Id-​Dinja Tagħna Qatt Se Tinqered?

ĠIELI staqsejt, ‘X’se jiġrilha d-​dinja fil-​futur?’ Minħabba li jaraw x’qed jiġrilha l-​pjaneta mill-​isbaħ tagħna, ħafna nies jemmnu li jistaʼ jkun li l-​art tinqered.

Tabilħaqq, illum l-​art qed iġġarrab rovina minħabba li qed isir abbuż mir-​riżorsi prezzjużi, bħalma huma l-​ilma, il-​foresti, u l-​atmosfera bilanċjata u delikata. Ukoll, xi xjenzati jwissu li l-​art u l-​ħajja kollha li fiha jistgħu jiġu mheddin minn affarijiet bħal xi meteorita kbira, xi kewkba li tisplodi, jew minħabba li jispiċċa l-​fuel mill-​idroġenu tax-​xemx.

Ix-xjenzati jemmnu li bil-​mod il-​mod—forsi wara ħafna biljuni taʼ snin—l-​art se titlef l-​abbiltà li ssostni l-​ħajja umana. L-​Encyclopædia Britannica dan tiddeskrivih bħala “t-​tendenza lejn id-​diżordni li ma jistax jitwaqqaf.”

B’ferħ, il-​Bibbja tassigurana li Alla Ġeħova mhux se jippermetti li d-​dinja tagħna tinqered jew issir inabitabbli. Bħala l-​Ħallieq, il-​“qawwa taʼ setegħtu” hi bla limitu, u għalhekk hu jistaʼ jsostni l-​univers għal dejjem. (Isaija 40:26) B’hekk, tistaʼ tafda dan il-​kliem: “[Alla waqqaf] l-​art fuq is-​sisien tagħha, b’mod li qatt ma titħarrek.” “Faħħruh, intom xemx u qamar, faħħruh, kwiekeb kollha li tiddu! . . . Għax hu kkmanda, u huma nħolqu; hu waqqafhom għal dejjem taʼ dejjem.”—Salm 104:5; 148:3-6.

L-​Iskop t’Alla għall-​Art

Qatt ma kien l-​iskop t’Alla li l-​art tiġi abbużata u mniġġsa bħalma hi llum. Minflok, Alla ħalaq lill-​ewwel raġel u mara, Adam u Eva, u poġġiehom fi ġnien mill-​isbaħ. M’għandniex xi ngħidu, il-​Ġenna taʼ l-​art li kienet id-​dar tagħhom ma kinitx tibqaʼ sabiħa li kieku xi ħadd ma ħax ħsiebha. Alla inkarigahom ‘biex jaħdmuha u jħarsuha.’ (Ġenesi 2:8, 9, 15) X’xogħol pjaċevoli u sodisfaċenti  ta Alla lill-​ġenituri tagħna li darba kienu perfetti!

Imma l-​iskop t’Alla għall-​art kien jinkludi ħafna iktar milli jieħdu ħsieb dak il-​ġnien tal-​bidu. Hu ried li l-​art kollha tinbidel f’Ġenna taʼ l-​art. Dan hu għala Alla ta dan il-​kmand lil Adam u Eva: “Nisslu u oktru, u imlew l-​art, u aħkmuha; u saltnu fuq il-​ħut tal-​baħar u t-​tajr taʼ l-​ajru u l-​ħlejjaq kollha li jitkaxkru fuq l-​art.”—Ġenesi 1:28.

B’sogħba, anġlu kburi li sar magħruf bħala Satana oppona l-​iskop t’Alla. Hu xxennaq għall-​qima taʼ Adam u Eva. Waqt li kellimhom permezz taʼ serp, Satana ġegħelhom jirribellaw kontra l-​ħakma t’Alla. (Ġenesi 3:1-6; Rivelazzjoni 12:9) Min jaf kemm ħassu mweġġaʼ l-​Ħallieq tagħna minħabba n-​nuqqas t’apprezzament tagħhom b’egoiżmu! Imma ħaġa waħda li r-​ribelljoni tagħhom ma biddlitx kienet l-​iskop t’Alla Ġeħova għall-​art. Hu jgħid: “Kelmti . . . toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.”—Isaija 55:11.

Mhux taʼ b’xejn li Ġeħova ħalla r-​ribelljoni taʼ Satana għaddejja sa żmienna! Matul dan iż-​żmien, l-​umanità setgħet tesperimenta billi taħkem lilha nfisha b’diversi forom taʼ gvernijiet, u r-​riżultati wrew li l-​indipendenza minn Alla, kif inkuraġġita minn Satana, twassal għal falliment totali. *—Ġeremija 10:23.

