1. Wãn to la ninsaalbã namsd rũndã-rũndã?

A ZEOVA ra pa rat tɩ ninsaalbã kʋʋndẽ, tɩ zu-loees nins kʋʋlmã sẽn wat ne wã namsd-b ye. A sẽn da rat yaa b tar laafɩ, n vɩ arzãnã pʋgẽ. La rũndã-rũndã, ‘bõn-naandsã wẽeda siri, n namsdẽ.’ (Rom 8:22) Wẽnnaam sã n get yel-wẽndã biisã sẽn namsd ninsaalbã woto wã, a sũur pa noom ye. Sẽn paase, sẽn kʋʋl-bã wʋsg pa paamd tɩ b get b yell sõma ye. Yaool n yaa wakat kãng la b rat gesg n yɩɩda.—Yɩɩl 39:6; 2 Tɩm. 3:3.

2. Bõe yĩng t’a Zeova Kaset rãmbã sũy noom ne b sẽn paam tɩ neb sẽn kʋʋl be b tigimsẽ wã?

² A Zeova Kaset rãmbã sẽn paam tɩ neb sẽn kʋʋl be b tigimsẽ wã, noom-b lame. Nin-kãensã tara yam wʋsg la tẽeb sẽn tar pãnga, tɩ d tõe n dɩk b togs-n-taare. Tõnd sʋka, neb wʋsg n kĩ ne neb sẽn kʋʋle. La d kĩ ne d tẽed-n-taas nins sẽn kʋʋlã tɩ d pa kĩ ne-b me, d fãa rat n sõng n gesa b yelle. (Gal. 6:10; 1 Pɩɛ. 1:22) Sõs-kãngã na n nafa tõnd fãa. Bala, a gomda Wẽnnaam sẽn get sẽn kʋʋl-bã to-to wã yelle. A na n goma sẽn kʋʋl-bã zak rãmba, la tigingã neb sẽn segd n maan bũmb ninsã me yelle.

3, 4. a) Bõe la sẽn gʋls-a Yɩɩl Sõamyã 71 soabã kos Wẽnnaam? b) Bõe la tigingã neb nins sẽn kʋʋlã tõe n kos Wẽnnaam?

³ Yɩɩl Sõamyã 71:9 wã yetame: “Da bas-y maam m  kʋʋlem wakat ye. Mam pãng sã n sɛ, bɩ y ra bas maam ye.” Wõnda yaa a Davɩɩd n gʋls gom-kãensã. A tũ a Zeova a yõor tɛka, t’a Zeova me sõng-a t’a maan bõn-kãsemse. (1 Sãm. 17:33-37, 50; 1 Rĩm 2:1-3, 10) Baa ne a Davɩɩd sẽn maan bũmb wʋsg a Zeova yĩngã, a sẽn wa n kʋʋlã, a pʋʋs-a lame n kos t’a ges a yelle.—Karm-y Yɩɩl Sõamyã 71:17, 18.

⁴ Rũndã-rũndã neb wʋsg n yaa wa a Davɩɩde. Baa ne b yʋʋmã sẽn vẽsg tɩ yaa toog ne-bã, b ket n maanda Wẽnnaam daabã wa b sẽn tõe tɛka. (Koɛ. 12:1-7) B wʋsg pa le tõe n moon koɛɛgã, wall b tʋm tʋʋm a taabã wa b sẽn da maand pĩndã ye. La bãmb me tõe n kosa a Zeova t’a kell n ning-b bark la a ges b yelle. Nin-kãensã sẽn yaa wẽn-sakdbã tõe n kɩsa sɩd tɩ Wẽnnaam na n deega b pʋʋsgã. A Zeova sẽn vẽneg a Davɩɩd t’a pʋʋs n kos bũmb ningã wilgda rẽ.

