L-Iskribi tal-Qedem u l-Kelma t’Alla
L-Iskribi tal-Qedem u l-Kelma t’Alla
L-ISKRITTURA Ebrajka tlestiet lejn l-aħħar tal-ħames seklu Q.E.K. Matul is-sekli li ġew wara, studjużi Lhud, speċjalment is-Soferim u iktar tard il-Masoreti, kienu joqogħdu attenti ħafna li jippreservaw l-eżattezza tat-test Ebrajk. Madankollu, l-eqdem kotba tal-Bibbja jmorru lura għal żmien Mosè u Ġożwè, elf sena qabel iż-żmien tas-Soferim. Il-materjal li fuqu nkitbu dawn il-kotba kien jitmermer; għalhekk l-iskrolli bilfors li ġew ikkopjati diversi drabi. X’nafu aħna dwar ix-xogħol taʼ l-iskribi f’dak il-perijodu bikri? Kien hemm uħud li jikkopjaw bis-sengħa f’Iżrael tal-qedem?
L-eqdem manuskritti tal-Bibbja disponibbli llum huma biċċiet mill-Iskrolli tal-Baħar il-Mejjet, li wħud minnhom ġew ikkopjati lura fit-tielet u fit-tieni seklu Q.E.K. Il-Professur Alan R. Millard, studjuż taʼ lingwi mil-Lvant Qarib u taʼ l-arkeoloġija, jispjega: “Kopji iktar bikrin taʼ kwalunkwe parti mill-Bibbja m’humiex disponibbli.” Hu jżid: “Kulturi li huma simili jistgħu juru kif skribi tal-qedem kienu jaħdmu, u għarfien bħal dan jistaʼ jgħin biex nikkalkulaw il-valur u s-sinifikat tat-test Ebrajk u l-istorja tiegħu.”
Il-Bidu tax-Xogħol taʼ l-Iskribi
Erbat elef sena ilu kienu qed jinkitbu kitbiet storiċi, reliġjużi, legali, akkademiċi, u letterarji fil-Mesopotamja. L-iskejjel taʼ l-iskribi ffjorixxew, u waħda mill-kapaċitajiet li kienu jiġu mgħallmin kienet li jżommu qrib kemm jistaʼ jkun mat-test meta jikkopjawh. Studjużi llum isibu biss bidliet żgħar ħafna fid-dokumenti Babiloniżi li ġew ikkopjati darba wara l-oħra għal elf sena jew iktar.
Ix-xogħol taʼ skriba ma kienx isir biss fil-Mesopotamja. The Oxford Encyclopedia of Archaeology in the Near East tgħid: “Skriba Babiloniż li kien jgħix f’nofs it-tieni millennju QEK x’aktarx li kien iħossu familjari mal-metodi użati fi kwalunkwe wieħed miċ-ċentri għall-iskribi fil-Mesopotamja, is-Sirja, Kangħan, u anki l-Eġittu.” a
Ix-xogħol taʼ skriba kellu stat speċjali fl-Eġittu fi żmien Mosè. L-iskribi kienu kontinwament jikkopjaw xogħlijiet taʼ letteratura. Din l-attività tidher fit-tiżjin taʼ l-oqbra Eġizzjani li għandhom iktar minn erbat elef sena. L-enċiklopedija li diġà kkwotajna minnha tgħid hekk dwar l-iskribi tal-qedem f’dan il-perijodu bikri: “Sat-tieni millennju QEK, kienu
kkopjaw u ġabru ħafna xogħlijiet taʼ letteratura li spjegaw iċ-ċivilizzazzjonijiet kbar tal-Mesopotamja u l-Eġittu u stabbilew ġabra taʼ regoli għax-xogħol taʼ skriba.”Din il-“ġabra taʼ regoli” inkludiet l-użu taʼ kolofoni miżjudin mat-test prinċipali. Il-kolofoni kien ikun fihom l-ismijiet taʼ l-iskriba u taʼ sid it-tavla, id-data, is-sors taʼ l-oriġinal li minnu ġiet ikkopjata t-tavla, l-għadd taʼ linji, u affarijiet bħal dawn. Spiss l-iskriba kien iżid: “Skond l-oriġinal, ġie miktub u ċċekkjat.” Dawn id-dettalji juru li l-iskribi tal-qedem kienu konċernati dwar l-eżattezza.
