Wãn to la d tõe n kogl d mens ne zĩn dãmbã?
Wãn to la d tõe n kogl d mens ne zĩn dãmbã?
“Malɛk rãmb nins sẽn da ka tall bãmb naam, la sẽn bas b zĩigã, Wẽnnaam balga bãmb wakat sẽn ka sɛt yĩng lik bida pʋgẽ n gũudẽ tɩ bʋʋd kaoob sẽn yaa kãsengã raar ta.”—ZIID 6.
1, 2. Sogs-bʋs la d sokd d mens a Sʋɩtãan la zĩn dãmbã wɛɛngẽ?
“YÕK-Y y mens n gũusi; tɩ bõe, yãmb bɛyã sẽn yaa Sʋɩtãanã gõoda wa gɩgemd sẽn kelemda, n baood a sẽn tõe n paam a soab n sãame.” Woto la tʋm-tʋmd a Pɩɛɛr sagl-yã. (1 Pɩɛɛr 5:8) Tʋm-tʋmd a Poll me goma zĩn dãmbã yell n yeel woto: “Mam ka rat tɩ yãmb paam lagem-n-taar ne zĩn dãmb ye. Yãmb ka tõe n yũ Zusoabã bõn-yũudla, la zĩn dãmbã bõn-yũudl ye; la yãmb ka tõe n dɩ Zusoabã rẽnda, la zĩn dãmbã rẽnd ye.”—1 Korẽnt dãmba 10:20, 21.
2 La a Sʋɩtãan ne zĩn dãmbã yaa ãnd rãmba? Maana wãn tɩ b wa beẽ, la rẽ sɩnga wakat bʋgo? Rẽ yĩnga yaa Wẽnnaam n naan-b bɩ? Pãn-tõog bʋg la b tar ãdem-biisã zutu? Rẽ yĩnga d tõe n kogla d mens ne-b bɩ?
Maana wãn t’a Sʋɩtãan ne zĩn dãmbã wa beẽ?
3. Wãn to la Wẽnnaam malɛk wa n lebg Sʋɩtãana?
3 Pipi ninsaalbã naaneg poor bilf bala, b sẽn da wa n be Edɛn zẽedã zĩigẽ wã, Wẽnnaam malɛk n yik n lebg tõta. Bõe yĩnga? Bala, a sũur da pa noom ne naam ning a Zeova sẽn da kõ-a saasẽ wã ye. B sẽn wa n naan a Ãdem ne a Hawa wã, a gesame t’a tõe n tũnuga ne rẽ n kɩt tɩ b bas Wẽnnaam sakr la a balengo, n balem yẽ. Malɛg-kãngã sẽn kɩɩs Wẽnnaam la a kɩt tɩ pipi ninsaalbã maan yel-wẽndã, a lebga Sʋɩtãana. Kaoosg zugẽ, malɛgs a taab me n lebg tõtba. Wãn to?—Sɩngre 3:1-6; Rom dãmba 5:12; Wilgri 12:9.
4. Sẽn deng sãoong sa-kãsengã niib a Nowe wakatẽ wã, bõe la malɛg-tõtb maan-yã?
4 Gʋlsg Sõamyã wilgd-d lame tɩ sẽn deng sãoong sa-kãsengã niib a Nowe wakatẽ wã, malɛgs n tʋlg kom-pugli tẽngã zugu, tɩ kɩt tɩ b maan bũmb sẽn pa segde. Kibarã yeta woto: “Wẽnnaam kom-dibli wã yãame tɩ ninsaalbã kom-pugli wã yaa neeba, la bãmb dɩgsa b sẽn dat b rãmbã fãa n maan b pagba.” Wẽnnaam sẽn pa naan malɛgsã tɩ b lagem ne pagbã yĩng kɩtame tɩ kamb nins b sẽn dogã yɩ yag-m-sʋgse. B ra yaa nin-wobdo. (Sɩngre 6:2-4) Malɛg-kãensã sẽn kɩɩs Wẽnnaamã, bãmb me lebga tõtb wa a Sʋɩtãana.
5. A Zeova sẽn kɩt tɩ sãoong sa-kãseng ni wã, bõe n paam malɛg-tõtbã?
5 Sa-kãseng ning a Zeova sẽn kɩt tɩ ni wã sãama nin-wobdã ne b ma rãmbã. Yɩɩ tɩlae ne malɛg-tõtbã tɩ b tedg b mens n ye lebg malɛgs n leb saasẽ. La Wẽnnaam pa sak tɩ b leb b pĩnd zĩisẽ wã ye. A kẽes-b-la “bog-zulung sẽn yaa lik bida pʋgẽ,” sẽn dat n yeel tɩ b pa le tar zems-n-taar ne Wẽnnaam ye.—Ziid 6; 2 Pɩɛɛr 2:4.
