B vẽnega neb tɩ b yã saasẽ yɛla

NAK-Y y neng n ges saasã wa y sẽn tõe tɛka. Y kõn yã Wẽnnaam, bɩ malɛk ye. Baa y maag y yĩng n kelg me y kõn wʋm b koɛɛg ye. La y yaool n miime tɩ b beeme. B tara yam la pãng n yɩɩd ninsaalbã zĩig sẽn zãre. B fãa tara yʋya, la b manesmã me yaa toor-toore. Kẽer rata tõnd neere, tɩ sãnda rat tõnd ne wẽnga.

Wẽnnaam mengã yaa sɩɩga, d pa tõe n yã-a ye. (Zã 4:24) A tara yʋ-peelle, sẽn welgd yẽ toor ne wẽnnaam dãmb nins sẽn yaa ziri wã. A yʋʋrã yaa a Zeova. (Yɩɩl Sõamyã 83:18, NW ) Yɩɩl-gʋlsdã yeela woto: “Zusoabã yaa kãsenga, la bãmb toga pẽgr wʋsgo. Bãmb seka zoees n yɩɩd wẽnnaam dãmbã fãa. Tɩ bõe, buud toɛy-toɛyã wẽnnaam dãmbã fãa yaa zaalem, la Zusoabã n naan saase. Waoogr ne naam bee bãmb nengẽ, pãng ne ziir bee bãmb sɛk-zĩigã pʋgẽ.”—Yɩɩl Sõamyã 96:4-6.

Wẽnnaam vẽnega neb tɩ b yã a ziirã

Biiblã yetame tɩ “ned nan ka yã Wẽnnaam abada.” (Zã 1:18) A sẽn yaa to-to wã ne a ziirã pa tõe n bãng n bilg tɩ tõnd wʋm a võor zãnga, wa f sẽn pa tõe n bilg ned sẽn dog ne zond kulɛɛr dãmb t’a bãngã. La wa karen-saam-sõng sẽn tõe n dɩk makr n kɩt tɩ yɛl võor wʋmb sẽn yaa toog lebg nana ne a karen-biisã, Biiblã pʋgẽ a Zeova me kɩtame tɩ b rɩk makr ne yɛl tõnd sẽn tõe n yã, sẽn na yɩl n bilg yɛl d sẽn pa tõe n yã. Pĩnd wẽndẽ wã, a Zeova vẽnega neb kẽer tɩ b yã saasẽ yɛla, n bilg ne yɛl d sẽn mi sẽn na yɩl tɩ d wʋm a võore, la d bãng manesem ning d sẽn segd n tall ne b rãmb nins sẽn be saasẽ wã.

Wala makre, no-rɛɛs a Ezekɩɛll yãa a Zeova ziirã n yeel tɩ yaa wa bugum sẽn yãgde, la wala safɩɩr kugri, la wa saag gomtɩʋʋgo. Vẽnegr a to pʋgẽ me, tʋm-tʋmd a Zã yãa a Zeova sẽn zao a naam geerã zugu, n yeel t’a “wẽnda wa kugr sẽn boond tɩ zaspe, la wa kugr sẽn boond tɩ sardoan. La saag gomtɩʋʋg sẽn wẽnd wa kugr sẽn boond tɩ emerood n gũbg geerã.” B sẽn bilg woto wã kɩtdame tɩ d bãng t’a Zeova sẽn beẽ wã tara ziir la rasãnd sẽn pa tõe n bãng n bilgi.—Wilgri 4:2, 3; Ezekɩɛll 1:26-28.

No-rɛɛs a Daniɛll me yãa a Zeova vẽnegr pʋgẽ, n yeel tɩ “[malɛgs] tus ka tɛk n da yas [a] taoorã.” (Daniɛll 7:10) Yaa vẽeneg tɩ woto sɩd kõta rabeem. Bala baa yaa malɛk a  ye la f yã-yã, kõta rabeem, tɩ pa sokd f sẽn na n yã bãmb tus ka tɛk ye.

