1, 2. (a) X’jistaʼ jiġri meta naħsbu u nitkellmu dwar xi ħadd li nħobbu? (Ara l-istampa tal-bidu.) (b) Liema mistoqsijiet se nikkunsidraw?

META naħsbu u nitkellmu dwar xi ħadd li nħobbu, il-ħbiberija li jkollna maʼ dik il-persuna tissaħħaħ. L-istess hu minnu rigward il-ħbiberija li għandna m’Alla Ġeħova. Bħala ragħaj, David qattaʼ ħafna ljieli jħares lejn l-istilel u jimmedita fuq kemm il-Ħallieq tagħhom hu meraviljuż. Hu kiteb: “Meta nara s-smewwiet tiegħek, għemil subgħajk, il-qamar u l-kwiekeb li int ħejjejt, x’inhu l-bniedem mortali biex iżżommu f’moħħok, u bin il-bniedem biex tieħu ħsiebu?” (Salm 8:3, 4) U wara li kkunsidra kif l-iskop taʼ Ġeħova rigward Iżrael spiritwali kien qed jitwettaq b’mod tal-għaġeb, l-appostlu Pawlu qal: “O kemm huma profondi r-rikkezzi u l-għerf u l-għarfien t’Alla!”—Rum. 11:17-26, 33.

² Hekk kif nieħdu sehem fil-ministeru, aħna naħsbu u nitkellmu dwar Ġeħova. Dan minnu nnifsu għandu effetti pożittivi. Ħafna pijunieri ħassew li l-imħabba tagħhom għal Alla kibret saħansitra iktar minħabba li jistgħu jqattgħu iktar ħin fil-ministeru. Dan l-artiklu se jgħin kemm lill-pijunieri u kemm lil dawk li jridu jsiru pijunieri sabiex jaħsbu sew fuq dawn il-mistoqsijiet: Il-ministeru full-time kif jistaʼ jsaħħaħ ir-relazzjoni li għandek maʼ Ġeħova? Jekk int pijunier, saqsi lilek innifsek, ‘X’se jgħinni nkompli f’dan is-servizz speċjali?’ Jekk għadek ma bdejtx tagħmel ix-xogħol taʼ pijunier, saqsi, ‘X’aġġustamenti nistaʼ nagħmel biex nibda dan ix-xogħol?’ Ejja nikkunsidraw modi kif is-servizz full-time jistaʼ jsaħħaħ ir-relazzjoni tagħna m’Alla.

3. Fil-ministeru, kif niġu effettwati meta nitkellmu dwar il-barkiet futuri tas-Saltna?

³ Aħna nersqu eqreb lejn Ġeħova meta niddiskutu l-barkiet futuri tas-Saltna m’oħrajn. Liema skrittura tħobb tuża meta tmur minn dar għal dar? Forsi l-favorita tiegħek hi Salm 37:10, 11; Danjel 2:44; Ġwanni 5:28, 29; jew Rivelazzjoni 21:3, 4. Kull darba li nitkellmu dwar dawn il-wegħdi m’oħrajn, aħna niġu mfakkrin li “kull għotja tajba u kull rigal perfett” jiġi mingħand l-Alla ġeneruż tagħna, Ġeħova. Dan iressaqna eqreb lejh.—Ġak. 1:17.

4. Għala nsiru saħansitra iktar grati għat-tjubija t’Alla meta nippritkaw lil oħrajn?

⁴ Meta naraw kemm il-maġġorparti tan-nies huma mdejqin u bla għajnuna, insiru saħansitra iktar grati għall-verità. In-nies fid-dinja m’għandhom l-ebda gwida taʼ min joqgħod fuqha biex tgħinhom jiksbu suċċess veru u kuntentizza. Ħafna minnhom jinkwetaw dwar il-futur u m’għandhomx tama. Huma jfittxu għat-tifsir tal-ħajja. Anki l-biċċa l-kbira taʼ dawk li huma reliġjużi għandhom ftit li xejn għarfien tal-Iskrittura. Huma jixbhu ħafna lin-nies taʼ Ninwe tal-qedem. (Aqra Ġona 4:11.) Meta nżidu fil-ministeru, naraw iktar il-kuntrast li hemm bejn il-kundizzjoni spiritwali taʼ dawk li nippritkawlhom u dik tal-poplu taʼ Ġeħova. (Is. 65:13) Imma Ġeħova mhux biss jieħu ħsieb il-bżonnijiet tan-nies tiegħu. Hu jagħti lil kulħadd ċans biex jitfarraġ u biex ikollu tama vera. Dan ifakkarna kemm Ġeħova tassew hu tajjeb.—Riv. 22:17.

