1, 2. Bõe n kɩt tɩ neb wʋsg ra pa wʋmd a Zezi goamã võore?

NED sã n gomd ne tõndo, d tõe n wʋma a koɛɛgã. D tõe n bãnga a sã n gomda ne bʋgsem wall ne sũ-yikr menga. La d sã n pa wʋmd a sẽn yetã võore, rẽ yõod yaa bõe? (1 Kor. 14:9) Woto me, neb wʋsg kelga a Zezi goamã. La baa a sẽn da gomd b buud-gomdã pʋgẽ wã, pa b fãa n wʋm a sẽn da yet bũmb ningã võor ye. Rẽ n so t’a Zezi yeel-b woto: “Bɩ yãmb fãa kelg maam la y bãnge.”—Mark 7:14.

² Bõe n kɩt tɩ wʋsg ra pa wʋmd a Zezi goamã võore? Kẽer ra tara tags-kɛga, n pa rat n toeem me ye. A Zezi yeel-b-la woto: “Yãmb sãamda Wẽnnaam tõodã zãnga tɩ sak y mens minundu.” (Mark 7:9) Nin-kãensã ra pa baood n wʋm a Zezi goamã võor ye. B ra pa rat n toeem b minimdã la b tagsa wã ye. B ra kelgdame, la goamã pa kẽed b sũyã ye. (Karm-y Matɩe 13:13-15.) La bõe la d tõe n maan n dɩ a Zezi zãmsgã yõodo?

3. Bõe n kɩt tɩ karen-biisã ra tõe n wʋm a Zezi goamã võore?

³ D segd n dɩka a Zezi karen-biisã togs-n-taare. A Zezi yeel-b-la woto: “Bark bee yãmb zutu, yãmb ninã sẽn yãt la y tʋbã sẽn wʋmdã yĩnga.” (Mat. 13:16) Bõe n  kɩt tɩ karen-biisã ra tõe n wʋm a Zezi goamã võore, tɩ neb a taabã yaool n da pa wʋmdẽ? Pipi, b ra sokda sogsgo, n baood n bãng a goamã sẽn sɩd rat n yɛɛlga. (Mat. 13:36; Mark 7:17) Yiibu, b ra sakd n zãmsda bõn-paala, n paasd bũmb nins b sẽn zoe n miẽ wã. (Karm-y Matɩe 13:11, 12.) Sẽn na n baase, b ra tũuda b sẽn zãms bũmb ningã, la b sõngd neb a taab tɩ b rɩt rẽ yõodo.—Mat. 13:51, 52.

4. D sã n dat n wʋm a Zezi yel-bũnã võore, bõe la d segd n maane?

⁴ Tõnd me sã n dat n wʋm a Zezi yel-bũnã võore, d segd n dɩka a karen-biisã togs-n-taare. Pipi, d segd n baoo sẽk n zãms a Zezi goamã la d bʋgs b zugu. Sẽn paase, d segd n soka d mens sogsgo, la d maan vaeesgo. Woto, d na n paama bãngre. (Yel. 2:4, 5) Yiibu, d segd n maka d sẽn zãms bũmb ningã ne d sẽn zoe n miẽ wã, la d bao n bãng rẽ sẽn tõe n naf tõnd to-to. Rẽ la d na n bãng yam, rat n yeel tɩ d na n wʋma yɛlã võore. (Yel. 2:2, 3) La tãabo, d segd n tũu d sẽn zãms bũmb ningã. Woto, d wilgdame tɩ d tara yam.—Yel. 2:6, 7.

