YƲƲMD 1963 soabã sa-sik kiuug rasem 28, rat n yeel tɩ na maan yʋʋm 50 woto, Etazĩni rao a Martin Luther King sõsa zãma taoore, hal tɩ neb wʋsg ket n gomd rẽ yelle. A sõsgã pʋgẽ, a wilgame tɩ yẽ saagdame tɩ daar n wat tɩ nebã na n vɩ ne taab zems-n-taar pʋgẽ, tɩ bu-welsg ka le beẽ ye. Baa sẽn yɩ Etazĩni la a sẽn sõsã, a sẽn gom bũmb ning yellã kẽe tẽns wʋsg neba.

Yʋʋmd 1963 soabã sɩpaolg kiuug rasem 20, rat n yeel tɩ kiis a tãab a Martin Luther King sõsgã poore, tẽns 100 la zak sẽn be Nasiõzĩni wã pʋgẽ n siig taab noore, n wilg tɩ b na n mao n menesa bu-welsg buud fãa. Yʋʋmã sẽn pʋglã pʋgẽ, tẽns wʋsg me pʋlmame tɩ b na n maana woto. B modgrã seka pẽgre. La rẽ waa ne bi-bʋse?

Yʋʋmd 2012 soabã tʋʋlg kiuug rasem 21, a Ban Ki-moon sẽn yaa Nasiõzĩni wã sekertɛɛr generallã yeelame tɩ bũmb wʋsg la tẽnsã maand sẽn na yɩl n menes bu-welsgã, wẽgbã la sãambã kisgrã. A paasa woto: “Baa ne rẽ, bu-welsgã ket n namsda neb milyõ-rãmb dũniyã gill zugu.”

Baa tẽns nins pʋsẽ b sẽn tõog tɩ bu-welsgã ne wẽgbã boogã, sokr n kete: Rẽ yĩnga b tõogame tɩ nebã bas tags-kɛgã bɩ, bɩ yaa rẽ sẽn mi n kɩt tɩ b maan bũmb ninsã bal la b tõog tɩ b base? Kẽer tagsame tɩ yaa wẽgbã bal n booge, la tɩ b pa tõe n menes tags-kɛgã ye. Bõe yĩng tɩ yaa toog tɩ b menes tags-kɛga? Yaa tɩ ned sã n wẽg a to, b tõe n bãngame n tũ laloa wã n sɩbg a soabã. La ned sã n tar tags-kɛga, bee a sũurẽ wã tɩ ned pa tõe n bãng ye.

Rẽnd sẽn na yɩl tɩ bu-welsgã sa, b pa segd n kɩt tɩ ned pa le wẽg a to bal ye. B segd n kɩtame tɩ nebã bas tags-kɛg nins b sẽn tarã me. Rẽ sɩd tõeeme bɩ? Bɩ d gom kibay a wãn yelle, tɩ na n sõng-d lame tɩ d bãng tɩ nebã tõe n basa tags-kɛgã. Sẽn paase, d na n bãnga bũmb ning sẽn tõe n sõng-ba.

A Linda: Mam doga Afirikdisiid. Mam da tagsdame tɩ neb nins fãa sẽn pa nasaar-dãmbã pa ta neb zĩigẽ, tɩ b pa karem n zãage, tɩ ned pa tõe n teeg-ba, la tɩ b yaa nasaar-dãmbã tʋm-tʋmdb bala. Mam da pa mi meng tɩ tags-kãensã yaa kɛg ye. La m sẽn wa n sɩng Biiblã zãmsgã, mam sẽn get bu-zẽmsã neb to-to wã sɩnga toeengo. Mam bãngame tɩ “Wẽnnaam ka tũusd neba,” la tɩ sẽn tar yõod a nifẽ pa d yĩngã kõbg wall d buud-gomdã ye. Yaa bũmb ning sẽn be d sũurẽ wã. (Tʋʋma 10:34, 35; Yelbũna 17:3) Filip rãmb 2:3 goamã sõng-m lame tɩ m bãng tɩ m sã n ning m yamẽ tɩ nebã fãa yɩɩda maam, m na n tõog n basa tags-kɛgã. Biiblã vɛrse kãngã, la a taab tũub sõnga maam tɩ m tõe n pẽneg ned buud fãa n pa ges a yĩngã kõbg ye. Masã, m paama m meng ne tags-kɛga.

 A Michael: Mam doga Ostrali, zĩig a ye nasaar-dãmbã sẽn waooge. Mam da kisa Aazi nebã, sẽn yɩɩd fãa sinoa-rãmbã. Mam sã n mi n kẽnd ne mobill n wa yã ned sẽn wõnd Aazi neda, m lɩkdame n tʋʋs-a, la m yeel woto: “Fo zĩig ka ka ye.” La mam sẽn wa n sɩng Biiblã zãmsgã, m bãngame tɩ Wẽnnaam nanda nebã fãa. A nonga nebã fãa n pa get b sẽn yitẽ, wall b yalẽ ye. Rẽ yɩ-m-la noogo, tɩ m bas bu-zẽmsã neb kisgri, n nong-b masã. Mam sẽn toeem to-to wã linga mam mengã. Masã, mam tõe n pẽnega neb buud fãa, tɩ noom-m wʋsgo.

