D paamda pãng n tõe n mao ne makr toor-toor la raood komsgo
D paamda pãng n tõe n mao ne makr toor-toor la raood komsgo
“Sɩɩg sõng sã n wa yãmb zutu, yãmb na reeg pãnga.”—TƲƲ. 1:8.
1, 2. Sõng-bʋg la a Zezi pʋlem a karen-biisã, la bõe yĩng tɩ sõng-kãng ra yaa tɩlae ne-ba?
A ZEZI ra miime t’a karen-biisã ra pa na n tõog n maan bũmb nins fãa yẽ sẽn yeel tɩ b maanã ne b mens pãng ye. Tags-y b sẽn da segd n moon koɛɛgã n ta zĩig ningã yelle, b bɛɛbã pãng sẽn da yaa to-to wã, la b sẽn da yaa ninsaalb tɩ kɩt tɩ b tar pãn-komsem toor-toorã yell me. Woto fãa kɩtame tɩ ra yaa tɩlae tɩ b paam pãng sẽn yɩɩd ninsaal dẽnda. Rẽ n so tɩ nand t’a Zezi leb saasẽ, a yeel a karen-biisã woto: “Sɩɩg sõng sã n wa yãmb zutu, yãmb na reeg pãnga. La yãmb na n yɩɩ mam kaset dãmb Zerizalɛm ne Zide la Samari ne dũniyã tɛk fãa.”—Tʋʋ. 1:8.
2 Pʋlen-kãng sɩnga pidsg yʋʋm 33 Pãntekotã sasa, wakat ning a Zezi karen-biisã sẽn paam vʋʋsem sõngã tɩ kɩt tɩ b paam pãng n tõog n moon koɛɛgã Zerizalɛm tẽngã tõr pʋgẽ wã. Bũmb kae n da tõe n yals tʋʋm-kãngã ye. (Tʋʋ. 4:20) ‘Wakat fãa, hal n tãag wakatã sɛɛbo,’ yaa tɩlae t’a Zezi karen-biis hakɩkã, tõnd fãa sẽn naag paam pãn-kãng sẽn yaa Wẽnnaam n kõtã.—Mat. 28:20.
3. Bõe la pãng ning a Zeova sẽn kõt-dã tõe n sõng-d tɩ d tõog n maane?
3 A Zezi ra pʋlma a karen-biisã tɩ ‘vʋʋsem sõngã sã n wa b zutu, b na n deega pãnga.’ Wẽnnaam sẽn ka to wã sẽn kõt a nin-buiidã pãng ningã kɩtdame tɩ tõnd ned kam fãa tõe n pids bũmb ning a sẽn pʋlem Wẽnnaam n dɩk a meng n kõ wã. Bũmb sã n wa rat n kʋɩɩb-d me, pãn-kãng tõe n sõng-d lame tɩ d tõog n da beeg Wẽnnaam ye.—Karm-y Mika 3:8; Kolos rãmb 1:29.
4. Bõe yell la d na n gome, la bõe yĩnga?
4 Wãn to la pãng ning Wẽnnaam sẽn kõt-d ne a vʋʋsem sõngã maasmã sõngd tõndo? D sã n paam vʋʋsem sõngã, manesem bʋg la d na n tall yɛlã toɛy-toɛyã taoore? Tõnd sẽn dat ne d sũur fãa n sak Wẽnnaamã, d segda zu-loees buud toor-toor a Sʋɩtãana, a dũniyã wall tõnd mengã pãn-komsmã sẽn wat ne. Tara yõod tɩ d mao ne zu-loe-kãens n tõog n ket n yaa kiris-neba, la sẽn na yɩl n tõogd n moond koɛɛgã n pa vaandẽ la d kell n tall zood sõma ne a Zeova. Bɩ d ges vʋʋsem sõngã sẽn sõngd tõnd to-to tɩ d tõogd n yalsd kãn-kãe kʋɩɩbg taoore, la d tõogdẽ me n maood ne yaamsã la raood komsgã.
