AFIRIK yaang tẽnsã neb mii yel-bũn-kãngã sõma. Dũniyã gill zug me, neb wʋsg sak n deegame tɩ yel-bũndã sẽn yeelã yaa sɩda. La yãmb yẽ tagsg yaa wãn ne ligd pengre? Baa yãmb yam sã n mi n bee ligd pengre, y tagsdame tɩ zemsame bɩ? Ligd pengr tõe n waa ne zu-loe-bʋse?

Suayili-rãmbã yel-bũnd a to goma sama zu-loe-kãseng a yembr yelle, n yeel tɩ zo-rãmb sã n nong n pengd taab ligdi, b zoodã wat n sãamame. Sɩd me, sam tõe n sãama zood wall rogem. Baa ned pʋ-peelem wall a magbã sẽn yaa to-to fãa, yɛlã tõeeme n wa pa yɩ wa a sẽn da tagsdã ye. Makre, ned sã n tɩ peng a to ligdi, tɩ raar ning a sẽn da segd n tɩ lebsã loog t’a pa yao, tõe n sãama a to wã sũuri. Rẽ tõe n waa ne sũ-kẽka, n sãam neb a yiibã zoodo, pa rẽ bɩ kɩt meng tɩ b zagsã rãmb pa le noom ne taab ye. Ligd pengr sẽn tõe n wa ne zu-loees wʋsgã yĩnga, d pa segd n yɩ yãg-yãg n kẽ sam, n tags tɩ rẽ la d zu-loɛɛg tɩɩm ye.

Samd tõe n sãama ned ne Wẽnnaam zood me. Wãn to? Pipi, Biiblã yetame tɩ ned sã n peng ligd n pa rat n lebse, a yaa nin-wẽnga. (Yɩɩl Sõamyã 37:21) Sẽn paase, Biiblã wilga woto vẽenega: “Fo sã n peng bũmb ned nengẽ, fo lebga a yamba.” (Yelbũna 22:7) Sẽn peng-a ligdã segd n ninga a yamẽ tɩ hal t’a wa yao samdã, a yaa a to wã yamba. Sɩd me, Afirik tẽng a ye neb yel-bũnd a yembr yeela woto: “F sã n peng ned naoore, f na n kẽnga f sẽn pa ratẽ.” Woto rat n yeelame tɩ ned sã n tar sam wʋsgo, a pa le so a meng ye.

Ned sã n peng ligdi, a segd n modg n lebsame. Sã n pa rẽ, tõe n waa ne yɛla. Makre, sam sã n lim neda, tõe n kɩtame t’a maand yɩɩr wʋsgo, t’a pa gõe sõma, la a tʋmdẽ tɩ loogd noore. Leb n tõe n kɩtame tɩ pag ne a sɩd moor pa le noomẽ, pa rẽ bɩ sãam b kãadmã menga, wall baas bʋ-kaoodb taoore, bɩ bãens roogo. Dẽnd yɩta sõma tɩ d tũ Rom dãmb 13:8 saglgã.  Be, b yeta woto: “Da tall-y ned ba a yembr samd ye, kal tɩ nong taaba.”

Sam sẽn wat ne zu-loeesã yĩnga, segdame tɩ d gũusi. Nand tɩ d kẽ sama, yɩta sõma tɩ d sok d meng woto: Rẽ yĩnga yaa tɩlae tɩ m tɩ peng ligd bɩ? Mam sẽn dat n kẽ samã yaa sẽn na yɩl tɩ m zakã rãmb ra kong rɩɩb bɩ, bɩ yaa yão-beed yĩnga, rat n yeel tɩ m tʋll n maaname tɩ yɩɩg m pãn-tõogã? Naoor wʋsgo, yɩta sõma tɩ d mao tɩ d sẽn tarã sek-do, n yɩɩd d sẽn na n tɩ penge.

Baasgo, wakat ninga, yell tõe n wa paka nina, tɩ yɩ tɩlae t’a kẽ sama. La ne rẽ fãa, ned sã n yãk yam n na n kẽ sama, a segd n maana pʋ-peelem. Wãn-wãna?

Pipi, d pa segd n tɩ peng ligd ned nug sẽn zãad nengẽ, n na n wẽg-a ye. D pa segd n tags tɩ sã n wõnd ned nug zãadame, yaa tɩlae t’a sõng-d ye. D leb n pa segd n tẽ tɩ d sã n peng ned a woto ligdi, pa tɩlae tɩ d yao samdã ye. D ra maan sũ-kiir ne neb nins nug sẽn zãadã ye.—Yelbũna 28:22.