Minkejja dan, matul il-​millennji li għaddew, Alla bierek lil ċerti bnedmin retti. Ukoll, fil-​Bibbja ppreserva bil-​miktub il-​konsegwenzi taʼ li wieħed jobdi lil Alla jew li jiċħad il-​ħakma Tiegħu. Iżjed minn hekk, Ġeħova għamel affarijiet meraviljużi li se nibbenefikaw minnhom fil-​futur. Bi mħabba hu pprovda Salvatur għall-​umanità billi bagħat lil Ibnu l-​maħbub, Ġesù Kristu, biex jgħallimna kif nistgħu ngħixu bl-​aqwa mod u biex jagħti ħajtu għalina. (Ġwanni 3:16) Peress li Ġesù ma kienx jistħoqqlu jmut, Alla uża l-​mewt tiegħu bħala bażi legali biex jixtri lura dak li tilfu Adam u Eva, jiġifieri, il-​prospett taʼ ħajja taʼ dejjem f’Ġenna taʼ l-​art mad-​dinja kollha. * Għal din ir-​raġuni, Alla Ġeħova stabbilixxa gvern fis-​sema biex jaħkem fuq il-​bnedmin kollha, u ħatar lil Ibnu, Ġesù Kristu rxoxtat, biex ikun Sultan taʼ din is-​Saltna. Dan l-​arranġament meraviljuż jiżgurana li l-​iskop t’Alla għall-​art se jitwettaq.—Mattew 6:9, 10.

B’hekk, jistaʼ jkollok fiduċja assoluta f’dawn il-​wegħdi mill-​isbaħ imniżżlin fil-​Bibbja: “Il-​ħżiena jitqaċċtu ’l barra; min jittama fil-​Mulej jikseb l-​art. Il-​ġusti jirtu l-​art, u jgħammru fiha għal dejjem.” “‘Ara! It-​tinda t’Alla hi mal-​bnedmin, u hu jgħammar magħhom, u huma jkunu l-​popli tiegħu. U Alla stess ikun magħhom. U jixxottalhom kull demgħa minn għajnejhom, u ma jkunx hemm iżjed mewt, u la niket u la għajat u lanqas uġigħ. L-​affarijiet taʼ qabel ikunu spiċċaw.’ U Dak li kien bil-​qiegħda fuq it-​tron qal: ‘Ara! Qed nagħmel kollox ġdid.’”—Salm 37:9, 29; Rivelazzjoni 21:3-5.

Il-​Bibbja Ma Tikkontradixxix Lilha Nfisha

Iżda, xi wħud jistgħu jistaqsu, ‘Kif nistgħu nqabblu l-​versi mill-​Bibbja li għadna kif ikkwotajna maʼ versi oħrajn li donnhom jitkellmu dwar li l-​art se tintemm?’ Ejja nikkunsidraw xi eżempji. Dan se jgħinna biex nuru li l-​Bibbja ma tikkontradixxix lilha nfisha.

Ferm qabel ma x-​xjenzati rrikonoxxew “it-​tendenza lejn id-​diżordni” fl-​affarijiet fiżiċi kollha, salmista tal-​Bibbja kiteb: “L-​art int [jiġifieri, Alla] waqqaftha sa mill-​bidu;  għemil idejk huma s-​smewwiet. Huma jgħaddu, imma int tibqaʼ; bħal libsa huma lkoll [“jitmermru,” NW], tbiddilhom bħal libsa u jintemmu. Imma int li int tibqaʼ; bla tmiem huma s-​snin tiegħek.”—Salm 102:26-28 (102:25-27, NW).

Meta niżżel dan il-​kliem bil-​miktub, is-​salmista ma kienx qed jikkontradixxi l-​iskop etern t’Alla għall-​art. Minflok, hu kien qed jagħmel kuntrast bejn l-​eżistenza eterna t’Alla u l-​fatt li kull ħaġa materjali li ħalaq Alla tistaʼ tgħib. Mingħajr il-​qawwa eterna t’Alla li tistaʼ ġġedded kollox, l-​univers—inkluż is-​sistema solari li niddependu minnha għall-​istabbilità, għad-​dawl, u għall-​enerġija—jispiċċa f’diżordni sħiħ u fl-​aħħar mill-​aħħar jinqered. B’hekk, mingħajr għajnuna, id-​dinja tagħna kieku ‘titmermer,’ jew tintemm għalkollox.

