1-3. a) Maan f bãngẽ rat n yeelame tɩ bõe, la wãn to la rẽ tõe n nams neda? b) Bõe yĩng t’a Poll kibarã tõe n naf-do?

NAOOR wʋsgo, ned sã n wa yetẽ ‘t’a bãngẽ,’ mi n yaa a sũur n sãam ne bũmb a sẽn maan wall a sẽn pa maane. Tõnd ned kam fãa zoe n maana bũmb n wa maand a bãngẽ. La rẽ wɛɛngẽ, neb kẽer maanda yɩɩr tɩ looge. Bõe poorẽ la yãmb yẽ maand y bãngẽ?

² Sãnda maana yel-kɛga, wall yel-wẽn-kãsems menga. Kẽer yẽ pa maan bũmb sẽn yaa wẽng ye. La baasgo, b sokda b meng b sẽn maan bũmb ningã sã n yaa sõma. Sãnda tõogame n pa le tagsd b sẽn da maan pĩndã yell ye. Neb a taab yẽ ket n sãamda b sũur bũmb b sẽn maan yĩnga. (Yɩɩl 51:5) La yãmb yẽ? Y tʋllame n da wa maan y bãngẽ Wẽnnaamã tũubã pʋgẽ bɩ? Rẽ yĩnga Biiblã gomda ned sẽn tũ Wẽnnaam n pa bas t’a pĩnd kongr koms a raood yell bɩ? N-ye. Yaa tʋm-tʋmd a Polle.

³ A Poll vɩɩmã pʋgẽ, a tudg n maana yel-wẽn-kãsemse, la a yãka yam me n maan bũmb a taab sẽn sek pẽgre. A sũur wa n sãama bõn-wẽns nins a sẽn maanã yĩnga, la a rɩka yam n tũ Wẽnnaam a pãng tɛka, n tõog t’a vɩɩmã tall barka. Bɩ d ges a mak-sõngã sẽn kõt tõnd yam ninga.

4. Bõe la tʋm-tʋmd a Poll da tudg n maane?

⁴ A Poll bi-bɩɩlmẽ, a ra yaa fariziẽ. Wakat kãnga, a tʋma tʋʋm-kɛg n wa maand a bãngẽ. Wala makre, a namsa a Zezi karen-biisã hal wʋsgo. Kibarã sẽn be Biiblã pʋgẽ wã wilgame t’a Etɩɛn kʋʋbã poor bilfu, a “Soll [b sẽn wa n boondẽ t’a Pollã] . . . namsa a Zezi tẽedbã  wʋsgo. Yẽ kẽe rot fãa pʋsẽ n yõg rap ne pagb n kẽes bãmb bi-bees roogẽ.” (Tʋʋ. 8:3) Bãngd a ye (Albert Barnes) yeelame tɩ gɛrkã gom-bil ning b sẽn lebg ka tɩ “nams wʋsgã” wilgdame t’a Soll namsa a Zezi tẽedbã ne toolem wa “we-rũnga.” A Soll sẽn da tar yẽesem zʋɩf-rãmbã tũudum pʋgẽ wã ra kɩsa sɩd tɩ Wẽnnaam datame tɩ yẽ menes kiris-nebã gilli. Woto kɩtame t’a nams-b nams-toaaga, n dat n kʋ rapã ne pagbã fãa.—Tʋʋ. 9:1, 2; 22:4. *

5. Maana wãn t’a Soll wa bas a Zezi karen-biisã namsgo?

⁵ Kaoosg zugẽ, a Soll wa n debda Damas n na n tɩ yõg kiris-nebã b zagsẽ n tall n kẽng Zerizalɛm tɩ Sãnedrẽ wã neb sɩbg-ba. La a Zezi sẽn yaa tigingã zu-soabã gɩdg-a lame. (Ef. 5:23) A Soll sẽn wa n be sorẽ, a Zezi vẽnega a meng ne-a, n kɩt tɩ vẽenem yi yĩngr n yãg n gũbg-a t’a lebg zoanga. Dẽ poore, a Zezi yeel-a lame t’a yik n kẽng Damas n tɩ gũ tɩ b wa wilg-a a sẽn segd n maanega. D mii kibarã sẽn baas to-to.—Tʋʋ. 9:3-22.

6, 7. Bõe n wilgd t’a Poll wa n bãngame t’a sẽn da maandã yaa wẽnga?