6. Wãn-wãn la zĩn dãmbã tudgd nebã tɩ b maan bãmb raabo?
6 Malɛg-wẽnsã sẽn pa tõog n ta b pĩnd zĩisẽ wã tɛka b lebga a Sʋɩtãan poorẽ dãmba, n sõngd-a n tʋmd tʋʋm wẽnse. Wakat kãng tɛk me b pa ye tõe n lebg ninsaalb ye. La baasgo, b tõe n kɩtame tɩ nebã tʋm daglem buud toor-toore. Zĩn dãmbã leb n tũnugda ne bagre, sõodo, la tɩt a taab maaneg n tudgd ãdem-biisã tɩ b maand bãmb raabo. (Tõodo 18:10-13; 2 Kibaya 33:6) La b na n wa sãama a Sʋɩtãan ne a malɛg-wẽnsã fãa tɩ b ra tol n ye zĩnd ye. (Matɩe 25:41; Wilgri 20:10) La nananda, d segd n maoome n da bas tɩ b tõog-d ye. D segdame me n bao n bãng a Sʋɩtãan pãn-tõogã sẽn ta zĩig ninga, la d sẽn tõe n kogl d mens ne yẽ ne a zĩn dãmbã to-to.
A Sʋɩtãan pãn-tõogã taa zĩ-bʋgo?
7. Pãn-tõog bʋg la a Sʋɩtãan tar ãdem-biisã zutu?
7 A Sʋɩtãan sɩng n paoogda a Zeova hal daar zãra. (Yelbũna 27:11) La a tõog n kɩtame me tɩ neb wʋsg paoogd Wẽnnaam. Pipi Zã 5:19 yeelame tɩ “dũniyã fãa bee wẽng soabã nugẽ.” Yaa rẽ yĩng la a Sʋɩtãan sẽn da tõog n pʋlem a Zezi t’a na n kõ-a-la “dũniyã soolem fãa” n na n mak-a wã. (Luk 4:5-7) Tʋm-tʋmd a Poll goma a Sʋɩtãan yell n yeel woto: “Sã n yaa tɩ tõnd koe-noogã ket n solgame, a solga ne neb nins sẽn na n sãamã. Bãmb yaa neb nins sẽn ka tẽebo, la neb nins dũni kãngã wẽnnaam sẽn lud b yam tɩ b ra yã koe-noogã vẽenem sẽn pukd Kirist ziirã sẽn yaa Wẽnnaam wẽnegã.” (2 Korẽnt dãmba 4:3, 4) A Sʋɩtãan “yaa ziri yagda, la ziri ba,” la a maanda a meng wa “vẽenem malɛka.” (Zã 8:44; 2 Korẽnt dãmba 11:14) A tara pãnga, sẽn paase, a mi a sẽn tõe n maan to-to n lud dũniyã nanambs la b poorẽ dãmbã yam. A tũnugda ne kibay sẽn pa sɩda, n paas tũudmã taoor dãmb sẽn zãmsd nebã soalem la ziri ninsã n tudgd ãdem-biisã.
8. Bõe la Biiblã yet a Sʋɩtãan pãn-tõogã wɛɛngẽ?
8 Yʋʋm kobs-nu sẽn deng a Zezi rogmã, no-rɛɛs a Daniɛll wakatẽ wã, bũmb n zĩnd tɩ wilgd vẽeneg t’a Sʋɩtãan sɩd tara pãnga. A Zeova ra tʋma malɛk t’a tɩ keng a Daniɛll raoodo. La zĩn sẽn da gũud Pɛrs naabã n mak n na n gɩdg-a. Wẽnnaam malɛkã maoa ne-a n maan dasem 21 hal t’a “Mikaɛll sẽn yaa [malɛgsã] na-kãseng a ye wã” na n tɩ sõng-a. Kiba-kãng leb n gomda zĩn sẽn gũud Gɛrɛs naab me yelle. (Daniɛll 10:12, 13, 20) Wilgri 13:1, 2 wã pʋgẽ, b bilgda a Sʋɩtãan wa “dragõ” sẽn kõt we-rũngã sẽn makd dũniyã politik siglsã a pãngã, a naamã la noor sẽn yaa kãsenga.
