D sã n tẽed tɩ sẽn ki-bã na n wa vʋʋgame, rat n yeelame tɩ d yaa ned sẽn tẽed gomd nana-nana bɩ? Tʋm-tʋmd a Poll ra pa tagsd woto ye. Wẽnnaam vẽneg-a lame t’a yeele: “Sã n yaa vɩ-kãngã pʋgẽ yĩng bal la tõnd be ne Kirisã, ned ka be t’a nimbãaneg leb n ta tõnd ye. La moas-moasã wã yẽ, Kiris vʋʋgame n yi kũum sʋka. Bãmb n yɩ pipi soab Wẽnnaam sẽn vʋʋge, sẽn ki-bã sʋka.” (1 Korẽnt-dãmbã 15:19, 20) A Poll ra kɩsa sɩd tɩ kũum vʋʋgr na n zĩndame. Yaa a Zeezi meng vʋʋgrã n kɩt t’a kɩs sɩd ne rẽ. * (Tʋʋmã 17:31) A Poll yeelame t’a Zeezi n ‘yɩ pipi soab Wẽnnaam sẽn vʋʋge,’ rat n yeel tɩ yẽ n yɩ pipi n vʋʋg n na n vɩɩmd wakat sẽn kõn sa yĩnga. A Zeezi sã n yaa pipi soaba, rat n yeelame tɩ neb a taab me n na n vʋʋge.

La bũmb a to n kɩt tɩ y tõe n kɩs sɩd tɩ kũum vʋʋgr na n zĩndame. A Zeova yaa Wẽnnaam sẽn togsd sɩd wakat fãa. (Tɩt 1:2) A zɩ n yag ziri, a kõn tol n yag ziri me ye. A yeelame tɩ sẽn ki-bã na n vʋʋgame, la a vʋʋg kũ-rãmb n wilg t’a tõee rẽ. Rẽ yĩnga a na bas n pa pids a pʋlengã sɩda? Abada!

Bõe yĩng t’a Zeova na n vʋʋg sẽn ki-bã? Yaa a sẽn nong ãdem-biisã yĩnga. Daar a ye, a Zoob soka woto: “Ned sã n ki, a tõe n le vʋʋgame bɩ?” Dẽ poore, a paasame: ‘Yãmb sã n bool maam, mam na n sakame. La y na n nonga maam tɩ m yaa y nug-tʋʋmde.’ (Zoob 14:14, 15, Wẽnnaam Sebre, 1983) A Zoob ra kɩsa sɩd t’a Ba sẽn be saasẽ wã nong-a lame, la t’a rata ne a sũur fãa n vʋʋg-a. La Wẽnnaam pa toeem ye. Ad a sẽn yeele: “Mam a Sẽn-Ka-Saab ka tek ye.” (Malasɩ 3:6) Wẽnnaam ket n data ne a sũur fãa n vʋʋg sẽn ki-bã tɩ b vɩɩmd ne laafɩ la sũ-noogo. Biig sã n ki, a ba wã bɩ a ma wã sẽn dat ne a sũur fãa yaa le paam n yã-a.  Wẽnnaam me rat n le yãa sẽn ki-bã, la a tara tõog n na n maan bũmb ning fãa a sẽn date.—Yɩɩn-sõamyã 135:6.

A Zeova na n kõ a Bi-riblã pãng t’a vʋʋg sẽn ki-bã, tɩ b roagdbã sẽn da yõd n zĩ ne sũ-sãamsã kɩdem sũ-noogo. La a Zeezi tagsg yaa wãn kũum vʋʋgrã wɛɛngẽ? Nand t’a vʋʋg a Lazaar sẽn da ki wã, a sẽn yã a Lazaar tãopã ne b zo-rãmbã sẽn kʋmdã, a “yãbame.” (Zã 11:35) Daar a ye, a Zeezi sega pʋg-kõor Nayin soolmẽ wã. Pʋg-kõorã bi-yend n da maan kaalem. A nimbãaneg yõka a Zeezi t’a yeel-a yaa: “Ra yãb ye!” Rẽ poore, a vʋʋga biigã. (Luk 7:13) Woto wilgdame tɩ kũumã sẽn namsd ãdem-biisã sãamda a Zeezi sũuri. Rẽnd a sã n wa vʋʋg sẽn ki-bã n menes sũ-sãamsã dũniyã gill zugu, a sũur na n yɩɩ noog hal wʋsgo!

Yãmb ned zoe n maana kaalem bɩ? Tõe tɩ y tagsdame tɩ kũum pa tar tɩɩm ye. La kũum yaool n tara tɩɩm. Bala, Wẽnnaam na n kɩtame t’a Bi-riblã vʋʋg sẽn ki-bã. Tẽeg-y tɩ Wẽnnaam datame tɩ y yã sẽn ki-bã vʋʋgrã. A ratame tɩ y wa paam n yã y neb nins sẽn maan kaalmã, n kɩdem sũ-noogo. Mams-y n ges-y y sẽn na n le wa yã taaba, n tõe n paam n vɩɩmd wakat sẽn kõn sa, tɩ ned baa a ye pa na n le ki ye!

A Lionel, rao ning yell d sẽn gom sɩngrẽ wã yeela woto: “B wa n yeela maam tɩ sẽn ki-bã na n vʋʋgame. Sɩngrẽ wã, m da pa rat n tẽ ye. Sẽn paase, mam da pa kɩs ned ning sẽn yeel woto wã sɩd ye. La mam vaeesa Biiblã n mik tɩ yaa sɩda! Mam yãgdame n dat n le yã m yaab-raoogã ne m sũur fãa.”

Yãmb data kibay kũum vʋʋgrã wɛɛngẽ n paas bɩ? Sã n yaa rẽ bɩ y kos a Zeova Kaset rãmbã tɩ b na n wilg-y-la Biiblã goam nins sẽn kɩt tɩ b tẽed tɩ kũum na n vʋʋgame wã. *