5. Li ngħinu lil oħrajn spiritwalment kif iġegħelna nħossuna dwar il-problemi tagħna stess?

⁵ Meta ngħallmu lil oħrajn il-verità, nitgħallmu ma ninkwetawx iżżejjed dwar il-problemi tagħna stess. Trisha, pijuniera regulari, tgħid li kienet imnikkta ferm meta l-ġenituri tagħha ddivorzjaw. Darba minnhom kienet imdejqa ħafna u ma kellhiex aptit toħroġ fil-ministeru. Imma xorta waħda marret tikkonduċi studju tal-Bibbja. L-istudju kien maʼ tlett itfal li kienu qed jikbru ġo familja b’ħafna problemi. Missierhom kien abbandunahom, u ħuhom il-kbir kien abbużahom. Trisha tgħid: “Kwalunkwe problema jew uġigħ taʼ qalb li kont qed niffaċċja ma kien xejn meta mqabbel maʼ tagħhom. Matul l-istudju, għajnejhom kienu jixegħlu u t-tfal kienu jidħqu b’eċċitament u ferħ. Dawn kienu għotja mingħand Ġeħova, speċjalment f’dik il-ġurnata.”

6, 7. (a) Il-fidi tagħna kif tissaħħaħ meta ngħallmu veritajiet mill-Bibbja? (b) Hekk kif nosservaw studenti tal-Bibbja jkollhom ħajja aħjar billi japplikaw prinċipji Skritturali, x’jiġri mill-apprezzament tagħna għall-għerf t’Alla?

⁶ Meta ngħallmu l-veritajiet tal-Bibbja lil oħrajn, il-fidi tagħna fihom tissaħħaħ. L-appostlu Pawlu kiteb dwar xi Lhud taʼ żmienu li naqsu milli jipprattikaw dak li għallmu: “Int, . . . li tgħallem lil ħaddieħor, ma tgħallimx lilek innifsek?” (Rum. 2:21) Il-pijunieri normalment għandhom bosta opportunitajiet biex jgħallmu l-verità lil oħrajn u jikkonduċu studji tal-Bibbja. Biex jagħmlu dan b’mod effettiv hemm bżonn li jippreparaw għal kull studju u forsi jagħmlu riċerka biex iwieġbu l-mistoqsijiet. Pijuniera jisimha Janeen tispjega li kull darba li tgħallem il-verità lil oħrajn, il-fidi tagħha stess f’dawn il-veritajiet tissaħħaħ.”

⁷ Meta naraw li l-prinċipji Bibliċi jgħinu l-istudenti tagħna jkollhom ħajja aħjar, aħna napprezzaw saħansitra iktar l-għerf t’Alla. (Is. 48:17, 18) Dan iġegħelna nkunu rridu nkomplu napplikaw dawn il-prinċipji f’ħajjitna stess. Adrianna, pijuniera oħra, tgħid: “Il-ħajja tan-nies tistaʼ tkun diżastru meta jistrieħu fuq fehmithom  stess.” Imma meta jibdew jistrieħu fuq l-għerf t’Alla, il-benefiċċji jibdew minnufih. B’mod simili, pijunier jismu Phil jgħid li jiskanta meta jara kif in-nies jistgħu jbiddlu ħajjithom bl-għajnuna taʼ Ġeħova.”