⁶ A Poll sẽn wa n bãng t’a sẽn maandã pa sõma wã bala, a basa a Zezi karen-biisã namsgo, n sɩng koɛɛgã mooneg ne yẽesem, n gomd Kiristã yelle. La a pa yĩm a sẽn da maanã yell ye. A wa n yeela woto: “Yãmb dag n wʋma mam tʋʋmd kibar pĩnda, mam sẽn da tũud zʋɩf-rãmbã karong wakate, tɩ mam da namsa Wẽnnaam tẽedbã wʋsg-wʋsgo, hal n sãam bãmba.” (Gal. 1:13) Kaoosg zugẽ, a goma a tʋʋm-kɛgã yell a sẽn wa n gʋlsd Korẽnt tẽedbã, Filip tẽedbã la a Tɩmote wã. (Karm-y 1 Korẽnt dãmb 15:9; Fil. 3:6; 1 Tɩm. 1:13.) Yaa sɩd t’a Poll sẽn maanã yãnd ra tar-a lame, la a pa bao n na n solg rẽ ye. A bãngame t’a sẽn da maanã yaa wẽng wʋsgo.—Tʋʋ. 26:9-11.

⁷ Bãngd a ye (Frederic Farrar) yeelame tɩ d sã n tags a Poll sẽn nams kiris-nebã ne wẽnem to-to wã zugu, d bãngda a sũur sẽn tog n da sãam to-to, la nebã me sẽn da sãbsd-a to-to wã. Sɩd me, a Poll sẽn da kaagd tigimsã yĩnga, tõe tɩ saam-biis kẽer sẽn seg-a pipi sok-a-la woto: ‘Dẽnd yaa foo la a Poll wɛ? Fo n da namsd tõndã!’—Tʋʋ. 9:21.

8. a) A Zeova ne a Zezi sẽn wilg a Poll nimbãan-zoeer la nonglmã, a manesem yɩɩ wãna? b) Yam bʋg la d tõe n dɩke?

⁸ A Poll bãngame tɩ yaa Wẽnnaam barkã yĩng la a sẽn zoe a nimbãaneg n kɩt t’a lebg tʋm-tʋmdã. A lɛta 14 pʋsẽ, a goma Wẽnnaam barkã yell naoor 90. Biiblã gʋlsdb a taabã pa gom dẽ yell wʋsg woto ye. (Karm-y 1 Korẽnt dãmb 15:10.) A Poll sũur da nooma wʋsg Wẽnnaam sẽn zoe a nimbãanegã yĩnga, n da rat n wilg-a a mi-beoogo. Rẽ n so t’a tʋm Wẽnnaam tʋʋmdã ne yẽesem n yɩɩg tʋm-tʋmdb a taabã fãa. A Poll kibarã wilgda tõnd bõe? Wilgdame tɩ d sã n tẽ a Zezi maoongã, n tek yam n kos sugr la d bas tʋʋm-wẽnsã, baa d sã n da maana yel-wẽn-kãsemse, a Zeova kõt-d-la sugri. Rẽnd y sã n tagsdẽ tɩ y yel-wẽnd yaa kãseng hal tɩ Wẽnnaam  pa tõe n kõ-y sugr Kiristã maoong maasem yĩnga, bɩ y tẽeg a Poll yelle. (Karm-y 1 Tɩmote 1:15, 16.) Baa a Poll sẽn da nams Kiristã, a wa n yeela woto: ‘Wẽnnaam Biigã nonga maam n kõ bãmb meng mam yĩnga.’ (Gal. 2:20; Tʋʋ. 9:5) A Poll mikame tɩ yaa a sẽn na n bas a tʋʋm-kɛgã yell tagsg la a wɩng ne Wẽnnaam tʋʋmdã la a pa na n le wa maand a bãngẽ. Yãmb me tog n maana woto.

9, 10. a) Bõe n tõe n kɩt tɩ d wa maand d bãngẽ? b) Bõe yĩng tɩ d pa segd n sidgd yɛl d sẽn da maan yĩng n pa satẽ?

⁹ Yãmb maanda y bãngẽ yɛl y sẽn maan yĩng bɩ? Y zoe n sãama y sẽk n pʋg bũmb sẽn ka yõod bɩ? Yãmb maana bũmb tɩ wa ne sũ-sãams n kõ y taab bɩ? Tõe me tɩ y maanda y bãngẽ bʋʋm a taab yĩnga. Sã n yaa woto, bõe la y tõe n maane?

¹⁰ Neb wʋsg sidgda wakat fãa. B wae n tagsda yel-kɛg b sẽn da maan yell n maand yɩɩre, tɩ sãamd b sũuri. La rẽ yĩnga sidgr tõe n welga yell sɩda? Ayo! Y sã n sidgdẽ, y sãamda y sẽk la y namsd y meng zaalem. Wall tɩ y sidgdẽ wã, bũmb n be y sẽn tõe n maan tɩ naf-yã. Wala makre, y sã n beega neda, y tõe n tɩ kos-a-la sugr n maneg yellã. Y leb n tõe n tagsa y beegrã yelle, la y bao n bãng y sẽn tõe n maan n da le paas a buud ye. Wakat ning me, tõe n yɩɩ tɩlae tɩ y tõog toog n mao ne yell ning y sẽn maanã biisi. La ned sã n sidgd yɛl a sẽn da maan yĩnga, tõe n yɩɩ toog ne-a t’a tũ Wẽnnaam ne a sũur fãa. Ad sidgr sɩd ka yõod ye!

