L-Aħbar Tajba Skont Mattew 26:1-75
-
Il-qassisin jippjanaw biex joqtlu lil Ġesù (1-5)
-
Jiġi mferraʼ żejt ifuħ fuq Ġesù (6-13)
-
L-aħħar Qbiż u t-tradiment (14-25)
-
Tiġi stabbilita l-Ikla taʼ Filgħaxija tal-Mulej (26-30)
-
Ġesù jbassar li Pietru se jgħid li ma jafux (31-35)
-
Ġesù jitlob fil-Ġetsemani (36-46)
-
Ġesù jiġi arrestat (47-56)
-
Jgħaddi ġuri quddiem is-Sinedriju (57-68)
-
Pietru jgħid li ma jafx lil Ġesù (69-75)
26 Wara li Ġesù qal dan kollu, hu qal lid-dixxipli tiegħu:
2 “Intom tafu li jumejn oħra l-Qbiż, u jien, Bin il-bniedem, se ningħata f’idejn l-għedewwa biex joqtluni fuq iz-zokk.”
3 Imbagħad il-qassisin importanti u l-anzjani* nġabru fil-bitħa tal-qassis il-kbir, li kien jismu Kajfa.
4 Huma bdew jiftiehmu bejniethom biex bil-qerq isibu mod kif jarrestaw* lil Ġesù u joqtluh.
5 Madankollu bdew jgħidu: “M’għandniex nagħmlu dan fil-festa li ma jmurx tqum xi rewwixta.”
6 Waqt li Ġesù kien Betanja fid-dar taʼ Xmun, li qabel kellu l-ġdiem,
7 marret ħdejh mara b’vażett tal-alabastru b’żejt ifuħ li kien jiswa ħafna flus, u din bdiet tferrgħu fuq rasu waqt li kien mal-mejda.
8 Meta d-dixxipli raw dan, xejn ma ħadu pjaċir u qalu: “Għala din il-ħela kollha?
9 Dan setaʼ nbiegħ bi prezz għoli u l-flus jingħataw lill-foqra.”
10 Peress li Ġesù kien jaf x’kienu qed jgħidu, qalilhom: “Għala qed tgħidu hekk fuq din il-mara? Hi għamlet xi ħaġa tajba għalija.
11 Dejjem se jkun hawn nies foqra magħkom, imma jien mhux dejjem se nkun magħkom.
12 Din il-mara ferrgħet iż-żejt ifuħ fuqi biex tippreparani għad-difna.
13 Naċċertakom li kull fejn tiġi ppritkata l-aħbar tajba se jissemma wkoll dak li għamlet din il-mara biex jibqgħu jiftakru fiha.”
14 Imbagħad Ġuda l-Iskarjota, li kien wieħed mit-Tnax, mar għand il-qassisin importanti
15 u qalilhom: “X’se tagħtuni biex nittradih ħalli tkunu tistgħu tarrestawh?” Huma ftiehmu li jagħtuh 30 munita tal-fidda.
16 U minn dak il-ħin, beda jfittex opportunità biex jittradixxi lil Ġesù.
17 Fl-ewwel jum tal-Festa tal-Ħobż bla Ħmira, id-dixxipli marru għand Ġesù u staqsewh: “Fejn trid li nippreparawlek l-ikla tal-Qbiż?”
18 Hu qalilhom: “Morru fil-belt. Hemm se ssibu raġel u għidulu, ‘L-Għalliem qallek li ż-żmien biex imut wasal. Hu se jiċċelebra l-Qbiż mad-dixxipli f’darek.’”
19 Għalhekk, id-dixxipli għamlu dak li qalilhom Ġesù u ppreparaw kollox għall-ikla tal-Qbiż.
20 Filgħaxija hu kien mal-mejda mat-12-il dixxiplu.
21 Waqt li kienu qed jieklu, hu qal: “Naċċertakom li wieħed minnkom se jittradini.”
22 Huma kienu mdejqin ħafna minħabba dan, u kull wieħed minnhom beda jistaqsih: “Mulej, mhux jien hux?”
23 Hu wieġeb: “Il-wieħed li se jittradini hu dak li se jdaħħal idu fl-iskutella fl-istess ħin miegħi.
24 Veru li jien, Bin il-bniedem, se mmut, bħalma tgħid l-Iskrittura, imma ħażin għalih dak li se jittradini! Kien ikun aħjar għalih li qatt ma twieled.”
25 Ġuda, li kien se jittradih, wieġbu: “Mhux jien hux, Rabbi?”* Ġesù qallu: “Int tafha t-tweġiba.”
26 Huma u jieklu, Ġesù ħa ħobża, qal talba, qasamha, taha lid-dixxipli, u qalilhom: “Kulu. Dan il-ħobż jirrappreżenta l-ġisem tiegħi.”
