Wẽnnaam gomdã sẽn yete

Bõe yĩng tɩ Wẽnnaam bas tɩ wẽnemã la namsgã beẽ?

Sõs-kãngã pʋgẽ, b leokda sogsg nebã sẽn mi n sokd b mense, la b wilgd Biiblã zĩis nins d sẽn tõe n yã b leoorã. Y sã n dat t’a Zeova Kaset soab wa tɩ y sõs rẽ zugu, a na n saka ne yamleoogo.

1. Sɩnga wãn tɩ wẽnemã wa beẽ?

A Sʋɩtãan n yɩ pipi n yag ziri. Yaa rẽ tɛk la wẽnemã sɩng-yã. Wẽnnaam sẽn wa n naan-a wã t’a ra pa Sʋɩtãan ye. A ra yaa malɛk sẽn zems zãnga, la “a ka pa sɩd pʋgẽ ye.” (Zã 8:44, Sebr Sõngo) A wa n yik n datame tɩ b waoog-a wa Wẽnnaam, tɩ yaool n yaa Wẽnnaam a ye bal n tog ne rẽ. A Sʋɩtãan belga d yaab a Hawa, n kɩt t’a bas Wẽnnaam sakr n sak yẽ. A Ãdem me sak n kɩɩsa Wẽnnaam. A sẽn yãk yam n maan woto wã kɩtame tɩ ninsaalbã namsdẽ la b kiidẽ.—Karm-y Sɩngr 3:1-6, 17-19.

A Sʋɩtãan sẽn wa n belgd a Hawa t’a kɩɩs Wẽnnaamã, yaa Wẽnnaam naam sẽn ka to wã la a Sʋɩtãan sẽn da kɩɩsdã. Ninsaalbã fãa la bal kẽe a Sʋɩtãana, n tõdg tɩ Wẽnnaam kõn yɩ b naab ye. Woto kɩtame t’a Sʋɩtãan lebg “dũniyã naaba.”—Karm-y Zã 14:30; Wilgr 12:9.

2. Yaa ninsaalbã la malɛgsã naaneg n pa yɩ sõma bɩ?

Ninsaalbã la malɛgsã fãa Wẽnnaam sẽn naanã ra tõe n sak-a-la zãng-zãng wa a sẽn datã. (Tõodo 32:5) Wẽnnaam naana tõnd n kõ-d tõog tɩ d tõe n yãk yam n maan sẽn yaa sõma wall d maan sẽn yaa wẽnga. Woto kɩtame tɩ d tõe n wilg Wẽnnaam d nonglem.—Karm-y Zak 1:13-15; 1 Zã 5:3.

3. Bõe yĩng tɩ Wẽnnaam bas tɩ nebã namsdẽ?

A Zeova kell n basame tɩ b kɩɩs a naam sẽn ka to wã wakat bilf yĩnga. Bõe yĩnga? Yaa sẽn na yɩl tɩ ninsaalbã bãng tɩ b pa tõe n soog b mens tɩ naf-b ye. (Yelbũna 20:24) Ninsaalbã sẽn be tẽngã zug sẽn yɩɩd yʋʋm 6 000 masã tɩ b yɛlã yaa to-to wã wilgda rẽ vẽenega. Nanambsã pa tol n tõog tɩ zabã, nin-kʋʋrã, wẽgbã, la bãasã sa ye.—Karm-y Koɛɛg Soab 7:29; 8:9; Rom dãmb 9:17.

La neb nins sẽn sakd Wẽnnaam naamã yẽ nafdame. (Ezai 48:17, 18) Ka la bilfu, a Zeova na n sãama ninsaalbã goosneema rãmbã fãa. Yaa neb nins sẽn na n sak tɩ Wẽnnaam yɩ b naabã bal n na n vɩɩmd tẽngã zugu.—Ezai 2:3, 4; 11:9; karm-y Daniɛll 2:44.

  4. Wẽnnaam sẽn maan sũ-marã kɩtame tɩ d tõe n maan bõe?

A Sʋɩtãan yeelame t’a Zeova pa tõe n paam tɩ ned baa a ye sak-a ne yamleoog ye. Wẽnnaam sẽn maan sũ-marã kɩtame tɩ tõnd ned kam fãa tõe n wilg sã n yaa Wẽnnaam naamã la a rata, bɩ a sã n data ninsaalbã naam. Yaa tõnd sẽn vɩ to-to wã n wilgd naam ning tõnd sẽn yãkã.—Karm-y Zoob 1:8-11; Yelbũn 27:11.

5. Wãn to la d wilgd tɩ d saka Wẽnnaam naamã?

D wilgdame tɩ d saka Wẽnnaam naamã, d sã n vaeesd Biiblã sẽn yaa a Gomdã, n bãngd a sẽn dat tɩ d tũ-a to-to wã, la d sakd rẽ. (Zã 4:23) Sẽn paase, wa a Zezi, d segd n lakda d mens ne dũniyã politikã la a zabã.—Karm-y Zã 17:14.

A Sʋɩtãan kɩtdame tɩ nebã tʋmd tʋʋm-beed buud toor-toore. D sã n tõdg tʋʋm-beedã maanego, d zo-rãmb la d roagdb kẽer tõe n yaand-d lame, wall b namsd-do. (1 Pɩɛɛr 4:3, 4) Rẽnd d segd n yãka d sẽn na n maanega. Rẽ yĩnga d na n baoa neb nins sẽn nong Wẽnnaamã tũud-n-taar bɩ? D na n saka Wẽnnaam noyã sẽn yaa sõma wʋsg la wilgdẽ t’a nong-d lame wã bɩ? D sã n maan woto, d wilgdame t’a Sʋɩtãan sẽn da yeel tɩ ned baa a ye pa na n sak Wẽnnaamã yaa ziri fasɩ.—Karm-y 1 Korẽnt dãmb 6:9, 10; 15:33.

Y sã n dat vẽnegr n paase, bɩ y karem Biiblã sɩd yetame tɩ bõe? sebrã sak 11 wã. A Zeova Kaset rãmbã n yiis-a.

[Foto, seb-neng 12]

A Ãdem maana yam-yãkr sẽn pa sõma

[Foto, seb-neng 13]

D yam-yãkr toor-toorã wilgda d sã n sakame tɩ Wẽnnaam yɩ d naaba