It-tagħlim tal-Bibbja—Għerf li jibqaʼ jgħodd
IMMAĠINA DAN: Int qed iddur mużew mimli monumenti antiki. Ħafna minnhom huma mittiekla u qed jitmermru. Xi wħud għandhom biċċiet kbar neqsin. Imma ħaġa tal-iskantament hemm wieħed li baqaʼ tali kwali; id-disinn elaborat tiegħu jidher ċar f’kull dettall. “Hu dan iktar ġdid mill-oħrajn?” tistaqsi int lill-gwida tiegħek. “Le,” hu jwieġeb, “hu wieħed mill-iktar qodma u qatt ma ġie restawrat.” “Kien qiegħed għall-kenn?” tistaqsi int. “Le,” jgħid il-gwida tiegħek, “anzi fejn kien kien jaqbel ir-riħ u qalaʼ ħafna xita. U ħafna vandali pprovaw jagħmlulu l-ħsara.” Forsi bejnek u bejn ruħek taħseb, ‘Min jaf minn xiex inhu magħmul?’
Sa ċertu punt, il-Bibbja hi bħal dak il-monument tal-għaġeb. Hija ktieb antik ħafna—saħansitra iktar minn ħafna kotba oħra. Naturalment, hemm kotba antiki oħrajn. Imma bħal monumenti antiki li qed jitmermru, ħafna kitbiet antiki ġarrbu ħsara konsiderevoli hekk kif għadda ż-żmien. Infatti, dak li jgħidu fuq ix-xjenza ħafna drabi ġie provat li mhuwiex minnu hekk kif kien hemm iktar għarfien. Il-pariri li jagħtu dwar is-saħħa spiss jagħmlu iktar ħsara milli ġid. U ħafna kitbiet antiki huma sempliċement biċċiet taʼ dak li darba kienu; partijiet minnhom intilfu jew ġarrbu ħsara kbira.
Imma l-Bibbja tispikka bħala li hi differenti minn kotba oħrajn. Minkejja li bdiet tinkiteb iktar minn 3,500 sena ilu, baqgħet l-istess. U għalkemm ġiet attakkata għal darba wara l-oħra matul is-sekli—maħruqa, projbita, u disprezzata—dak li tgħid il-Bibbja baqaʼ eżatt kif kien. Il-Bibbja mhux talli tagħti prova li għadha tgħodd meta mqabbla maʼ għarfien modern, imma dak li hemm miktub fiha juri kemm kienet avvanzata.—Ara l-kaxxa “Antikwata jew avvanzata għal żmienha?”
VALURI LI GĦANDNA BŻONN ILLUM
Imma għandek mnejn taħseb, ‘Huwa t-tagħlim tal-Bibbja verament prattiku għal żmienna?’ Biex twieġeb, saqsi lilek innifsek: ‘X’inhuma l-agħar problemi li l-bniedem qed jiffaċċja llum? Liema huma l-iktar tal-biżaʼ?’ Forsi taħseb fil-gwerer, fit-tinġis, fil-kriminalità, jew fil-korruzzjoni. Issa kkunsidra xi tagħlim bażiku tal-Bibbja. Hekk kif tagħmel dan, saqsi lilek innifsek, ‘Kieku n-nies jgħixu fi qbil maʼ dawn il-valuri, ma tkunx id-dinja post aħjar?’
IMĦABBA GĦALL-PAĊI
“Henjin dawk li jġibu l-paċi, għax għad jissejħu ‘wlied Alla.’” (Mattew 5:9) “Jekk inhu possibbli, sakemm jiddependi minnkom, żommu l-paċi mal-bnedmin kollha.”—Rumani 12:18.
ĦNIENA, MAĦFRA
“Henjin dawk li jħennu, għax għad jintwerew ħniena.” (Mattew 5:7) “Komplu ssaportu lil xulxin u aħfru lil xulxin mill-qalb jekk xi ħadd għandu għalxiex jilmenta kontra ħaddieħor. Bħalma Ġeħova * ħafrilkom mill-qalb, agħmlu hekk intom ukoll.”—Kolossin 3:13.
ARMONIJA BEJN IR-RAZEZ
Alla “minn raġel wieħed għamel il-ġnus kollha tal-bnedmin, biex jgħammru fuq il-wiċċ kollu taʼ l-art.” (Atti 17:26) “Alla mhux parzjali, imma f’kull ġens min jibżaʼ minnu u jagħmel is-sewwa hu aċċettat minnu.”—Atti 10:34, 35.
RISPETT GĦALL-ART
“Alla Ġeħova ħa lir-raġel u qiegħdu fil-ġnien taʼ l-Għeden biex jikkultivah u jieħu ħsiebu.” (Ġenesi 2:15) Alla se ‘jeqred lil dawk li qed jeqirdu l-art.’—Rivelazzjoni 11:18.