5. Wãn to la a Zeova get sẽn kʋʋl-bã?

⁵ Biiblã wilga vẽeneg t’a Zeova nanda sẽn kʋʋl-bã, la t’a ratame tɩ d waoog-ba. (Yɩɩl 22:25-27; Yel. 16:31; 20:29) Maankʋʋr 19:32 yetame: “Bɩ f waoog zoob-peend soab la nin-kẽema. Bɩ f zoe fo Wẽnnaamã. Mam yaa Zu-soabã.” Woto wilgdame tɩ hal pĩnd wẽndẽ n tãag rũndã, a Zeova ratame tɩ d waoog sẽn kʋʋl-bã. Rẽ baoodame tɩ d ges b yelle. La ãnda rãmb n segd n ges b yelle?

6. Mak-sõng bʋg la a Zezi kõ roagdbã yell gesgã wɛɛngẽ?

⁶ Biiblã yetame: “Waoog f ba ne f ma.” (Yik. 20:12; Ef. 6:2) A Zezi sẽn wa n ningd fariziẽ-rãmbã ne gʋlsdbã taal b sẽn pa get b roagdbã yellã, a goma tõ-kãngã yelle, n wilg t’a tara yõod wʋsgo. (Mark 7:5, 10-13) Yẽ mengã kõo mak-sõng rẽ wɛɛngẽ. Baa b sẽn wa n ka-a kũum da-lukã zugã, a ra ket n tagsda a ma wã sẽn na n yõd n yɩ a soaba. Tõe tɩ wakat kãng t’a ra yaa pʋg-kõore. Rẽ n so t’a Zezi kos a karen-bi-nongr a Zã t’a ges a yelle.—Zã 19:26, 27.

7. a) Bõe la tʋm-tʋmd a Poll yeel roagdbã yell gesgã wɛɛngẽ? b) Bõe me yell la a gom-yã?

⁷ Lɛtr ning tʋm-tʋmd a Poll sẽn tool a Tɩmote wã pʋgẽ, a wilgame tɩ kiris-nebã segd n gesa b zakã rãmb yelle. (Karm-y 1 Tɩmote 5:4, 8, 16.) Yɩ a sẽn wa n wilgd neb nins buud sẽn segd ne tigingã neb sõngrã la a gom rẽ yelle. A yeelame tɩ pʋg-kõor sẽn kʋʋl sã n tar kamba, yagens la roagdb a taab sẽn yaa kiris-neba, bãmb n segd n ges a yelle. B sã n maan woto, pa na n yɩ zɩɩb n kõ tigingã neb ye. Rũndã-rũndã me, d sã n dat n wilg tɩ d nonga Wẽnnaam, d segd n geta d roagdbã yelle.

8. Bõe yĩng tɩ Biiblã pa wilg ned sẽn segd n ges a roagdb sẽn kʋʋl yell to-to wã takɩ?

⁸ Kamb nins sẽn bɩ wã segd n gesa b roagdbã yelle. Yaa sɩd t’a Poll ra gomda roagdb nins sẽn yaa kiris-nebã sõngr yelle, la d pa segd n bas sẽn pa-b kiris-nebã ye. Zak fãa yɛl yaa toore. Rẽnd yaa zak fãa neb n segd n yãk b sẽn na n ges b neb nins sẽn kʋʋlã yell to-to. Nebã raabo, b zʋg la b laafɩ wã me pa yembr ye. Roagdb kẽer tara kamb wʋsgo, tɩ sãnda tar bi-yende. Kẽer tõe n paama goosneema wã sõngre, tɩ sãnda pa tõe ye. Sẽn paase, sẽn kʋʋl-bã raab  yaa toor-toore. Rẽnd ned sã n get a roagdb sẽn kʋʋl yelle, d pa segd n wɩd a sẽn maand rẽ to-to wã ye. Woto ka yõod ye. A Zeova ningda yam-yãkr ning fãa sẽn zems ne Biiblã sẽn yetã barka. Yɩɩ woto a Moiiz wakatẽ wã, n ket n yaa woto.—Sõd. 11:23.

9-11. a) Zu-loe-bʋs la kẽer mi n segda? (Ges-y sõsgã sɩngrẽ fotã.) b) Bõe yĩng tɩ ned pa segd n yɩ tao-tao n bas tʋʋmd a Zeova sẽn kõ-a? Rɩk-y makre.

