TIXTIEQ tkun taf sigriet?— a Għandi sigriet li nixtieq ngħidlek. Fil-​Bibbja jissejjaħ is-​“sigriet sagru li nżamm fis-​skiet għal żmien twil.” (Rumani 16:25) Għall-​ewwel Alla biss kien jafu s-​“sigriet sagru.” Ħalli naraw kif Alla għamel ċert li dan is-​sigriet isir magħruf maʼ ħafna nies.

L-​ewwel nett, taf xi tfisser il-​kelma “sagru”?— Tfisser qaddis, nadif, jew speċjali ħafna. Allura s-​sigriet jissejjaħ is-​sigriet sagru għax hu minn Alla, li hu qaddis. Min taħseb li ried ikun jaf dan is-​sigriet speċjali?— L-​anġli. Il-​Bibbja tgħid: “Dwar dawn l-​affarijiet jixtiequ jkunu jafu l-​anġli.” Iva, huma riedu jifhmu dan is-​sigriet qaddis.—1 Pietru 1:12.

Meta Ġesù ġie fuq l-​art tkellem dwar is-​sigriet sagru u beda jispjegah. Lid-​dixxipli tiegħu qalilhom: “Lilkom ngħata s-​sigriet sagru tas-​saltna t’Alla.” (Marku 4:11) Innotajt dwar xiex inhu s-​sigriet sagru?— Huwa dwar is-​Saltna t’Alla, li Ġesù għallimna nitolbu għaliha!—Mattew 6:9, 10.

Issa ħalli naraw kif is-​Saltna t’Alla kienet sigriet “għal żmien twil,” sakemm Ġesù ġie fuq l-​art u beda jispjegaha. Wara li Adam u Eva kisru l-​liġi t’Alla u tkeċċew ’il barra mill-​ġnien tal-​Għeden, il-​qaddejja t’Alla saru jafu li l-​iskop t’Alla xorta kien li jagħmel l-​art kollha ġenna. (Ġenesi 1:26-​28; 2:8, 9; Isaija 45:18) Il-​qaddejja t’Alla kitbu dwar il-​ferħ li n-​nies se jgawdu fuq l-​art taħt il-​ħakma tas-​Saltna t’Alla.—Salm 37:11, 29; Isaija 11:6-​9; 25:8; 33:24; 65:21-​24.

Issa aħseb ftit dwar il-​Ħakkiem tas-​Saltna t’Alla. Taf lil min għażel Alla biex ikun Ħakkiem?— Lil Ibnu Ġesù Kristu, il-​“Prinċep tal-​Paċi.” Il-​Bibbja tgħid: “Il-​ħakma taʼ prinċep se tkun fuq spalltu.” (Isaija 9:6, 7) Jeħtieġ li jien u int nieħdu ‘għarfien dwar is-​sigriet sagru t’Alla, jiġifieri, Kristu.’ (Kolossin 2:2) Hemm bżonn inkunu nafu li Alla ħa l-​ħajja tal-​ewwel anġlu (Iben spirtu) li Hu ħalaq u li ħajtu poġġieha fil-​ġuf taʼ Marija. Dan l-​Iben, li kien anġlu setgħan, sar il-​wieħed li Alla bagħat fuq l-​art bħala sagrifiċċju ħalli aħna jkollna l-​ħajja taʼ dejjem.—Mattew 20:28; Ġwanni 3:16; 17:3.

Iżda minbarra li Alla għażel lil Ġesù biex ikun il-​Ħakkiem tas-​Saltna Tiegħu, hemm iktar x’jeħtieġ inkunu nafu dwar dan is-​sigriet. Parti mis-​sigriet sagru hi li oħrajn, kemm irġiel u kemm nisa, se jkunu maʼ Ġesù rxoxtat  fis-​sema. Dawn se jaħkmu maʼ Ġesù fis-​sema!—Efesin 1:8-​12.

Ejja nitgħallmu l-​ismijiet taʼ xi wħud li se jaħkmu maʼ Ġesù fis-​sema. Ġesù qal lill-​appostli leali tiegħu li hu kien sejjer fis-​sema biex iħejji post għalihom. (Ġwanni 14:2, 3) Jekk taqra l-​iskritturi li jmiss se tara l-​ismijiet taʼ ftit mill-​irġiel u n-​nisa li se jaħkmu maʼ Ġesù fis-​Saltna taʼ Missieru.—Mattew 10:2-​4; Marku 15:39-​41; Ġwanni 19:25.

L-​għadd taʼ dawk li se jaħkmu fis-​sema maʼ Ġesù bħala parti mis-​Saltna tiegħu ma kienx magħruf għal żmien twil. Imma issa n-​numru nafuh. Int tafu?— Il-​Bibbja tgħid li hu 144,000. Anki dan huwa parti mis-​sigriet sagru.—Rivelazzjoni 14:1, 4.

Taqbel int li dan “is-​sigriet sagru tas-​saltna t’Alla” huwa l-​iktar sigriet meraviljuż li xi ħadd jistaʼ jkun jaf?— Jekk iva, ejja nipprovaw nitgħallmu dak kollu possibbli dwaru biex b’hekk nispjegaw dawn l-​affarijiet lil kemm jistaʼ jkun nies.

[Nota taʼ taħt]

MISTOQSIJIET:

▪ X’jissejjaħ dan is-​sigriet li tkellimna dwaru, u għala jissejjaħ hekk?

▪ X’inhu dan is-​sigriet, u min kien l-​ewwel wieħed li beda jgħallem lin-​nies dwaru?

▪ X’inhuma xi ftit mill-​affarijiet dwar dan is-​sigriet li tgħallimt?

▪ Kif tistaʼ tispjega s-​sigriet sagru lil xi ħabib jew ħabiba tiegħek?

[Stampa f’paġna 31]

X’taħseb li l-​anġli kienu qed jipprovaw isiru jafu?