MIBEGĦDA GĦAX-XEWQAT ĦŻIENA U L-IMMORALITÀ
“Għassu kontra kull xenqa b’għira, għax anki meta wieħed ikollu bl-abbundanza, ħajtu ma tiddependix minn dak li għandu.” (Luqa 12:15) “Lanqas biss għandhom jissemmew fostkom iż-żína [jew, l-immoralità sesswali] u n-nuqqas taʼ ndafa taʼ kull xorta jew ir-regħba, bħalma jixraq lill-qaddisin.”—Efesin 5:3.
ONESTÀ, XOGĦOL IEBES
“Nixtiequ nġibu ruħna bl-onestà f’kollox.” (Ebrej 13:18) “Min kien jisraq ħa ma jisraqx iktar, imma minflok ħa jaħdem iebes.”—Efesin 4:28.
L-IMPORTANZA TAʼ LI TGĦIN LIL DAWK FIL-BŻONN
“Ikkonslaw lid-dipressi, wieżnu lid-dgħajfin, uru sabar fit-tul lejn kulħadd.” (1 Tessalonikin 5:14) ‘Ħu ħsieb l-iltiema u r-romol fit-tribulazzjoni tagħhom.’—Ġakbu 1:27.
Il-Bibbja ma ssemmix biss dawn il-valuri. Imma b’mod prattiku, tgħallimna ngħożżu prinċipji bħal dawn u napplikawhom fil-ħajja tagħna taʼ kuljum. Kieku iktar nies japplikaw it-tagħlim li ssemma, kieku jkun hawn ħafna inqas problemi fid-dinja llum. Għalhekk, fir-realtà, il-prinċipji tal-Bibbja huma iktar prattiki u f’waqthom minn qatt qabel! Imma kif tistaʼ tibbenefika mit-tagħlim tal-Bibbja issa stess?
KIF TISTAʼ TIBBENEFIKA MIT-TAGĦLIM TAL-BIBBJA ISSA
L-iktar raġel għaref darba qal: “L-għerf jintwera li hu sewwa minn għemilu.” (Mattew 11:19) Ma taqbilx maʼ dan? L-għerf juri li hu sewwa bir-riżultat li jinkiseb meta jiġi applikat. Allura għandu mnejn tirraġuna: ‘Jekk il-Bibbja hi verament prattika, m’għandux dan jidher f’ħajti jekk napplikaha? Kif inhi utli issa meta nħabbat wiċċi mal-problemi?’ Ikkunsidra eżempju.
Għal Delphine, * il-ħajja kienet mimlija u sodisfaċenti. Però, f’daqqa waħda hi għaddiet minn serje taʼ traġedji. It-tifla tagħha, li kellha 18-il sena, mietet. Iż-żwieġ tagħha sfaxxa fix-xejn. U esperjenzat diffikultajiet finanzjarji. Hi tiftakar: “Ma kontx għadni naf min jien—bla bint, bla raġel, u bla dar. Ħassejtni vojta minn ġewwa—mingħajr identità, mingħajr saħħa, u mingħajr skop għall-futur.”
Delphine qatt qabel ma rat kemm kien minnu dan il-kliem: “B’kollox jiemna huma sebgħin sena; u jekk minħabba xi setgħa speċjali jkunu tmenin, xorta jinsistu li jġibu l-inkwiet u l-uġigħ; u dawn jgħaddu malajr, u aħna ntiru magħhom.”—Salm 90:10.
Delphine sabet l-għajnuna fil-Bibbja matul dan iż-żmien diffiċli. Dak li għamlet għaliha ħalla impatt 1 Tessalonikin 2:13.
pożittiv fuqha. Bħalma se juru t-tliet artikli li ġejjin, ħafna oħrajn sabu li l-Bibbja għenithom meta użaw il-gwida tagħha biex jegħlbu l-problemi tagħhom. Huma jħossu li l-Bibbja hi bħal dak il-monument li ssemma fil-bidu. Hi differenti ħafna mill-ħafna kotba li jgħaddi ż-żmien minn fuqhom u ma jibqgħux validi. Imma l-Bibbja hi differenti għax hi magħmula minn xi ħaġa oħra? Jistaʼ jkun li fiha l-ħsibijiet t’Alla u mhux sempliċement tal-bniedem?—Forsi anki int taħseb li l-ħajja hi qasira u mimlija problemi. Meta tħoss li ma tistax issib tarf tal-problemi, lejn xiex iddur għall-faraġ, l-appoġġ, u l-pariri taʼ min joqgħod fuqhom?
Ejja nikkunsidraw tliet modi importanti li fihom il-Bibbja tistaʼ turi li hi prattika fil-ħajja. Tistaʼ tgħallmek kif
-
tevita l-problemi meta jkun possibbli.
-
issolvi d-diffikultajiet li jqumu.
-
tkampa b’suċċess maʼ sitwazzjonijiet li ma tistax tbiddel.
L-artikli li ġejjin se jiddiskutu dawn it-tliet affarijiet.
^ par. 10 Ġeħova hu l-isem t’Alla kif jidher fil-Bibbja.—Salm 83:18.
^ par. 24 F’dan l-artiklu u fit-tlieta taʼ warajh, xi ismijiet ġew mibdulin.