Kaoosdame tɩ neb kẽer yaool n wa rɩk yam b manesem wẽngã pʋgẽ. Yɩɩ woto ne maam. Mam doga Barselon n bɩ be. Yaa Ɛspayn tẽn-bedr a yiib-n-soaba. Tõnd zakã rãmb ra bee zĩig b sẽn boond tɩ Somorostro. Yaa tẽng sẽn be mogrã noore. Tẽnga nebã ra nonga nen-kɛglem la doroogã.

 Mam roagdbã ra tara kamb a wɛ. Maam la kẽema. D sẽn da yaa nong rãmbã yĩnga, m baaba talla maam n kẽng tenis tãoob zĩigẽ, tɩ b sã n da wa tãoodẽ bɩ m wʋkd ball-dãmbã n wat n kõt-b tɩ b yaood-ma. M ra tara yʋʋm piiga, n da tʋmd lɛɛr piig daar fãa. Rẽ kɩtame tɩ m da pa tõe n kẽng lekoll wa m rog-taasã ye. M sẽn wa n tar yʋʋm piig la a naase, mam kẽngame n tɩ tʋmd kutã tʋʋma.

 Yʋʋmd 1975 wã, b boola maam tɩ m wa kẽ sodaarã. Wakat kãnga, Ɛspayn tẽngã pʋgẽ, kom-bɩɩsã fãa ra segd n kẽe sodaarã. M da rat n maana bũmb sẽn yaa kãseng wʋsg m vɩɩmã pʋgẽ. Rẽ n so tɩ m sak n tɩ naag sodaas sull sẽn da be Ɛspayn, Afirik nug-rɩtg sẽnese. Wakat kãnga, m sɩnga doroogã la rãamã yũubu.

 M sẽn bas sodaarã, m leba Barselon n tɩ lugl bi-bees sulli. D ra zuuda bũmb nins fãa d sẽn paame. D ra koosda bõn-kãens sẽn na yɩl n paam ligd n da doroogã. M da yũuda doroog buud toor-toor la rãam, n yooda, la m pard n baood ligdi. Rẽ kɩtame tɩ m nen-kɛglem tʋʋmã ra paamd pãng n paasdẽ. Daar fãa m sã n da kẽnda, m zãada sʋ-bil bɩ sʋ-bedre, wall lare. M da pa yɛɛsd ne m tall-b n maan ned yelle, sã n wa mik tɩ yaa tɩlɛ ye.

 Vugri, maam ne m sullã neb zuka mobilli, tɩ polɩɩs-rãmbã na n dig tõndo. Ra yaa wa filim. D wẽna mobillã n maan kilo 30 tɩ polɩɩs-rãmbã yaool n sɩng n tãood-d ne bug-raado. Mobillã wa n lʋɩɩme, tɩ d fão n yi n zoe. M baaba sẽn wa n wʋmã, a riga maam n yiis zakã pʋgẽ. A ra bee bʋʋm.

 Yʋʋm a nu wã sẽn pʋglã m da vɩɩ soayã zutu. M gãanda zags noy, mobila pʋsẽ, goeels zut park-rãmbẽ, la yaadẽ. M vɩɩmda tãng bokẽ menga. M vɩɩmã ra pa tar võore, tɩ kɩt tɩ m da getẽ tɩ m sã n da kiẽ lame n são. M tẽrame tɩ daar a ye m yũ doroogã tɩ kɩt tɩ m wã m nusã. Nod-rãandã keta hal ne rũndã.

 M sẽn wa n tar yʋʋm 28, m ma wa n gẽesa maam, n yeel-m tɩ m lebg n wa zakẽ. M sakame, la m yeel-a tɩ m na n modg n toeemame. La kaoosa bilf tɩ m yaool n wa tõog n toeeme.

 Daar a ye zaabre, a Zeova Kaset rãmb a yiib n wa kogs tõnd kʋɩlengã. M sẽn wa n kelgd-bã, m baaba paa roogã pʋgẽ n tãs maam, n yeel tɩ m lebs n pag kʋɩlengã. M sẽn da pa nong weoogrã yĩnga, m pa kelg-a ye. B kõo maam seb-bõones a tãabo. M deega rẽ ne sũ-noogo. M sok-b lame n gese yɛ la b tigimd taaba. La rasem a wãn poore, m kẽnga b Rĩungã roogẽ.

 M sẽn kẽngã, bũmb sẽn yɩ maam noog yaa nebã fãa sẽn da maneg b mens sõma wã. Mam yẽ ra tara zoob-wogdo, tɩ m toɛɛngã yaa zuna, tɩ m futã me pa lebd be ye. Ra yaa vẽeneg tɩ m pa m zĩig la be ye. Woto kɩtame tɩ m pa kẽ roogã pʋgẽ ye. La ned la m yã tɩ ling-ma. Yaa ned sẽn da naag maam n be bi-bees sullã pʋgẽ. A yʋʋr la a Juan. A ra ninga vɛste. B yeela maam tɩ yʋʋmd la woto a sẽn lebg a Zeova Kaset soaba. A sẽn da be be wã kõo maam raoodo, tɩ m tõog n kẽ Rĩungã roogẽ n naag n kelg tigsgã. Rẽ tɛk la m vɩɩmã sɩng toeengo.