Woto yĩnga, y sã n dɩk samd bɩ y modg n yao, la tao-tao. Baa ligdã soab sã n pa wilg wakat ning y sẽn tog n wa lebs ligdã, segdame tɩ y yãk wakat takɩ n kõ-a, la y modg n tũ. Sẽn na yɩl n gil no-koɛɛm samdã poore, bɩ y gʋls y sẽn zems taab to-to wã fãa sebr zugu, tɩ ned fãa tik a nugu. (Zeremi 32:9, 10) Sã n tõe bɩ y tɩ lebs samdã y toore, la y pʋʋs barka. Y sã n tẽeg n lebs bũmb y sẽn penge, manegda zoodo. A Zezi sẽn sõs ne nebã tãngã zugã, a yeela woto: “Bɩ yãmb n-ye yɩ n-ye, tɩ y ayo yɩ ayo.” (Matɩe 5:37, Kãab-paalgã Koe-noogo) Sẽn paase, y pa segd n yĩm a Zezi sagl-kãngã yell ye: “Yãmb sẽn dat tɩ nebã maan yãmb bũmb ningã, bɩ yãmb me maan bãmb boto.”—Matɩe 7:12.

Biiblã tara saglg sẽn tõe n sõng-d tɩ d gũus ne sama. A yeta woto: “Sɩda, ned sã n maand sũ-noog ne bũmb nins a sẽn tara, Wẽnnaam sakrã sɩd yaa paoong so-kẽenga.” (1 Tɩmote 6:6, Kãab-paalgã Koe-noogo) Woto rat n yeelame tɩ ned sã n modgdẽ t’a sẽn tarã sekd-a, sõngd-a lame t’a gil sam sẽn wat ne zu-loees ninsã. La togs sɩdã, rũndã-rũndã, yɩl n tõog tɩ bũmb nins f sẽn tarã sek-fo, pa nana ye. Rẽ n so tɩ Wẽnnaam sakr tar yõod wʋsgã. Ad makr sẽn wilgd rẽ.

Yaa kiris-ned ne a pag sẽn yit Aazi soolmẽ wã. B sẽn kẽ kãadmã paalem, b yamã wa n kẽe neb nins sẽn da tar b toorẽ zagsã, tɩ bãmb me tʋlg n na n paam b toorẽ zaka. Rẽ kɩtame tɩ b tɩ peng b zo-rãmba, b roagdb la bãnk ligdi, n paas ligd ning b sẽn da tarã, n da zaka. La sẽn pa yã n kaoose, samã b sẽn da segd n yao kiuug fãa wã lebga toog wʋsgo. Yɩl n paam ligdã, wa n lebga tɩlae tɩ b tʋm wʋsg tɩ yɩɩg raasenkamã, tɩ kɩt tɩ b ra pa le tar sẽk n get b kambã yell ye. Ad saam-biigã sẽn yeele: “Yaamsã, toogã, n paas m sẽn da pa le tõe n gũs sõma wã kɩtame tɩ yaa wa m tʋka kugr sẽn zɩse. Yellã wa n yɩɩda m pãnga.”

La b wa n tagsa saglg ning sẽn be 1 Tɩmote 6:6 tɩ kɩt tɩ b bãng tɩ b zu-loɛɛgã tɩɩm yaa b sẽn na n koos b zakã. Yaa yʋʋm a yiib poor la b yaool n tõog n yao b samã zãnga. Yam bʋg la b rɩk b zu-loɛɛgã pʋgẽ? Ad b sẽn yeele: “D sã n tũud sagls nins Biiblã sẽn kõt laogã wɛɛngẽ wã, d ginda zu-loeese.”

Neb wʋsg mii Suayili-rãmbã yel-bũnd ning sẽn be d sõsgã sɩngrẽ wã. Baasgo, neb n ket n kẽed sama. La wa Biiblã sagls nins d sẽn yã sõs-kãngã pʋgẽ wã sẽn sõng-d tɩ d bãngã, nand tɩ d rɩk samde, yɩta sõma tɩ d sok d meng woto: “Rẽ yĩnga yaa tɩlae tɩ m kẽ sam bɩ?”