D paamda pãng n tõe n mao ne makre
5. Wãn to la pʋʋsgã tõe n kõ tõnd pãnga?
5 A Zezi ra sagla a karen-biisã tɩ b pʋʋs n kos woto: “Bɩ y ra bas tõnd tɩ d kẽ makr pʋgẽ ye, la bɩ y fãag tõnd wẽng soabã nugẽ.” (Mat. 6:13) A Zeova pa na n bas neb nins sẽn sakd-a ne b sũy fãa wã sẽn kot woto wã n pa sõng-b ye. Daar a to me, a Zezi yeelame tɩ d saasẽ Ba wã na n kõ a vʋʋsem sõngã neb nins sẽn kot-a wã. (Luk 11:13) Ad a Zeova sẽn pʋlem t’a na n kõ-d-la a vʋʋsem sõngã tɩ d tõog n maan sẽn yaa tɩrgã sɩd kengda d raoodo! La woto pa rat n yeel t’a Zeova na n gɩdgame tɩ makr da tol n paam tõnd ye. (1 Kor. 10:13) La d sã n wa be makr taoore, yaa wakat kãng la d segd n maneg n wɩng ne pʋʋsgo.—Mat. 26:42.
6. A Sʋɩtãan sẽn mak a Zezi wã, bõe zug la a Zezi tik n leok-a?
6 A Sʋɩtãan sẽn wa n na n mak a Zezi wã, a tika Biiblã zug n leok-a. A Zezi ra mii Wẽnnaam Gomdã sẽn yet bũmb ningã vẽenega, bala a leoor fãa pʋgẽ, a yeela woto: “A gʋlsame . . . A gʋlsame me . . . Sʋɩtãana, looge, tɩ bõe, a gʋlsame: ‘Waoog Zusoabã fo Wẽnnaam, la f sak bãmb bala.’ ” A Zezi sẽn da nong a Zeova la a nong a Gomdã kɩtame t’a tõdg a Sʋɩtãan sẽn da rat t’a maan bũmb ninsã fãa. (Mat. 4:1-10) A Zezi sẽn kɩɩs a Sʋɩtãan naoor wʋsgã poore, a Sʋɩtãan loogame n bas-a.
7. Wãn to la Biiblã tõe n sõng-d tɩ d tõog n mao ne makre?
7 A Zezi sã n da tikda Biiblã zug n kɩɩsd a Sʋɩtãanã, tõnd n segd n maand woto n yɩɩda! Sɩd me, sẽn na yɩl n tõogd n kɩɩsd a Sʋɩtãan ne a poorẽ dãmbã, d segd n baood n bãngda Wẽnnaam noyã la d sakd-b ne d sũur fãa. Neb wʋsg sẽn zãms Biiblã n bãng Wẽnnaam yamã la a tɩrlmã, kɩtame tɩ b modg n maneg b vɩɩmã tɩ zems ne a noyã. Sãmbg sẽn ka be, “Wẽnnaam goamã” tara pãng n tõe n fees ned ‘sũur tagsg la a ratem.’ (Heb. 4:12) Ned sã n karemd Biiblã la a bʋgsd a sẽn karemdã zugu, a manegd n nee vẽeneg tɩ d sɩd tõe n kɩsa a Zeova sɩd zãng-zãnga. (Dan. 9:13, NW ) Sẽn yaa woto wã, d segd n bʋgsda Biiblã vɛrse rãmb nins sẽn gomd tõnd sẽn maood ne pãn-komsem ninsã yellã zug neere.
