D yãa Biiblã sẽn yet bũmb ninsã a wãn bala. Rẽ pa kɩt tɩ y maneg n nong a Zeova sɩda? La y tog n modgame tɩ nonglem-kãng paasdẽ. (1 Pɩɛɛr 2:2) Yaa y sã n ket n zãmsd Biiblã, tɩ y zoodã ne Wẽnnaamã paasdẽ la y na n wa tõog n paam vɩɩm sẽn kõn sa wã.​—Karm-y Zã 17:3; Ziid 21.

Yãmb sã n bãngd Wẽnnaam n paasdẽ, y tẽebã me na n paasdame. Tẽebã na n sõng-y lame tɩ y ta a yam. (Hebre dãmba 11:1, 6) Leb n na n kɩtame tɩ y tek yam n kos sugri, la y toeem y vɩɩmã tɩ naf-yã.​—Karm-y Tʋʋm 3:19.

Y na n datame tɩ nebã bãng y sẽn zãmsã, bala ned sã n wʋm koe-noogo, a ratame tɩ neb a taab wʋme. Y sã n ket n zãmsd Biiblã, y na n wa tõog n tall-a lame n wilg ned koe-noogã, la bũmb ning sẽn kɩt tɩ y tẽed a Zeova wã.​—Karm-y Rom dãmb 10:13-15.

Y tõe n goma koe-noogã yell ne y zo-rãmb bɩ y roagdba. Yaa woto la wʋsg sɩngda. La gom-y ne yam. Ra sãbg-y b tũudmã ye. Yãmb wee n wilg-b bũmb nins Wẽnnaam sẽn kãabã. La tẽeg-y tɩ b geta yãmb yel-manesmã n yɩɩd y sẽn yetã.​—Karm-y 2 Tɩmote 2:24, 25.

Biiblã zãmsg na n sõnga yãmb tɩ y tẽebã paase. Tarẽ-n-tarẽ, y na n wa pʋʋsa a Zeova n yeel-a tɩ y rɩka y meng n kõ-a. Woto yaa zu-zẽkr tɛkẽ! Y na n paam n naaga a Zeova nin-buiidã n maand a raabã.​—Karm-y 2 Korẽnt dãmb 6:18.

Y sã n ket n zãmsd Wẽnnaam Gomdã, y na n bɩɩsa y bãngrã. (Hebre dãmba 5:13, 14) Kos-y-yã a Zeova Kaset soab t’a wa tall Biiblã sɩd yetame tɩ bõe? sebrã n sõng-y tɩ y bãng Biiblã n paase. Y sã n wɩng ne Biiblã zãmsgo, y vɩɩmã na n talla barka.​—Karm-y Yɩɩl Sõamyã 1:1-3; 73:27, 28.

Koe-noogã yita a Zeova sẽn yaa sũ-noog soabã nengẽ. Y sã n tigimd ne a nin-buiidã, y na n paama a zoodo. (Hebre dãmba 10:24, 25) Bɩ y kell n modge, n tõog n ta a Zeova yam, tɩ y na n wa paama vɩɩm sẽn ka sɛtã. Bũmb kae t’a yõodã ta Wẽnnaam zood ye.​—Karm-y 1 Tɩmote 1:11; 6:19.