Mam bɩɩ Losãnzelɛs sẽn be Kaliforni, Etazĩni soolmẽ wã. Mam sẽn vɩɩmd sags ninsã ra pida ne bi-beese, la dorg yũudba. Tõnd zakẽ wã, d ra yaa kamb a yoobe, tɩ maam la yiib-n-soaba.

M ma ra yaa portɛstã, n da tar tõnd n kẽnd wẽnd-doogẽ wã. La mam bi-bɩɩlmẽ, m da soosd n tʋmda tʋʋm-beedo. Hat fãa, mam da naagda wẽnd-doogã korallã n yɩɩndẽ. La ray a taabã, mam da kẽnda saooga, n yũud dorge, la m yooda.

Mam da yaa sũ-tʋʋlem soab la zab-zabda. Mam sã n da zabd ne neda, m maanda m sẽn tõe fãa sẽn na yɩl n tõoge. Mam sẽn da paam bũmb ning fãa lebgda m zab-teoogo. B sẽn wilg maam bũmb ning wẽnd-doogẽ wã pa sõng maam tɩ m toeem ye. Wala makre, mam da nong n yetame: “Sũ-dokr yaa Zu-soabã n so, la mam yaa a tʋʋm-teoogo!” Yʋʋmd 1970 soabã sẽn wa n kolgdẽ wã tɩ mam bee kolɛɛse. Be, mam bãnga politik siglg a ye sẽn da maood n dat tɩ nin-buiidã paam lohorem n paase. Mam da tagsdame tɩ b sẽn maand bũmb ningã zemsame. Rẽ n so tɩ m tɩ naag tõnd kolɛɛsã karen-biis sull a ye sẽn da maand wa bãmba. Naoor wʋsgo, tõnd gẽe ne pãn-soaadbã n tʋm zũnglg wʋsg hal tɩ yɩ tɩlɛ tɩ b pag kolɛɛsã rasem a wãna.

La mam sẽn da nong zabã, rẽ ra pa sekd maam ye. Woto kɩtame tɩ mam da mi n naag m kom-bɩ-taas n tʋmd bi-be-tʋʋma. Wala makre, maam ne m zo-rãmbã da mi n tɩ gesa filim-dãmb sẽn wilgd b sẽn nams nin-sablsã sẽn da yaa yembs Etazĩni wã to-to. Rẽ yikda tõnd sũyã, tɩ d pãb nasaar-bi nins sẽn da be filmã roogẽ wã. Rẽ poore, d kẽngda nasaar-dãmbã sagsẽ, n tɩ bao neb a taab n pãbe.

Mam sẽn wa n kolg yʋʋm pisi wã tɩ maam ne m kẽemã n paas m yaop a yiib n da tolg n lebg bi-beese. Tõnd paama zu-loees ne polɩɩs-rãmbã naoor wʋsgo. Mam yao a yembr n da tũud bi-bees sull yʋʋr sẽn yi, tɩ mam tɩ naag-ba. Mam vɩɩmã ra tara sãoong n debda.

Mam da tara zoa t’a roagdbã yaa a Zeova Kaset rãmba. B boola maam b tigissẽ wã, tɩ mam kẽnge. Pipi daarã bala, mam yãame t’a Zeova Kaset rãmbã yaa toor ne tũudum a taabã. B tigsgã sasa, b ned kam fãa zãada a Biible, n lakd n pʋgd karengã. Hal baa kom-bɩɩs n wɛgs sõss baraare. Mam sẽn bãng tɩ Wẽnnaam tara yʋʋre, la t’a yʋʋrã la a Zeova wã, n paas mam sẽn da wʋmd tɩ b pʋt a yʋʋrã, yɩ-m-la noog  wʋsgo. (Yɩɩn-sõamyã 83:18, MN) Tigingã neb ra yaa buud toor-toore, la bu-welsg ra pa be b sʋk ye.

Sɩngrẽ wã, mam da pa rat n zãms Biiblã ne a Zeova Kaset rãmbã ye. La mam da nonga b tigissã. Daar a ye yʋngo, mam kẽnga tigsga, tɩ m zo-rãmbã kẽng reem zĩigẽ. Reemã zĩigẽ, b yãa bi-bɩɩg a yembr fuug n dat n deeg t’a tõdge, tɩ b pãb-a n kʋ. Vẽkembeoogã, b ra gomda rẽ yell n pẽgd b mense. Polɩɩs-rãmbã yõg-b lame n kẽng bʋʋd roogo. Baa bʋ-kaoodbã taoore, b rɩka yellã n maan kʋʋsem. B kaoa b bʋʋdo, tɩ b wʋsg segd n zĩnd bãens roog b yõor tɛka. Vẽenega, mam sũur yɩɩ noogo, m sẽn pa tũ-b baraar yʋngã. Mam yãka yam n na n toeeme. Rẽ n so tɩ m sɩng Biiblã zãmsgo.