8. Bõe maaneg n kɩtd tɩ d paamd vʋʋsem sõngã?
8 A Zezi sẽn tõog n mao ne makr toor-toorã yaa t’a ra mii Gʋlsg Sõamyã neere, la sẽn paase, a ra “pida ne sɩɩg sõngo.” (Luk 4:1) Tõnd me sã n dat n tõog n mao ne makr toor-toorã, rẽndame tɩ d bao zood sõma ne a Zeova, d sẽn na n maand bũmb nins fãa sẽn kɩtd tɩ d paamd a vʋʋsem sõngã. (Zak 4:7, 8) Wala makre, Biiblã zãmsgo, pʋʋsgã la d saam-biisã tũud-n-taare. Kiris-neb wʋsg yãame me tɩ b sã n maand woto fãa la b moond koɛɛgã wʋsgo, sõngd-b lame tɩ b tagsd yɛl sẽn tõe n keng b tẽebã yell wakat fãa.
9, 10. a) Mak-bʋs buud la kiris-nebã wae n segda? b) Baa y sã n wa ya, wãn to la bʋgsgã la pʋʋsgã tõe n kɩt tɩ y paam pãng n tõog makre?
9 Yãmb tõog n maoa ne mak-bʋs sẽn da rat n kʋɩɩb-yã? Sasa n zĩnd tɩ y yam kẽ ned sẽn pa y pag wall y sɩda, tɩ ra kɩt tɩ y maand wa y rat-a lame bɩ? Y sã n pa kẽ kãadem, rẽ yĩnga, y zoe n tʋlgame n na n sak ned sẽn pa tũud a Zeova rolemd bɩ? Kiris-nebã sã n get televiziõ wã wall b tʋmd ne ẽntɛrnetã, b tõe n wa yãa bũmb sẽn tõe n kɩt tɩ b ges sẽn pa sõma. A buud sã n zoe n paama yãmba, y manesem yɩɩ wãna? Y sã n bʋgs sõma, y na n yãame tɩ y sã n maan sẽn pa segd vugri, tõe n kɩtame tɩ y le maan nindaare, tɩ wa kɩt tɩ y maan sẽn yaa wẽng wʋsgo. (Zak 1:14, 15) Tẽeg-y tɩ y sã n maan yel-wẽnde, y na n sãama a Zeova sũuri, la y sãam tigingã neb la y zakã rãmb me sũyã. La yɩl n tõog n tall sũur-kaset sẽn yaa sõma, rẽnda d sakd Wẽnnaam noyã. (Karm-y Yɩɩl Sõamyã 119:37; Yelbũn 22:3.) Sẽn yaa wakat ning fãa la y seg mak-kãensã buudu, bɩ y pʋʋs ne y sũur fãa n kos pãng n tõog n yals kãn-kãe.
10 Bũmb a to me yell la d pa segd n yĩm a Sʋɩtãan sẽn makd ned to-to wã zugu. A sẽn wa na n mak a Zezi wã, rẽ t’a Zezi loe noor dasem 40 rasempʋɩɩgẽ wã. Yaa vẽeneg t’a Sʋɩtãan tagsame tɩ wakat kãnga, a sã n mak a Zezi, a na n tõogame t’a bas Wẽnnaam sakre. (Luk 4:13) A Sʋɩtãan baooda wakat sẽn zems n na n tus tõnd me tɩ d beeg Wẽnnaam. Rẽnd yaa tɩlae tɩ d mao n tall zood sõma ne Wẽnnaam wakat fãa. A Sʋɩtãan sã n wa na n mak neda, naoor wʋsgo, a bẽta wakat ning a soabã sẽn tõe n kong pãng faag-faagã. Woto yĩnga, d sã n wa ya wall d komsa raoodo, sasa kãng la d segd n maneg n pʋʋs a Zeova n yɩɩda, n kos-a t’a kogl-d la a kõ-d a vʋʋsem sõngã.—2 Kor. 12:8-10.
D paamda pãng n tõe n mao ne yaamsã la raood komsgã
11, 12. a) Bõe yĩng tɩ neb wʋsg komsd raood rũndã-rũndã? b) Bõe n tõe n kõ-d pãng tɩ d tõog n mao ne raood komsgã?
