Proverbji 19:1-29
19 Aħjar tkun fqir u tagħmel dak li hu tajjeb,Milli tkun stupidu u tigdeb.
2 Mhux tajjeb li xi ħadd ma jkollux għarfien,U min jaġixxi bla ma jaħsibha* qed jidneb.
3 Il-bluha taʼ xi ħadd twasslu fit-triq ħażina,U hu jirrabja ħafna kontra Ġeħova.
4 Is-sinjur għandu ħafna ħbieb,Imma l-fqir anki l-ħabib li għandu jitilqu.
5 Xhud falz se jiġi kkastigat żgur,U dak li jigdeb maʼ kull nifs li jieħu ma jgħaddihiex lixxa.
6 Ħafna jkunu jridu jinħabbu maʼ min hu ġeneruż,*U kulħadd hu ħabib taʼ raġel li jagħti r-rigali.
7 Raġel fqir jobogħduh ħutu kollha;Hu żgur se jiġi mwarrab mill-ħbieb tiegħu!
Hu jibqaʼ jitlobhom il-pjaċiri, imma ħadd ma jwieġbu.
8 Min għandu l-għaqal iħobb lilu nnifsu.*
Min japprezza* l-abbiltà taʼ li jagħraf x’inhu tajjeb u ħażin se jkollu suċċess.
9 Xhud falz se jiġi kkastigat żgur,U dak li jigdeb maʼ kull nifs li jieħu se jinqered.
10 Mhux xieraq li l-iblah jgħix fil-lussu,Aħseb u ara li qaddej imexxi fuq il-mexxejja!
11 Raġel li hu għaqli ma jirrabjax malajr,U hu se jiġi mfaħħar jekk iħalli nuqqas għaddej.*
12 Ir-rabja taʼ re hi bħal għajta taʼ ljun,Imma l-approvazzjoni tiegħu hi bħal nida fuq il-ħaxix.
13 Tifel stupidu jinkwieta lil missieru,U mara miżżewġa li hi ġellieda* qisha saqaf li l-ħin kollu jqattar.
14 In-nies jirtu d-dar u l-ġid mingħand missierhom,Imma li wieħed ikollu mara għaqlija hu rigal mingħand Ġeħova.
15 Xi ħadd għażżien jorqod ħafna,U min hu* bla ħeġġa se jbati l-ġuħ.
16 Min jobdi l-kmandamenti jibqaʼ ħaj;*Min ma jimpurtahx mill-konsegwenzi taʼ dak li għamel se jmut.
17 Min iħenn għall-batut qed jislef lil Ġeħova,U Hu se jħallsu lura* għal dak li għamel.
18 Iddixxiplina lit-tifel tiegħek waqt li għad hemm iċ-ċans,U tkunx responsabbli għall-mewt* tiegħu.
19 Min jirrabja malajr se jbati l-konsegwenzi;Hu għalxejn li tipprova tgħinu għax se jerġaʼ jagħmel hekk għal darba wara l-oħra.
20 Ismaʼ mill-pariri u aċċetta d-dixxiplina,U b’hekk issir għaref.
21 Bniedem jistaʼ jagħmel ħafna pjanijiet,Imma hu l-iskop* taʼ Ġeħova li se jirnexxi.
22 Bniedem jiġbdek meta juri mħabba u lealtà* lejn ħaddieħor;Hu aħjar li tkun fqir milli giddieb.
23 Min jirrispetta ħafna lil* Ġeħova se jibqaʼ jgħix;Hu se jorqod tajjeb u mhux se jkollu inkwiet.
24 L-għażżien idaħħal idu fl-iskutella tal-ikel,Imma ma jindenjax ruħu jressaqha maʼ ħalqu.
25 Sawwat lil min iwaqqaʼ għaċ-ċajt, ħalli dak li hu bla esperjenza jsir għaqli,U kkoreġi lil min kapaċi jifhem, ħalli jkollu iktar għarfien.
26 It-tifel li jittratta ħażin lil missieru u jkeċċi lil ommuJġib mistħija u diżunur.
27 Ibni, jekk ma tobdix mid-dixxiplina,Ma tibqax fit-triq it-tajba.
28 Xhud li ma jiswa għal xejn iwaqqaʼ għaċ-ċajt il-ġustizzja,U wieħed mill-agħar jieħu pjaċir jagħmel dak li hu ħażin daqskemm jieħu gost jiekol.
29 Dawk li jwaqqgħu għaċ-ċajt se jiġu ġġudikati,U l-istupidi se jiġu kkastigati.
Noti taʼ taħt
^ Letteralment “iħaffef saqajh.”
^ Jew “nobbli.”
^ Jew “lil ruħu.”
^ Jew “jaħżen.”
^ Jew “jinjora offiża.”
^ Jew “li l-ħin kollu teqred.”
^ Jew “ir-ruħ.”
^ Jew “jipproteġi lil ruħu.”
^ Jew “jippremjah.”
^ Jew “tixtieqx il-mewt.”
^ Jew “il-pariri.”
^ Jew “imħabba leali.” Ara Termini tal-Bibbja Spjegati.
^ Letteralment “jibżaʼ minn.”