Il-Professur Millard, li ġie kwotat qabel, jgħid: ‘Wieħed jistaʼ jara li l-iskribi kellhom metodu li fih xogħolhom kien jiġi ċċekkjat u koreġut, proċess li kellu metodi fissi biex jiġu evitati l-iżbalji. Uħud minn dawn, partikolarment l-għadd tal-linji jew il-kliem, kienu inklużi fost it-tradizzjonijiet tal-Masoreti fil-bidu tal-Medju Evu.’ Għalhekk, fi żmien Mosè u Ġożwè, diġà kien hemm drawwa favur il-ħarsien u l-eżattezza fil-kitba taʼ xogħlijiet li diġà kienu jeżistu fil-Lvant Nofsani.
L-Iżraelin ukoll kellhom skribi kwalifikati? X’juri dak li hemm fil-Bibbja?
L-Iskribi f’Iżrael tal-Qedem
Mosè trabba bħala membru tad-dar tal-Fargħun. (Eżodu 2:10; Atti 7:21, 22) Skond dawk li jistudjaw dwar l-Eġittu tal-qedem, l-edukazzjoni taʼ Mosè żgur li inkludiet is-sengħa tal-qari u l-kitba skond is-sistema tal-kitba Eġizzjana u minn taʼ l-inqas xi ftit mis-snajjaʼ taʼ l-iskribi. Fil-ktieb tiegħu Israel in Egypt, il-Professur James K. Hoffmeier jgħid: “Hemm evidenza li tappoġġa t-tradizzjoni biblika li tgħid li Mosè kellu l-abbiltà li jniżżel ġrajjiet bil-miktub, jiġbor informazzjoni dwar vjaġġi, u attivitajiet oħrajn li kienu jagħmlu l-iskribi.” b
Il-Bibbja tirreferi għal oħrajn f’Iżrael tal-qedem li kellhom is-sengħa taʼ skriba. Skond The Cambridge History of the Bible, Mosè “ħatar uffiċjali li kienu jafu jaqraw u jiktbu . . . Dewteronomju 1:15, li jgħid: “Għalhekk [jien, Mosè] ħadt il-prinċpijiet tat-tribujiet tagħkom . . . u qegħedthom kapijiet fuqkom, kapijiet taʼ l-eluf u kapijiet tal-mijiet, kapijiet tal-ħamsinijiet, u kapijiet taʼ l-għaxriet u uffiċjali oħra għat-tribujiet tagħkom.” Min kienu dawn l-uffiċjali?
biex iniżżlu deċiżjonijiet bil-miktub u biex iżommu rekord tan-nies bl-ordni.” Din il-konklużjoni hija bbażata fuqIl-kelma Ebrajka għal “uffiċjal” tidher diversi drabi fil-Bibbja b’referenza għal żmien Mosè u Ġożwè. Diversi studjużi jispjegaw li din il-kelma tfisser “segretarju li jżomm rekord,” “wieħed li ‘jikteb’ jew ‘jiddokumenta,’” u “uffiċjal li kien jassisti l-imħallef f’xogħol taʼ segretarju.” Il-fatt li din il-kelma Ebrajka tidher diversi drabi jindika li ammont kbir mhux ħażin taʼ dawn is-segretarji kien jeżisti f’Iżrael u dawn l-uħud kellhom diversi responsabbiltajiet fl-amministrazzjoni bikrija tal-ġens.
It-tielet eżempju jikkonċerna l-qassisin taʼ Iżrael. L-Encyclopaedia Judaica tgħid li l-“funzjonijiet reliġjużi u sekulari tagħhom għamluh neċessarju li jkunu jafu jaqraw u jiktbu.” Per eżempju, Mosè kkmanda lil ulied Levi: “Fi tmiem kull sebaʼ snin, . . . taqra din il-liġi quddiem Iżrael kollu.” Il-qassisin saru dawk l-uħud li ħadu ħsieb il-kopja uffiċjali tal-Liġi. Huma awtorizzaw u ħarsu l-kitba taʼ kopji oħrajn.—Dewteronomju 17:18, 19; 31:10, 11.
