Salm 74:1-23
Maskil.* Għanja t’Asaf.
74 Alla tagħna, għala warrabtna għal dejjem?
Għala tirrabja ħafna kontra l-merħla li int kont tirgħa u tieħu ħsieb?
2 Ftakar fil-poplu* li int għażilt minn żmien twil ilu,It-tribù li int fdejt* bħala l-wirt tiegħek.
Ftakar fil-Muntanja Sijon fejn int kont tgħix.
3 Mur fil-post li ġie ħerba għalkollox.
L-għadu qered kulma kien hemm fil-post qaddis.
4 L-għedewwa tiegħek għajtu bil-ferħ fis-santwarju tiegħek.*
Hemmhekk, huma poġġew is-sinjali tar-rebħa tagħhom stess.
5 Huma qishom irġiel li jużaw il-mannara biex iqaċċtu s-siġar tal-foresta.
6 Kissru t-tiżjin kollu bil-mannara u b’għodda tal-ħadid.
7 Huma taw in-nar is-santwarju tiegħek.
Niġġsu u kissru t-tabernaklu li jonora lil ismek.
8 Huma u dawk li jiġu minnhom qalu f’qalbhom:
“Aħna se naħarqu l-postijiet kollha tal-pajjiż fejn iqimu lil Alla.”
9 M’għadx hemm sinjali għalina li nistgħu naraw;M’għadx fadal profeta,U ħadd fostna ma jaf kemm se ddum din is-sitwazzjoni.
10 Alla tagħna, kemm se jdumu jgħajruk l-għedewwa?
Se jibqgħu ma jurux rispett lejn ismek għal dejjem?
11 Għala qed iżżomm lura idek il-leminija?
Ħu azzjoni għax l-għadu dalwaqt jeqridna.
12 Int ir-Re tiegħi minn żmien twil ilu,L-Alla li jsalva b’mod tal-għaġeb fuq l-art kollha.
13 Int ikkontrollajt il-baħar bis-saħħa tiegħek;Farrakt l-irjus tal-monstri tal-baħar.
14 Int farrakt ras* il-Levjatan;*Tajtu lin-nies li joqogħdu fid-deżert biex jikluh.
15 Int għamilt fetħiet fl-art għan-nixxigħat tal-ilma u l-widien;Nixxift ix-xmajjar li kienu dejjem bl-ilma.
16 Kemm il-ġurnata u kemm il-lejl huma tiegħek.
Int għamilt id-dawl* u x-xemx.
17 Int għamilt limiti għall-art;Għamilt is-sajf u x-xitwa.
18 Ġeħova, ftakar fit-tgħajjir tal-għadu,Kif il-boloh jittrattaw lil ismek bla rispett.
19 Aħna bħal gamiema, tħalliniex f’idejn l-għedewwa tagħna li huma bħal annimali slavaġ.
Tinsiex għal dejjem il-poplu maħqur tiegħek.
20 Ftakar fil-patt li għamilt magħna,Għax il-postijiet mudlama tal-art huma mimlijin b’nies li lesti jattakkaw.
21 Jalla l-maħqur ma jitlaqx iddiżappuntat.
Jalla l-batut u l-fqir ifaħħru lil ismek.
22 Aġixxi Alla tagħna u agħmel ġustizzja.
Ftakar kif il-boloh qed jgħajruk il-ġurnata kollha.
23 Tinsiex dak li qed jgħidu l-għedewwa tiegħek.
L-għajjat taʼ dawk li jisfidawk dejjem qed jiżdied.
Noti taʼ taħt
^ Letteralment “fil-ġemgħa.”
^ Jew “fil-post tal-laqgħa tiegħek.”
^ Letteralment “l-irjus.”
^ Jew “id-dawwala.”