Hemm versi oħrajn fl-​Iskrittura li wkoll għall-​ewwel jistgħu jidhru li jikkontradixxu l-​iskop mistqarr t’Alla għall-​art. Per eżempju, il-​Bibbja titkellem dwar is-​sema u l-​art bħala li ‘jgħaddu.’ (Rivelazzjoni 21:1) Żgur li dan il-​kliem ma jikkontradixxix il-​wegħda taʼ Ġesù: “Henjin il-​ġwejdin, għax għad jirtu l-​art.” (Mattew 5:5) Imma allura xi trid tfisser il-​Bibbja meta tgħid li s-​sema u l-​art ‘jgħaddu’?

Il-Bibbja spiss tuża l-​espressjoni “art” f’sens figurattiv biex tirreferi għas-​soċjetà umana. Per eżempju, ikkunsidra l-​vers li ġej: “L-​art kollha kienet ilsien wieħed u kliem wieħed.” (Ġenesi 11:1) Ovvjament, l-​“art” hawnhekk tirreferi għan-​nies li kienu qed jgħixu fuq l-​art. Eżempju ieħor hu Salm 96:1 li skond il-​King James Version jgħid: “Għanni lill-​MULEJ, art kollha.” Jidher ċar li f’din is-​silta u f’ħafna oħrajn, il-​kelma “art” tintuża b’mod figurattiv biex tirreferi għan-​nies.—Salm 96:13.

Kultant il-​Bibbja xxebbah il-​qawwiet li jaħkmu fuq l-​art mas-​smewwiet jew maʼ l-​oġġetti ċelestjali. Per eżempju, il-​ħakkiema Babiloniżi kefrin kienu deskritti bħala ‘kwiekeb’ minħabba li għollew lilhom infushom fuq dawk taʼ madwarhom. (Isaija 14:12-14) Bħalma ġie mbassar, “is-​smewwiet” figurattivi taʼ Babilonja, jew il-​klassi taʼ ħakkiema, u l-​“art,” dawk li appoġġaw din il-​ħakma, intemmu fis-​sena 539 Q.E.K. (Isaija 51:6) Dan ippermetta lil-​Lhud li nidmu biex imorru lura lejn Ġerusalemm, fejn “smewwiet ġodda,” ġemgħa ġdida taʼ ħakkiema, ħakmu fuq “art ġdida,” soċjetà taʼ nies ġusti.—Isaija 65:17.

Dak li tgħid il-​Bibbja dwar li s-​sema u l-​art ‘jgħaddu’ milli jidher jirreferi għat-​tmiem tal-​gvernijiet umani u korrotti taʼ llum u dawk li jappoġġawhom u li m’għandhom ebda devozzjoni lejn Alla. (2 Pietru 3:7) Dan se jiftaħ it-​triq għall-​gvern il-​ġdid t’Alla li se jaħkem mis-​sema biex ibierek lis-​soċjetà umana ġdida u ġusta, għaliex “hemm smewwiet ġodda u art ġdida li aħna qed nistennew skond il-​wegħda [t’Alla], u f’dawn tgħammar il-​ġustizzja.”—2 Pietru 3:13.

Għal din ir-​raġuni, tistaʼ tpoġġi l-​fidi tiegħek fil-​wegħda t’Alla li d-​dinja, id-​dar tagħna, se tibqaʼ għal dejjem. Iktar minn hekk, il-​Bibbja turik x’għandek tagħmel biex tkun hemm f’dak iż-​żmien mill-​isbaħ meta l-​art se tiġi trasformata f’Ġenna taʼ l-​art globali. Ġesù qal: “Il-​ħajja taʼ dejjem tfisser dan: li jieħdu għarfien dwarek, l-​uniku Alla veru, u dwar Ġesù Kristu li int bgħatt.” (Ġwanni 17:3) Għala ma tagħmilhiex il-​mira tiegħek li teżamina dak li tgħallem il-​Bibbja dwar il-​futur taʼ l-​art u taʼ l-​umanità? Ix-​Xhieda taʼ Ġeħova fl-​inħawi tiegħek se jieħdu pjaċir jgħinuk f’dan ir-​rigward.

[Noti taʼ taħt]

[Kumment f’paġna 12]

Il-​Bibbja twiegħed li d-​dinja, id-​dar tagħna, se tibqaʼ għal dejjem

[Sorsi taʼ l-​Istampa f’paġna 10]

Globu fl-​isfond: NASA/The Visible Earth (http://visibleearth.nasa.gov/); ors polari: © Bryan and Cherry Alexander Photography