11. a) Bõe la d tõe n maan n paam t’a Zeova zoe d nimbãanega? b) D sã n tudgame n maan bũmb tɩ sãamd d sũuri, Biiblã wilgame tɩ bõe la d segd n maane?

¹¹ Neb kẽer wae n tagsda yel-kɛg  nins b sẽn da maanã yelle, hal n wa getẽ tɩ b ka yõod Wẽnnaam nifẽ ye. B tõe n tagsdame tɩ Wẽnnaam pa na n tol n kõ-b sugr tɩ bala, b beega naoor wʋsgo, wall tɩ b beegrã yaa wẽng wʋsgo. La baa bũmb ning b sẽn maanã wẽnem sẽn zem to-to, b tõe n teka yam n kos Wẽnnaam sugri. (Tʋʋ. 3:19) Sɩd me, a Zeova na n sak n kõ-b-la sugr wa a sẽn kõ neb wʋsg sugrã. Ned sã n yaa sik-m-meng soab la pʋ-peelem soaba, n tek yam n kot sugri, a Zeova zoeta a nimbãanega. Wala makre, Wẽnnaam sak n kõ a Zoob sugri, bala a Zoob yeela woto: “Mam yam tekame tɩ m zĩ tom ne tompɛglem pʋgẽ n kot-y sugri.” (Zoob 42:6) D sã n tudgame n maan bũmb tɩ sãamd d sũuri, Biiblã wilgd-d-la d sẽn segd n maan tɩ d sũ-sãamsã sa, tɩ d lebs n paam sũur pʋgẽ bãane. A yeta woto: “Sẽn solgd-a a yel-wẽn ka na n tõog ye. La sẽn sak n vẽneg-a a yell la a bas-a na n paama nimbãan-zoeere.” (Yel. 28:13; Zak 5:14-16) Rẽnd d tõe n pʋʋsa Wẽnnaam n togs-a d yel-wẽndã, n kos-a sugri, la d maan d sẽn tõe fãa tɩ yɩ vẽeneg tɩ d sũur sãama ne d beegrã. (2 Kor. 7:10, 11) D sã n maan woto, a Zeova “sẽn kõt sugr wʋsgã” na n zoeya d nimbãanega.—Ezai 55:7.

12. a) A Davɩɩd kibarã wilgdame tɩ ned sã n maana yell t’a sũur-kasetã namsd-a, a tɩɩm yaa bõe? b) Biiblã sã n yeel t’a Zeova teka yam, rat n yeelame tɩ bõe, la wãn to la rẽ bãngr nafd tõndo? (Ges-y zĩ-gũbrã sẽn be yĩngrã.)

¹² Ne pʋʋsgã maasem, d tõe n paama Wẽnnaam sõngr n yɩɩda. Wala makre, a Davɩɩd pelga a pʋg n pʋʋs Wẽnnaam barka, n wilg a sũ-noog a sẽn deeg a pʋʋsgã yĩnga. (Karm-y Yɩɩl Sõamyã 32:1-5.) A Davɩɩd sẽn da wa n nan pa vẽneg a yel-wẽndã n togsã, a sũur-kasetã ra namsd-a-la wʋsgo. Sẽn paase, ra booga a keelmã la menes a sũ-noogã. Bõe n sõng a Davɩɩd t’a paam a menga? Yaa a sẽn vẽneg a yellã n togs Wẽnnaamã bala. A Zeova reega a Davɩɩd pʋʋsgã, la a keng a raood t’a tõog n ket n maand sẽn yaa tɩrga. Yãmb me sũur sã n sãama y beegr yĩnga, bɩ y pʋʋs a Zeova n kos-a sugr la y maan y sẽn tõe fãa n toeeme. Rẽ, y tõe n kɩsa sɩd t’a kelga y pʋʋsgã sõma, la t’a kõ-y-la sugri.—Yɩɩl 86:5.

13, 14. a) Bõe yell la d segd n tagsd n yɩɩda? b) Sogs-bʋs n tõe n sõng-d tɩ d fees d mense?

¹³ Yaa sɩd tɩ d tõe n dɩka yam yell sẽn loog pʋgẽ. La d pa segd n sãamd d sũur ne rẽ ye. Wall tɩ d maand woto, segdame tɩ d tagsd rũndã la beoog  yelle. Sok-y y meng woto: ‘Rẽ yĩnga m na n wa maana m bãngẽ m sẽn yãk yam n maand bũmb ninsã yĩng bɩ? M sã n wa tẽeg rẽ yelle, m sũur pa na n sãam sɩda? Mam tũuda Wẽnnaam ne m sũur fãa sẽn na yɩl n da wa maand m bãngẽ bɩ?’

