META Ġesù kien fuq l-​art, hu imita kif jagħmel l-​affarijiet Ġeħova u l-​kwalitajiet tiegħu. Hu qal: “Ma nagħmel xejn minn rajja; imma dan ngħidu skond kif għallimni l-​Missier. . . . Dejjem nagħmel dak li jogħġob lilu.” (Ġwanni 8:28, 29; Kolossin 1:15) Allura meta naraw kif Ġesù tratta lin-​nisa, se nitgħallmu x’jaħseb Ġeħova fuq in-​nisa u kif jixtieq li jiġu trattati.

Ġesù kien jittratta lin-​nisa differenti ħafna minn kif kienu jittrattawhom oħrajn dak iż-​żmien. Kif? U jistaʼ dak li għallem jagħti iktar libertà lin-​nisa tal-​lum?

Għal Ġesù n-​nisa ma kinux għas-​sess biss. Xi mexxejja reliġjużi Lhud kienu jaħsbu li jekk raġel jitkellem maʼ mara, se jiġuh ħsibijiet ħżiena. Huma kienu jgħidu li n-​nisa ma jistgħux jitkellmu mal-​irġiel meta joħorġu barra u li dejjem għandhom jgħattu rashom. Imma Ġesù qal lill-​irġiel biex jikkontrollaw lilhom infushom u jirrispettaw lin-​nisa minflok ma jkellmuhomx.—Mattew 5:28.

Ġesù qal: “Kulmin jiddivorzja lil martu u jiżżewweġ oħra jagħmel adulterju kontriha.” (Marku 10:11, 12) Dan kien kontra dak li kienu jgħallmu l-​mexxejja reliġjużi li kienu jħallu lill-​irġiel jiddivorzjaw lin-​nisa “għal kwalunkwe raġuni.” (Mattew 19:3, 9) Għal-​Lhud kienet stramba li raġel jagħmel adulterju kontra l-​mara. Dan għax il-​mexxejja tagħhom għallmu li n-​nisa biss setgħu jagħmlu dan. Meta Ġesù qal li anki l-​irġiel iridu jkunu leali lejn in-​nisa tagħhom, hu kien qed jittratta lin-​nisa bir-​rispett.

Dak li għallem Ġesù għadu jgħodd: Fil-​kongregazzjoni Kristjana tax-​Xhieda taʼ Ġeħova, in-​nisa jitkellmu mal-​irġiel meta jiltaqgħu għal-​laqgħat. In-​nisa ma jħossuhomx skomdi, għax l-​irġiel Kristjani joqogħdu attenti biex jittrattaw ‘lin-​nisa xjuħ bħala ommijiet, lin-​nisa żgħażagħ bħala aħwa bis-​safa kollu.’—1 Timotju 5:2.

Ġesù ħa l-​ħin biex jgħallem lin-​nisa. Il-​mexxejja reliġjużi ma kinux jgħallmu lin-​nisa. Imma Ġesù għallimhom u inkuraġġiehom biex jitkellmu. Meta Ġesù ħalla lil Marija tisimgħu jgħallem, hu wera li l-​mara m’għandhiex tkun fil-​kċina biss. (Luqa 10:38-​42) Oħt Marija, Marta, ukoll tgħallmet minn Ġesù. Dan urietu bil-​mod kif wieġbet lil Ġesù wara li miet Lazzru.—Ġwanni 11:21-​27.

Ġesù kien jinteressah minn x’jaħsbu n-​nisa. Fi żmien Ġesù, ħafna nisa Lhud kienu jemmnu li l-​iżjed ħaġa importanti f’ħajjithom kienet li jkollhom tifel li jistgħu jkunu kburin bih, forsi xi profeta. Meta mara għajtet: “Hieni l-​ġuf li ġarrek!” Ġesù ħa l-​opportunità biex jgħallimha xi ħaġa aħjar. (Luqa 11:27, 28) Ġesù wera li mara m’għandux għalfejn ikollha tifel biex tkun ferħana. L-​iżjed ħaġa li se tagħmilha ferħana hi l-​ħbiberija tagħha maʼ Ġeħova.—Ġwanni 8:32.

Dak li għallem Ġesù għadu jgħodd: Waqt il-​laqgħat Kristjani, l-​aħwa nisa jistgħu jikkummentaw. L-​anzjani jirrispettaw in-​nisa għax huma “għalliema taʼ dak li hu tajjeb.” Dan jagħmluh billi jgħallmu l-​verità lit-​tfal tagħhom u l-​istudenti tal-​Bibbja, u huma eżempju tajjeb fil-​kongregazzjoni. (Titu 2:3) L-​anzjani jafu li hemm ħafna nisa jippritkaw l-​aħbar tajba tas-​Saltna.—Salm 68:11; ara l-​kaxxa “ L-​Appostlu Pawlu Ma Ħalliex lin-​Nisa Jitkellmu?”

Ġesù kien jimpurtah min-​nisa. Fi żmien il-​Bibbja, il-​bniet ma kinux importanti daqs is-​subien. Fil-​fatt it-​Talmud jgħid: “Ferħan hu min għandu tfal subien, u miskin min għandu tfal bniet.” Għal xi ġenituri kienet problema li jkollhom tifla. Dan għax kellhom isibulha raġel u jtuha rigal tat-​tieġ. U meta jikbru ma setgħux jistennew li se tieħu ħsiebhom.