A Sandra: Mam ma wã yita Nizeriya soolem ning b sẽn boond tɩ l’état du Delta wã. Mam ba wã yẽ yita l’état d’Edo, n yaa Esan buudã nedã. Woto kɩtame tɩ mam ba wã zakã rãmb kisg mam ma wã a yõor tɛka. Rẽ kɩtame tɩ m da wẽen tɩ m pa na n tol n yõg zood ne Esan buudã neda, wall n kẽ kãadem ne ned sẽn yit l’état d’Edo ye. La m sẽn wa n sɩng Biiblã zãmsgã, m yamã sɩnga toeengo. Biiblã sẽn wilg tɩ Wẽnnaam ka tũusd neba, la tɩ buudã fãa sʋka, ned ning sẽn zoet-a tata a yamã, maam la ãnda n na n tik ned buud n kisg-a? Mam toeema m tagsgã, tɩ maam ne m ba wã zak rãmb zemsd taab masã. Biiblã sagls tũub kõta maam sũ-noogo, la kɩtdẽ tɩ m yam gãe bãane. Sõngame me tɩ m tõe n pẽneg ned buud fãa, n pa ges a sẽn yitẽ wall a buud-gomdã sẽn yaa a soab ye. Mam kẽe kãadem ne rao sẽn yit l’état d’Edo, n yaa Esan buudã ned menga.

Bõe yĩng tɩ Biiblã tõog n sõng nin-kãensã la neb a taab tɩ b bas bu-welsgã? Bala, Biiblã yaa Wẽnnaam Gomde. A goamã tõe n kẽe neda, n toeem a tagsgã. Sẽn paase, Biiblã  wilgda bũmb nins Wẽnnaam sẽn na n maan tɩ welsgã buud fãa sa.

Yaa sɩd tɩ Biiblã bãngrã tõe n sõnga ned sẽn tar tags-kɛg t’a toeeme, la sẽn na yɩl tɩ welsgã buud fãa sa, bũmb a yiib la Wẽnnaam na n menese. Pipi yaa yel-wẽndã. Biiblã yeela vẽeneg tɩ “ned ka be n ka beegdẽ ye.” (1 Rĩm dãmba 8:46) Rẽ n so tɩ baa d sẽn maaneg fãa, d mi n wa tagsda wa tʋm-tʋmd a Polle. A yeela woto: “Mam yãta tõ-kãng mam pʋgẽ tɩ mam sẽn dat n maan neere, wẽng loee ne maam.” (Rom dãmba 7:21) Rẽnd d pa tõe n pa wa tall “tags-wẽns” ye. Yaool n yaa rẽ n wat ne welsgã.—Mark 7:21.

Yiib-n-soab yaa a Sʋɩtãana. Biiblã yeelame t’a yaa “nin-kʋʋda,” la t’a ‘belgda dũniyã fãa.’ (Zã 8:44; Wilgri 12:9) Yaa rẽ la neb wʋsg sẽn tar tags-kɛgã, tɩ ninsaalbã pa tõe tɩ wẽgbã, bu-welsgã, sãambã kisgr la welsg buud a taabã sa wã.

Rẽnd sẽn na yɩl tɩ welsgã buud fãa sa, Wẽnnaam na n menesa yel-wẽndã la a Sʋɩtãana. Biiblã wilgame t’a na n kɩtame t’a Rĩungã maan dẽ.

A Zezi yeela a karen-biisã tɩ b pʋʋs Wẽnnaam n kos t’a ‘Rĩungã wa, t’a raabã maan dũniyã zug wa sẽn maand saasẽ wã.’ (Matɩe 6:10, MN) Yaa Wẽnnaam Rĩungã n na n kɩt tɩ wẽgbã buud fãa sa. Rẽnd kisgrã la bu-welsgã me na n saame.

Wẽnnaam Rĩungã sã n wa na n sɩng a naamã rɩɩb tẽngã zugu, a na n yõka a Sʋɩtãan n ‘balge,’ t’a “ka tõe n le belg nebã” ye. (Wilgri 20:2, 3) Rẽ poore, ‘tẽn-paalg’ n na n zĩndi, tɩ ‘tɩrlem zĩnd a pʋgẽ.’ *—2 Pɩɛɛr 3:13.

Neb nins sẽn na n vɩɩmd tẽngã zug wakat kãngã na n paama b mens ne yel-wẽndã. B na n lebga neb sẽn zems zãnga. (Rom dãmba 8:21) B sẽn na n sakd Wẽnnaam Rĩungã naamã yĩnga, “wẽng ne sãoong ka na n tol n le zĩnd” ye. Bõe yĩnga? Bala “dũniyã na n pida ne Zu-soabã bãngre.” (Ezai 11:9) Wakat kãnga, nebã fãa na n mii Wẽnnaam noyã, n dɩkd a togs-n-taare. Welsg buud baa a ye pa na n le zĩndi, bala “Wẽnnaam ka tũusd neb ye.”—Rom dãmba 2:11.