A Zezi: Bõe la a maan-yã?

“Mam dɩɩb yaa [m] maan sẽn tʋm-a maamã ratem, la [m] maan bãmb tʋʋmã n sɛ.”—ZÃ 4:34.

WAKAT ning a Zezi sẽn gom gom-kãensã wã wilgda bũmb ning sẽn pak-a n yɩɩdã. A Zezi ne a karen-biisã ra kẽna Samari kunkubã zut hal yibeoog n tãag wĩnto-sʋka. (Zã 4:6) A Zezi karen-biisã sẽn da tẽed tɩ kom n tar-a masã wã yĩnga, b waa ne rɩɩb n na n kõ-a. (Zã 4:31-33) A Zezi sẽn leok a karen-biisã to-to wã wilgda bũmb ning sẽn da pak-a n yɩɩda. Ne yẽ, Wẽnnaam raabã maaneg n da tar yõod n yɩɩd rɩɩbo. Ne a goamã la a manesmã fãa pʋgẽ, a wilgame tɩ yaa a Zeova sẽn tʋm-a t’a wa maan bũmb ningã n pak-a n yɩɩda. Bõe la a ra segd n maane?

▪ Wẽnnaam Rĩungã moonego, la nebã zãmsgo: Biiblã wilgda tʋʋm nins a Zezi sẽn tʋm tẽngã zugã, n yeel woto: “A Zezi saaga Galile soolem fãa n zãms nebã . . . n moon Wẽnnaam soolem koe-noogo.” (Matɩe 4:23) A Zezi pa moon Wẽnnaam Rĩungã koɛɛg bal ye. A zãmsa nebã, n wilg-b yɛl kẽer tɩ b wʋm a võore, la a sõng-b tɩ b sak n deege. A moonegã fãa ra tika Wẽnnaam Rĩungã zugu.

A Zezi koɛɛgã mooneg fãa pʋgẽ, a wilga nebã Wẽnnaam Rĩungã sẽn yaa bũmb ninga, la Rĩungã sẽn na n wa maan bũmb ningã. Goam nins sẽn pʋgdã kõta vẽnegr Wẽnnaam Rĩungã wɛɛngẽ, tɩ vɛrse rãmbã wilgd a Zezi sẽn yeel bũmb ning rẽ wɛɛngẽ:

▪ Wẽnnaam Rĩungã yaa goosneem sẽn be saasẽ, la yaa a Zezi la a Zeova yãk t’a yaa Rĩma.—MATƖE 4:17; ZÃ 18:36.

▪ Rĩungã na n wa kɩtame tɩ Wẽnnaam yʋʋrã paam waoogre, la a kɩt t’a raabã maan tẽngã zug wa sẽn maand saasẽ wã.—MATƖE 6:9, 10.

▪ Rĩungã sã n wa soog tẽngã sasa, tẽngã fãa na n lebga arzãna.—LUK 23:42, 43.

▪ Ka la bilfu, Rĩungã na n wa kɩtame tɩ Wẽnnaam sẽn da rat tɩ tẽngã yɩ to-to wã pidsi. *—MATƖE 24:3, 7-12.

▪ A maana yel-soalma: Nebã ra boonda a Zezi tɩ “karen-saamba.” (Zã 13:13) La baasgo, yʋʋm a tãab la pʋɩ-sʋkã pʋgẽ, a maana yel-soalem wʋsg me. D tõe n sõdga bʋʋm a yiib sẽn kɩt t’a maan rẽ wã. Pipi, yaa sẽn na yɩl tɩ nebã bãng tɩ Wẽnnaam n tʋm-a. (Matɩe 11:2-6) Yiib-n-soaba, yaa sẽn na yɩl tɩ nebã bãng a sẽn na n wa maan bũmb ning tẽngã gill zugã, a naamã sasa. Ad yel-soalem kẽere:

▪ A kɩtame tɩ sebg yõke, la a kɩt tɩ mogr sẽn da rãmbd sigi.—MARK 4:39-41.

▪ A puka zoens nini, a yoka wʋms tʋba, a kɩtame tɩ põe kẽne.—LUK 7:21, 22.

▪ A kɩtame tɩ rɩɩb lebg wʋsgo, n dɩlg neb kʋʋngo.—MATƖE 14:17-21; 15:34-38.

▪ Sẽn na ta naoor a tãabo, a vʋʋga kũum.—LUK 7:11-15; 8:41-55; ZÃ 11:38-44.

 Tags-y n ges-y vɩɩmã sẽn na n yɩ to-to, rĩm sẽn tar tõog woto sã n wa soog tẽngã!

▪ A wilga nebã Wẽnnaam a Zeova sẽn yaa a soaba: Sã n yaa ne wilg nebã a Zeova sẽn yaa a soabã wɛɛngẽ, ned kae n tõe n maan rẽ sõma n ta Wẽnnaam meng Biig a Zezi Kirist ye. A sẽn yaa “bi-kãseng sẽn yɩɩd bõn-naandsã fãa” wã yĩnga, a zĩnda ne a Zeova saasẽ n kaoos n yɩɩd malɛgsã fãa. (Kolos rãmba 1:15) Dẽnd a sɩd paama weer n bãng a Ba wã raabã, a noyã la a manesmã.

Rẽ n so t’a Zezi tõog n yeel tɩ “ned baa a yembr ka mi Biigã sẽn yaa a soab ye, sã n ka Ba [wã] bala. La ned baa a yembr ka mi Ba [wã] sẽn yaa a soab ye, sã n ka Biigã bala, la Biigã sẽn dat n vẽneg ned ning ne bãmbã.” (Luk 10:22) A Zezi sẽn wa n be tẽngã zugã, a wilga nebã a Ba wã sẽn yaa a soaba. A sẽn zĩnd saasẽ ne Wẽnnaam sẽn ka to wã kɩtame t’a tõog n wilg bũmb nins a sẽn wʋm la a sẽn yã a Ba wã nengẽ wã.—Zã 8:28.

A Zezi sẽn wa tẽngã zugã, pa bũmb ning a sẽn bãng a Ba wã nengẽ wã fãa la a wilg nebã ye. Yaa bilf bala, sẽn zems b wʋmbo.

D ges manesem a wãn a Zezi sẽn tũnug ne n sõng nebã tɩ b bãng a Ba wã sẽn yaa a soaba.

▪ A Zezi wilga nebã a Zeova yʋʋrã, a sẽn dat n maan bũmb ningã, la a noyã.—ZÃ 3:16; 17:6, 26.

▪ Ne a Zezi manesmã fãa sẽn tall yamleoogã, a kɩtame tɩ nebã bãng a Zeova sõma, bala a rɩka a Ba wã togs-n-taar kɛpɩ. Rẽ n so t’a yeel tɩ “ned ningã sẽn yã maam, a yãa m Ba.”—ZÃ 5:19; 14:9.

Bũmb nins a Zezi sẽn maanã sɩd noogda sũuri. D sã n bao n bãng a kũumã võore, la d sã n wilg tɩ d tara tẽeb ne rẽ, na n naf-d-la wʋsgo.

[Tẽngr note]