8. Kif niġu megħjuna meta naħdmu maʼ ħutna fil-ministeru?

⁸ Aħna niġu inkuraġġiti meta naħdmu maʼ ħutna fil-ministeru. (Prov. 13:20) Il-maġġorparti tal-pijunieri jqattgħu ħafna ħin fil-ministeru maʼ ħuthom. Dan jagħti iktar lok biex “ninkuraġġixxu lil xulxin.” (Rum. 1:12; aqra Proverbji 27:17.) Pijuniera jisimha Lisa tosserva: “Fejn naħdem spiss ikun hemm spirtu taʼ kompetizzjoni u għira. Kuljum ikollok tismaʼ tqasqis u kliem baxx. Moħħhom biex ikunu minn taʼ quddiem akkost taʼ kollox. Kultant tkun irridikolat jew imwaqqaʼ għaċ-ċajt minħabba l-kondotta Kristjana tiegħek. Però, meta naħdem fil-ministeru maʼ sħabi l-Kristjani nħossni ninbena tassew. Fl-aħħar tal-ġurnata, inkun kemm inkun għajjiena, nasal id-dar inkuraġġita.”

9. Ix-xogħol taʼ pijunier mas-sieħeb jew is-sieħba tagħna fiż-żwieġ x’jistaʼ jagħmel għall-ħabel bi tlieta taż-żwieġ?

⁹ Il-ħabel bi tlieta taż-żwieġ jissaħħaħ meta nagħmlu x-xogħol taʼ pijunier mas-sieħeb jew is-sieħba tagħna fiż-żwieġ. (Ekk. 4:12) Madeline, li taqdi bħala pijuniera maʼ żewġha, tispjega: “Jien u żewġi nistgħu noqogħdu nitkellmu dwar il-ġurnata tagħna fil-ministeru jew dwar xi ħaġa mill-qari tagħna tal-Bibbja li tistaʼ tiġi applikata fil-ministeru tagħna. Kull sena li nagħmlu x-xogħol taʼ pijunier flimkien, aħna nersqu eqreb lejn xulxin.” B’mod simili, Trisha tgħid li hi u żewġha qablu li ma jixtrux affarijiet li ma jaffordjawx.  B’hekk ma jiġġildux fuq il-flus. Barra minn hekk, jagħmlu ż-żjajjar lura u jikkonduċu l-istudji tal-Bibbja tagħhom flimkien. Dan għen biex iż-żwieġ tagħhom jissaħħaħ saħansitra iktar.”

10. Il-fiduċja tagħna f’Ġeħova kif tiġi effettwata meta npoġġu s-Saltna l-ewwel u nesperjenzaw l-appoġġ t’Alla?

¹⁰ Il-fiduċja tagħna f’Ġeħova tiżdied hekk kif inpoġġu l-interessi tas-Saltna l-ewwel, nesperjenzaw l-appoġġ taʼ Ġeħova, u narawh iwiġbilna t-talb tagħna. Sa ċertu punt, dan jgħodd għall-Kristjani leali kollha. Imma dawk fis-servizz full-time jaraw li meta jistrieħu fuq Ġeħova, hu jkun jistaʼ jgħinhom jibqgħu pijunieri. (Aqra Mattew 6:30-34.) Curt, li hu pijunier u sostitut għall-indokratur tas-circuit, aċċetta li jżur kongregazzjoni li kienet sagħtejn u nofs ʼil bogħod mid-dar tiegħu. Hu u martu, li hi pijuniera wkoll, kellhom biżżejjed fjuwil biex jaslu sal-kongregazzjoni imma mhux biżżejjed biex imorru lura d-dar, u kien baqaʼ ġimgħa għall-paga. Curt jgħid, “Bdejt niddubita jekk kontx ħadt id-deċiżjoni t-tajba.” Wara li talbu, iddeċidew li jaċċettaw l-inkarigu, b’fiduċja li Ġeħova kien se jieħu ħsieb il-bżonnijiet tagħhom. Hekk kif kienu se jitilqu, oħt żarithom u qalet li kellha rigal għalihom. Kien eżatt l-ammont taʼ flus li kellhom bżonn biex jagħmlu l-vjaġġ kollu. Curt jgħid, “Meta jkollok esperjenza bħal din għal darba wara l-oħra, ikun faċli li tara id Ġeħova.”