Biiblã pʋgẽ, yaa sẽn kolg naoor 400 la b gomd malɛgsã yelle. B boonda kẽer tɩ seribẽ rãmba, la kẽer me tɩ serafẽ rãmba. Hebre ne gɛrk gom-bil ning b sẽn lebg tɩ malɛkã rat n yeelame tɩ koe-taasda. Malɛgsã tõe n goma ne taaba, la pĩnd wẽndẽ wã b goma ne ninsaalba. Pa ninsaalb n lebg malɛgsã ye. A Zeova naana malɛgsã hal tɩ kaoose, n yaool n na n naan ninsaala.—Zoob 38:4-7.

A Daniɛll sẽn yã bũmb ningã pʋgẽ, malɛgs tus ka tɛkã ra tigma taab n na n maan kaset ne yel-kãsenga. A Daniɛll yeelame t’a yãa “bũmb sẽn wẽnd ninsaala,” sẽn kolg a Zeova naamã geere, t’a kõ-a “soolem ne waoogr la naam, tɩ tẽnsã fãa neb sẽn yaa soolem toɛy-toɛy n gomd goam toor-toorã sak-a.” (Daniɛll 7:13, 14) Sẽn wõnd-a ninsaalã yaa a Zezi Kirist sẽn vʋʋgã. A tara tʋʋm-kãseng malɛgsã sʋka, la b kõo yẽ naam t’a na n soog tẽngã. Ka la bilfu, yẽ naamã na n wa ledga ninsaalbã goosneema rãmbã, n kɩt tɩ bãasã, sũ-sãamsã, wẽgbã, talemdã la baa kũumã menem fasɩ.—Daniɛll 2:44.

Yaa vẽeneg tɩ b sẽn kõ a Zezi naamã yɩɩ malɛgs nins sẽn sakd a Zeova la sẽn dat ninsaalbã neerã noog wʋsgo. La pa malɛgsã fãa sũur n yɩ noog ye.

Kẽer yaa Wẽnnaam ne ninsaalbã bɛɛba

Ninsaal naanegã poor bilfu, malɛk a ye n yik n dat tɩ b waoogd yẽ wa Wẽnnaam.  A kɩɩsa a Zeova n lebg Sʋɩtãana, sẽn dat n yeel tɩ “kɩɩsda.” A Sʋɩtãan wẽnemã pa tõe n bãng n bilg ye. A Sʋɩtãan yaa toor fasɩ ne a Zeova sẽn yaa nonglem soabã. Malɛgs a taab n lebg a Sʋɩtãan poorẽ dãmba. Biiblã pʋgẽ b boond-b lame tɩ zĩn-dãmba. Wa a Sʋɩtãana, zĩn-dãmbã me yaa ninsaalbã bɛɛba. Naoor wʋsgo, wẽgbã, bãasã, talemdã la zabã yaa bãmb n wat ne.

Baa ne wẽnd-dot kẽer pʋsẽ b sẽn pa le gomd a Sʋɩtãan yell wʋsg wa pĩndã, a Zoob sebrã sẽn be Biiblã pʋgẽ wã sõngda tõnd tɩ d bãng malɛg-wẽng kãngã sẽn sɩd yaa a soaba, la a sẽn baood bũmb ninga. A Zoob sebrã pʋgẽ b yeela woto: “Daar a yembre, Wẽnnaam kom-dibli kẽnga Zusoabã nengẽ. La Sʋɩtãanã me tũu bãmb n kẽnge.” Baraare, a Sʋɩtãan yeela a Zeova t’a Zoob sẽn tũud yẽ wã yaa a sẽn ningd-a barkã yĩnga. Sẽn na yɩl n wilg t’a sẽn yetã yaa sɩda, a Sʋɩtãan kɩtame t’a Zoob paam toogo. A kɩtame t’a rũms sãnda ki, tɩ b zu kẽere, la a kɩt me t’a kamb piigã fãa ki. Rẽ poore, a lob-a-la bãag hal t’a yĩngã fãa lebg noada. La ne a Sʋɩtãan sẽn maanã fãa, a pa tõog n kɩt t’a Zoob bas Wẽnnaam tũub ye.—Zoob 1:6-19; 2:7.