⁹ Kambã ne b roagdbã sã n zãr ne taaba, tõe n yɩɩ toog tɩ b ges b roagdbã yelle. Tõe n wa tiig n lebga tɩlae tɩ kambã tɩ ges b roagda. Wala makre, a sã n lʋɩ t’a nug wall a karg kaooge, pa rẽ bɩ a lʋɩɩ bã-kɛgenga. Rẽ poore, tõe n yɩɩ tɩlae tɩ roagdã paam tɩ ned ges a yell wakat bilfu, wall n kaoos menga. *

¹⁰ Betɛll tʋm-tʋmdba, misioneer-dãmba, tigims sul la distrik yel-gɛtbã sẽn tɩ tʋmd zĩ-zãrsẽ wã kẽer mi n sega zu-loɛɛg b roagdbã yell gesg wɛɛngẽ. Nin-kãensã miime tɩ tʋʋmd ning a Zeova sẽn kõ-bã tara yõod wʋsgo. La b roagd sã n wa lʋɩ bãaga, tõe tɩ pipi bũmb b sẽn tagsd yaa bas b tʋʋmdã, n lebg n kuil n tɩ ges a yelle. Baasgo, yɩta sõma tɩ b pʋʋs rẽ yĩnga, la b tags n ges sã n yaa tɩlae, la sã n yaa rẽ la b roagdbã sɩd rata. Ned pa segd n yɩ tao-tao n bas tʋʋmd a Zeova sẽn kõ-a ye. Naoor wʋsgo, pa tɩlae ye. Tõe tɩ yaa bãag b sẽn tõe n tɩp tɩ sa, wall roagdbã tigingã pʋgẽ, neb n be n na n sak n sõnge, tɩ kambã tõog n kell n tʋm b tʋʋmdã.—Yel. 21:5.

¹¹ Wala makre, saam-biig ne a pag sẽn kʋʋl n be Zapõ n tar kom-dibli a yi sẽn tʋmd zĩ-zãrsẽ. A ye n be Amerikdisiid n yaa misioneere, t’a to wã tʋmd a Zeova Kaset rãmbã biru-kãsengã sẽn be Bruklin sẽn be Niuyork soolmẽ wã. Wa n lebga tɩlae tɩ roagdbã paam tɩ ned ges b yelle, tɩ kambã ne b pagbã lebg n wa, n na n ges b sẽn tõe n maan to-to. Misioneerã ne a pagã wa n dat n basa b tʋʋmdã, n wa zĩnd n ges b roagdbã yelle. La roagdbã tigingã kãsem-dãmb bool-b-la telefonnẽ, n wilg tɩ b rat n sõng-b lame. Kãsem-dãmbã yãa taaba, n wilg tɩ b sũur nooma ne tʋʋmd ning b sẽn tʋmdã, la tɩ b ratame tɩ b kell n tʋm dẽ n kaoose. B wilgame tɩ b na n sõng-b lame n ges b roagdbã yelle. Kãsem-dãmbã sẽn maan woto wã yɩɩ zakã rãmb fãa noog wʋsgo.

12. Zak rãmb sẽn yaa kiris-neb sã n wa rat n maan bũmb sẽn kʋʋl-bã yell gesg wɛɛngẽ, bõe n segd n pak-b yɩɩda?

¹² Zak rãmb sẽn yaa kiris-neb sã n wa rat n maan bũmb b roagdbã yell gesg wɛɛngẽ fãa, b segd n gũusame tɩ rẽ yɩ Wẽnnaam waoogr yĩnga. D pa rat n wõneg a Zezi wakatẽ tũudmã taoor-dãmb abada. (Mat. 15:3-6) D ratame tɩ bũmb nins fãa d sẽn yãkd yam n maandẽ wã waoog Wẽnnaam, la zẽk tigingã zugu.—2 Kor. 6:3.

13, 14. Wãn to la Biiblã wilg tɩ tigimsã segd n gesa sẽn kʋʋl-bã yelle?

