Vjaġġ Twil Premjat

FIR-​REPUBBLIKA Demokratika tal-​Kongo jasal rapport dwar żewġ aħwa nisa mid-​demm li ddeċidew li jagħmlu vjaġġ twil f’żona mifnija bil-​gwerra. Dan għamluh sabiex jattendu l-​Konvenzjoni Distrettwali “Agħtu Glorja lil Alla” fil-​belt taʼ Lisala. Minbarra t-​tagħlim spiritwali u s-​sħubija Kristjana li kienu qed jistennew li jgawdu fil-​konvenzjoni, huma kienu qed iħarsu ’l quddiem biex jiltaqgħu mar-​rappreżentanti mill-​uffiċċju tal-​fergħa tax-​Xhieda taʼ Ġeħova ġo Kinxasa. Minħabba l-​gwerra ċivili li kien hemm fil-​pajjiż, kienu ilhom snin sħaħ ma jaraw lil xi ħadd mill-​fergħa, u għalhekk riedu jieħdu din l-​opportunità biex jagħmlu dan.

Permezz taʼ dgħajsa qisha kenura, iż-​żewġ aħwa nisa telqu mill-​belt tagħhom Basankusu u vvjaġġaw lejn Lisala. Dan kien vjaġġ taʼ madwar 300 kilometru li fih kellhom jgħaddu minn foresta u jaqsmu żewġ xmajjar. Huma damu jivvjaġġaw għal tliet ġimgħat sħaħ. Ladarba t-​tnejn li huma jaqdu fil-​ministeru full-time, waħda ilha taqdi 3 snin u l-​oħra 19-il sena, huma ħadu l-​opportunità sabiex jaqsmu l-​aħbar tajba tas-​Saltna maʼ oħrajn fil-​vjaġġ tagħhom. Huma qattgħu 110 sigħat jippridkaw lil dawk li kien jiltaqgħu magħhom fit-​triq, u qassmu 200 fuljett u 30 rivista.

Huma u jaqsmu x-​xmajjar kellhom jgħaddu minn bejn annimali li huma komuni għal dawk l-​inħawi, bħall-​ippopotami u l-​kukkudrilli. Ma setgħux jaqsmu x-​xmara bil-​lejl​—perikli bħal dawn ma tistax tevitahom fid-​dlam! Huma kellhom jgħaddu wkoll minn postijiet fejn il-​militar kien jiċċekkja lil min jgħaddi.

Għalkemm dan kien vjaġġ twil u taʼ strapazz, l-​aħwa kienu kuntenti li għamlu dan l-​isforz. It-​tnejn kienu grati u ferħanin li attendew il-​konvenzjoni f’Lisala. Qlubhom faru biż-​żelu għall-​verità, u tassew ħassewhom inkuraġġiti meta ssieħbu mas-​7,000 ħu u oħt li attendew. Wara l-​konvenzjoni, reġgħu ffaċċjaw l-​istess sfidi hekk kif ivvjaġġaw lura d-​dar, fejn sabu lill-​familji tagħhom qawwijin u sħaħ.