9. Kiris-nebã zabda ne ãnd dãmba?
9 Rẽ n so tɩ tʋm-tʋmd a Poll sẽn gʋls bũmb ningã pa ling-d ye. A gʋlsa woto: ‘Tõnd zabr ka be ne ninsaal ye, la a yaa ne sɩ-wẽns buud fãa sẽn be yĩngri la bãmb dĩm dãmbã la pãens rãmbã la lik soaadbã sẽn so pãng masã’ wã. (Efɛɛz rãmba 6:12) Baa rũndã-rũndã, yaa a Sʋɩtãan ne a zĩn dãmbã n tusd dũniyã nanambs la neb a taab me tɩ b mi n yik n kʋʋd buud a ye neb n dat n na menes-b zãnga, la b tʋmd nen-kɛglem tʋʋm a taab sẽn pa tõe n bãng n bilgã. Masã, d ges d sẽn tõe n maan to-to n tõog n kogl d mens ne a Sʋɩtãan ne a zĩn dãmbã.
Wãn to la d tõe n kogl d mense?
10, 11. Wãn to la d tõe n kogl d mens ne a Sʋɩtãan ne a malɛg-wẽnsã?
10 D pa tõe n teeg d yam bɩ d yãoog pãng n tõog n kogl d mens ne a Sʋɩtãan la a malɛg-wẽnsã ye. Tʋm-tʋmd a Poll sagl-d-la woto: “Bɩ y paam daood Zusoaba tũudum pʋgẽ n deeg bãmb pãn-kãsengã.” Woto wilgdame tɩ d segd n teega Wẽnnaam t’a kogl-do. A Poll paasame tɩ: “Bɩ y bob Wẽnnaam zab-teed fãa, tɩ yãmb tõe n tõog Sʋɩtãanã sɩlem fãa. . . . Bɩ yãmb bob Wẽnnaam zab-teed fãa tɩ yãmb tõe n tõog wẽng wakate, la tɩ yãmb sã n zab n tõoge, yãmb na yals kãn-kãe.”—Efɛɛz rãmba 6:10, 11, 13.
11 A Poll sagla a tẽed-n-teesã hal naoor a yiib tɩ b ‘bob Wẽnnaam zab-teedã fãa.’ B sẽn yeel tɩ “fãa” wã wilgdame tɩ d sã n deem n bas baa yaa zab-teoog a yembre, d pa na n tõog n kogl d mens ne zĩn dãmbã ye. Woto yĩng bɩ d bao n bãng zab-teed nins b sẽn sagend rũndã-rũndã kiris-nebã tɩ b bob sẽn na yɩl n tõog n kogl b mens ne zĩn dãmbã.
Wãn to la d tõe n “yals kãn-kãe”?
12. Wãn to la kiris-nebã tõe n sẽb b seesã ne sɩdã?
12 A Poll deng n wilga woto: “Dẽ yĩnga, bɩ y yalse, la y sẽb sɩdã tɩ yɩ yãmb sẽbdga, la y bob tɩrlem tɩ yɩ gãntika.” (Efɛɛz rãmba 6:14) Zab-teed a yiib nins b sẽn wilg ka wã yaa sẽbgd la gãntika. Sodaag segd n sẽba a sẽbgd sõma n kogl a pendã, a pʋgã la a sɛɛgã, la a paam n sẽgemd a sʋʋgã be. Woto me, d segd n basame tɩ Biiblã sẽn sɩd yet bũmb ningã kẽ d sũy hal sõma tɩ d tũud-b d vɩɩmã pʋgẽ. Rẽ yĩnga, d yãka sẽk n karemd Biiblã daar fãa bɩ? Tõnd ne d zakã neb naagda taab n karemd-a bɩ? Yãmb ne y zakã rãmb yãkda sẽk daar fãa n vaeesd daarã verse bɩ? Sẽn paase, d modgd n wʋmda vẽnegr nins fãa “tʋm-tʋmd sẽn tũud sɩd la sẽn tar yamã” sẽn kõt-d a sɛbã pʋsẽ wã võor bɩ? (Matɩe 24:45) D sã n maand woto, d modgdame n tũud a Poll saglgã. D leb n tara kasɛt video rãmb la DVD rãmb sẽn kõt sagls sẽn yit Biiblã pʋgẽ. D sã n tũud sɩdã ne d sũur fãa, na n sõng-d lame tɩ d bãng n maan sẽn yaa sõma, la leb n na n kogl-d lame tɩ d ra maan wẽng ye.
