IL-​ĦALLIEQ tagħna jridna nkunu ferħanin, ingawdu paċi ġewwinija, u nżidu mal-​ferħ t’oħrajn. Għalhekk, hu jitlobna biex ‘inkunu ġusti u nħobbu l-​qalb tajba.’ (Mikea 6:8) Kif nistgħu nagħmlu dan? Irridu nikkultivaw il-​kwalitajiet li se jżommuna milli nkunu inġusti. Ikkunsidra kif il-​Bibbja tistaʼ tgħinna nagħmlu dan.

NEGĦLBU R-​REGĦBA. L-​iktar arma b’saħħitha kontra r-​regħba hi l-​imħabba—mhux sempliċi emozzjoni jew attrazzjoni romantika—imma mħabba mhix egoistika lejn ħaddieħor. Imħabba bħal din hi “qalbha tajba,” u “ma tfittixx l-​interessi tagħha,” jgħid l-​1 Korintin 13:4, 5. Iktar minn hekk, din l-​imħabba ma tintweriex biss maʼ tal-​familja jew mal-​ħbieb. Ġesù staqsa: “Jekk tħobbu lil min iħobbkom, xi premju għandkom?” Wara żied li anke dawk li ma jafux lil Alla jħobbu lil dawk li jħobbuhom.​—Mattew 5:46.

NEGĦLBU L-​PREĠUDIZZJU. Atti 10:34, 35 jgħid: “Alla mhux parzjali, imma f’kull ġens min jibżaʼ minnu u jagħmel is-​sewwa hu aċċettat minnu.” Alla ma jagħtix is-​salvazzjoni fuq il-​bażi tar-​razza, l-​istat soċjali, jew is-​sess. F’għajnejh “la hemm Lhudi u lanqas Grieg, la lsir u lanqas ħieles, la raġel u lanqas mara.” (Galatin 3:28) Meta nimitaw lil Alla, negħlbu l-​preġudizzju. Ikkunsidra l-​eżempju taʼ Dorothy, li kienet tgħix fl-​Istati Uniti.

Dorothy tant kienet tinkedd minħabba l-​preġudizzju razzjali li xtaqet tieħu sehem f’rivoluzzjoni bl-​armi ħalli ttaffi t-​tbatija u l-​moħqrija tan-​nies suwed. Madankollu, matul dak iż-​żmien attendiet laqgħa Kristjana tax-​Xhieda taʼ Ġeħova u tassew baqgħet impressjonata bil-​merħba mill-​qalb li ngħatat kemm mis-​suwed kif ukoll mill-​bojod. Ma damitx ma rrealizzat li Alla biss jistaʼ jbiddel lin-​nies minn ġewwa. Meta esperjenzat l-​imħabba ġenwina tax-​Xhieda bojod—nies li skont hi ‘kienet toqtolhom mingħajr ma taħsibha darbtejn biex tgħin fl-​isforzi taʼ rivoluzzjoni’—qalbha “ntmesset” sal-​punt li nfaqgħet tibki.

 NEGĦLBU L-​ATTITUDNIJIET ANTISOĊJALI. Qabel ma saru Kristjani, xi wħud mis-​segwaċi bikrin taʼ Ġesù kienu sakranazzi, imbroljuni, xalaturi, u żeblieħa. Però, bl-​għajnuna t’Alla minflok dawn il-​kwalitajiet negattivi rawmu kwalitajiet bħall-​imħabba, il-​qalb tajba, u t-​tjubija. (1 Korintin 5:11; 6:9-​11; Galatin 5:22) Bl-​istess mod illum, miljuni taʼ nies għamlu bidliet bnien f’ħajjithom billi daru lejn Alla. Eżempju taʼ dan hu Firuddin, li jgħix fl-​Azerbajġan.

Firuddin trabba f’orfanatrofju, fejn spiss iġġieled maʼ subien oħrajn. Meta kiber, sar għalliem tal-​kumbattiment bl-​idejn. Hu jgħid: “Kont maledukat, aħdar, u vjolenti. Jekk matul l-​ikel marti, Zahra, kienet tinsa xi ħaġa—anke toothpick—kont insawwatha. U jekk xi ħadd kien iħares lejha aħna u mexjin flimkien, kont insawwat lilu!”