5. Rɩk-y makr sẽn wilgd tɩ bãngre, wʋm bũmb võor la tall yam pa yembr ye.

⁵ Bõe n kɩt tɩ bãngre, wʋm bũmb võor la tall yam pa yembre? D rɩk makre: Mams-y wa yãmb sẽn na n be so-kõodr tẽn-sʋka, n zẽk n yã mobill sẽn tees yãmb n watẽ. Pipi, y bãngame tɩ yaa mobill la sẽn watã. Yiibu, y miime tɩ y sã n kell n pa sorã zugu, mobillã na n fão-y lame. Rẽnd y wʋma yellã võore. Sẽn na n baase, y na n wudgame n yi sorã zugu. Woto wilgdame tɩ y tara yam. Rẽnd pa lingr la Biiblã sẽn yeel tɩ d ‘tall yamã’ ye. Bala, tõe n fãaga d yõore.—Yel. 3:21, 22; 1 Tɩm. 4:16.

6. D sã n wa gomd a Zezi yel-bũn a yopoe wã yelle, sogs-bʋs la d na n sok d mense? (Ges-y  zĩ-gũbrã sẽn be seb-neng 10.)

⁶ Sõs-kãnga ne sẽn pʋgd-a wã pʋgẽ, d na n goma a Zezi yel-bũn a yopoe yelle. D na n soka d mens sogs-kãensã: Yel-bũndã võor yaa bõe? (Rẽ la d na n paam bãngre.) Bõe yĩng t’a Zezi wẽ yel-bũndã? (Rẽ na n sõng-d lame tɩ d wʋm a võore.) Bõe la d tõe n maan n dɩ yel-bũndã yõodo, la d sõng neb a taab me tɩ b rɩ a yõodo? (Rẽ la d na n paam yam.) Sẽn na n baase, yel-bũndã sõngda tõnd tɩ d bãng bõe a Zeova wall a Zezi zugu?

7. Mutardã bil yel-bũnd võor yaa bõe?

⁷ Karm-y Matɩe 13:31, 32. * Mutardã bil yel-bũndã võor yaa bõe? Mutardã bil makda Rĩungã koɛɛg d sẽn moondã, la kiris-nebã tigingã. Kiris-nebã tiging sẽn wa n sɩng yʋʋmd 33 wã, a ra yaa bilf wa mutardã bil sẽn yaa “bilf n yɩɩd bõn-buud a taabã fãa” wã. La yʋʋm a wãn pʋgẽ bala, koe-moonegã kɩtame t’a nebã sõor paas tao-tao, tɩ ling neb wʋsgo. (Kol. 1:23) A Zezi yeelame tɩ “liuuli wat n zao a wilã.” Liuuli wã makda pʋ-peelem dãmbã sẽn wat tigingã pʋgẽ, n paamd koglg la zãmsg sẽn yit Wẽnnaam nengẽ wã.—Ges-y Ezekɩɛll 17:23.

8. Bõe yĩng t’a Zezi wẽ mutardã bil yel-bũndã?

 ⁸ Bõe yĩng t’a Zezi wẽ yel-bũndã? B sã n bʋd mutard bilã, a tõe n yiime n lebg bedr wʋsgo. Yaa rẽ la a Zezi sẽn wẽ yel-bũndã n na n wilg tɩ Wẽnnaam Rĩungã na n paama pãnga, t’a na n kogla neb nins sẽn sakd-a wã, la tɩ baa fʋɩ pa tõe n gɩdg-a ye. Yʋʋmd 1914 tɛka, Wẽnnaam siglgã neb sõor paasa wʋsgo. (Ezai 60:22) Neb nins sẽn be sigl-kãng pʋgẽ wã paamdame tɩ b sõngd-b tɩ b tar zood sõma ne a Zeova. (Yel. 2:7; Ezai 32:1, 2) Sẽn paase, bɛ baa a ye pa tõe tɩ tigingã neb sõor pa paas ye.—Ezai 54:17.

9. a) Yam bʋg la d tõe n dɩk mutardã bil yel-bũndã pʋgẽ? b) Yel-bũndã sõngda tõnd tɩ d bãng bõe a Zeova wall a Zezi zugu?

