“Kom-bɩɩs nins sẽn bẽed bãag sẽn kɩt tɩ b sũur pa noom ne b mensã sõor lebga wʋsgo. Rezo sosiyo-rãmbã kɩtame tɩ rẽ paamd pãng n paasdẽ.”—A Dr. Vivek Murthy, U.S. surgeon general, New York Times, June 17, 2024.

 Wãn to la roagdbã tõe n kogl b kambã ne zu-loees nins rezo sosiyo-rãmbã sẽn wat ne wã? Sagls n be Biiblã pʋgẽ n tõe n sõng-ba.

 Ad Biiblã sagls a wãna:

 “Gũus-m-meng soab tagsda a sẽn na n maan bũmb ningã zug neere.”—Yel-bũnã 14:15.

 Ra tags-y tɩ yaa tɩlɛ tɩ y bas y biigã t’a kẽ rezo sosiyo-rãmbã pʋsẽ, bala b tõe n waa ne zu-loees y biigã zugu. Nand tɩ y bas tɩ y biigã kẽ rezo sosiyo-rãmbã pʋsẽ, bɩ y reng n kɩs sɩd t’a bɩɩme n miẽ t’a pa segd n kẽes a sẽkã wʋsg a pʋgẽ, t’a na n kell n talla tũud-n-ta-sõma, la t’a pa na n ges bũmb sẽn pa sõma ye.

•   Y sã n dat n bãng n paas bɩ y karem sõs nins gom-zut sẽn yaa: “Mam biigã segd n tʋmda ne rezo sosiyo rãmbã bɩ?” ne “Sõng-y y biigã t’a tõog n gil zu-loees nins rezo sosiyo-rãmbã sẽn wat ne wã.”

 “Ra sãam-y y sẽkã ye.”—Efɛɛz rãmbã 5:16.

 Y sã n sak tɩ y biigã na n tʋm ne rezo sosiyo-rãmbã bɩ y lugl noy rẽ wɛɛngẽ, la y wilg-a no-kãens sẽn na n kogl-a to-to. Gũusd-y n get y biigã manesmã sã n pa toeemdẽ tɩ y segd n boog sẽk ning a sẽn kẽesd rezo sosiyo-rãmbẽ wã.

•   Tũnug-y ne desẽ-rãmb video ning gom-zug sẽn yaa Gũus ne réseaux sociaux rãmbã, n sõng y biigã t’a bãng bũmb ning sẽn kɩt t’a segd n gũus ne a sẽn tʋmd ne rezo sosiyo-rãmbã to-to wã.

 Biiblã wilgame tɩ d vɩɩ wakat ‘yɛlã sẽn yaa kãn-kãe hal tɩ vɩɩmã lebg toogo.’ (2 Tɩmote 3:1-5) La a kõt-d-la sagls sẽn tõe n sõng-d tɩ d mao ne zu-loe-kãense. Sõs sẽn yɩɩd bãmb pisi sẽn tik Biiblã zug n be sõs-kãngã sẽn gomd kom-bɩɩsã sũy sẽn pa noom ne b mensã pʋgẽ, n tõe n sõng roagdbã ne b kambã.