taab sã n kelle, mam na n kɩtame tɩ b pa tãp pʋgẽ, tɩ b ned ba a ye ra wa põs ye. Baa bãmb sã n tu bok n kẽ kɩɩm-kulgu, mam na n yõg-b lame. La b sã n dʋ n ta saasẽ, mam na n yiisa bãmb be.”—Amos 9:1, 2.
16 Baa nin-wẽnsã sã n da tu bok n “kẽ kɩɩm-kulgu,” sẽn makd tẽngã bok ning b sẽn tõe n solgẽ sõma n yɩɩdã, b ra pa tõe n põs a Zeova sɩbgrã ye. B ra pa tõe me n zoe n “dʋ n ta saasẽ,” sẽn dat n yeel tɩ mak n paam solgr zĩig tãn-lug-lugã zutã n põs Wẽnnaam sɩbgrã ye. A Zeova keoogrã ra yaa vẽenega: Solgr zĩig ra pa be tɩ yẽ pa tõe n ta ye. Wẽnnaam tɩrlmã ra baoodame tɩ Israɛll rĩungã kolg n togs a tʋʋm-wẽnsã yĩnga. Wakat kãng sɩd da wa n taame. Yʋʋmd 740 sẽn deng Kirist zãmaanã, sẽn zems yʋʋm 60 a Amos sẽn gʋls a bãngr-gomdã poore, Israɛll rĩungã lʋɩɩ Asiri rãmbã sẽn wa n zab n tõog-bã nusẽ.
Wẽnnaam bʋ-kaoorã pidsg wakate, a pa sãamd nebã yaar ye
17, 18. Bõe la Amos sak a 9 wilgd Wẽnnaam nimbãan-zoeerã wɛɛngẽ?
17 A Amos bãngr-gomdã sõng-d lame tɩ d bãng tɩ wakat fãa, Wẽnnaam bʋ-kaoorã zemsame, la tɩ ned pa tõe n põs-a ye. La a Amos sebrã leb n zãmsda tõnd t’a Zeova bʋ-kaoorã pidsg sasa, a pa sãamd nebã yaar ye. Wẽnnaam tõe n yãa nin-wẽnsã, baa b sẽn solgẽ fãa n sɩbg-ba. A leb n tõe n yãa neb nins sẽn tek yam n kos sugr n yaa tɩrsã, neb nins sẽn zems ne a nimbãan-zoeerã. Rẽ yaa vẽeneg a Amos sebrã yaoolem sak pʋgẽ.
18 Sã n yaa ne Amos sak a 9, verse a 8 wã a Zeova yeelame: “M ka na n sãam a Zakoob buuda zãng ye.” Sã n yaa ne verse 13 n tɩ ta 15 wã, a Zeova kãabame t’a na n “lebsa” a neba b “tẽnga pʋgẽ.” A na n zoeya b nimbãanega, la b na n paama bãan la yidgri. A Zeova kãabame tɩ “neb kẽer n na n kẽebdẽ tɩ neb kẽer pʋgd n bʋtẽ.” Mams-y n gese: tigisg sẽn yaa wʋsg hal tɩ tigisgã pa yã n sa la koob la bʋdb wakat zoe n ta ye!
19. Bõe n paam Israɛll la Zida neb nins sẽn kellã?
19 B tõe n yeelame t’a Zeova sẽn kao Zida la Israɛll nin-wẽnsã bʋʋd n ning b taalã pa yɩ zond yaar ye, bala a zoeya neb nins sẽn tek yam n kos sugr la b yɩ sakdbã nimbãanega. Lebs-n-lugl kãng yell b sẽn da reng n togs Amos sak a 9 pʋgẽ wã pidsame. Rẽ yɩɩ wakat ning Israɛll la Zida neb nins sẽn da ketã sẽn tek yam n kos sugrã sẽn wa n yi b yembdẽ wã yʋʋmd 537 sẽn deng Kirist zãmaanã n wa wã. B sẽn lebg n wa b ba-yirã, b lebs n lugla Wẽnnaam baleng hakɩkã. B leb n mee b yiyã la b sel viyn tɩɩs la zardẽ rãmb bãan pʋgẽ.