⁹ Yam bʋg la d tõe n dɩk mutardã bil yel-bũnd pʋgẽ? Tõe tɩ yãmb sẽn vɩ zĩig ningã, a Zeova Kaset rãmbã sõor pa waooge, wall koe-moonegã pa womd biis wʋsg ye. La d sã n tẽeg tɩ baa fʋɩ pa tõe n gɩdg Wẽnnaam Rĩungã, na n sõng-d lame tɩ d kell n moon koɛɛgã. Wala makre, yʋʋmd 1926, saam-biig a Edwin Skinner sẽn wa n kẽng Ẽnd soolmẽ wã t’a Zeova Kaset rãmbã ra pa waoog be ye. Tʋʋmdã ra yaa toogo, bala koɛɛgã mooneg ra pa womd biis wʋsg ye. La a sẽn kell n moonã, a wa n yãame tɩ baa fʋɩ pa tõe tɩ Rĩungã koɛɛgã pa wom bɩɩs ye. Rũndã-rũndã, a Zeova Kaset rãmb 37000 la zak n be Ẽnd soolmẽ wã. Yʋʋmd 2013 wã, neb nins sẽn wa a Zezi kũumã tẽegrã yɩɩ bãmb 108000 la zaka. Ad makr a to. Saam-biig a Skinner sẽn ta Ẽndã yʋʋmde, koe-moonegã sɩnga Zãmbi soolmẽ wã. Rũndã-rũndã, neb 170000 la zak n moond koɛɛgã Zãmbi. Yʋʋmd 2013 wã, neb nins sẽn wa a Zezi kũumã tẽegrã yɩɩ bãmb 763915. Woto rat n yeelame tɩ neb 18 zugu, nin-yend n wa tẽegrã. Ad b sõorã sɩd paasame!

10. Rabɩllã yel-bũndã võor yaa bõe?

¹⁰ Karm-y Matɩe 13:33. Rabɩllã yel-bũndã võor yaa bõe? Yel-bũndã gomda Rĩungã koɛɛgã, la a sẽn toeem nebã to-to wã yelle. “Zoma” makda dũniyã soolem fãa, tɩ zomã wukr makd Rĩungã koɛɛg b sẽn moondã sẽn tat zĩig zãng to-to wã. Mutardã bɩʋʋng yaa bũmb d sẽn tõe n yã, la d sã n ning rabɩll zom pʋgẽ, sɩngrẽ wã d pa ne tɩ wukdame ye. Yaa sã n wa kaoos bilf la d ne tɩ wukame.

11. Bõe yĩng t’a Zezi wẽ rabɩllã yel-bũndã?

¹¹ Bõe yĩng t’a Zezi wẽ yel-bũndã? Yaa sẽn na n wilg tɩ Rĩungã koɛɛgã tõe n ta “dũniyã tɛk fãa,” la t’a tõe n toeema nebã. (Tʋʋ. 1:8) La pa wakat fãa la d ne koɛɛgã sẽn toeemd nebã to-to wã ye. Baasgo, neb wʋsg kelgda Rĩungã koɛɛgã n sakdẽ, tɩ rẽ sõngd-b tɩ b toeemd zʋgo.—Rom 12:2; Ef. 4:22, 23.

12, 13. Mak-bʋs n wilgd tɩ koɛɛgã mooneg sẽn paamd pãng to-to wã yaa wa rabɩll sẽn wukd zom to-to wã?