Ikkunsidra kif saret l-ewwel kopja tal-Liġi. Matul l-aħħar xahar taʼ ħajtu, Mosè qal lill-Iżraelin: “Meta taqsmu x-xmara tal-Ġordan għall-art li se jagħtik il-Mulej, Alla tiegħek, inti twaqqaf ġebel kbir, u tkaħħlu bil-ġir, u tikteb fuqu l-kliem taʼ din il-liġi.” (Dewteronomju 27:1-4) Wara l-qerda taʼ Ġeriko u Għaj, l-Iżraelin inġabru ħdejn il-Muntanja Għebal, f’nofs l-Art Imwiegħda. Hemmhekk Ġożwè tabilħaqq kiteb kopja “tal-liġi taʼ Mosè” fuq il-ġebel t’artal. (Ġożwè 8:30-32) Dawn l-iskrizzjonijiet setgħu jeżistu biss għax kien hemm min kien jaf jaqra u jikteb. Dan jindika li l-Iżraelin tal-bidu kellhom il-kapaċità u s-sengħa li jippreservaw it-testi sagri tagħhom b’eżattezza.
L-Eżattezza taʼ l-Iskrittura
Wara żmien Mosè u Ġożwè, inkitbu diversi skrolli oħrajn bl-Ebrajk, u saru kopji tagħhom miktubin bl-idejn. Hekk kif dawn il-kopji ddeterjoraw jew ġarrbu l-ħsara minħabba l-effetti taʼ l-umdità jew il-moffa, imbagħad kellhom isiru kopji ġodda. Dan il-proċess taʼ kkopjar dam għaddej għal sekli sħaħ.
Minkejja l-attenzjoni kbira taʼ dawk li kkopjaw il-Bibbja, xi żbalji ma setgħux jiġu evitati milli jidħlu fit-test. Imma l-iżbalji taʼ dawn l-uħud bidlu b’mod sinifikanti t-test tal-Bibbja? Le. Meta tqis kollox, dawn l-iżbalji huma insinifikanti u ma jeffettwawx l-eżattezza tal-Bibbja b’mod ġenerali, kif ġie provat minn eżaminar taʼ manuskritti tal-qedem.
Għall-Kristjani, il-ħarsa taʼ Ġesù Kristu lejn il-kotba Bibliċi tal-bidu tikkonferma l-eżattezza tal-kitba fl-Iskrittura Mqaddsa. Espressjonijiet bħal “Ma qrajtux fil-ktieb taʼ Mosè?” u “Mhux Mosè takom il-Liġi?” juru li Ġesù kkunsidra l-kopji miktubin bl-idejn li kienu disponibbli meta hu kien fuq l-art bħala li kienu taʼ min joqgħod fuqhom. (Marku 12:26; Ġwanni 7:19) Iktar minn hekk, Ġesù kkonferma l-integrità taʼ l-Iskrittura Ebrajka kollha kemm hi meta qal: “Kulma hemm miktub dwari fil-liġi taʼ Mosè u fil-Profeti u fis-Salmi jrid jitwettaq.”—Luqa 24:44.
Għalhekk, għandna raġuni tajba għala nistgħu nkunu fiduċjużi li l-Iskrittura Mqaddsa ġiet mgħoddija b’eżattezza minn żmien il-qedem. Huwa eżatt kif qal il-profeta Isaija ispirat minn Alla: “Il-ħaxix jinxef, u l-ward jidbiel, iżda l-kelma tal-Mulej tibqaʼ għal dejjem.”—Isaija 40:8.
[Noti taʼ taħt]
a Ġożwè, li kien jgħix f’nofs it-tieni millennju Q.E.K., isemmi belt Kangħanija msejħa Kirjat-sefer, li tfisser “Belt tal-Ktieb” jew “Belt taʼ l-Iskriba.”—Ġożwè 15:15, 16.
b Hemm referenzi għall-fatt li Mosè niżżel bil-miktub affarijiet legali f’Eżodu 24:4, 7; 34:27, 28; u f’Dewteronomju 31:24-26. F’Dewteronomju 31:22 naqraw li niżżel għanja bil-miktub, u f’Numri 33:2 hemm referenza għad-dokument li għamel dwar ir-rotta li ħadu fix-xagħri.
[Stampa f’paġna 18]
Skriba Eġizzjan fuq xogħlu
[Stampa f’paġna 19]
L-eqdem kotba tal-Bibbja jmorru lura sa żmien Mosè