 M sak n sɩnga Biiblã zãmsgo. La pa yã n kaoos la m bãng tɩ m sã n dat n ta Wẽnnaam yam, m segd n toeemame n bas bi-be-tʋʋmã, yoobã, ne doroogã la rãamã yũubu. Yɩl n bas woto fãa pa yɩ nana ye. M bãngame me tɩ sẽn na yɩl n ta a Zeova yam, m segd n ‘manega m yamã tɩ kɩt tɩ m toeeme.” (Rom dãmbã 12:2) Wẽnnaam nimbãan-zoeerã yɩɩ maam noog wʋsgo. Baa ne mam kongrã sẽn da yaa wʋsgã, a kõ-m-la weer sẽn na yɩl tɩ m toeeme. Mam sẽn da zãmsd bũmb ning Wẽnnaam a Zeova zugã kẽe mam sũurã wʋsgo. Wa n lebga vẽeneg ne maam tɩ Naand n be, la tɩ m yell pak-a lame.—1 Pɩyɛɛr 5:6, 7.

 Rẽ sõnga maam tɩ m sɩng toeengo. Wala makre, m Biiblã zãmsg sasa, d sẽn wa n gomd sɩgaarã yũub yellã, m yeela m meng yaa: ‘Wẽnnaam a Zeova sã n dat tɩ m yɩlg m meng n yiis rẽgd buud fãa, m sẽn segd n maan yaa m bas sɩgaarã.’ (2 Korẽnt rãmbã 7:1) Sɩd me, m basa sɩgaarã fasɩ!

 M da segdame me n bas doroogã yũub la a koosgo. Rẽ maaneg rɩka sẽk wʋsgo, la modgre. Sẽn na yɩl n tõog n maan rẽ, m da miime tɩ m segd n zãaga m meng ne m pĩnd tũud-n-taasã. B ra pa sõngd maam tɩ m paasd maam ne a Zeova zoodã pãng ye. Kaoosg zugẽ, m wa n sɩngame n teeg Wẽnnaam, la m paam me tɩ zo-rãmb nins m sẽn paam tigingã pʋgẽ wã sõng-ma. B sẽn da nong maam la b wilgdẽ tɩ m yell pak-b lame wã yaa bũmb m sẽn da zɩ n paame. Kiis a wãn poore, m wa n tõog n basa doroogã, la m ‘yeelg nin-paalgã,’ tɩ sõng-m tɩ m wa ta Wẽnnaam yam. (Efɛɛz rãmbã 4:24) Yʋʋmd 1985 sa-sik kiuugã, m deega lisg n lebg a Zeova Kaset soaba.

 Biiblã sõnga maam tɩ m vɩɩmã lebg sõma. Sõnga maam tɩ m bas vɩɩm manesem sẽn da sãamd m yĩnga, la sẽn kɩt tɩ m da get tɩ m ka barkã. Mam pĩnd zo-rãmbã sʋka, sẽn yɩɩd bãmb pis-tã n ki SIDA wã bãaga, ne doroogã bãas a taab yĩnga, tɩ b yʋʋmã ra nan pa vẽsg ye. M sũur nooma wʋsgo, m sẽn tũ Biiblã saglsã yĩnga. Bala rẽ sõnga maam tɩ m gil yel-beed nins sẽn paam-bã.

 Masã m sã n kẽnda, m pa le zãad sʋg bɩ lar wa pĩndã ye. M da zɩ n tags tɩ m da na n wa zãada Biiblã, n talld-a n sõngd neb a taabã ye. Rũndã-rũndã, maam ne m pagã fãa kẽesa d meng zãng a Zeova tʋʋmdã pʋgẽ.

 Mam roagdbã zɩ n lebg a Zeova Kaset rãmb ye. La b sũy ra nooma ne Biiblã zãmsgã sẽn naf maam to-to wã. Sɩd me, m baaba ra gomd n teenda a Zeova Kaset rãmbã a tʋmd-n-taasã fãa taoore. A ra nee vẽeneg tɩ m sẽn lebg a Zeova Kaset soabã kɩtame tɩ m vɩɩmã lebg sõma. M ma ra nong n yetame tɩ m sã n da zãms Biiblã pĩnd n são. A sẽn yeelã yaa sɩda.

 M sẽn maan bũmb nins m vɩɩmã pʋgẽ wã sõng-m lame tɩ m bãng tɩ m sẽn da baood sũ-noog doroogã la manesem-wẽns a taabã pʋgẽ wã ra ka võor ye. Masã, m sẽn zãmsd neb a taabã Wẽnnaam Gomdã sẽn fãag maamã kõt-m-la sũ-noog hakɩɩka.