¹² D sã n moon nebã koɛɛgã, tõe n maana yʋʋm tɩ yaool n wom biisi. Wala makre, yʋʋmd 1982 t’a Franz ne a pag a Margit ra tʋmda Berzɩll Betɛllẽ wã. B ra kẽnd n moonda tẽn-bil a yembr pʋgẽ, n sɩng Biiblã zãmsg ne neb wʋsgo. Pag a ye ne a kamb a naas la b ra zãmsd Biiblã me. Wakat kãng tɩ pagã bi-ribl-kãsengã ra tara yʋʋm 12. A ra yaa yãn-zoeta, tɩ zãmsgã sã n wa rat n sɩng bɩ a mi n zoe n solge. Siglgã wa n tʋma a Franz ne a Margit Betɛll a to, tɩ b pa le tõe n zãms pagã ne a kambã Biiblã ye. La yʋʋm 25 poore, b lebg n kẽnga tẽn-bilẽ wã. B sẽn ta wã, b sũur yɩɩ noogo. Bala, b mikame tɩ tiging n be be ne koe-moondb 69, tɩ bãmb 13 yaa wakat fãa so-pakdba. B tigimda taab Rĩung ro-paal pʋgẽ. La bi-ribl ning sẽn da yaa yãn-zoɛtã yẽ? Yẽ n lebg kãsem-dãmbã sull yel-gɛta. Rẽnd Rĩungã koɛɛgã taa zĩig zãng tẽn-kãng pʋgẽ, la a toeem neb wʋsgo. Yɩɩ wa rabɩll sẽn wukd zom to-to wã.

¹³ Baa tẽns nins pʋsẽ tẽngã taoor dãmb sẽn gɩdg koe-moonegã, Rĩungã koɛɛgã ket n toeemda nebã. D sã n mi n wʋm koɛɛgã sẽn saagd tẽn-kãens pʋsẽ to-to wã, ling-d lame. Wala makre, b sɩnga koɛɛgã mooneg Kuba soolmẽ wã yʋʋmd 1910. Yʋʋmd 1913 wã, saam-biig a Russell kẽnga be. La sɩngrẽ wã, neb wʋsg ra pa kelgd koɛɛgã ye. La rũndã-rũndã yẽ? Neb 96000 la zak n moond koɛɛgã be. Yʋʋmd 2013, neb nins sẽn wa a Zezi kũumã tẽegrã yɩɩ bãmb 229726. Rat n yeelame tɩ neb 48 sʋka, a yembr n wa tẽegrã.—Koɛ. 8:7; 11:5.

14, 15. a) Yam bʋg la d tõe n dɩk rabɩllã yel-bũnd pʋgẽ? b) Yel-bũndã sõngda tõnd tɩ d bãng bõe a Zeova wall a Zezi zugu?

¹⁴ Yam bʋg la d tõe n dɩk rabɩllã yel-bũnd pʋgẽ? Neb milyõ-rãmb n nan pa wʋm koɛɛgã ye. La d sã n bʋgs a Zezi yel-bũndã zugu, na n sõng-d lame tɩ d ra maan yɩɩr ne d sẽn na n maan to-to tɩ koɛɛgã ta-b ye. Bũmb fãa bee a Zeova nugẽ. La tõnd yẽ tʋʋmd yaa bõe? Biiblã yeela woto: “Bʋd f bõn-buud  yibeoogo, la ra bas f nus tɩ yɩ zaalem zaabr ye. Tɩ bõe, fo ka mi a yembr wall a to sã n na n tõogame, wall a yiibã fãa sã n na n yɩɩ sõma ye.” (Koɛ. 11:6) La d segd n ket n pʋʋsda a Zeova t’a ning koe-moonegã barka, sẽn tɩ yɩɩd fãa tẽns nins pʋsẽ b sẽn gɩdg koe-moonegã.—Ef. 6:18-20.

¹⁵ Sẽn paase, d sã n moond koɛɛgã tɩ yaa wa pa womd biisi, d pa segd n koms raood ye. D pa segd n sãam d sũuri, n yetẽ tɩ “yaa tʋʋm bõones” ye. (Zak. 4:10, Sebr Sõngo) D moonegã tõe n wa woma biis hal tɩ yɩɩg d sẽn da tagsdã.—Yɩɩl 40:6; Zak. 4:7.