27 U ħa tazza bl-inbid, irringrazzja lil Alla, tahielhom, u qal: “Ixorbu minnha,
28 għax dan l-inbid jirrappreżenta ‘d-demm tiegħi li bih se jibda jgħodd il-patt t’Alla.’ Dan se jixxerred għall-benefiċċju taʼ ħafna nies, ħalli b’hekk jinħafrulhom id-dnubiet.
29 Mhux se nerġaʼ nixrob inbid sa dakinhar li nixrob inbid ġdid magħkom fis-Saltna taʼ Missieri.”
30 Fl-aħħar, wara li kantaw biex ifaħħru lil Alla,* huma marru lejn il-Muntanja taż-Żebbuġ.
31 Imbagħad Ġesù qalilhom: “Dan il-lejl kollha kemm intom se tabbandunawni,* għax fl-Iskrittura hemm miktub: ‘Jien se nattakka lir-ragħaj, u n-nagħaġ tiegħu jitferrxu.’
32 Imma wara li niġi rxoxtat, immur qabilkom fil-Galilija.”
33 Imma Pietru wieġbu: “Anki jekk l-oħrajn jabbandunawk, jien qatt mhu se nabbandunak!”
34 Ġesù qallu: “Naċċertak li dan il-lejl se tgħid li ma tafnix tliet darbiet qabel ma jidden is-serduq.”
35 Pietru qallu: “Anki jekk ikolli mmut miegħek, żgur se ngħid li nafek.” Id-dixxipli l-oħra kollha qalu l-istess.
36 Imbagħad Ġesù mar mad-dixxipli tiegħu f’post li jgħidulu Ġetsemani u qalilhom: “Poġġu hawn waqt li jien immur nitlob.”
37 Miegħu ħa lil Pietru u ż-żewġt itfal taʼ Żebedew, u beda jħossu mdejjaq u inkwetat ħafna.
38 Imbagħad qalilhom: “Inħossni mdejjaq* għall-mewt. Ibqgħu mqajmin miegħi hawn.”
39 Imbagħad mexa ftit ’il quddiem, niżel wiċċu mal-art, u talab: “Missier, jekk hu possibbli, ħa ma jkollix bżonn nixrob minn din it-tazza.* Imma ħa jsir kif trid int, u mhux kif irrid jien.”
40 Hu mar lura ħdejn it-tliet dixxipli u sabhom reqdin, u qal lil Pietru: “Ma stajtux tibqgħu mqajmin imqar għal siegħa miegħi?
41 Ibqgħu għassa u itolbu kontinwament, ħalli ma taqgħux fit-tentazzjoni. Veru, l-intenzjoni hi tajba,* imma l-ġisem* hu dgħajjef.”
42 U Ġesù reġaʼ mar jitlob u qal: “Missier, jekk mhux possibbli li nevita li nixrob minn din it-tazza, mela ħa jseħħ dak li trid int.”
43 U reġaʼ mar ħdejn id-dixxipli tiegħu u sabhom reqdin, għax kellhom ħafna ngħas.
44 Għalhekk, telaq minn ħdejhom u reġaʼ mar jitlob għat-tielet darba, u qal l-istess.
45 Imbagħad reġaʼ mar ħdejn id-dixxipli u qalilhom: “Issa mhux il-ħin li torqdu u tistrieħu! Issa wasal il-ħin li jien, Bin il-bniedem, niġi ttradut u ningħata f’idejn il-midinbin.*
46 Qumu, ejja mmorru. Dak li se jittradini wasal.”
47 Waqt li kien għadu qed jitkellem, wasal Ġuda, wieħed mit-Tnax, u miegħu kellu folla kbira. Dawn kienu armati bi xwabel u bsaten, u kienu ntbagħtu mill-qassisin importanti u l-anzjani.
48 Dak li kien se jittradih kien tahom sinjal u qalilhom: “Arrestaw lil dak li se nbus, għax hu l-wieħed li qed tfittxu.”
49 U mar dritt fuq Ġesù u qallu: “Il-paċi miegħek, Rabbi!” u biesu b’tenerezza.
50 Imma Ġesù qallu: “Għala qiegħed hawnhekk?” Imbagħad dawk li kienu maʼ Ġuda, resqu, qabdu lil Ġesù, u arrestawh.
51 U wieħed mid-dixxipli taʼ Ġesù qabad ix-xabla tiegħu u qataʼ l-widna tal-ilsir tal-qassis il-kbir.
52 Imbagħad Ġesù qallu: “Poġġi x-xabla f’postha, għax kull min jiġġieled bix-xabla, se jmut bix-xabla.
53 Taħseb li ma nistax nitlob bil-ħniena lil Missieri biex issa stess jibgħatli iktar minn 12-il armata* t’anġli?
54 Imma jekk nagħmel hekk, kif se jseħħ dak li qalet l-Iskrittura?”
55 Dak il-ħin Ġesù qal lill-folla: “Mela jien xi ħalliel biex ġejtu għalija armati bix-xwabel u l-bsaten? Kuljum kont inkun bilqiegħda fit-tempju ngħallem, mela għax ma ġejtux tarrestawni hemm?
