D rɩk makre: A Boris karen-bi-taas n kẽnd n watẽ. A Boris sẽn yã-bã bal la a sũurã sẽn sɩng kiuusgu. Semennã pʋgẽ, b pẽdg-a-la naoor a yiib n dat t’a yũ sɩgaare. B sẽn watã, b na n le pẽdg-a lame.

B sẽn ta, b nin-yend n yeel a Boris yaa:

A sẽn yeel woto wã la a sẽn foog bũmb a poaasẽ wã n tees a Boris.

A Boris geta sigaarã a karen-bi-taagã sẽn zãada, t’a sũurã maneg n kiuusd n paasdẽ.

Fo sã n da be a Boris zĩigẽ, f na n maana wãna?

Fo tagsdame t’a Boris karen-bi-taasã miime tɩ sɩgaarã yũub pa sõma bɩ? Fo tẽedame tɩ yaa bãmb n yãk yam b toor n sɩng yũub bɩ? Naoor wʋsgo, yaa neb a taabã n pẽdg-b tɩ b sɩnge. B sẽn dat tɩ b taabã nong-bã yĩnga, b sakd n maanda wa bãmba.

Fo sã n wa be yel-kãngã taoore, bõe la f tõe n maane, tɩ f taabã ra tõog n pẽdg-f tɩ f maan sẽn pa sõma?

1. ZOE N TAGS F SẼN TÕE N GIL TO-TO

   Biiblã yetame: “Gũus-m-meng soab yãta yell n zoe n soonde, la zɩtbã zãgsda soondgo, n bao yell n kõ b mense.”—Yel-bũnã 22:3.

   Wakat ninga, f tõe n yãa yell yɩɩga. Wala makre, fo nee f karen-bi-taas sẽn tũud taab n watẽ la b yũud sɩgaare. F sã n deng n tags sõma, f bãngda f sẽn tõe n gil yellã to-to.

2. TAGSE

   Biiblã yetame: “Kell-y n tall-y sũur-kaset sẽn yaa sõma.”—1 Pɩyɛɛr 3:16, MN.

   Sok f meng yaa: ‘Mam sã n tũ neb n maan b sẽn date, tarẽ-n-tarẽ m vɩɩmã na n wa yɩɩ wãna?’ Yaa sɩd tɩ zĩig pʋgẽ wã, nebã sũur na n yɩɩ noog ne foo. La f sũur kõn wa n sãam sɩda? Fo na n sak n maana bũmb fo mengã sẽn pa rate, f sẽn dat n noog f karen-bi-taasã sũur bal bɩ?—Yikri 23:2.

3. FOO N YÃKDE

   Biiblã yetame: “Yam soab gũusdame.”—Yel-bũnã 14:16, Wẽnnaam Sebre, 1983.

   Yɛl kẽer taoore, yaa ned kam fãa n yãkd a sẽn na n maane, la a sak rẽ sẽn na n wa ne yell ningã. Biiblã pʋgẽ, b gomda a Zozɛf, a Zoob, a Zeezi la neb a taab sẽn yãk yam-sõma b vɩɩmã pʋgẽ. B gomda neb me sẽn pa yãk yam-sõma yelle. Wala makre, a Kayẽ, a Ezayu la a Zida. La fo na n maana wãna?

Biiblã yetame: “Ned ning sẽn maand sɩd bõn-bõoneg pʋse, a maanda sɩd bõn-kãsems pʋse.” (Luk 16:10) Fo sã n maag f yĩng n tags f yam-yãkrã sẽn tõe n wa ne yɛl ninsã, n togs f karen-bi-taasã f sẽn yãk yam ningã, tõe n ling-b lame tɩ b bas-f sɩɩ.

Pa tɩlɛ tɩ f gom wʋsg ye. Yeel-b bal tɩ AYO. F tõeeme me n yeel-b vẽeneg tɩ:

• “M pa naag ye!”

• “M kõn saag n maan a buud ye!”

• “Fo meng mii maam.”

Fo we n leok vẽenega, tɩ sãmb-sãmb kae ye. Rẽ b na n looga tao-tao n bas foo, hal tɩ ling-fo.

Fo karen-bi-taasã sã n yaand foo, f maanda wãna? La b sã n yeel foo tɩ f yaa rabɛɛma? Bãng tɩ b rat n belga foo tɩ f tũ bãmb raabo. F na n maana wãna? Ad bũmb a yiib f sẽn tõe n maane.

• Sak n deege, la f yeel-b yaa: “Y bee bʋʋm, mam yaa rabɛɛma.” La f wilg-b bũmb ning sẽn kɩt tɩ f yɛɛsdẽ wã.

• Leok-ba. Togs-b bũmb ning sẽn kɩt tɩ f zãgsã, la f sõng-b tɩ b tagse. Wala makre, f tõe yeelame yaa: “M da pa tẽed tɩ yãmb na sak n maan woto ye!”

F karen-bi-taasã sã n ket n yaand foo, kẽng n looge! Bãng tɩ f sã n pa loog tao-tao, b na n maneg n pẽdga foo n paase. La f sã n looge, f wilgdame tɩ f pa na n sak tɩ neb a taabã sãam f zʋg-sõma wã ye.

Yaa sɩd tɩ f pa tõe tɩ f taabã pa wa pẽdg-f n dat tɩ f maan bũmb sẽn yaa wẽng ye. La yaa foo n tog n yãk f sẽn na n maanega, la f kɩt tɩ f karen-bi-taasã bãng rẽ vẽenega.—Zozoe 24:15.