Mam sẽn da ne bu-welsgã zĩig zãngã kɩtame tɩ m sẽn yã bũmb ning a Zeova Kaset rãmbã sʋkã ling-m wʋsgo. Wala makre, a Zeova Kaset soab sẽn yaa nasaara n da wa n dat n tog sore, n dɩk a kambã n tɩ gũnug a tẽed-n-taag sẽn yaa nin-sablga. Sẽn paase, mam yãa bi-bɩɩg a ye sẽn yaa nin-sablg sẽn da pa tar gãag zĩiga, tɩ nasaar-dãmb sak n deeg-a b zakẽ. Woto fãa kɩtame tɩ mam kɩs sɩd t’a Zeova Kaset rãmbã tũuda a Zeezi goam nins sẽn be Zã 13:35 wã. Be, a yeela woto: “Yãmb sã n nong taaba, nebã fãa na bãng tɩ yãmb yaa mam karen-biisi.” Mam bãngame tɩ m paama saam-biis hakɩɩka.

Mam sẽn sɩng Biiblã zãmsgã, m mikame tɩ m segd n toeemame. Mam da segd n tekame n lebg ned sẽn baood laafɩ, la m kɩs sɩd tɩ rẽ la sõma n yɩɩda. (Rom-dãmbã 12:2) Bilf-bilfu, m wa n tõog n toeemame. Yʋʋmd 1974 yʋʋm-vẽkr kiuugã, mam deega lisgu, n lebg a Zeova Kaset soaba.

Baa mam lisgã poore, yɩɩ tɩlɛ tɩ m kell n mao n tõog m sũ-tʋʋlmã. Wala makre, daar a yembre, koe-moonegã sasa, wagdr n yãk mam mobillã radio tɩ mam na n dig-a. Sẽn wa n ket fĩ-fĩi tɩ mam gãd-a wã, a basa radio wã tɩ lʋɩ la a zoe. Mam sẽn togs m tẽed-n-taasã m sẽn maan to-to n paam m radio wã, kãsem-soab a ye n sok maam woto: “Stephen, fo sã n da yõk wagdrã, f ra na n maan-a-la bõe?” A sokrã kɩtame tɩ mam tagse, n bãng tɩ m segd n kell n maoome n yɩ ned sẽn nong laafɩ.

Yʋʋmd 1974 zĩ-likr kiuugã, mam lebga wakat fãa so-pakda, n moond koɛɛgã lɛɛr koabg kiuug fãa, la m zãmsd nebã Biiblã. Kaoosg zugẽ, m paamame tɩ b bool-m tɩ m tɩ tʋm a Zeova Kaset rãmbã biru-kãsengã sẽn be Burkilin, Niuyork soolmẽ wã. Yʋʋmd 1978 soabã pʋgẽ, mam lebg n leba Losãnzelɛs n na n tɩ ges m ma wã sẽn da ka laafɩ wã yelle. Yʋʋm a yiib poore, mam kẽe kãadem ne a Aarhonda. Mam pagã sõnga maam wʋsg tɩ d ges mam ma wã yelle, hal n tãag a kũum. Kaoosg zugẽ, maam ne a Aarhonda paam n kẽnga Gileaad lekollã. Rẽ poore, b tʋma tõnd Panama tɩ d lebg misioneer-dãmba. Tõnd keta be hal ne masã.

M sẽn deeg lisgã tɛka, m sega zu-loees sẽn da tõe n kɩt tɩ m pa tõog m sũurã ye. La masã, m mi m sẽn tõe n maan to-to n loog n bas ned sẽn baood m noore, wall m sẽn tõe n maan tɩ ned sũur sigi. Mam pagã, n paas neb a taab zoe n pẽga maam m sẽn tõog m meng yĩnga. Naoor wʋsgo, mam manesmã linga mam menga. La pa yɩ ne mam mengã pãng la m sẽn toeemã ye. Mam kɩsa sɩd tɩ m sẽn tõogã wilgdame tɩ Biiblã goam tara pãnga, n tõe n toeem neda.—Ebre-rãmbã 4:12.

Biiblã zãmsg kɩtame tɩ mam vɩɩmã tar bark masã, la kɩt me tɩ m lebg ned sẽn sɩd nong laafɩ. Mam basa nebã pãbre, n sõngd-b n dat tɩ b bãng Wẽnnaam. Mam tol n sõnga ned a ye sẽn da yaa mam bɛ lekollẽ wã t’a bãng Biiblã sẽn yetã. A lisgã poore, tõnd naaga taab n gãand roog a ye pʋgẽ n kaoos bilfu. Rũndã-rũndã, a yaa mam zoa meng-menga. Maam ne m pagã sõnga neb pis-nii la zak tɩ b bãng Biiblã n lebg a Zeova Kaset rãmba.

Mam pʋʋsda a Zeova bark ne m sũur fãa, bala, a sõnga maam tɩ m vɩɩmã tar bark masã, la m paam saam-biis hakɩɩka, n tar sũ-noog b sʋka.