Bʋʋm wʋsg n kɩt t’a Zeova bas t’a Sʋɩtãan ket n beẽ, la a pa na n bas-a t’a kell n zĩnd wakat fãa ye. Ka la bilfu, a na n sãam-a lame. Wilgr sebrã togsda bũmb sẽn maan saasẽ, tɩ wilgdẽ t’a Zeova na n sãama a Sʋɩtãana. Be b yeela woto: “Zabr zĩnda [saasẽ]. A Misɛll [a Zezi Kirist sẽn vʋʋgã] ne bãmb malɛk rãmbã zaba ne dragõ wã [a Sʋɩtãana], la dragõ wã ne yẽ malɛk rãmbã me zaba ne bãmba. La dragõ wã ne a poorẽ dãmbã ka tõog ye, la b ka le yã bãmb zĩig [saasẽ] ye. La b riga dragõ kãsengã sẽn yaa wag-kʋdre, sẽn boond tɩ diabl la Sʋɩtãanã, sẽn belgd dũniyã fãa wã. B riga yẽnda t’a kẽng dũniyã zugu, la b riga yẽ malɛk rãmbã me tɩ b tũ yẽnda.”—Wilgri 12:7-9.

B yeelame t’a Sʋɩtãan ‘belgda dũniyã fãa.’ Sɩd me, a kɩtame tɩ tũudum kẽer zãmsd nebã sẽn yaa ziri, sẽn na yɩl tɩ b kɩɩs a Zeova la a Gomdã. Ziri a ye a sẽn kɩt tɩ b zãmsd nebã zĩig fãa yaa tɩ ned sã n ki, a tara sɩɩg sẽn kẽngd zĩig a to. Wala makre, Afirik la Aazi, neb wʋsg tẽedame tɩ ned sã n ki, a kẽngda a yaab rãmbẽ. Tũudum kẽer me sẽn zãmsd nebã tɩ pirgatoaar la bugum yir beeme wã, yaa b sẽn tẽed tɩ ninsaal tara sɩɩg sẽn ket n vɩ a kũum poorã.

Ned kũum poore, a kẽngda saasẽ bɩ?

Neb milyõ rãmb tẽedame tɩ nin-sõma wã fãa rebda saasẽ. Woto yaa sɩd bɩ? Yaa sɩd tɩ nin-sõma kẽer n na n kẽng saasẽ, la b sõorã yaa bilfu, d sã n na n mak ne neb nins fãa sẽn ki wã. Biiblã wilgdame tɩ b tũusa neb 144 000 dũniyã zugu, tɩ b na n kẽng saasẽ n tɩ lebg “maan–kʋʋdba,” la tɩ b “na n dɩɩ naam dũniyã zugu.” (Wilgri 5:9, 10; 14:1, 3) Nin-kãensã ne a Zezi Kirist b sẽn boond tɩ ninsaal Biigã na n naaga taab n zĩnd saasẽ goosneema pʋgẽ. Yaa goosneem kãng la b sẽn boond tɩ Wẽnnaam Rĩungã. Goosneem kãng na n wa sãama a Sʋɩtãan ne a zĩn-dãmbã, la a kɩt tɩ tẽngã lebg arzãna. B na n vʋʋga neb wʋsg sẽn ki tɩ b vɩɩmd tẽngã sẽn na n lebg arzãnã pʋgẽ, tɩ b sã n kell n sak Wẽnnaam bɩ b paam n vɩɩmd wakat sẽn kõn sa.—Luk 23:43.

D sã n na n kʋmse, sẽn vɩ-b tɩ tõnd pa ne-bã yaa wʋsgo. Wẽnnaam a Zeova n yɩɩd b fãa. Yaa yẽ la vɩɩm buudã fãa naanda. A tara malɛgs tus ka tɛk sẽn sakd-a wakat fãa. Malɛgs kẽer kɩɩsa a Zeova n lebg a Sʋɩtãan poorẽ dãmba, n maand b sẽn tõe fãa n tudgd ninsaalbã. Sẽn paase, Wẽnnaam tũusa neb bilf tẽngã zug tɩ b na n tɩ tʋm tʋʋmd saasẽ. D sẽn bãng woto wã, bɩ d bao n bãng a soab ning d sẽn segd n pʋʋs bɩ n gom ne, la d sẽn segd n maan dẽ to-to.