¹⁴ To-kãsengã sẽn ta n sa wã, yɩta sõma tɩ d sok d mens woto: ‘M tõe n tʋma Wẽnnaam tʋʋmdã wʋsg n paas bɩ? M tõe n lebga so-pakd bɩ? Bõe n gɩdg tɩ b pa tõe n yãk-m tɩ m lebg kãsemb-sõngda? Mam maanda m sẽn tõe fãa tɩ m zʋgdã lebgd sõma n paasdẽ bɩ? Mam tara zʋg-sõma nins a Zeova sẽn dat tɩ sẽn na n vɩɩmd-b dũni-paalgã pʋgẽ wã tallã bɩ?’ La d pa segd n maand yɩɩr bal ye. D tik sogs-kãensã n fees d mens n ges d sã n sɩd tʋmda a Zeova tʋʋmdã wa d sẽn tõe tɛka. D mao tɩ d yam-yãkr fãa yɩ sõma, tɩ rẽ la d pa na n wa maan d bãngẽ.—2 Tɩm. 2:15.

15, 16. a) Bõe la neb wʋsg mong b mens sẽn na yɩl n lʋɩɩs Wẽnnaam daabã taoore? b) Bõe yĩng tɩ d pa segd n maan d bãngẽ d sẽn lʋɩɩs Wẽnnaam Rĩungã taoorã yĩnga?

¹⁵ Yãmb sak n monga y mens bũmb kẽer n lebg so-pakdb bɩ? Tõe tɩ y basa tʋʋmd sẽn da kõt-y ligd sõma, sẽn na yɩl n paam sẽk n tʋm Wẽnnaam tʋʋmdã wʋsgo. Tõe me tɩ y yãka yam n pa na n kẽ kãadem bɩ n pa na n dog kamba, sẽn na yɩl n tʋmd Betɛllẽ wall y gilgd n met siglgã roto, pa rẽ bɩ n kaagd tigimsã, wall y yaa misioneere. Y sã n maana woto tɩ y yʋʋmã vẽsgdẽ masã, y maanda y bãngẽ bɩ? Y segd n tagsame tɩ ra pa tɩlae tɩ y maan woto, wall y tags tɩ y sãama y sẽk bɩ?

¹⁶ Yaa y sẽn nong a Zeova ne y sũur fãa la y rat n sõng neb a taabã tɩ b bãng-a la b tũ-a wã n kɩt tɩ y maan woto. Ra n tags-y tɩ y sã n da pa maan woto, y vɩɩmã ra na n yɩɩ sõma n yɩɩg ye. Y tõe n nooga y sũuri, y sẽn mi tɩ y maana sẽn yaa tɩrgã yĩnga. Y maana y sẽn tõe a Zeova tũudmã pʋgẽ. A pa na n tol n yĩm bũmb ning y sẽn maan a yʋʋrã yĩngã ye. Y sã n wa paam vɩɩm hakɩkã sẽn yaa vɩɩm sẽn pa satã, y na n paama bark sẽn pa tõe n bãng n bilgi!—Yɩɩl 145:16; 1 Tɩm. 6:19.

17, 18. a) Bõe n sõng a Poll t’a tõog n tũ Wẽnnaam n pa maan a bãngẽ? b) Wãn to la y tõe n dɩk a Poll togs-n-taare?

¹⁷ Bõe n sõng a Poll t’a wa pa le maand a bãngẽ? A Poll yeelame tɩ yẽ pa le maand yɩɩr ne bũmb nins sẽn loogã, la t’a maoodame n dat n wa paam keoorã. (Karm-y Filip rãmb 3:13, 14.) A Poll da pa tagsd yel-kɛg nins a sẽn maan a sẽn da wa n be zʋɩf-rãmbã tũudum pʋgẽ wã yell wʋsg ye. A maoome n kell n sak Wẽnnaam, sẽn na yɩl n wa paam keoorã sẽn yaa vɩɩm sẽn kõn sa wã.

¹⁸ Yam bʋg la d tõe n dɩk a Poll goamã pʋgẽ? Wall tɩ d maand yɩɩr yɛl nins d sẽn zoe n maanã sẽn yaa yɛl d sẽn pa tõe n toeemã yĩnga, yɩta sõma tɩ d tagsd bark nins sẽn watã yelle. Yaa sɩd tɩ d pa tõe n yĩm yel-kɛg nins d sẽn da maanã yell fasɩ ye. La pa segd tɩ d ningd d meng taal rẽ yĩng n pa satẽ ye. Bɩ d bas sẽn loogã yell tagsg la d tʋm Wẽnnaam tʋʋmdã ne d sũur fãa, n tagsd bark nins sẽn watã yelle.