Gũusg Gasg a to ne ãngilind wʋmb sẽn pa toogo

YAA ne sũ-noog la d rat n wilg-y tɩ ki-kãngã tɛka, d na n yiisda Gũusg Gasg a to zãmsgã yĩng ne ãngilindi, t’a wʋmbã yaa nana. D na n maana rẽ yʋʋmd a ye n gese. A pʋgẽ wã, d na n ningda zamsgã sõss toor-toorã, la sõss a taaba. D saagdame tɩ woto na n sõnga a Zeova kaset rãmbã sʋk neb wʋsg tɩ b bãng a Zeova sõma n paase. Bõe yĩng tɩ d yet woto?

Tẽns wʋsg pʋsẽ, d saam-biisã wʋsg gomda ãngilindi. Wala makre, Fidzi, Gãna, Kenya, Liberia, Nizeria, Papuazi Nuvɛll Gine la Il Salomo. Baa saam-biis nins sẽn be tẽn-kãens pʋsẽ wã sẽn tõe n gomd b buudã goam toor-toorã, naoor wʋsgo, tigissã sasa la koe-moonegã pʋgẽ, b gomda ãngilindi. La baasgo, b sẽn gomd ãngilind ningã yaa faag n yɩɩd sẽn be-a tõnd sɛbã pʋsẽ wã. A Zeova Kaset rãmb kẽer me n yik n bas b tẽnse, n tɩ vɩ tẽns b sẽn gomd ãngilind pʋsẽ. Woto kɩtame tɩ baa b sã n pa wʋmd ãngilind sõma me, yaa tɩlae tɩ b gom-a. Sẽn paase, b pa tõe n paam tigissã ne b buudã goam ye.

D miime tɩ sẽn yɩɩd fãa, yaa ne sõss nins d sẽn zãmsd Gũusg Gasgã pʋgẽ semen fãa wã maasem la “tʋm-tʋmd sẽn tũud sɩd la sẽn tar yamã” sõngd-d tɩ d wʋmd Wẽnnaam Gomdã võor sõma. Rẽ n so tɩ sẽn na yɩl n sõng neb nins fãa sẽn wat tigissã tɩ b rɩ sõssã yõod sõma, Gũusg Gasg ning yell d sẽn gomdã pʋgẽ, b gʋlsa sõssã ne gom-biis võor wʋmb sẽn pa toe. A zugã fotã na n yɩɩ toore. La zãmsgã sõss pʋgẽ gom-zu-bi wã, sulã, sogsg nins b sẽn ningd lebg-n-ges yĩngã, n paas fot rãmbã fãa pa na n toeem ye. Rẽnd Gũusg Gasgã zãmsg sasa, y tõe n talla Gũusg Gasg ning fãa y sẽn date, n pʋg karengã. Y tõe n gesa goam nins sẽn be tẽngrã, n bãng welgr ning sẽn be seb-kãensã b yiibã sʋka. B yãk-b-la seb-kãngã pipi zãmsg sõsgã sull a yiib-n-soabã pʋgẽ.

Neb wʋsg pʋʋsda a Zeova n kot woto: “Bɩ y kõ maam bãngr tɩ m zãms yãmb tõodo.” (Yɩɩl 119:73) D saagdame tɩ seb-paallã na n yɩɩ nin-kãens wʋsg pʋʋsgã leoore. D kɩsa sɩd tɩ neb nins sẽn pa wʋmd ãngilindã sõma wã, n paas sẽn gomd-b ãngilindã kamb kẽer na n tõogd n segenda Gũusg Gasgã zãmsgã sõss sõma semen fãa masã. D sũur yaa noogo, a Zeova sẽn wilgd t’a nonga d “ba-biisã” fãa sẽn be dũniyã gill zugu, n kɩtdẽ tɩ “tʋm-tʋmd sẽn tũud sɩd la sẽn tar yamã” sõngd-d tɩ d bãngd-a sõma wã.—1 Pɩɛ. 2:17; Mat. 24:45.

A Zeova Kaset rãmbã Siglgã taoor lʋɩtb Sulli