A Zeova taal ningr bʋ-kaoorã na n pidsame!
20. Tõnd sẽn vaees bʋ-kaoor koees nins a Amos sẽn togsã kõta tõnd bas-m-yam bʋgo?
20 Tõnd sẽn vaees Wẽnnaam bʋ-kaoor koeesã a Amos sẽn moona segd n kõo tõnd bas-m-yam t’a Zeova na n kɩtame tɩ wẽnemã sa tõnd wakatã. Bõe yĩng tɩ d tõe n tẽ woto? Pipi, pĩnd mak-kãensã sẽn wilgd a Zeova manesem ne nin-wẽnsã sẽn yɩ to-to wã sõngda tõnd tɩ d bãng a sẽn na n tʋm to-to tõnd wakatã. Yiib-n-soaba, Wẽnnaam sẽn sɩbg Israɛll rĩungã sẽn kɩɩsd sɩdã wilgda vẽeneg t’a na n sãama kiris-neb ne yʋʋr siglsã. Bãmb n tar taal n yɩɩd ‘Babilon kãsengã’ sẽn makd ziri tũudmã fãa sẽn yaa wa soolem tẽngã zugã sʋkã.—Wilgri 18:2.
21. Bõe yĩng tɩ zems tɩ Wẽnnaam kao kiris-neb ne yʋʋr siglsã bʋʋd n sɩbg-ba?
21 Sãmbg kae tɩ kiris-neb ne yʋʋrã siglsã zemsa ne Wẽnnaam sɩbgrã ye. Wẽngã sẽn maand a pʋgẽ wã n wilgd t’a sɩd zemsa ne rẽ. A Zeova sẽn na n kao kiris-neb ne yʋʋr siglsã la a Sʋɩtãan dũniyã sẽn ketã bʋʋdã zemsame. Sor kae n põsd rẽ ye, bala bʋ-kaoorã pidsg wakate, Amos sak a 9, verse a 1 sẽn yet bũmb ningã na n pidsame: ‘B ned ba a ye ka na n põs ye.’ N-ye, baa nin-wẽnsã sẽn solgẽ fãa, a Zeova na n yã-b lame.
22. Yel-bʋs sẽn tɩ loe ne Wẽnnaam bʋ-kaoorã n yaa vẽeneg 2 Tesalonik rãmba 1:6-8 pʋgẽ?
22 Wẽnnaam bʋ-kaoorã zemsa wakat fãa, ned pa tõe n põs-a, la Wẽnnaam pa sãamd nebã yaar ye. Tʋm-tʋmd a Poll gom-kãensã n wilgd tɩ sɩd yaa woto: “Wẽnnaam na n maana tɩrga n lebs neb nins sẽn namsd yãmba toogo. La yãmb sẽn namsdã, b na n kõo yãmb vʋʋsg ne tõndo wakat ninga Zusoab a Zezi sẽn na n yi [saasẽ] ne bãmb malɛk kãsemsã n wa wã. Bãmb na n puka bug-witim pʋgẽ. Bãmb na n sɩbga neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã.” (2 Tesalonik rãmba 1:6-8) “Wẽnnaam na n maana tɩrga,” n dol neb nins sẽn tar taalã n sɩbg-ba, b sẽn da nams neb nins sẽn paam vʋʋsem sõng zaeebã yĩnga. B pa na n tõog n põs bʋ-kaoor ning sẽn wat b zugã ye, bala nin-wẽnsã pa na n põse, ‘a Zezi sã n wa puk ne a malɛk rãmbã sẽn tar pãngã bug-witim pʋgẽ’ ye. Wẽnnaam bʋ-kaoorã pidsg pa na n yɩ ne zond-yaar ye, bala a Zezi na n wa sɩbga “neb nins sẽn ka mi Wẽnnaam la sẽn ka sakd tõnd Zusoab a Zezi Koe-noogã.” Woto, Wẽnnaam bʋ-kaoorã pidsg na n waa ne belsg n kõ wẽn-zoɛtbã sẽn namsd toogã pʋgẽ wã.