16. Toandã yel-bũndã, la bõn-sõma sẽn solgã yel-bũndã võor yaa bõe?

¹⁶ Karm-y Matɩe 13:44-46. Toandã yel-bũndã, la bõn-sõma sẽn solgã yel-bũndã võor yaa bõe? A Zezi wakatẽ wã, toandb kẽer da kẽnda zĩ-zãrsẽ n daad kĩnd biis sẽn yaa sõma wʋsgo. A Zezi yel-bũndã pʋgẽ, toandã makda pʋ-peelem dãmbã sẽn modgd wʋsg n na n bãng Wẽnnaamã. ‘Kĩndf sẽn yaa sõma wʋsgã’ makda bũmb nins Biiblã sẽn yet Rĩungã wɛɛngẽ wã. Toandã sẽn yã kĩndfã sẽn yaa sõma wʋsgã, a yɩɩ tao-tao n koos bũmb nins fãa a sẽn tarã sẽn na yɩl n da-a. A Zezi goma rao a to sẽn tʋmd pʋʋg pʋgẽ sẽn yã “bõn-sõma sẽn solg” me yelle. La ra-kãngã ra pa baood arzegs wa toandã ye. Baasgo, yẽ me sak n koosa a “sẽn tarã fãa” sẽn na yɩl n paam arzɛkã a sẽn yã wã.

17. Bõe yĩng t’a Zezi wẽ toandã yel-bũndã, la bõn-sõma sẽn solgã yel-bũndã?

¹⁷ Bõe yĩng t’a Zezi wẽ yel-bũn-kãensã? A ra rat n wilgame tɩ nebã sẽn bãngd sɩdã to-to wã pa yembr ye. Kẽer ra baooda sɩdã, n modg wʋsg sẽn na yɩl n bãng-a. La sãnda wa n bãnga sɩdã, baa b sẽn da pa baood-a wã. Tõe tɩ yaa ned n wa n moon-b koɛɛgã. Yel-bũn a yiibã pʋgẽ, rap a yiibã bãngame tɩ b sẽn yã bũmb ningã tara yõodo, n sak n maan b sẽn tõe fãa sẽn na yɩl n paam-a.

18. a) Yam bʋg la d tõe n dɩk toandã yel-bũndã pʋgẽ, la bõn-sõma sẽn solgã yel-bũndã pʋgẽ? b) Yel-bũn-kãensã sõngda tõnd tɩ d bãng bõe a Zeova wall a Zezi zugu?

¹⁸ Yam bʋg la d tõe n dɩk toandã yel-bũndã pʋgẽ, la bõn-sõma sẽn solgã yel-bũndã pʋgẽ? (Mat. 6:19-21) D sok d meng woto: ‘Mam tara nin-kãensã yel-manesmã buud bɩ? Sɩdã yaa bũmb sẽn tar yõod ne maam bɩ? M sakd n maanda m sẽn tõe fãa sẽn na yɩl n bãng sɩdã sõma bɩ, bɩ m basdame tɩ bũmb a taaba, wala makre, daar fãa yɛlã tiisd-ma?’ (Mat. 6:22-24, 33; Luk 5:27, 28; Fil. 3:8) D sũur sã n noom ne d sẽn bãng sɩdã, d na n maana d sẽn tõe fãa t’a kell n yɩ bũmb ning sẽn tar yõod ne-d n yɩɩdã.

19. Sõsg ning sẽn pʋgdã pʋgẽ, d na n goma bõe yelle?

¹⁹ Bɩ d wilg tɩ d kelga yel-bũn-kãensã sẽn gomd Rĩungã yellã, la tɩ d wʋma b võor sõma. D tẽeg tɩ wʋm b võorã bal pa sek ye. D segd n tũu d sẽn zãms bũmb ningã me. Sõsg ning sẽn pʋgdã pʋgẽ, d na n goma a Zezi yel-bũn a tãab yelle, la yam ning d sẽn tõe n dɩk b pʋsẽ wã me yelle.