11 D sẽn yaa ninsaalb sẽn pa zems zãngã yĩnga, d mi n wa komsa raoodo. Rũndã-rũndã, sɩd tõe n yɩɩ woto, bala, zu-loeesã maneg n yaa wʋsgo. Tõe tɩ ãdem-biisã sẽn be tẽng zug tɛk menga, yaa tõnd sẽn vɩ wakat ningã toom n yɩɩda. (2 Tɩm. 3:1-5) Armagedõ sẽn kolgdã, laogã zu-loees la yɛl a taabã tara zẽnebo. Rẽnd pa lingr la neb wʋsg sẽn get tɩ yɩl n tõog n ges b zagsã rãmb yell wa sẽn segdã lebgda toog n paasdẽ wã ye. Yaamsã wʋma nebã tɩ yaa n looge, tɩ kɩt tɩ b pa tol n mi b sẽn maandg ye. Sã n yaa woto ne yãmb me, wãn to la y tõe n mao ne zu-loeesã?
12 Tẽeg-y t’a Zezi ra pʋlma a karen-biisã t’a na n kõ-b-la sõngda, rat n yeel tɩ Wẽnnaam vʋʋsem sõngã. (Karm-y Zã 14:16, 17.) Vʋʋsem sõngã yaa pãng ning sẽn yaa kãseng n yɩɩd ãndũniyã fãa pʋgẽ wã. A Zeova tõe n kõ-a-la tõnd “wʋsg n yɩɩd tõnd sẽn kosã” tɩ kɩt tɩ d paam pãn-kãseng n tõog toog makr buud fãa pʋgẽ. (Ef. 3:20) Tʋm-tʋmd a Poll yeelame tɩ baa ‘yɛlã sã n wa gũbg-du,’ vʋʋsem sõngã tõe n kɩtame tɩ d paam pãng sẽn yɩɩd tõnd meng pãngã. (2 Kor. 4:7, 8) A Zeova pa pʋlem t’a na n kɩtame tɩ d zu-loeesã sa ye. A pʋlmame t’a a na n kõ-d-la pãng ne a vʋʋsem sõngã maasem tɩ d tõog n mao ne zu-loeesã.—Fil. 4:13, NW.
13. a) Wãn to la bi-pugl a ye paamd pãng n tõogd n maood ne a zu-loɛɛga? b) Yãmb mii neb sẽn maood ne zu-loees woto bɩ?
13 D gom yʋʋm 19 bi-pugl a Stephanie sẽn yaa wakat fãa so-pakda yelle. A sẽn wa n tar yʋʋm 12 wã, zug bãag n yik-a t’a sobge. Logtoɛɛmbã sẽn vaeesã, b mikame tɩ kãnsɛɛr n be a kalkõtẽ wã. Rẽ loogr poore, b wopeer-a-la naoor a yiibu, la b tɩp-a ne tɩbsg buud b sẽn boond tɩ radioterapɩ. La bãagã wa n leb kɩtame t’a sobg naoor a yiibu. Woto fãa yɩ sabaab t’a wa pa le tõe n tʋm ne a goabg nugã la a goabg naoorã sõma, t’a ninã me pa le ne sõma ye. Sẽn na yɩl n tõog n maan bũmb nins a sẽn get tɩ tara yõod ne-a wã, wala tigissã kẽnd la koɛɛgã moonego, a Stephanie segd n basa yɛl kẽer maanego. La baasgo, a neeme tɩ yaa a Zeova vʋʋsem sõngã n sõngd-a ne manesem buud toor-toor t’a tõogd toogã. A sũurã sã n mi n wa sãam wʋsgo, a karemda tõnd sɛb nins sẽn gomd kiris-neb sẽn mao ne zu-loees toor-toor yellã tɩ sõngd-a. Saam-biisã la saam-bi-pogsã teend-a lame, b sẽn wae n toond-a lɛta, wall b sẽn nong n sõsd ne-a tigissẽ wã tɩ kengd a raoodã. Neb a sẽn moon koɛɛgã me n wilg tɩ b nanda a sẽn zãmsd-b bũmb ninsã, n babsd-a a zakẽ wã sẽn na yɩl t’a zãms-b Biiblã. Woto fãa kɩtame t’a Stephanie sɩd rat n wilg a Zeova a mi-beoogo. Biiblã vɛrse ning sẽn noom-a n yɩɩd yaa Yɩɩl Sõamyã 41:4 soabã. Sɩd me, a tagsdame tɩ vɛrse kãng goamã pidsda yẽ zugu.