¹³ Pa tigimsã fãa n tõe n sõng sẽn tɩ be-b zĩ-zãrsẽ n tʋmd a Zeova tʋʋmdã wa tiging ning yell d sẽn  gomã ye. La bũmb sẽn zĩnd pipi kiris-nebã wakatẽ n wilgd tɩ tigingã neb segd n maana b sẽn tõe, n ges wẽn-sakdb nins sẽn kʋʋlã yelle. Biiblã wilgame tɩ Zerizalɛm tigingã pʋgẽ, ned ra ka be n “yaa naong soab ye.” La pa rat n yeel tɩ b fãa ra yaa arzɛgs rãmb ye. B kẽer da pa são ye. La tigingã neb n kõ ligdi, tɩ b ‘pʋɩ wa sẽn zems ned kam fãa sẽn dat sõngr’ to-to wã. (Tʋʋ. 4:34, 35) La kaoosg zugẽ, zu-loɛɛg n zĩndi. Rɩɩbã pʋɩɩb wɛɛngẽ, pʋg-kõap kẽer da pa paamd “b pʋɩɩr daar fãa” ye. Woto wã, bõe la tʋm-tʋmdbã maan-yã? B kɩtame tɩ b yãk rap sẽn tar yʋ-noogo, tɩ b ges rɩɩbã pʋɩɩb yell sõma, tɩ pʋg-kõapã fãa paame. (Tʋʋ. 6:1-5) Yʋʋmd 33 Pãntekotã sasa, sãamb wʋsg sẽn da wa Zerizalɛm lebga kiris-neba. B paa be wakat bilf sẽn na yɩl n paam tɩ b zãms-b la b keng b tẽebã. Baa rɩɩbã pʋɩɩb sẽn da yaa sasa kãng yĩng balã, tʋm-tʋmdbã sẽn maan bũmb ningã wilgdame tɩ tigimsã tõe n gesa saam-biis la saam-bi-pogs nins sẽn kʋʋlã yelle.

¹⁴ Tʋm-tʋmd a Poll wilga a Tɩmote pʋg-kõap nins buud sẽn segd ne tigingã neb sõngrã. (1 Tɩm. 5:3-16) Wẽnnaam vẽnega a Zak t’a togs tɩ kiris-nebã segd n gesa kɩɩbse, pʋg-kõapa, la neb a taab sẽn namsd yelle. (Zak 1:27; 2:15-17) Tʋm-tʋmd a Zã me soka woto: “Ned sã n tar dũniyã paoongo, n yã t’a ba-biig tar nimbãaneg t’a ka zoe a nimbãanega, Wẽnnaam nonglem na n yɩɩ wãn n zĩnd yẽ pʋgẽ?” (1 Zã 3:17) Sẽn mik tɩ kiris-ned kam fãa segd n sõnga sẽn namsd-bã, rẽnd tigimsã me segd n maana woto.

15. Sẽn na yɩl n ges sẽn kʋʋl-bã yell sõma, bõe ne bõe la d segd n bãnge?

¹⁵ Tẽns kẽer pʋsẽ, goosneema wã kõta sẽn kʋʋl-bã ligdi, la b maand bũmb a taab n sõngd-ba. (Rom 13:6) La tẽns sãnda pʋsẽ, sõngr a woto buud ka be ye. Rẽnd d tẽed-n-taas nins sẽn kʋʋlã zagsã rãmb la b tigimsã neb sẽn na n ges b yell to-to wã bee ne yɛlã sẽn yaa to-to b tẽngẽ wã. Kambã sẽn vɩ zĩig ningã sã n zãra, roagdbã yell gesgã mi n pa nana ye. Sã n yaa woto, yɩta sõma tɩ kambã sõs ne b roagdbã tigingã kãsem-dãmba, tɩ b bãng zakã yɛl sẽn yaa to-to wã sõma. Wala makre,  kãsem-dãmbã tõe n sõnga roagdbã tɩ b bãng b sẽn tõe n paam sõngr goosneema wã nengẽ to-to. B tõeeme me n gũusd n getẽ tɩ yell sã n wa beẽ n sek b na togs kambã bɩ b togs-ba. Wala makre, roagdbã sã n yĩmd b fagtiir-dãmbã wall b tɩtã. Kambã ne kãsem-dãmbã sã n sõsd ne taab sõma, tõe n sõngame tɩ zu-loɛɛg sã n wa beẽ bɩ b bãng n welg-a. Ned sã n be yambẽ n sõngd sẽn kʋʋl-bã, la a taasd sẽn be-b zĩ-zãrgẽ wã kibaya, tõe n sõngame tɩ zu-loɛɛg ra paam pãnga, la boog zakã rãmb yɩɩre.