Darba minnhom, qalb Firuddin intmesset meta tgħallem li Ġesù talab lil Alla biex jaħfer lis-​suldati li kienu sammruh maʼ zokk. (Luqa 23:34) Hu ħaseb, ‘L-​Iben t’Alla biss setaʼ jaġixxi hekk.’ Wara dan, xtaq li jkollu relazzjoni m’Alla. Meta x-​Xhieda taʼ Ġeħova offrew li jgħinuh, minnufih aċċetta studju tal-​Bibbja bla ħlas. Ma damx ma beda jtejjeb il-​personalità tiegħu. Tabilħaqq, tant sar qalbu tajba maʼ Zahra li hi wkoll bdiet tistudja l-​Bibbja. Illum il-​ġurnata, it-​tnejn li huma jinsabu magħqudin paċifikament fil-​qima vera.

M’għandniex xi ngħidu, bidliet personali li għandna mnejn nagħmlu mhumiex se jbiddlu d-​dinja kollha! Imma xi ngħidu jekk Alla jkollu l-​iskop li jġib dinja ġdida tassew ġusta? Wara kollox, żgur li għandu l-​qawwa biex jagħmel dan! U kkunsidra dan: Fit-​2 Timotju 3:1-​4, ikkwotat fil-​bidu tal-​artiklu taʼ qabel dan, rajna li l-​Bibbja bassret bl-​eżatt kif kienu se jkunu n-​nies inġenerali fi żmienna. Din il-​profezija twettqet sal-​iċken dettall—kif għamlu bosta profeziji Bibliċi oħrajn. Għalhekk, qed inkunu raġunevoli meta nieħdu bis-​serjetà l-​wegħda t’Alla li jtemm l-​inġustizzja kollha. Tabilħaqq, Alla se jwettaq dan l-​iskop. Kif?

[Kaxxa/Stampa f’paġna 7]

HEIDE TFITTEX IL-​ĠUSTIZZJA

“Kont imnikkta u rrabjata minħabba r-​razziżmu, il-​gwerer, il-​faqar, u l-​inġustizzji oħrajn, u kont qed infittex soluzzjoni,” tiftakar Heide, li tgħix fl-​Istati Uniti. “Ipprovajt naħdem mal-​moviment tad-​drittijiet ċivili u eventwalment ngħaqadt maʼ partit politiku, imma dawn donnhom ma setgħu jġibu ebda bidla sinifikanti.

“Ħassejt li kien hemm bżonn taʼ bidla iktar radikali, u l-​moviment tal-​hippies deher li kien se jkollu suċċess. Iżda, dan ukoll kien taʼ diżappunt. Rajt li ħafna hippies kienu iktar interessati fis-​sess, fid-​drogi, u fir-​rock and roll milli f’li jġibu bidliet fis-​sistema. Dan ġegħelni naqaʼ f’dipressjoni qawwija. Imbagħad iltqajt maʼ waħda mix-​Xhieda taʼ Ġeħova. Hi wrietni mill-​Bibbja l-​bidliet li Alla se jġib. Pereżempju, urietni skritturi bħal dik taʼ Rivelazzjoni 21:3, 4, li tgħid li Alla se jimsaħ id-​dmugħ minn wiċċ kulħadd u se jġib fi tmiem in-​niket, l-​għajjat, u l-​uġigħ—li spiss jiġu sforz l-​inġustizzja. Għedt bejni u bejn ruħi, ‘Possibbli li dawn il-​wegħdi verament se jseħħu?’

“Sirt konvinta li dawn il-​wegħdi kienu minnhom meta qrajt dak li tgħid l-​Iskrittura dwar il-​qawwa u l-​imħabba t’Alla u meta esperjenzajt l-​imħabba fost ix-​Xhieda taʼ Ġeħova. Issa għandi sebaʼ mitt sena biex il-​wegħdi t’Alla jitwettqu.”

[Stampa f’paġna 6]

Il-​preġudizzju jiġi megħlub meta nimitaw l-​imħabba t’Alla

[Stampa f’paġna 6]

Firuddin maʼ martu, Zahra