14. D sã n wa koms raoodo, bõe la d pa segd n base, la bõe yĩnga?
14 D sã n wa ya wall d wa tar zu-loeese, d pa segd n tags tɩ yaa d sẽn na n bas Wẽnnaam tʋʋmã tʋmb la d na n paam d meng ye. Woto maaneg yaa tudgr meng-menga. Bõe yĩnga? Bala yaa ne tʋʋm-kãensã, rat n yeel tɩ Biiblã zãmsg f ye wall ne f zakã rãmbã, koɛɛgã mooneg la tigissã kẽnd maasem la d paamd vʋʋsem sõngã sẽn kengd d raoodã. Kiris-nebã sẽn segd n tʋm tʋʋm ninsã kõta yolsgo. (Karm-y Matɩe 11:28, 29.) Naoor wʋsgo, saam-biis la saam-bi-pogs n wat tigissã ne yaamse, la b sã n wa lebg n kuusẽ, b mikdame tɩ b yaamsã yiime tɩ yaa wa b paama pãn-paalle!
15. a) A Zeova pʋlmame t’a na n kɩtame tɩ vɩɩmã yɩ nana ne kiris-nebã bɩ? Tũnug-y ne vɛrse rãmb n wilg y leoorã võore. b) Bõe la Wẽnnaam pʋlem tõndo, la rẽ kɩtame tɩ d segd n sok d mens sok-bʋgo?
15 La woto pa rat n yeel tɩ d sẽn yaa kiris-nebã sẽn kɩt tɩ d segd n maan bũmb ninsã yaa nana ye. Yɩl n tõog n yɩ kiris-ned hakɩk baooda modgr wʋsgo. (Mat. 16:24-26; Luk 13:24) La baasgo, ne vʋʋsem sõngã maasem, a Zeova tõe n kõo neb nins sẽn ya wã pãnga. No-rɛɛs a Ezai ra yeela woto: “Neb nins sẽn teegd Zusoabã pãng paasda wakat fãa. Bãmb na n yɩga wa sɩlse. Bãmb na n zoeeme la b pãng ka na n sɛ ye. Bãmb na n kẽname n ka yɛ ye.” (Ezai 40:29-31) Rẽ n so tɩ d segd n sok d meng woto: ‘Bõe n mi n wa kɩt tɩ d getẽ tɩ Wẽnnaam tʋʋmã tʋmb kõt-d-la yaamsã?’
16. Bõe la d tõe n maan n gil bũmb nins sẽn wat ne yaamsã la raood komsgã?
16 A Zeova Gomdã sagend-d lame tɩ d baood n ‘bãngd bũmb nins sẽn yaa sõma n yɩɩdã.’ (Fil. 1:10) Wẽnnaam vẽnega tʋm-tʋmd a Poll t’a gom kiris-ned sẽn segd n vɩɩmd to-to wã yelle, n mak rẽ ne ned sẽn segd n zoe ne nao n zãag zĩiga, tɩ kɩt t’a yeel woto: “Bɩ tõnd bas zɩɩb fãa . . . , la d zoe zoees ning sẽn be tõnd taoorã n da yɛ ye.” (Heb. 12:1) A Poll da rat n yeelame tɩ d pa segd n bao bũmb sẽn pa tɩlae ne-do, bala rẽ yaa zɩɩb sẽn tõe n wa ne yaams n kõ-do. Tõe tɩ d sʋkã, kẽer pẽdgdame n dat n maan bũmb wʋsgo, baa vɩɩmã sẽn zoe n pa nana wã. Sã n mik tɩ y mi n yaame la y getẽ tɩ y yɛlã loog-y lame, tõe tɩ y sã n boog y sẽn tʋmd to-to y tʋʋmã zĩigẽ wã, wall sẽk ning y sẽn dɩkd n togd soay n noogd y yõorã, pa rẽ bɩ n maand ɛspoorã wall y kokd pemsmã ne manesem a taabã, na n sõng-y lame. D sã n yaa maan-tɩ-zems rãmb la d miẽ tɩ d pa tõe n maan bũmbã fãa, na n kɩtame tɩ d bãng d sẽn tõe n maanã tɛka, la kɩt tɩ d boog tʋʋm nins sẽn pa tɩlaeyã.