16. Bõe la kiris-neb kẽer maand n sõngd b tẽed-n-taas nins sẽn kʋʋlã?

¹⁶ Kiris-neb kẽer sẽn nong b tẽed-n-taas nins sẽn kʋʋlã yĩnga, b yãka yam n na n sõng-b wa b sẽn tõe tɛka. B geta nin-kãens yell wa b zakã neba. Sãnda zemsda ne tigingã neb a taab n maand rẽ n tʋmd tʋʋmã n deesd taaba. D tẽed-n-ta-kãensã miime tɩ bãmb mensã yɛl sẽn yaa to-to wã kɩtame tɩ b pa tõe n yɩ so-pakdb ye. La b sẽn tõe n sõng kambã tɩ b kell n tʋm b tʋʋmdã n kaoosã noom-b lame. B sẽn maand woto wã, b sɩd segda ne pẽgre. La baa neb a taabã sẽn sõngd to-to fãa, kambã segd n ket n maanda b sẽn tõe fãa n get b roagdbã yelle.

17, 18. Bõe n tõe n kɩt tɩ sẽn kʋʋl-bã yell gesg zĩnd yamleoogo?

¹⁷ Sẽn kʋʋl-bã ne neb nins sẽn get b yellã sã n pa tar manesem sẽn komsd raoodo, tõe n kɩtame tɩ bũmb fãa maan ne yamleoogo. Wakat ninga, neb nins sẽn kʋʋlã sũy mi n sãamame, wall b yamã kae b mens ye. Rẽ n so tɩ y segd n modg wʋsg n waoogd d tẽed-n-taas nins sẽn kʋʋlã, la y kengd b raoodo. La wãn to la y tõe n maan dẽ? Sõsd-y ne-b noog-noogo. Nin-kãensã tũ a Zeova n kaoose, n segd ne pẽgre. A Zeova pa yĩm bũmb nins b sẽn maan a tũudmã pʋgẽ wã ye. Tõnd me pa yĩm ye.—Karm-y Malaki 3:16; Hebre dãmb 6:10.

¹⁸ Sẽn kʋʋl-bã ne neb nins sẽn get b yellã sã n mi n maand laad me, yɛlã tõe n yɩɩ nana. (Koɛ. 3:1, 4) Sẽn kʋʋl-bã wʋsg gũusdame n da wa yɩ neb sẽn dat tɩ b maan bũmbã fãa tɩ zems wa bãmb sẽn datã ye. B miime tɩ b sã n yaa nin-bʋgsa, neb wʋsg na n wat n get-b lame la b sõngd-ba. D wae n wʋmda neb sẽn yet woto: “Mam kẽngame n na n tɩ keng m zoa sẽn kʋʋl raoodo, la yɩɩ mam mengã raood la a keng-yã.”—Yel. 15:13; 17:22.

19. Toog wakate, bõe n na n sõng kom-biisã ne sẽn kʋʋl-bã tɩ b yam da yuusi?

¹⁹ D gũuda wakat ning kʋʋlmã, namsgã la yɛl a taabã sẽn na n sa wã ne d sũy fãa. La nand tɩ wakat kãng ta, d fãa segd n tagsda vɩɩm sẽn kõn sa wã yell wakat fãa. Toog wakate, d sẽn tẽed Wẽnnaam pʋlemsã kɩtdame tɩ d yam pa yuusdẽ ye. Tẽeb kãng maasem yĩnga, “tõnd ka tadgd ye.” Baa d yĩngã pãng sã n boogdẽ, d paamda raood beoog sẽn vẽeg fãa. (2 Kor. 4:16-18; Heb. 6:18, 19) Bõe me n tõe n sõng sẽn get-b sẽn kʋʋl-bã yellã? Sõsg ning sẽn pʋgdã na n kõo sagls zĩ-kãng wɛɛngẽ.