11. X’inhuma xi barkiet li jesperjenzaw il-pijunieri?

¹¹ Il-pijunieri spiss jgħidu li iktar ma jersqu qrib lejn Alla u iktar ma jaħdmu fis-servizz tiegħu, iktar ikollhom barkiet. (Dt. 28:2) Madankollu, ix-xogħol taʼ pijunier għandu l-isfidi tiegħu. Ilkoll insofru minħabba l-imperfezzjoni u minħabba din id-dinja mill-agħar. Għalkemm xi pijunieri kellhom jieqfu mis-servizz tagħhom għal xi żmien, l-isfidi spiss jistgħu jiġu kkontrollati jew saħansitra evitati. X’jistaʼ jgħin lill-pijunieri jkomplu jieħdu pjaċir fis-servizz speċjali tagħhom?

12, 13. (a) Pijunier x’għandu jagħmel jekk qed isibha diffiċli biex ilaħħaq mas-sigħat? (b) Għala hu daqshekk importanti li twarrab il-ħin biex taqra l-Bibbja kuljum, tagħmel l-istudju personali, u timmedita?

¹² Il-biċċa l-kbira tal-pijunieri għandhom skeda mimlija daqs bajda. Jistaʼ jkun diffiċli biex ilaħħqu maʼ kollox, allura huwa importanti li jkun hemm organizzar tajjeb. (1 Kor. 14:33, 40) Jekk pijunier qed isibha diffiċli biex ilaħħaq mas-sigħat, għandu mnejn li jkollu bżonn jerġaʼ jeżamina kif qed juża ħinu. (Efes. 5:15, 16) Għandu mnejn isaqsi: ‘Qed inqattaʼ wisq ħin fir-rikreazzjoni? Għandi bżonn niddixxiplina iktar lili nnifsi? Nistaʼ naġġusta l-iskeda tax-xogħol tiegħi?’ Kwalunkwe Kristjan se jammetti kemm hu faċli li jżid affarijiet oħra mal-iskeda tiegħu; b’hekk, dawk li qegħdin fis-servizz full-time jeħtieġu jsaqsu lilhom infushom dawn il-mistoqsijiet regolarment u jagħmlu l-aġġustamenti jekk ikun hemm bżonn.

¹³ Il-qari tal-Bibbja taʼ kuljum, l-istudju personali, u l-meditazzjoni għandhom ikunu parti mill-iskeda taʼ pijunier. Għalhekk, pijunier għandu bżonn jiddixxiplina lilu nnifsu ħalli attivitajiet inqas importanti ma jiħdulux mill-ħin li warrab għall-affarijiet neċessarji. (Flp. 1:10) Pereżempju, immaġina pijunier li ġej lura wara ġurnata twila mill-ministeru. Hu biħsiebu li dik il-lejla jipprepara għal-laqgħa li jmiss. Imma l-ewwel, hu jara l-posta. Imbagħad jixgħel il-kompjuter u jaqra u jwieġeb l-e-mails. Waqt li jkun fuq l-Internet, imur f’Websajt biex jara jekk niżilx il-prezz taʼ oġġett li jrid jixtri. Ikunu diġà għaddew kważi sagħtejn qabel  ma jinduna li jkun għadu ma bediex jistudja dak li kellu f’moħħu għal dik il-lejla. Għala din hija problema? Atleti professjonali għandhom jieħdu ħsieb ġisimhom jekk iridu li jkollhom karriera twila. B’mod simili, il-pijunieri għandhom bżonn rutina tajba taʼ studju personali biex isostnu lilhom infushom spiritwalment jekk iridu jibqgħu fis-servizz full-time.—1 Tim. 4:16.

14, 15. (a) Il-pijunieri għala għandhom iżommu ħajjithom sempliċi? (b) X’għandu jagħmel pijunier jekk jiffaċċja diffikultajiet?