17. Bõe n tõe n koms kẽer daoodo, la bõe la a Zeova yeel rẽ wɛɛngẽ tɩ kengd pɛlga?
17 Tõe tɩ tõnd sẽn da sɩng n tẽed tɩ pa na n kaoos la dũni-kãngã sãam tɩ yaool n ta rũndã t’a ket n nan pa sãamã me komsa kẽer daood bilfu. (Yel. 13:12) La ned ning fãa sẽn tagsd woto sã n bʋgs goam nins sẽn be Habakuk 2:3 wã zugu, tõe n kenga a raoodo. Be, a Zeova yeta woto: “Tɩ bõe, a wakatã nan ka ta ye, la a pidsgã kolgda tao-tao. Mam sẽn na n wilg foom bũmb ningã ka na n vaal ye. Ba a sã n wẽnd wa a kaoosdame, bɩ f gũ-a. Wakat ninga mam sẽn na n yãkã, a na n maaname n ka vaal ye.” Rẽnd wa a Zeova sẽn wilg vẽenegã, d tõe n kɩsa sɩd tɩ dũni-kãngã sãoongã na n waa wakat ning yẽ sẽn yãkã takɩ!
18. a) Wẽnnaam pʋlem-bʋs n kengd yãmb raoodo? b) Wãn to la sõsg ning sẽn pʋgdã na n naf tõndo?
18 Sãmbg sẽn ka be, a Zeova nin-buiidã fãa gũuda wakat ning yaams la raood-komsg buud fãa sẽn na n sa wã, wakat ning ned kam fãa sẽn na n paam pãng ning ned sẽn be a “bi-bɩɩlem wakat” sẽn tarã. (Zoob 33:25) La baa rũndã-rũndã menga, d sã n tʋmd Rĩungã tʋʋm sẽn kengd raoodã, vʋʋsem sõngã na n kõt-d-la pãnga. (2 Kor. 4:16; Ef. 3:16) Ra bas-y tɩ yaams kɩt tɩ y wa kong bark sẽn ka sɛtã ye. Zu-loeesã buud fãa, rat n yeel tɩ makr toor-toorã sẽn dat n kʋɩɩb-dã, yaamsã wall raood komsgã sẽn wat ne-b rãmbã na n wa saame. Baa pa sa masã, b na n saa Wẽnnaam dũni-paalgã pʋgẽ. Sõsg ning sẽn pʋgdã pʋgẽ, d na n goma vʋʋsem sõngã sẽn kõt-d pãng tɩ d tõogd toog namsg pʋgẽ, la d tõogd n kɩɩsd d taabã, b sã n wa rat tɩ d maan sẽn pa segde, la d tõogd toog yɛl a taab taoorã me yelle.
Y na n leokame tɩ bõe?
• Wãn to la Biiblã kareng kõt-d pãnga?
• Wãn-wãn la pʋʋsgã la bʋgsgã kõt-d pãnga?
• Bõe la y tõe n maan n gil bũmb nins sẽn tõe n koms y raoodã?
[Zãmsgã sogsgã]
[Foto, seb-neng 26]
Tigissã kẽnd tõe n kõ-d-la pãnga