Saagr n kõ nin-tɩrsã
23. Saagr la bels-bʋg la a Amos sebrã kõt tõndo?
23 A Amos bãngr-gomdã tara koɛɛg sẽn kõt belsg la saagr me n kõ neb nins sẽn nong tɩrlmã. Wa b sẽn deng n togs a Amos sebrẽ wã, a Zeova pa sãam a pĩnd wẽndẽ nin-buiidã zãng ye. A baas n tigma Israɛll la Zida yembsã, n kɩt tɩ b leb b ba-yirã n ning-b bark n kõ-b bãan la a kɩt tɩ b yidg sõma. Rẽ võor yaa bõe ne tõnd wakatã? Rẽ kɩtdame tɩ d kɩs sɩd tɩ Wẽnnaam bʋ-kaoorã pidsg wakate, nin-wẽnsã sẽn solgẽ zĩig ning fãa a Zeova na n yã-b lame, la a na n yãa neb nins sẽn zems ne a nimbãan-zoeerã me, baa b sẽn beẽ zĩig ning tẽng zugu.
24. Wãn to la a Zeova rũndã-rũndã sõgen dãmbã paamd barka?
24 Nananda, d sẽn gũud t’a Zeova wa sãam nin-wẽnsã sasa, tõnd sẽn yaa a sõgen dãmb sẽn sakd-a wã d paamda bõe? A Zeova ningda tõnd bark n kɩtdẽ tɩ d yidgd tẽebã wɛɛngẽ! D tara baleng buud sẽn pa naag ne ziri la tags-goalem nins sẽn yit kiris-neb ne yʋʋr siglsã ziri zãmsgẽ wã ye. A Zeova leb n ninga tõnd bark me n kõ-d tẽeb rɩɩb wʋsgo. La tẽeg-y tɩ bark kãensã sẽn yaa wʋsg n yit a Zeova nengẽ wã kõt-d-la zɩɩb sẽn yaa kãsenga. A Zeova gũudame tɩ tõnd keoog neb a taabã tɩ bʋ-kaoor n wate. D segd n maana d sẽn tõe fãa n bao neb nins sẽn tar “yam-sõng vɩɩm sẽn-kõn-sa wã yĩngã.” (Tʋʋma 13:48, NW ) N-ye, d tʋll n sõnga neb wʋsg wa d sẽn tõe tɛk tɩ b paam tẽebã bark tõnd sẽn tar masã wã. Sẽn paase, d ratame tɩ b põs Wẽnnaam sẽn na n wa kao nin-wẽnsã bʋʋd n sãam-bã sẽn kolgdã sasa. La sẽn na yɩl n paam bark kãensã, d segd n talla sũur sẽn yaa tɩrga. Wala d sẽn na n yã zãmsg ning sẽn pʋgdã pʋgẽ wã, b wilga rẽ me a Amos bãngr-gomdã pʋgẽ.
Wãn to la y na n leoke?
• Wãn to la a Amos bãngr-gomdã wilgd t’a Zeova bʋ-kaoorã zemsa wakat fãa?
• Kaset bʋg la a Amos kõ n wilg tɩ ned pa tõe n põs Wẽnnaam bʋ-kaoorã?
• Wãn to la a Amos sebrã wilgd tɩ Wẽnnaam pa sɩbgd nebã yaare?
[Zãmsgã sogsgã]
[Foto, seb-neng 12, 13]
Israɛll rĩungã pa põs Wẽnnaam bʋ-kaoorã ye
[Foto, seb-neng 15]
Yʋʋmd 537 sẽn deng Kirist zãmaanã, Israɛll la Zida neb n yi Babilon yembdẽ wã n wa