¹⁴ Pijunieri li jirnexxu jagħmlu l-aħjar tagħhom biex iżommu ħajjithom sempliċi. Ġesù inkuraġġixxa lid-dixxipli tiegħu biex ikollhom għajn sempliċi. (Mt. 6:22) Hu żamm ħajtu stess sempliċi ħalli jkun jistaʼ jwettaq il-ministeru tiegħu mingħajr tfixkil. Setaʼ jgħid: “Il-volpijiet għandhom l-għerien u l-għasafar tas-sema għandhom il-bejtiet, imma Bin il-bniedem m’għandu mkien fejn imidd rasu.” (Mt. 8:20) Pijunieri li jitgħallmu mill-eżempju taʼ Ġesù jiftakru li iktar ma jkollhom affarijiet iktar ikollhom x’jieħdu ħsieb, isewwu, jew ibiddlu.

¹⁵ Il-pijunieri jirrealizzaw li s-servizz tagħhom hu speċjali imma ma jaħsbux li huma aħjar minn oħrajn. Minflok, kwalunkwe għotja jew privileġġ taʼ servizz li għandu mnejn ikollna hu minħabba l-qalb tajba mhix mistħoqqa t’Alla. B’hekk, kull pijunier irid jistrieħ fuq Ġeħova biex ikompli jaqdi bħala pijunier. (Flp. 4:13) Sfidi u diffikultajiet se jitfaċċaw. (Salm 34:19) Meta jiġri hekk, il-pijunieri għandhom ifittxu għad-direzzjoni taʼ Ġeħova u jagħtuh l-opportunità biex jgħinhom, minflok ma jaqtgħu qalbhom malajr mill-privileġġ taʼ servizz tagħhom. (Aqra Salm 37:5.) Hekk kif jaraw kif Ġeħova jieħu ħsiebhom bl-imħabba kollha, il-ħbiberija tagħhom miegħu tissaħħaħ iktar.—Is. 41:10.

16. X’għandek tagħmel jekk tixtieq issir pijunier?

¹⁶ Jekk tixtieq tkun pijunier u jkollok l-istess barkiet li jkollhom huma, itlob lil Ġeħova. (1 Ġw. 5:14, 15) Tkellem maʼ dawk li bħalissa huma pijunieri. Agħmel miri li jgħinuk issir pijunier. Hekk għamlu Keith u Erika. Kienu qed jaħdmu full-time u, bħal ħafna koppji tal-età tagħhom, xtraw dar u karozza ġdida ftit wara ż-żwieġ. Huma jgħidu: “Aħna ħsibna li dawn l-affarijiet kienu se jagħtuna sodisfazzjon—imma dan qatt ma ġara.” Meta Keith tilef ix-xogħol, qeda bħala pijunier awżiljarju. Hu jiftakar: “Ix-xogħol taʼ pijunier fakkarni dwar kemm tikseb ferħ meta tkun fil-ministeru.” Huma għamlu ħbieb maʼ koppja li kienu pijunieri u li għenuhom jaraw il-ferħ li jiġi milli jgħixu ħajja sempliċi u milli jkunu pijunieri. Keith u Erika x’għamlu? “Għamilna lista tal-miri spiritwali, waħħalnieha mal-friġġ, u qtajna kull mira hekk kif ilħaqnieha.” Maż-żmien, setgħu jibdew jaqdu bħala pijunieri.

17. Għala jkun għaqli li taħseb sew dwar jekk tistax tkun pijunier?

¹⁷ Tistaʼ ssir pijunier? Jekk bħalissa tara li dan mhux possibbli, agħmel dak li tistaʼ biex tersaq eqreb lejn Ġeħova billi jkollok sehem sħiħ fil-ministeru. Wara li tqis dan kollu bit-talb, għandu mnejn issib li billi tagħmel xi tibdil f’ħajtek, dan se jippermettilek issir pijunier. Jekk tistaʼ tkun pijunier, il-ferħ li jkollok ikun ħafna akbar minn kwalunkwe sagrifiċċju li tagħmel. Se jkollok iktar sodisfazzjon li jiġi milli tpoġġi l-interessi tas-Saltna qabel tiegħek. (Mt. 6:33) Int se tesperjenza iżjed ferħ meta tagħti lil oħrajn. Iktar minn hekk, se jkollok iktar opportunitajiet biex taħseb u titkellem dwar Ġeħova, u dan se jsaħħaħ imħabbtek għalih u tagħmlu ferħan.