13. Tẽebã wɛɛngẽ, wãn to la d tõe n kogl d sũurã?
13 Sodaag gãntik kogenda a yãoogã ne a sũurã la a zĩ-bãn a taaba. Tẽebã wɛɛngẽ, kiris-ned me tõe n kogla a sũurã, a sã n nong Wẽnnaam a Zeova tɩrlmã la a tũud a noyã. D tẽebã wɛɛngẽ gãntikã kɩtdame tɩ d pa reemd ne sagls nins Wẽnnaam Gomdã sẽn kõt-dã ye. D sẽn ‘kis wẽng la d nong neerã’ yĩnga, d ‘gũusda d naoã ne so-wẽns fãa.’—Amos 5:15, Sebr Sõngo; Yɩɩl Sõamyã 119:101.
14. B sẽn yeel tɩ d ‘wid laafɩ koe-noog togsg ratem tɩ yɩ d neoodã’ wã võor yaa bõe?
14 Rom sodaasã ra wita neooda sẽn yaa sõma sẽn na yɩl n tõog n kẽn n gilg Rom soolmã fãa. Dẽnd b sẽn yeel tɩ kiris-nebã ‘wid laafɩ koe-noog togsg ratem tɩ yɩ b neoodã’ wã võor yaa bõe? (Efɛɛz rãmba 6:15) Rat n yeelame tɩ d segl d mens tʋʋmd yĩnga. N-ye, segb d sẽn paam fãa tog n mikame tɩ d seglame n tõe n moon Wẽnnaam Rĩungã koɛɛga. (Rom dãmba 10:13-15) D sẽn moond koɛɛgã wakat fãa wã, kogend-d-la ne a ‘Sʋɩtãan sɩlmã fãa.’—Efɛɛz rãmba 6:11.
15. a) Bõe n wilgd tɩ tara yõod wʋsg tɩ d tẽebã yɩ wa gãong sẽn yalme? b) Pɛɛm bʋs sẽn yaa wa bugum n tõe n koms d tẽebã?
15 Tʋm-tʋmd a Poll paasa woto: “La wakat fãa, bɩ y tall tẽeb tɩ yɩ gãongo, tɩ yãmb tõe n kok wẽng soabã pɛɛmã fãa sẽn yaa wa bugmã.” (Efɛɛz rãmba 6:16) A Poll sẽn deng n yeel tɩ “wakat fãa” wã, rat n yeelame tɩ tẽebã zab-teedã sʋka, gãongã tara yõod wʋsgo. Woto wilgdame tɩ d tẽebã segd n yɩɩ kãn-kãe. Wala gãong sẽn yalem sẽn kogend sodaag to-to wã, d tẽebã tõe n kogl-d-la ne a Sʋɩtãan “pɛɛma fãa sẽn yaa wa bugmã.” Pɛɛm kãens tõe n yɩɩ bõe rũndã-rũndã? Tõe n yɩɩ tʋy sẽn kãbd sũuri, zɩlem-beedo, kibay sẽn pa sɩd zãng d bɛɛbã la sɩdã kɩɩsdb sẽn yeelgd n dat n koms d tẽebã. Leb n tõe n yɩɩ bũmb sẽn kɩt tɩ d rat n lebg ned sẽn nong laogo, tɩ sẽn pak-d lebg teedã raab wʋsg-wʋsgo. Rẽ tõeeme meng n kɩt tɩ d rat n wags ne neb nins sẽn maand tɩtaam ne b tarmã. Wala makre, tõe tɩ nin-kãens mee zag-neeba, n tar mobil neeba, pa rẽ bɩ b maanda wilg-m-meng ne b nag-teed la fut ligd sẽn toe. La baa nebã manesem sẽn yaa to-to fãa, d segd n talla tẽeb sẽn yaa kãn-kãe n tõog n kok ‘pɛɛm kãens fãa sẽn yaa wa bugmã.’ Wãn to la d tõe n paam tẽeb sẽn yaa kãn-kãe wakat fãa?—1 Pɩɛɛr 3:3-5; 1 Zã 2:15-17.
16. Bõe n tõe n sõng-d tɩ d paam tẽeb sẽn yaa kãn-kãe?
16 D sã n zãmsd Biiblã wakat fãa la d pʋʋsd ne d sũur fãa, na n pẽneg-d-la ne Wẽnnaam. D tõe n pʋʋsa a Zeova n kos t’a keng d tẽebã, tɩ rẽ poor bɩ d tʋm tɩ zems ne d sẽn kos bũmb ningã. Wala makre, rẽ yĩnga d segenda Gũusg Gasgã semen fãa sẽn na yɩl n tõog n tɩ kõ leoor bɩ? D sã n zãmsd Biiblã la sɛb nins sẽn tik Biiblã zugã, d tẽebã na n yɩɩ kãn-kãe.—Hebre dãmba 10:38, 39; 11:6.