56 Imma dan kollu ġara biex iseħħ dak li kitbu* l-profeti.” Imbagħad id-dixxipli kollha abbandunawh u ħarbu.
57 Dawk li arrestaw lil Ġesù ħaduh għand Kajfa l-qassis il-kbir, fejn kien hemm l-iskribi u l-anzjani.
58 Imma Pietru baqaʼ jsegwih mill-bogħod sal-bitħa tal-qassis il-kbir. U wara li daħal, qagħad bilqiegħda mal-qaddejja tad-dar biex jara x’se jiġri.
59 Issa l-qassisin importanti u l-membri l-oħra tas-Sinedriju kienu qed ifittxu nies biex jagħtu xhieda falza kontra Ġesù ħalli joqtluh.
60 Iżda għalkemm marru ħafna xhieda foloz ma sabux fuqiex jikkundannawh. Fl-aħħar marru tnejn
61 u qalu: “Dan ir-raġel qal li hu kapaċi jwaqqaʼ t-tempju t’Alla u jibnih fi tlett ijiem.”
62 Għal dan, il-qassis il-kbir qam u qallu: “Mhu se tgħid xejn? M’intix tismaʼ fuqiex qed jakkużawk dawn l-irġiel?”
63 Imma Ġesù baqaʼ ma qal xejn. Għalhekk il-qassis il-kbir qallu: “Aħlef bl-Alla l-ħaj li tgħidilna jekk intix il-Kristu, l-Iben t’Alla!”
64 Ġesù qallu: “Int stess għedt dan. Imma kunu afu li fil-futur se taraw lili, Bin il-bniedem, bilqiegħda fuq il-lemin tal-Wieħed b’saħħtu u ġej fis-sħab tas-sema.”
65 Imbagħad il-qassis il-kbir ċarrat ħwejġu u qal: “Qed jidgħi!* Għandna bżonn iktar xhieda? Smajtuha d-dagħwa.
66 Intom x’taħsbu?” Huma wiġbuh: “Ħaqqu l-mewt.”
67 Imbagħad beżqulu f’wiċċu u tawh bil-ponn. Oħrajn tawh daqqiet taʼ ħarta,
68 u qalu: “Ja Kristu, jekk int profeta, għidilna min tahielek din id-daqqa!”
69 Issa Pietru kien bilqiegħda barra fil-bitħa, u resqet lejh qaddejja u qaltlu: “Anki int kont maʼ Ġesù l-Galilew!”
70 Imma hu m’ammettiex, u qal quddiem kulħadd: “Ma nafx fuqiex qed titkellem.”
71 Meta mar fid-daħla tal-bitħa, ratu qaddejja oħra u qalet lil dawk li kienu hemm: “Dan ir-raġel kien maʼ Ġesù n-Nazzarenu.”
72 U reġaʼ qal li mhux veru u ħalef: “Ma nafux lil dan ir-raġel!”
73 Wara ftit, dawk li kienu hemm qalu lil Pietru: “Int żgur li wieħed minnhom, għax qed titkellem bħan-nies mill-Galilija.”*
74 Imbagħad beda jisħet* u jaħlef: “Jien ma nafux lil dan ir-raġel!” U s-serduq idden mill-ewwel.
75 U Pietru ftakar f’dak li kien qallu Ġesù, jiġifieri: “Qabel ma jidden is-serduq, int se tgħid li ma tafnix tliet darbiet.” Imbagħad Pietru ħareġ barra u beka fuq li beka.
Noti taʼ taħt
^ Letteralment “jaqbdu.”
^ Jew “Għalliem.”
^ Jew “kantaw is-salmi.”
^ Letteralment “se titfixklu minħabba fija.”
^ Jew “Ruħi mdejqa.”
^ It-tazza tirrappreżenta dak li jrid Alla, jiġifieri li jħalli lil Ġesù jmut minħabba li jiġi akkużat b’mod falz li dagħa.
^ Letteralment “l-ispirtu jrid.”
^ Dan jirreferi għall-istat midneb u imperfett taʼ bniedem.
^ Jew “in-nies li jagħmlu d-dnub.”
^ Letteralment “12-il leġjun.” Fl-armata Rumana kien hemm madwar 4,000 sa 6,000 suldat f’leġjun wieħed.
^ Jew “l-iskritturi li kitbu.”
^ Jew “qed titkellem bid-djalett.”
^ Jiġifieri jgħid li se jkun misħut jekk mhux qed jgħid il-verità.