Ġesù wera li tifla kienet importanti daqs tifel. Dan għamlu meta qajjem mill-​mewt lit-​tifla taʼ Ġajru u anki lit-​tifel tal-​armla f’Najn. (Marku 5:35, 41, 42; Luqa 7:11-​15) Meta fejjaq lil mara “li kienet ilha marida għal tmintax-​il sena,” Ġesù rrefera għaliha bħala “bint Abraham.” Il-​Lhud rari kienu jużaw din l-​espressjoni għal mara. (Luqa 13:10-​16) Billi uża dan il-​kliem li juri rispett u qalb tajba, Ġesù wera li hi kienet importanti daqs ħaddieħor u ra li kellha fidi kbira.—Luqa 19:9; Galatin 3:7.

Dak li għallem Ġesù għadu jgħodd: Fl-​Asja jgħidu: “Li trabbi tifla qisu qed issaqqi l-​ġnien taʼ xi ħadd ieħor.” Dan ifisser li għalxejn trabbi tifla għax imur tajjeb ħaddieħor minflokok. Missirijiet Kristjani li jħobbu t-​tfal tagħhom m’għandhomx jirraġunaw hekk. Minflok, huma jieħdu ħsieb it-​tfal kollha tagħhom, subien u bniet. Il-​ġenituri jagħmlu ċert li t-​tfal kollha tagħhom ikollhom edukazzjoni tajba u jkunu b’saħħithom.

Ġesù kien jafdahom lin-​nisa. Meta mara kienet tkun xhud f’qorti, għal-​Lhud dak li tgħid kien jiswa daqs taʼ skjav. Studjuż tal-​istorja tal-​ewwel seklu jismu Ġużeppi Flavju qal li n-​nisa m’għandekx tafdahom għax huma nisa.

Għall-​kuntrarju, wara li qam mill-​mewt, Ġesù għażel li l-​ewwel nies li jarawh ikunu nisa. (Mattew 28:1, 8-​10) Avolja dawn in-​nisa leali kienu raw lil Ġesù jmut u jindifen, l-​appostli sabuha diffiċli biex jemmnuhom. (Mattew 27:55, 56, 61; Luqa 24:10, 11) Imma meta Ġesù deher l-​ewwel in-​nisa, wera li huma importanti daqs id-​dixxipli l-​oħra.—Atti 1:8, 14.

Dak li għallem Ġesù għadu jgħodd: Fil-​kongregazzjonijiet tax-​Xhieda taʼ Ġeħova, l-​anzjani juru li jirrispettaw in-​nisa billi jagħtu kashom meta jkellmuhom. Dan jgħin l-​anzjani jiddeċiedu b’mod tajjeb u juru li jimpurtahom minnhom. Fil-​fatt, raġel Kristjan ‘jonora’ lill-​mara tiegħu billi jagħti kasha meta tkellmu.—1 Pietru 3:7; Ġenesi 21:12.

Meta l-​irġiel jimitaw lil Ġesù, dawn jirrispettaw u jagħtu l-​libertà lin-​nisa bħalma xtaq Alla. (Ġenesi 1:27, 28) L-​irġiel Kristjani ma jaħsbux li n-​nisa huma inqas importanti. Minflok, huma jagħmlu lin-​nisa tagħhom ferħanin billi jobdu l-​prinċipji tal-​Bibbja.—Efesin 5:28, 29.

Meta Yelena bdiet tistudja l-​Bibbja, hi kienet tbati għax ir-​raġel tagħha kien qed jittrattaha ħażin ħafna. Hu kien trabba f’post vjolenti fejn kien popolari li jisirqu lin-​nisa biex jiżżewġuhom u jabbużawhom. Yelena tgħid: “Dak li tgħallimt mill-​Bibbja vera għenni. Jien fhimt li hemm xi ħadd li jħobbni ħafna u jimpurtah minni. Fhimt ukoll li jekk ir-​raġel jibda jistudja l-​Bibbja, se jittrattani differenti ħafna.” Dak li xtaqet ġara, għax ir-​raġel tagħha beda jistudja l-​Bibbja u sar wieħed mix-​Xhieda taʼ Ġeħova. Yelena tgħid: “Hu tgħallem jikkontrolla lilu nnifsu u sar persuna taʼ min jimitah. Aħna tgħallimna kif naħfru lil xulxin.” Fi ftit kliem hi tgħid: “Il-​Bibbja vera għenitni biex inħossni importanti u protetta fiż-​żwieġ tiegħi.”—Kolossin 3:13, 18, 19.

Dan ma ġarax lil Yelena biss. Miljuni taʼ nisa Kristjani huma ferħanin li mal-​irġiel tagħhom qed jaħdmu biex japplikaw il-​prinċipji tal-​Bibbja fiż-​żwieġ tagħhom. Huma jħossuhom irrispettati u komdi mal-​aħwa tal-​kongregazzjoni.—Ġwanni 13:34, 35.

Irġiel u nisa Kristjani jafu li huma imperfetti u jiżbaljaw. Dan għax huma parti mill-​ħolqien t’Alla li ma baqax perfett. Imma huma xorta jistgħu jkunu ħbieb sew maʼ Missierhom kollu mħabba, Ġeħova. Huma għandhom it-​tama li ‘jinħelsu’ mill-​imperfezzjoni u jkollhom il-​ħajja taʼ dejjem. Kemm hi xi ħaġa sabiħa li Alla se jieħu ħsieb lil dawn l-​irġiel u n-​nisa!—Rumani 8:20, 21.