17. B sẽn yeel tɩ d ‘fõgen fãagrã me tɩ yɩ kut puglã’ võor yaa bõe?
17 A Poll sẽn bilg tẽebã zab-teedã, a baasa ne sagl-kãngã: “Bɩ y fõgen fãagr me tɩ yɩ kut pugla. La y bob Wẽnnaam goamã [vʋʋsem sõngã, NW] sẽn kõt yãmbã wa sʋʋga.” (Efɛɛz rãmba 6:17) Kut pugl kogenda sodaag zugu, a tagsa wã fãa sẽn yitẽ wã. Woto me, kiris-ned saagrã kogenda a tagsa wã. (1 Tesalonik rãmba 5:8) Wala a Zezi, segdame tɩ yaa bũmb nins Wẽnnaam sẽn pʋlem tõndã n be d yamẽ wã wakat fãa. D pa tog n bas tɩ dũniyã yɛl la laog tʋlsem yãmb d yamã ye.—Hebre dãmba 12:2.
18. Bõe yĩng tɩ d pa segd n deem ne d Biiblã kareng daar fãa wã?
18 Sẽn na n baase, bũmb a to me sẽn kogend-d ne a Sʋɩtãan la a zĩn dãmbã, yaa Wẽnnaam goamã sẽn be Biiblã pʋgẽ wã. Yaa rẽ n so tɩ d pa segd n deem ne d Biiblã kareng daar fãa wã ye. D sã n mi Wẽnnaam Gomdã sõma, kogend-d-la ne a Sʋɩtãan ne a zĩn dãmbã zɩlem-beedã, la ne sɩdã kɩɩsdb kɩɩsg goamã.
‘Bɩ y pʋʋs wakat fãa’
19, 20. a) Bõe n na n paam a Sʋɩtãan ne a zĩn dãmbã? b) Bõe maaneg n tõe n keng d tẽebã?
19 A Sʋɩtãan ne a zĩn dãmbã la dũni wẽn-kãngã sãoong kolgame. A Sʋɩtãan miime t’a ‘wakatã yaa bilfu.’ A sũurã puudame t’a zabd ne neb nins “sẽn sakd Wẽnnaam noor la sẽn tar a Zezi kasetã.” (Wilgri 12:12, 17) D segd n kogla d mens ne a Sʋɩtãan la a zĩn dãmbã.
20 Ad d sɩd tara mi-beoog b sẽn sagl-d tɩ d bob Wẽnnaam zab-teedã fãa wã yĩnga! A Poll baasa a goamã ne sagl-kãngã: ‘Bɩ y pʋʋs wakat fãa ne [vʋʋsem sõngã] pãng n da bas ye, la y bao weer n pʋʋs Wẽnnaam nebã fãa yĩnga.’ (Efɛɛz rãmba 6:18) Pʋʋsgã tõe n kenga d tẽebã la sõng-d tɩ d pa gũusg pʋgẽ. Woto yĩng bɩ d tũ a Poll saglgã ne d sũy fãa, n ket n pʋʋsdẽ tɩ na n sõng-d lame tɩ d tõog n kogl d mens ne a Sʋɩtãan la a zĩn dãmbã.
Bõe la y zãms-yã?
• Maana wãn t’a Sʋɩtãan ne a zĩn dãmbã wa beẽ?
• A Sʋɩtãan pãn-tõogã taa zĩ-bʋgo?
• Bõe la d tar n na n kogl d mens ne a Sʋɩtãan la a zĩn dãmbã?
• Wãn to la d tõe n bob Wẽnnaam zab-teedã fãa?
[Zãmsgã sogsgã]
[Foto rãmba, seb-neng 17]
‘Wẽnnaam kom-dibli wã yãame tɩ ninsaalbã kom-pugli yaa neeba’
[Foto, seb-neng 19]
Yãmb tõe n bãng n sõdga d tẽebã zab-teed a yoobã bɩ?
[Foto rãmba, seb-neng 21]
Wãn to la woto fãa maaneg sõngd-d tɩ d tõog n kogl d mens ne a Sʋɩtãan la a zĩn dãmbã?